Marengsterta með créme brulée skyri og piparlakkrískurli

Birt þann 29.12.2017 af Eldhússögur

Um daginn fór ég í matarboð og fékk svo dæmalaust góða marengstertu í eftirrétt. Ég kom ekki fyrir mig bragðinu, það var eitthvað svo óvenjulegt og óhemjugott bragð af rjómanum. Það kom í ljós að það var créme brulée skyr sem er einmitt að gera góða hluti í allskonar eftirréttauppskriftum þessa dagana (þetta er samt ekki styrkt færsla sko! 🙂 ). Samsetning tertunnar var líka harla óvenjuleg því það voru í henni bananar og lakkrís, svakalega góð blanda fannst mér. Ég tók því til við að endurtaka leikinn hér heima og betrumbætti með því að nota ekki lakkrís heldur piparlakkrískurl. Alveg sjúklega góð terta finnst mér, vona að ykkur finnist það líka! 🙂

Botnar:

5 eggjahvítur
3 1/2 dl púðursykur
1 dl sykur

Á milli:

2 dl rjómi
250 g créme brulée skyr
2 stórir eða 3 litlir bananar, vel þroskaðir

Ofan á:

ca. 2 dl rjómi
ca 100 g piparlakkrískurl
rifið suðusúkkulaði

Ofn hitaður í 130 gráður við blástur. Eggjahvítur eru þeyttar og sykri og púðursykri smá saman bætt út í þar til marengsinn er orðinn stífur. Diskur eða kökuform sem er ca. 20-22 cm í þvermál er lagt á bökunarpappír og strikaður hringur eftir disknum. Þetta er gert tvisvar. Marengsinum er skipt í tvennt og hann settur á sitt hvorn hringinn. Því næst er slétt jafnt úr marengsinum innan hringsins með sleikju eða spaða. Þá er marengsinn bakaður í 130°C (blástur) í heitum ofni í ca. 55-60 mínútur. Best er að láta marengsinn kólna í ofninum.

Þegar marengsinn er orðinn kaldur er rjóminn þeyttur og skyrinu bætt varlega út í með sleikju. Blandan er borin á annan botninn. Bananar eru skornir i sneiðar og þeim raðað yfir rjómann. Hinn marengsbotninn er lagður ofan á. Þá er þeyttur um það bil 2 dl af rjóma og honum dreift yfir marengsinn. Að lokum er piparlakkrískurli og vel af rifnu suðusúkkulaði dreift yfir rjómann.

Hægeldaðar kalkúnabringur

Birt þann 28.12.2017 af Eldhússögur

Svara

Mér finnst kalkúnamáltíðir rosalega góðar. Stundum hentar að hafa eldunina auðveldari en að elda heila kalkún. Mér finnst þá afar handhægt og ljúffengt að matreiða kalkúnabringur og elda þær þá við vægan hita í lengri tíma, það gerir þær ákaflega meyrar og safaríkar. Mér hefur fundist best að kaupa bara venjulegar bringur, ófylltar, því þær hafa reynst meyrari að mínu mati. En þessi eldunaraðferð virkar auðvitað líka fyrir fylltar bringur. Ég gef líka upp uppskrift að einfaldri og góðri kalkúnasósu, unnin úr tilbúnum kalkúnasósugrunni.

Meðlætið sem ég tel upp hér með heilsteikta kalkúninum smellpassar líka með kalkúnabringunum.

Uppskrift f. ca 4

1 kalkúnabringa (u.þ.b. 900 g)
kalkúnakrydd frá Pottagöldrum
salt & pipar
100 kryddsmjör með hvítlaukskryddi
2 msk fljótandi kalkúnakraftur + 2 dl vatn
1/2 laukur, skorinn í strimla
kjöthitamælir

Bringan tekin úr kæli um það bil hálftíma fyrir eldun. Hún er þá krydduð með kalkúnakryddi, salti og pipar. Ofn hitaður í 100 gráður við undir- og yfirhita. Vatnið soðið og blandað saman við kalkúnakraftinn, hellt í eldfast form ásamt lauknum. Helmingurinn af kryddsmjörinu er hitaður á pönnu og bringan brúnuð við háan hita í stutta stund. Þá er hún lögð í eldfasta formið. Restinni af kryddsmjörinu er dreift yfir bringuna og ofan í formið. Sett inn í ofn við 90 gráður, gott er að ausa yfir bringuna nokkrum sinnum á meðan eldun stendur. Þegar kjarnhiti bringunnar er 68 gráður (tekur ca 70-90 mín fyrir meðalstóra bringu) er hún tekin út og leyft að hvíla í minnst 10 mínútur þar til skorin. Mér finnst gott að hafa kjarnhitann eins lágan og hægt er að komast upp með. Pakka svo bringunum strax þétt í álpappír í 10-15 mínútur áður en þær eru skornar.

Kalkúnasósa

1 bréf kalkúnasósugrunnur
2 dl vatn
3 dl rjómi
3-4 msk rjómaostur
1 tsk dijon sinnep
1 tsk rifsberjahlaup
salt og pipar
ca. 1 msk fljótandi kalkúnakraftur (meira við þörfum)
20 g smjör
soð frá kalkúnabringunum
sósujafnari

Sósugrunninum er hellt út í 2 dl vatni og hrært á meðan suðan kemur upp. Þá er rjómanum og rjómaosti bætt út í. Því næst er sinnepi og rifsberjahlaupi bætt út í sósuna og hún krydduð eftir smekk. Fljótandi kalkúnakrafti er bætt út í ásamt soðinu og sósan smökkuð til. Sósan er látin krauma á meðan köldu smjörinu er bætt út í, hrært á meðan. Sósujafnari notaður við þörfum.

Fimm ljúffengir ísar fyrir hátíðarnar

Birt þann 22.12.2017 af Eldhússögur

Svara

Ísgerð er vinsæl fyrir hátíðarnar. Ég er almennt ekki mikið gefin fyrir ís en mér finnst heimagerður ís mjög góður og geri alltaf mismunandi tegundir af ísum fyrir jólahátíðina. Hér eru nokkrar tegundir sem ég mæli með! 🙂

Toblerone jólaís með hnetum og banönum

Vanilluís með marsípani og Daim súkkulaði

Vanilluís með Dumle-núggati og smjörsteiktum kanileplum

Ís með heimatilbúnu frönsku núggati og súkkulaðisoðnum perum

Bismark ís með myntusúkkulaði og hindberjum

Waldorfsalat

Birt þann 20.12.2017 af Eldhússögur

Waldorfsalatið var fyrst búið til árið 1896 fyrir fjáröflunarball sem haldið var á Waldorfhótelinu í New York. Upprunalega var salatið með eplum, sellerí, vínberjum og valhnetum. Þessu var blandað saman við majónes sem hefur á síðari árum vikið fyrir sýrðum rjóma. Mér finnst langbest og ferskast að sleppa selleríi og bæta við ananas í staðinn. Waldorf salat ómissandi með til dæmis kalkúni og hamborgarhrygg.

Uppskrift:

3-4 græn epli, flysjuð og skorin í litla bita
góður klasi af grænum, steinlausum grænum vínberjum, skorin í tvennt
1 stór dós ananas, skorinn í litla bita
2 dósir sýrður rjómi
þeyttur rjómi
valhnetur til skreytinga, má sleppa

Öllu blandað saman saman.

Hvítar sörur

Birt þann 19.12.2017 af Eldhússögur

Ég geri alltaf hefbundnar sörur fyrir jólin en get alveg staðist freistinguna að eiga þær í frysti. Þessar hvítu sörur gerði ég hins vegar í fyrsta sinn í fyrra og þær get ég engan veginn staðist! Uppskriftin kemur frá Jóa Fel og þær eru algjört sælgæti. Ef ég þyrfti að velja bara eina tegund til að gera fyrir jól þá yrðu þessar himnesku sörur fyrir valinu. Ég gaf afa box með svona sörum og hann var alveg vitlaus í þær, sagði að þetta væru bestu smákökur sem hann hefði smakkað á níutíu ára ævi sinni, ekki slæmur dómur það! 🙂

Botn:

9 stk. eggjahvítur
85 g sykur
430 g flórsykur
515 g möndlur

Ofn hitaður í 180 gráður. Eggjahvítur þeyttar og sykur sett rólega útí, stífþeytt. Möndlur maukaðar mjög smátt í matvinnsluvél, flórsykrinum blandað saman við. Þessu er síðan blandað varlega saman við stífþeytta marengsinn með sleikju. Sprautað á ofnplötu klædda bökunarpappír og bakað í ca. 12 mínútur við 180 gráður. Kælt áður en kremið er sett á.

Krem:

240 g sykur
200 ml vatn
8 stk. eggjarauður
180 g hvítir súkkulaðidropar
500 g smjör, við stofuhita
2 tsk vanillusykur
1.5 tsk vanilludropar

Hjúpur:

Hvítir súkkulaðidropar

Sykur og vatn sett í pott og htiað upp í 116 gráður eða þar til sírópið fer aðeins að þykkna. Eggjarauður þeyttar til hálfs og þá er sírópinu hellt mjög varlega út í rauðurnar í mjórri bunu á meðan þeytingin er á miðlungshraða. Því næst er aukið við hraðann og þeytt í ca. 3-4 mínútur. Súkkulaðið er brætt yfir vatnsbaði. Á meðan er smjör (við stofuhita) bætt út í þeytinguna (best er að nota hendur) og síðan er súkkulaði og vanillu bætt út í. Hrært þar til myndast gott smjörkrem). Best er að nota hendur en það er hægt að nota spaðann á hrærivélinni og vinna rólega. Kreminu er sprautað á, eða því smurt, á botnana. Þá eru þær kældar í frysti í ca. 20 mínútur. Hvítt súkkulaði fyrir hjúpinn er brætt og sörunum (kremhliðinni) er dýft ofan í hjúpinn. Best er að geyma sörurnar í frysti og bera fram kaldar.

Gulrótarkaka

Birt þann 27.9.2017 af Eldhússögur

Svara

Ég hef lengi skoðað litríkar Kitchen aid hrærivélar með stjörnur í augum og stúderað alla þá liti sem eru í boði. Ég er ekki mikið fyrir króm eða svart, er meira svona pasteltýpan. Bláu litirnir hafa alltaf höfðað mest til mín en núna, þegar kom loksins að því að velja lit, þá kolféll ég hins vegar fyrir pistasíugrænu vélinni.

Ég gæti ekki verið sáttari með nýju vélina og þennan fallega lit. Ég gat ekki beðið eftir því að nota nýju vélina og jómfrúarbaksturinn var ein af mínum uppáhaldskökum, gulrótarkaka. Ég er eiginlega jafnhrifin af gulrótarkökum og eplakökum (ég elska góðar eplakökur!) og þessi uppskrift er algjörlega skotheld. Dúnmjúk, safarík og góð gulrótarkaka sem er ákaflega einfalt að baka. Ég mæli með! 🙂

Uppskrift:

150 g gulrætur, rifnar
ca 70 g maukaður ananas (án vökva)
4 egg
4 dl sykur
2 dl matarolía
1 msk lyftiduft
2 tsk vanillusykur
2 tsk kanill
4 dl hveiti

Rjómaostakrem

200 g rjómaostur
100 g smjör, við stofuhita
4 dl flórsykur

Ofn hitaður í 180 gráður við undir- og yfirhita. Egg og sykur þeytt saman þar til létt og ljóst. Þá er matarolíu, rifnum gulrótum og maukuðum ananas bætt út í. Því næst er lyftidufti, vanillusykri, kanil og hveiti bætt út í og hrært þar til deigið er slétt. Þá er deiginu hellt í smurt form ( ca. 30 cm x 25 cm eða hringlaga form), klætt bökunarpappír. Kakan er bökuð við 180 gráður neðarlega í ofninum í ca. 40-45 mínútur. Kakan er kæld áður en kremið er sett á.

Rjómaostakrem: öllum hráefnunum er hrært saman þar til kremið verður létt og ljóst. Kremið er sett á kalda kökuna.

Sætkartöflu- og kúrbítsklattar

Birt þann 19.9.2017 af Eldhússögur

Svara

Mér finnst auðveldlega henda að maður festist í sama meðlætinu með góðu grillkjöti. Mér finnst í raun fátt jafnast á við ofnbakaðar sætar kartöflur og grillað grænmeti og nota það afar oft með grillmat. En það er alltaf skemmtilegt að breyta til. Um daginn fengum við matargesti sem eru á lágkolvetnisfæði. Ég ákvað því að búa til klatta úr kúrbít og sætri kartöflu. Reyndar eru sætar kartöflur takmarkaðar í LKL mataræði en matargestirnir okkar leyfa sér þær. Þessir klattar eru ljúffengir og passa vel með ýmisskonar grillkjöti.

Uppskrift:

1 kúrbítur
1 stór sæt kartafla
1 egg
1/2 msk husk
1 dl rifinn parmesan
chiliflögur
salt & pipar

Ofn hitaður í 225 gráður. Kúrbítur rifinn gróft og settur í sigti ásamt smá salti. Hrært dálítið saman og kreist létt til þess að mestur vökvinn farin úr. Sæta kartaflan er skræld og rifin gróft. Rifinn kúrbítur, rifin sæt kartafla og rifinn parmesan ostur er blandað saman ásamt eggi, huski og kryddi. Mótuð buff (fremur lítil) og þeim raðað á ofnplötu klædda bökunarpappír. Hitað í ofni við 225 gráður þar til buffin hafa tekið fallegan lit og eru elduð í gegn.

Grænmetisbollur í kókoskarrísósu með mangó

Birt þann 5.9.2017 af Eldhússögur

Svara

*í samstarfi við Hälsans kök“

Ég mun líklega seint gerast grænmetisæta en mér finnst hins vegar rosalega gott að fá mér grænmetisrétti reglulega. Þegar ég var beðin um að búa til uppskrift fyrir grænmetisrétti frá Hälsans kök varð ég mjög spennt fyrir því verkefni því ég þekki vörurnar frá Svíþjóð, þar eru þær mjög vinsælar. Ég bjó til þessa uppskrift úr grænmetisbollunum og var afar hrifin af þeim, virkilega góðar bollur, enda eru þær einna vinsælastar af öllum grænmetisréttunum þeirra. Ég var svo frökk að segja yngstu börnunum fyrst að þetta væru kjötbollur og í kjölfarið borðuðu þau matinn með bestu lyst (sem hefði pottþétt ekki gerst ef þau hefðu vitað að þetta væru grænmetisbollur! 😉 ). Þessi sósa fannst mér líka svo geggjað góð! Mér finnst kókos/karrí alltaf svo gott en þarna prófaði ég í fyrsta sinn að mauka mangó út í. Það gefur einstaklega góða fyllingu í sósuna og góðan sætan keim sem kemur vel heim og saman við kókosmjólk og karrí. Bollurnar smellpassa við þessa sósu.

Uppskrift (f. 4-5)

600 g grænmetisbollur (bullar) frá Hälsans kök
3 msk ólífuolía
2 msk ferskur engifer, rifinn
3 hvítlauksrif, söxuð smátt
1 rauður chili, fræhreinsaður og saxaður smátt
1 meðalstór rauðlaukur, skorinn í sneiðar
400 g brokkolí, skorið í bita
1 dós kókosmjólk (400 ml)
200 ml grænmetissoð
1-4 msk rautt karrímauk (fer eftir styrkleika mauksins og smekk)
300 g frosið mangó, afþýtt (eða ferskt)
1 tsk túmerik krydd
ca. 1 msk fiskisósa (fish sauce) – má sleppa og nota dálítið salt í staðinn
1 límóna (lime), safinn notaður
ferskt kóríander

Grænmetisbollurnar eru hitaðar í ofni eftir leiðbeiningum. Ólífuolían er hituð á pönnu. Engifer, hvítlaukur og chili er steikt upp úr olíunni í 2 mínútur. Þá er karrímaukinu bætt út á pönnuna og hrært vel við fremur háan hita í um það bil 2 mínútur. Því næst er brokkolí og rauðlauk bætt út á pönnuna (ólífuolíu bætt við eftir þörfum) og steikt í smástund. Síðan er kókosmjólk og grænmetissoði bætt við. Látið malla við meðalhita á meðan mangóið er maukað vel í matvinnsluvél. Þá er mangómaukinu bætt út á pönnuna ásamt túmerik kryddi. Látið malla við meðalhita í 10-15 mínútur og smakkað til með fiskisósu og safa úr límónu. Í lokin er grænmetisbollunum bætt út í sósuna. Borið fram með fersku kóríander og hrísgrjónum.

Sætar kartöflur með jurtasalti og blóðbergssírópi

Birt þann 2.9.2017 af Eldhússögur

Svara

*Í samstarfi við Urtu*

Í vor vann ég nokkrar uppskriftir fyrir fyrirtækið Urtu Islandica. Þau eru gera ákaflega spennandi hluti! Þau nota íslenskar jurtir og ber til að framleiða meðal annars salt, síróp og te. Ég hvet ykkur til að kíkja til þeirra í fallega húsið þeirra í Hafnarfirði, Gömlu matarbúðina við Austurgötu, og skoða þetta skemmtilega fjölskyldufyrirtæki og framleiðsluna þeirra. Vörurnar fást að auki í Hagkaup í Kringlunni.

Ég hreinlega elska sætar kartöflur! Ég fæ ekki nóg af þeim en því miður eru börnin ekki eins hrifin, elsta dóttirin segist hafa borðað yfir sig af þeim og gefur þar með í skyn að móðirin hafi boðið aðeins of oft upp á sætar kartöflur sem meðlæti í gegnum tíðina .. sem ég bara skil ekki! 😉 Ég gæti nefnilega grínlaust borðað sætar kartöflur í hvert mál. Mér finnst mikilvægt að leyfa sætu kartöflunum að njóta sín í einfaldleika sínum þegar þær eru matreiddar og hér bjó ég til uppskrift þar sem mér finnst sætu kartöflurnar njóta sín fullkomlega. Ég notaði þær með ljúffengum fiskrétti (uppskrift kemur á bloggið innan skamms) og fannst þessi réttur algjört hnossgæti. Það væri örugglega dásamlega gott líka að nota þær með t.d. kjúklingi eða grillmat.

Uppskrift:

900 g sætar kartöflur, flysjaðar og skornar bita
3 msk ólífuolía
svartur pipar
ca. 30 ml blóðbergssíróp
100 g pekanhnetur
öræfa jurtasalt
fersk steinselja

Ofn hitaður í 210 gráður við undir- og yfirhita. Ólífuolíu, svörtum pipar og blóðbergssírópi blandað saman og dreift á ofnplötu klædda bökunarpappír. Bakað við 210 gráður í 25-30 mínútur. Þá eru sætu kartöflurnar teknar úr ofninum, pekan hnetunum blandað saman við þær ásamt öræfa jurtasalti og ferskri steinselju.

Mozzarella- og tómatasalat með pestósósu og parmaskinku

Birt þann 29.8.2017 af Eldhússögur

Hingað til hef ég ekki mikið verið að bjóða fjölskyldunni upp á einfalt salat í kvöldmatinn nema í því sé kjúklingur eða eitthvað annað bitastætt. Ég hef einhvern veginn tekið því sem gefnu að börnin yrðu ekki hrifin og jafnframt hef ég haldið að eingöngu salat væri ekki nægileg kvöldmáltíð. Nú hefur viðhorf mitt gjörbreyst því þetta salat er orðið ein af vinsælustu máltíðunum heimilisins! Salatið lætur mjög lítið yfir sér en galdurinn við það eru vönduð og góð hráefni. Það þýðir til dæmis ekkert að nota íslenska mozzarella ostinn eða óspennandi tómata í þetta salat ef það á að vera gott. Lykilhráefnin er alvöru buffalo mozzarella osturinn sem fæst í Costco ásamt sætu og ljúffengu kokteiltómötunum sem eru á kvisti.

MOZZARELLA-BUFFALO-Mozzarella-di-Bufala-Campana-D

Buffalo mozzarella osturinn er stinnur að utan en mjúkur innan í og það er auðvelt að taka hann í sundur með fingrunum, algjört hnossgæti! Fólkið mitt er líka mjög hrifið af pestó sósunni sem fæst í Costco og hún smellpassar með þessu salati.

Sem sagt, til þess að gera hið fullkomna salat sem ég veit að slær í gegn þá kaupi ég í Costco: buffalo mozzarella, litla kvisttómata, avókadó (þessi í netinu í Costco eru rosalega góð og stór), míní paprikur og pestó sósu. Ég bæti svo við góðu grænu blönduðu káli og oftar en ekki er ég líka með parmaskinku sem gerir salatið enn matarmeira og gúrmei!

Hérna bætti ég jafnframt við granateplakjörnum sem var óskaplega gott! Sjálf set ég oft líka ótæpilegt magn af fersku kóríander út á salatið mitt en það eru víst ekki allir jafn hrifnir af kóríander og ég!

Það er misskilningur hjá mörgum að til að salat verði gott þá þurfi að setja svo mörg hráefni í salatið eða að með því setja allt sem manni þykir gott í salat þá verði það sjálfkrafa gott. Mín skoðun er að hið fullkomna salat séu fá, en jafnframt mjög góð, hráefni og allt þarf að smella saman eins og hönd í hanska! Þetta salat uppfyllir algjörlega þau skilyrði og ég hvet ykkur til að prófa!

Það er ekki verra að bera salatið fram með nýbakaða súrdeigsbrauðinu sem fæst í Costco!
sous_at_accueil

Já og nóta bene, þetta er ekki styrkt færsla af Costco, ég er bara hrifin af vönduðu hráefni! 🙂

Uppskrift:

ca. 120 g blandað salat (t.d. ruccola, spínat, rauðkálsblöð …)
5-6 míní paprikur í blönduðum lit (fást í Costco), skornar í sneiðar
1 stórt avókadó, skorið í bita (mæli með þessum í netunum í Costco)
2 kúlur buffalo mozzarella (fæst í Costco), tættar í sundur með fingrunum
ca. 300 g kokteiltómatar á kvisti (úr Costco), skornir í tvennt
100 g parmaskinka
Pestó sósa (ég mæli með Belazu Italian basil pestó úr Costco)

Salatið er sett á botninn á breiðum disk, þá er paprikunnni bætt út á salatið, því næst avókadó, svo mozzarella og tómötum. Að lokum er parmaskinkan skorin niður og dreift yfir salatið ásamt pestósósu. Borið fram með góðu brauði, t.d. steinofnsbökuðu súrdeigsbrauði.