Frönsk súkkulaðikaka

Birt þann af
38

Eldhússaga dagsins er frönsk súkkulaðikaka, saga sem verður aldrei of oft sögð! 🙂 Strangt til tekið eru klassískar franskar súkkulaðikökur ekki með kremi, en þessi fær undanþágu án nokkurra vandkvæða! Ljúffeng súkkulaðikakan leidd saman við gómsæt kremið, það er bara ekki hægt að standa í vegi fyrir slíkri sameiningu, enda les líklega engin frönsk kökulögga þetta blogg! Ég skreyti oftast þessa frönsku dásemd með jarðaberjum eða hindberjum. En verandi stödd á Vestfjörðunum þurfti ég að grípa til þess sem í boði var. Það var annars vegar kiwi og hins vegar nýtínd bláber frá bláberjalyngi við fjallsrætur Brella þó enn sé júlí. Einkenni franskra súkkulaðikaka eru að í þeim er lítið, jafnvel ekkert hveiti. Kakan er dökk, þétt og þung og á að vera eins og hún sé dálítið klesst. Þetta er einföld kaka sem flestum þykir góð, þetta er til dæmis uppáhaldskaka yngstu barnanna á heimilinu.

Uppskrift

Botn:

  • 2 dl sykur
  • 200 g smjör
  • 200 g suðusúkkulaði
  • 1 dl hveiti
  • 4 stk egg

Súkkulaðikrem:

  • 150 g suðusúkkulaði
  • 70 g smjör
  • 2-3 msk síróp

Aðferð-botn:

Þeytið eggin og sykurinn vel saman. Bræðið smjörið og súkkulaðið saman við vægan hita í potti. Blandið hveitinu saman við eggin og sykurinn. Bætið bráðnu súkkulaðinu og smjörinu að lokum varlega út í deigið. Bakið í vel smurðu tertuformi (ath. ekki lausbotna) við 170°C í 30 mínútur.

Aðferð – krem:

Látið allt saman í pott og bræðið saman við vægan hita. Kælið bráðina svolítið og berið hana síðan á kökuna þegar hún hefur kólnað.

Kakan á að vera blaut í miðjunni. Gott er að bera kökuna fram með rjóma eða ís og berjum, til dæmis jarðaberjum, hindberjum eða bláberjum.

Grillað lambalæri með kartöflugratíni

Birt þann af
6

Það er algengt að lambalæri séu vafin inn í álpappír og þau grilluð á þann hátt en þá kemur ekki alvöru grillbragð af kjötinu. Til þess að halda grilluðu lambalæri safaríku en jafnframt að fá gott grillbragð af því er til skotheld leið, grillun við óbeinan hita! Þá eru engir logar hafðir beint undir kjötinu og bara haft kveikt á brennurum í kringum lærið. Með lærinu bar ég fram að þessu sinni kartöflugratín. Flestir eru hrifnir af kartöflugratíni en ókosturinn við það er að það tekur afar langan tíma í ofninum og verður oft of dökkt að ofan en kartöflurnar samt ekki fulleldaðar. Ég er hins vegar með mjög góða og einfalda leið til að elda stórt form af kartöflugratíni á ca 35 mínútum en samt er öruggt að kartöflurnar verða mjúkar og fulleldaðar!

Læri – uppskrift f. 6

    • 1 lambalæri, 2.5 kg, vel hangið
    • 8 hvítlauksgeirar
    • 1 msk ólífuolía
    • Kryddblandan ,,Best á lambið“ eða önnur blanda af kryddum

Aðferð:

Ég keypti lærið í versluninni Til sjávar og sveita í Ögurhvarfi. Það var ókryddað og búið að hanga vel. Ég geymdi lærið svo í ísskáp í 4 daga og þar með var ég viss um að það væri orðið meyrt og gott. Mikilvægt er að taka lærið út nokkru áður en það er grillað þannig að það nái stofuhita.

Kveikið á grillinu og hitið það vel. Fitusnyrtið lærið, gerið djúpar raufar í það á nokkrum stöðum með hnífsoddi og stingið hvítlauksgeirum inn í það. Nuddið ólífuolíu vel á lærið (til að kryddblandan festist betur) og kryddið með ,,Best á lambið“ og núið vel á allt lærið. Slökkvið á öðrum brennaranum á gasgrilli. Setjið lærið á grillið þar sem ekki er eldur undir og lokið síðan, sá sem kveikt er á er stilltur frekar lágt, ofnlokið hjá mér sýndi 120 gráður, það getur þó verið misjafnt milli grilla. Ef það eru þrír brennarar á grillinu, setjið lærið í miðjuna, slökkvið undir þeim brennara og hafið brennarana sitt hvorum megin við í gangi. Grillið lærið í 1 klst og 50 mínútur miðað við læri sem er 2.5 kíló. Það er líka hægt að stinga kjöthitamæli í vöðvann þar sem hann er þykkastur, hann sýnir 60°C fyrir meðalsteikt, 70°C fyrir gegnsteikt. Snúið lærinu tvisvar eða þrisvar en opnið grillið annars sem allra minnst. Ef óskað er eftir dekkri skorpu má færa það yfir eldinn seinustu mínúturnar og fylgjast þá vel með því. Leyfið lærinu að standa undir álpappír í minnst 15 mínútur áður en það er skorið, gjarnan lengur. Kjötið varð einstaklega meyrt og safaríkt með þessari aðferð.

Kartöflugratín f. ca. 10-12

  • ca 1,3 kíló kartöflur
  • 4 dl rjómi
  • 4 dl mjólk
  • hálfur rauðlaukur, skorin í strimla
  • 3 hvítlauksrif, söxuð smátt
  • 2 grænmetisteningar
  • Töfrakrydd, salt og pipar
  • rifinn ostur

Aðferð:

Kartöflurnar skolaðar vel (ég hef þær oftast með hýðinu á) og svo skornar í skífur, sumir vilja hafa þær næfurþunnar, mér finnst best að hafa þær ca 1 cm á þykkt. Hvítlaukur og laukur skorinn niður. Mjólk og rjómi settur í stóran pott ásamt hvítlauk, lauk, grænmetisteningi og kryddi. Ég nota Töfrakrydd frá pottagöldrum, það er góð kryddjurtablanda með cheddar osti sem hentar vel en það er hægt að nota hvaða krydd sem hugurinn girnist. Sjóðið við vægan hita í 15-20 mínútur (fer svolítið eftir þykkt kartaflanna), eða þar til þær eru orðnar vel mjúkar. Hellið kartöflublöndunni í eldfast mót, dreifið rifnum osti yfir og hitið í ofni við 200 gráður í 20-25 mínútur eða þar til osturinn er bráðnaður og orðin gullinbrúnn.

Með þessu bar ég fram ofnbakað ferskt grænmeti. Það er: sætar kartöflur, gulrætur, kúrbít og brokkolí. Grænmetið skorið í bita (ég hef til dæmis sætu kartöflurnar smátt skornar þar sem þær eru lengi að bakast, en brokkolíið í stærri bitum þar sem það bakast fljótt) sett á ofnplötu, velt upp úr dálítilli ólífuolíu og kryddi, bakað í ofn í ca. hálftíma (fer eftir stærð grænmetisins). Veltið grænmetinu 2-3svar á meðan bökun stendur. Sósan sem ég notaði að þessu sinni var sveppasósa, uppskrift er að finna hér.

Belgískar vöfflur

Birt þann af
14

Ég hef lengi óskað mér belgísks vöfflujárns. Í byrjun sumars sá ég þannig vöfflujárn auglýst á netinu, lítið sem ekkert notað og falt fyrir fáeina ríkisdali! Ég sló auðvitað til og fjárfesti í því. Ég er búin að skoða mikið uppskriftir og fróðleik um belgískar vöfflur. Helsti munurinn er að þær eru með geri, ekki með lyftidufti eins og venjulegar vöfflur, að auki eru þær mun þykkari en með djúpum dældum. Í Belgíu eru þær seldar hjá götusölum með til dæmis súkkulaði, rjóma, berjum, sykri og öðru gúmmelaði. Ég fann uppskrift af belgískum vöfflum frá Nönnu Rögnvaldar. Eftir að hafa borið hana saman við ótal erlendar uppskriftir sá ég að hennar uppskrift var mjög sambærileg flestum uppskriftunum en með kannski meiri vökva en margar þeirra. Það kom ekki að sök, mér finnst þessi hlutföll koma vel út og held mig við hennar uppskrift.

Með vöfflunum er hægt að bjóða upp á allskonar fyllingar. Hér var ég með vanilluís og tvennskonar heitar sósur, karamellusósu og súkkulaðisósu. Gestirnir voru beðnir um að taka út sósurnar og meta hvor þeirra væri betri með belgísku vöfflunum. Útkoman varð sú að best væri að blanda þeim saman!

Uppskrift:

  • 1 msk þurrger
  • 700 ml mjólk (eða 350 ml mjólk, 350 ml súrmjólk)
  • 3 stór egg, aðskilin
  • 150 g smjör, bráðið og látið kólna dálítið
  • 6 msk sykur (má vera minna)
  • 1 tsk salt
  • 2 tsk vanillusykur
  • um 500 g hveiti
  • 3 eggjahvítur
  • olía til að pensla vöfflujárnið

Hitaðu 100 ml af mjólk í sem næst 40°C, leystu gerið upp í blöndunni (e.t.v. með 1 tsk af sykrinum) og láttu standa þar til freyðir, eða í um 10 mínútur. Hitaðu afganginn af vökvanum í um 40°C, helltu um einum bolla í stóra skál og hrærðu eggjarauðum, smjöri, sykri, salti og vanillusykri saman við, ásamt gerblöndunni. Hrærðu afganginum smátt og smátt saman við til skiptis við hveitið, þar til komin er fremur þykk vöfflusoppa (ekki nota allt hveitið ef hún virðist ætla að verða of þykk, bættu við hveiti ef hún er of þunn). Þeyttu eggjahvíturnar þar til þær eru farnar að stífna og blandaðu þeim þá saman við með sleikju. Láttu soppuna lyfta sér á hlýjum stað í um 1 klst (enn betra er þó að láta hana lyfta sér í ísskáp yfir nótt, en þá er best að sleppa því að hita meirihluta vökvans).

Hitaðu vöfflujárnið og penslaðu það með olíu. Bakaðu vöfflurnar þar til þær eru gullinbrúnar. Berðu þær fram strax eða haltu þeim heitum í volgum ofni. Einnig má frysta þær og hita svo í ofni.

(Það má líka nota eggin heil og sleppa því að þeyta hvíturnar en þær verða betri svona.)

Með vöfflunum bar ég fram vanilluís og heita súkkulaðisósu (suðusúkkulaði og smá rjómi hitað yfir vatnsbaði) og heita karamellusósu:

  • 100 g smjör
  • 100 g púðursykur
  • 1 tsk vanilludropar
  • 1 dl rjómi

Sjóðið saman í 5 mínútur og hrært stöðugt á meðan. Sósan er borin fram heit.

Það er líka gott að bera fram með vöfflunum jarðaber, hindber, þeyttan rjóma, ferska ávexti, hlynsíróp og blanda þessu saman eftir því sem hugurinn girnist, svo ekki sé nú minnst á Nutella, banana og þeyttan rjóma!

Uppfært: ég mæli með því að baka stóra uppskrift af þessum vöfflum til að eiga afgang daginn eftir. Það er nefnilega hrikalega gott að rista þær í brauðrist og smyrja með íslensku smjöri, namminamm!

Fiskisúpa að vestan

Birt þann af
22

 Image

Ég elda afar sjaldan súpur, líklega af því að ég er ekki mikil súpumanneskja sjálf. Samt finnst mér öðru hvoru gott að fá súpu ef þær eru góðar og helst matarmiklar. Þessi súpa er einmitt þannig, bragðmikil, matarmikil og ljúffeng! Það er auðvelt að útbúa hana og hún er sérstaklega sniðug þegar mörgum er boðið í mat. Ég bjó hana til fyrir 12 manns á aldrinum 3ja – 84 ára og allir borðuðu af bestu lyst. Með henni bar ég fram nýbakað naan brauð, uppskriftin er hér, en ég notaði ekki indverskt krydd ofan á brauðið í þetta sinn heldur penslaði brauðið með eggi áður en ég bakaði það.

Uppskrift (fyrir 6-8):

  • 500 g langa, skorin í bita
  • 500 g þorskur, skorin í bita
  • 300 g rækjur (má sleppa)
  • 4 hvítlauksrif, söxuð mjög smátt
  • 4 meðalstórar gulrætur, skornar í sneiðar
  • 1 stk. laukur, saxaður
  • 1 rauð paprika, skorin í bita
  • 1 gul eða appelsínugul paprika, skorin í bita
  • 2-3 msk tómatpúrra
  • 1 dós niðursoðnir hakkaðir tómatar (ekki verra að hafa þá með t.d. basilku eða chili)
  • 3 dl vatn
  • 1 teningur (eða 1 msk) fiskikraftur
  • ½ teningur (eða 1/2 msk) kjúklingakraftur
  • 1 -2 tsk tandoori masala
  • ½ -1 tsk karrí
  • salt og pipar
  • ca. 5-7 sólþurrkaðir tómatar, sneiddir smátt
  • 4 msk mango chutney
  • 1 dl sweet chilisauce
  • 1 líter matreiðslurjómi og/eða hefðbundinn rjómi (hægt að skipta út að hluta fyrir kókosmjólk)
  • steinselja til skreytingar

Aðferð: 

Image

Ein matskeið olíu hituð í potti og hvítlaukurinn steiktur í skamma stund. Áður en hann byrjar að brenna er hann tekinn upp úr og settur til hliðar. Tveimur matskeiðum af olíu bætt við í sama pott og gulrætur, laukur og paprika brúnuð. Því næst er tómatpúrru, niðursoðnu tómötum, vatni, fiskikrafti, kjúklingakrafti, tandoori masala, karríi ásamt hvítlauknum bætt út í. Strax á eftir eru sólþurrkuðu tómatarnir sneiddir niður og þeim ásamt mango chutney, sætu chilisósunni og rjómanum bætt út í. Smakkað til með salti, pipar og meira kryddi ef með þar, látið malla í um það bil fimmtán mínútur (því lengur því betra). Þá er þorsknum og löngunni bætt út í og leyft að malla í súpunni í nokkrar mínútur. Rétt áður en súpan er borin fram er rækjum bætt út í. Fallegt að skreyta með steinselju. Súpan er borin fram með góðu brauði.

 

Bakaðar perur með mjúkum marengs og súkkulaði

Birt þann af
22

Þetta er mjög fljótlegur en góður eftirréttur og ef maður á niðursoðnar perur til taks þá er auðvelt að útbúa þennan rétt með litlum fyrirvara því auk peranna eru bara örfá hráefni. Í þetta sinn bætti ég líka við hvítu súkkulaði. Ávextir með bræddu hvítu súkkulaði er alltaf feykigóð blanda og ég tók því áhættuna að það kæmi vel út í þessum rétti sem það og gerði.

Ég man mjög vel eftir því þegar ég gerði þennan rétt í fyrsta sinn. Þá var ég tvítug, nýflutt til Stokkhólms og við vorum að fá gesti í fyrsta sinn í íbúðina okkar þar. Ég átti litla dós af perum og lagði þær í form, það var ekki nóg þannig að ég tók ferskar perur sem voru mjög harðar og óþroskaðar, afhýddi, skar þær í tvennt og fyllti formið. Svo komu gestirnir, rétturinn leit mjög vel út og allir fengu sér í skál. Við Elfar lentum á dósaperunum sem voru mjúkar og heitar. Gestirnir fengu hins vegar á sinn disk fersku perurnar sem voru auðvitað enn grjótharðar! Þau reyndu að skera perurnar með skeiðinni en það gekk vægast sagt illa. Ég man að annar gesturinn sagði að þessi réttur væri mjög sérstakur! Og þá var hann ekki að meina ,,sérstaklega góður“! 🙂 Sama kvöld kveiktum við í fyrsta sinn upp í gamla arninum í íbúðinni, Elfar hafði fyrr um daginn rogast heim með 40 kílóa viðarpoka en við áttum ekki bíl. Ég vildi nú breiða yfir þennan misheppnaða rétt og kveikja upp í notalegum arni fyrir gestina. Það tókst ekki betur en svo að íbúðin fylltist af reyk og gestirnir enduðu úti á svölum til að reyna að ná andanum og nágranninn bankaði upp á og hélt að það væri kviknað í! Þessir gestir komu aldrei í heimsókn aftur! 😉

En fylgið bara uppskriftinni og kveikið ekki upp í stífluðum arni, þá get ég lofað ykkur að gestirnir verða sáttir! 🙂

Uppskrift:

  • 1 stór dós perur
  • 4 eggjahvítur
  • 4 msk flórsykur
  • 100 gr suðusúkkulaði
  • 50 gr hvítt súkkulaði (hentar vel að nota hvíta súkkulaðidropa), má sleppa


Aðferð:

Raðið perunum í eldfast mót með skornu hliðina upp. Saxið hvíta súkkulaðið frekar fínt og setjið í dældirnar í perunum, ef notaðir eru hvítir súkkulaðidropar þarf ekki að saxa þá. Stífþeytið eggjahvítur og sykur. Þekjið perurnar með eggjahrærunni. Bakið við 110 gráður í u.þ.b 20 mínútur eða þar til rétturinn er orðinn fallega brúnn. Bræðið súkkulaði í vatnsbaði og dreifið því yfir réttinn eftir að formið er tekið úr ofninum . Berið fram heitt með ís.

Síbreytilegt lasagna

Birt þann af
12

Framarlega í uppskriftabókinni minni sem hefur fylgt mér síðan ég var 19 ára hef ég skráð niður lasagna uppskrift. Þetta var árið 1992 og þar stendur jafnframt að uppskriftin komi úr uppskriftabók frá matreiðslukennslu í Seljaskóla í 9. bekk! 🙂 Ég hef örugglega fylgt þessari uppskrift í fyrstu skiptin sem ég eldaði lasagna en síðan þá hef ég sjaldan eldað það tvisvar sinnum eins. Stundum bæti ég við grænmeti, t.d. sveppum, gulrótum eða kúrbít. Stundum nota ég spínat -lasagnablöð, set ferskar kryddjurtir út í kjötsósuna og annað slíkt. Allt fer þetta eftir því hvaða hráefni ég á til og hvert tilefnið er. En eitt finnst mér mikilvægt með lasagna, að það sé ekki bragðdauft. Þegar saman kemur kraftlítil kjötsósa, ostasósa og lasagnaplötur þá getur sú útkoma verið heldur dauf . Þetta lasagna hins vegar rífur dálítið í bragðlaukana, getur orðið býsna sterkt með heita pizzukryddinu, fer þó auðvitað alveg eftir hversu mikið er notað af því. En allir krakkarnir borða það með bestu lyst og biðja um ábót, það er góðs viti! Hér notaði ég í fyrsta sinn beikon í lasagnað, það var nú bara af því að ég átti beikonbréf sem var að renna út, en það kom vel út.

Uppskrift fyrir 6:

Kjötsósa:

  • 800 gr. hakk
  • 1 pakki beikon
  • 1 stór laukur
  • 3-4 hvítlauksgeirar
  • 150 gr sveppir
  • 2 dósir niðursoðnir tómatar (ég nota yfirleitt Huntz með hvílauk annars vegar og basiliku hinsvegar)
  • 3 msk tómapuré
  • kjötkraftur
  • Heitt pizzakrydd frá Pottagöldum
  • Krydd lífsins frá Pottagöldrum
  • basiliku krydd
  • oregano krydd
  • salt og pipar
  • olía til steikingar
  • lasagna plötur
  • rifinn ostur

Ostasósa: 

  • 90 gr smjör
  • 90 gr hveiti
  • ca 1 líter nýmjólk
  • 2 dl rifinn mozzarella ostur
  • 150 gr rjómaostur
  • múskat
  • salt og pipar

Aðferð

Beikon steikt á pönnu þar til það verður stökkt og gott. Beikonið tekið af pönnunni, lagt á eldhúsrúllublað, þerrað, kælt og skorið niður í litla bita. Sveppir skornir í sneiðar, laukur saxaður smátt ásamt hvítlauk. Steikt á pönnu þar til laukurinn er orðinn mjúkur og sveppirnir hafa tekið lit. Til þess að laukurinn brenni ekki er blandan tekin af pönnunni og hakkið steikt. Það er kryddað vel með kryddunum í uppskriftinni (ég notaði lítið sem ekkert salt þar sem að beikonið er vel salt) og nautakrafti bætt út í. Beikoni og grænmeti bætt út í ásamt niðursoðnum tómötum og tómatpuré. Þessu er leyft að malla í dágóða stund, smakkið til með kryddunum eftir þörfum.

Ostasósan:

Smjör brætt í potti og hveiti hrært saman við. Síðan er mjólkinni hellt rólega saman við, munið að hræra án afláts. Bætið osti og rjómaosti út í, hrærið saman á vægum hita þar til að osturinn er bráðnaður. Kryddið með múskati, salti og pipar.

Lasagna sett saman:

Fyrst er ostasósa sett á botninn á eldföstu móti, því næst er lasagna plötum raðað yfir, þá kjötsósan og svo koll af kolli. Endað á ostasósu og þá er rifnum osti dreift yfir. Ef ég á ferska basiliku raða ég henni stundum yfir efsta lagið af ostasósunni áður en ostinum er dreift yfir.

Bakið í ofni við 200 gráður í ca. 25-30 mínútur. Berið fram með góðu brauði og salati. Svo mæli ég með því að gera mjög stóra upppskrift af lasagna, setja í fleiri en eitt form og frysta auka formin. Það er afar ljúft að geta tekið lasagna út úr frysti að morgni, stungið því inn í ofn eftir vinnu og verið fyrirhafnalaust komin með afar gómsætt lasagna á borðið hálftíma síðar! 🙂

Heimatilbúin tómatsósa og Food network!

Birt þann af
2

Mér finnst voða gott að stússast í eldhúsinu seinni hluta dags og undirbúa kvöldmat. Það er undartekning ef ég elda ekki á kvöldin enda erum við sex í fjölskyldunni, stóru krakkarnir (sem eru nú varla krakkar lengur!) taka með sér afganga í vinnu og skóla, það krefst stöðugrar framleiðslu á mat! Ég elda því alltaf eins og fyrir minnst átta manns þar sem að markmiðið er að eiga afganga í nesti næsta dag. Í eldhúsinu er lítið sjónvarp með ótal rásum en ég horfi yfirleitt bara á eina rás yfir eldamennskunni, Food network auðvitað!

Þar eru margir mjög góðir þættir, uppskriftalega séð finnst mér „Barefood contessa“ vera best, hún er með mjög evrópskar og góðar uppskriftir. Ég er alltaf með annað augað á skjánum og fæ fullt af góðum hugmyndum, punkta þær niður á skrifblokk í eldhúsinu og fer svo á netið til að skoða þær betur. Ég fékk hugmyndina af heimatilbúinni tómatsósu frá grillþætti á Food network. Mér hafði aldrei dottið í hug að gera slíka sósu áður, ég nota venjulega tómatsósu ekki mikið nema á pylsur og finnst hún ekkert sérstök. En eins og ameríkönum er einum lagið þá mærðu þáttastjórnendur þessa sósu í bak og fyrir, hún væri víst ómissandi með grillmat! Ég skoðaði uppskriftir á netinu, fann þessa uppskrift frá snillingnum Paul Løwe og  prófaði. Og viti menn, heimatilbúin tómatsósa er ljúffeng! 🙂 Ég myndi segja að munurinn á heimatilbúinni tómatsósu og þessari venjulegu sé svipaður og munurinn á til dæmis ferskum og niðursoðnum ananas! Hún er sérstaklega góð á grillaða hamborgara en það er hægt að nota hana með öllum grilluðum mat. Það er lítið mál að gera þessa sósu, eina vinnan er eiginlega að skera laukinn, svo mallar hún bara sjálf á pönnunni. Tómatsósan geymist vel í kæli í þéttri flösku (fæst í Søstrene Grene). 

Uppskrift:

  • 1 dós góðir niðursoðnir heilir tómatar (ég notaði niðursoðna kirsuberjatómata)
  • 1 lítill gulur laukur
  • 2 msk ólífuolía
  • 1-2 msk tómatpúrra
  • 2 dl púðursykur
  • 1 dl eplacider-edik
  • salt

Niðursoðnir tómatar settir í matvinnsluvél og hrært þar til blandan verður jöfn. Fínsaxið laukinn og steikið í olíunni þar til laukurinn verður mjúkur. Tómötum, tómatpúrru, eplacider-edik og púðursykri bætt við (smakkið sósuna til). Það er hægt að fínhakka hálfan rauðan chili og setja út í tómatana fyrir þá sem vilja sterkari útgáfu af sósunni. Látið blönduna malla á lágum hita, án loks, þar til hún þykknar eða í ca. einn klukkutíma. Smakkið hana til með salti. Setjið blönduna alla í matvinnsluvél og hrærið í smá stund. Kælið og hellið í krukku eða flösku með þéttu loki eða tappa. Tómatsósan geymist í ísskáp í vel lokuðu íláti í allt að þrjár vikur. Berið fram með grillmat, t.d. grilluðum hamborgurum.

Jóhönnu Ingu fannst þessi tómatsósutilraun afar spennandi og vildi útbúa sína eigin flösku sem hún gerði með glæsibrag! 🙂

Gulrótarkaka með súkkulaði og eplum

Birt þann af
7

Gulrótarkökur eru rosalega góðar, sérstaklega þær sem eru safaríkar og bragðmiklar. Þessi er ein af þeim, þetta er dásamlega góð uppskrift. Þessi gulrótarkaka er best daginn eftir að hún er bökuð.

Uppskrift:

  •  3 stór egg
  • 2.5 dl matarolía (t.d. sólblómaolía)
  • 200 gr. sykur
  • 150 gr púðursykur
  • 2 tsk vanillusykur
  • 2 tsk kanill
  • 1/2 tsk múskat
  • 1 tsk matarsódi
  • 1 tsk lyftiduft
  • 320 gr. hveiti
  • 100 gr. suðusúkkulaði, fínsaxað
  • 400 gr gulrætur, rifnar
  • 1-2 græn epli, rifin

Rjómaostakrem

  •  100 gr. smjör, við stofuhita
  • 200 gr. flórsykur
  • 200 gr. rjómaostur, við stofuhita
  • 3 tsk vanillusykur

Aðferð:

Hitð ofinn í 180 gráður. Þeytið saman egg, sykur og olíu þar til blandan verður ljós. Bætið út í hveiti og öðrum þurrefnum og blandið varlega saman. Bætið við súkkulaði, rifnum gulrótum og rifnum eplum og blandið við deigið. Bakið í lausbotna smurðu formi (25 cm) í miðjum ofni í 50-60 mínútur.

Krem:

Hrærið saman smjör og flórsykur þar til það verður létt og ljóst, bætið þá við rjómaostinum og vanillusykri. Smyrjið kremið á kökuna þegar hún er orðin köld.

Límónumarineruð laxaspjót með mangó- og avókadósalsa

Birt þann af
15

Ég eldaði þennan laxarétt í fyrsta sinn í fyrradag. Ég vissi svo sem að hann hlyti að vera góður þar sem að uppistaðan í réttinum eru nokkur af uppáhaldshráefnunum mínum, lax, mangó og avókadó. En vá hvað þetta er bragðgóður, léttur og ljúffengur réttur, þið bara verðið að prófa! Mikilvægt er að vera með vel þroskað mangó og avókadó, ég skrifaði ráð hér hvernig hægt er að hraða fyrir þroska þeirra. Ég átti avókadó sem ég hafði geymt á þennan hátt og var orðið rétt þroskað. Síðan var ég svo heppin að finna fullkomlega þroskað mangó í Nettó. Ég keypti síðan ljúffengan lax hjá Fiskbúð Hólmgeirs í Mjóddinni en ég kaupi allan fisk af þeim. Þetta er ekki erfiður réttur að útbúa og hann er fljótlegur, það þarf bara að gefa sér tíma fyrir mareneringuna. Þessi uppskrift dugir fyrir þrjá sem aðalréttur en fyrir sex sem forréttur. Ég var með hann í aðalrétt og bar fram með honum naanbrauð með smjöri og salti, uppskriftina er að finna hér.

Límónumarineruð laxaspjót

  • 900 gr. ferskur lax, skorinn í teninga (ca 2,5 x 2,5 cm)
  • 1/2 dl ólífuolía
  • 2 hvítlauksrif, saxað smátt
  • 1/2 límóna (lime), safi og börkur
  • 1/4 tsk sykur
  • salt og pipar
  • kóríander, saxað smátt (hægt að nota flatblaða steinselju í stað kóríanders)

Blandið saman hráefnunum fyrir mareneringuna. Laxinn skorinn í eins jafna teninga (ca. 2.5 cm x 2.5 cm) og hægt er og hann settur í plastpoka. Mareneringunni helt yfir og laxinum velt varlega upp úr henni, geymið í ísskáp í minnst einn tíma, lengur ef hægt er.

Þrír til fimm laxateningar þræddir upp á grillspjót. Ef þið notið tréspjót, leggið þá spjótið í bleyti í ca. hálftíma fyrir notkun til þess að þau brenni ekki. Grillið spjótinn á meðalhita þar til þau eru tilbúin. Reynið að snúa þeim sjaldan til að koma í veg fyrir að laxinn losni af spjótunum. Það þarf að leyfa spjótunum að grillast vel í byrjun áður en þeim er snúið fyrst, þá er lítið mál að snúa þeim eftir það.

Mangó- og avókadósalsa

Á meðan laxinn er að marinerast er salsað útbúið:

  • 1 stórt mangó, skorið í teninga
  • 2 avókadó, skornir í teninga
  • 1/2-1 rauðlaukur, fínsaxaður
  • 1/2-1 rautt chili, kjarnhreinsað og fínsaxað
  • 1/2 límóna (lime)
  • 2 msk góð ólífuolía
  • 1 msk hvítvínsedik
  • salt og pipar
  • ferskt kóríander, saxað (hægt að nota flatblaða steinselju í stað kóríanders)

Mangó, avókadó og lauk blandað varlega saman. Chili bætt við ásamt safanum úr límónunni, ólífuolíu og hvítvínsediki. Kryddið með salt, pipar og kóríander og blandið öllu varlega saman. Geymið í ísskáp.

Berið fram grilluðu laxaspjótin á mangó- og avókadósalsanu, kreystið smá límónusafa yfir og njótið gjarnan með vínsglasi!

Grillað Naan brauð eða bakað

Birt þann af
8

Þvílíkur dásemdar sumardagur í gær! Ég þurfti bara að vinna fram að hádegi og fór því heim og útbjó brunch úti á palli fyrir krakkana og þá vini sem voru í húsinu. Jóhönnu og Gyðu vinkonu hennar fannst svo heitt að það urðu að nota „sól“hlíf á á meðan þær snæddu! Síðan var uppblásna sundlaugin dregin fram ásamt vatnsslöngunni, afar vinsæl afþreying á heitum degi. Á brunch borðinu var ég meðal annars með crousant sem maður kaupir frosið og óbakað (fæst í Bónus). Crousantin eru bökuð í ofni og borin fram heit og fersk, hrikalega góð, öll tíu stykkin hurfu eins og dögg fyrir sólu! Hvet ykkur til að kippa með einum svona poka í næstu Bónus ferð!

Um kvöldið var að sjálfsögðu grillað eins og heyrir til á svona góðum degi. Meðal þess sem rataði á grillið var uppáhaldsbrauð fjölskyldunnar, naan brauð. Þetta brauð baka ég oft á hefðbundinn hátt en eftir að hafa verið kynnt fyrir grilluðu naanbrauði af góðum vinum okkar, matgæðingunum Frissa og Jóhönnu, grillum við yfirleitt naan brauðið á sumrin. Þetta er afar einföld og góð uppskrift. Krakkarnir elska þetta brauð, ég geri oft tvöfalda uppskrift en samt klárast brauðið á mettíma! Það er best að bera það fram nýbakað og rjúkandi heitt en það helst mjög safaríkt lengi. Í uppskriftinni er hrein jógúrt en ég hef notað ab-mjólk með góðum árangri og núna notaði ég gríska jógúrt sem kom mjög vel út. Hér að neðan fylgir uppskrift af brauðinu bæði grilluðu og bökuðu á hefðbundinn hátt.

Nanbrauð (10 stykki) 

200 ml. mjólk
2 msk sykur
1 poki þurrger
600 gr hveiti
1 tsk. salt
2 tsk. lyftiduft
4 msk. ólífuolía
1 dós hrein jógúrt (180 gr við stofuhita, má líka nota ab-mjólk eða gríska jógúrt)

Ofan á brauðið:

1 msk. maldon salt
1 msk indversk kryddblanda (garam masala)
25 gr. smjör (brætt)
1-2 hvítlauksrif
ferskt kóríander (má sleppa)

Setjið ger og sykur saman í skál og hellið volgri mjólk yfir, pískið létt saman. Látið standa í 15 mín. Blandið síðan hveiti, salti, lyftidufti, olíu og jógúrt saman við germjólkina. Hnoðið degið þar til að það verður mjúkt. Látið deigið hefast í skál í klukkustund við stofuhita. Hitið ofninn í 275 gráður. Blandið kryddinu og saltinu saman á disk. Skiptið deiginu í 10 hluta og hnoðið kúlur úr þeim. Fletjið síðan kúlurnar nokkuð þunt og þrýstið þeim ofan í kryddblönduna. Raðið brauðunum á plötu sem er klædd bökunarpappír og bakið þau í 5-7 mínútur. Bræðið smjörið í potti, setjið pressaðan hvítlaukinn saman við smjörið og dreypið því strax á heit brauðin. Klippið kóríander síðan yfir brauðin ef þið viljið. Berið fram strax á meðan brauðin eru heit.

Ef brauðin eru grilluð er kryddblandan sett á eftir grillun Það er lítið mál að grilla brauðin í stað þess að baka þau í ofni. Það þarf að smyrja þau með ólífuolíu á báðum hliðum. Einnig þarf að passa að hafa brauðin ekki of stór og hafa þau vel flöt þannig að þau nái að bakast í gegn. Þau geta nefnilega verið mjög stutt á grillinu áður en þau byrja að brenna að utan, ca. 1-3 mínútur á hvorri hlið á háum hita. Fylgist bara með þeim mjög vel, um leið og þau fara að dökkna mikið þarf að snúa þeim við. Það er svo hægt að pensla brauðin strax eftir grillun með smjör- og kryddblöndunni, leyfa þeim að jafna sig í nokkrar mínútur og bera þau svo fram. Ég nota oft bara smjör, hvítlauk og salt og sleppi kryddinu eða jafnvel bara smjör og salti.