Tillögur að páskamáltíðum


páskaNúna er páskarnir að ganga í garð. Ég held mikið upp á páskana, yndislega birtan komin aftur, vor í loftinu og gott, kvaðalaust frí. Það eina sem maður þarf að gera er að borða góðan mat og mikið súkkulaði, dásemdin ein! 🙂

Hér eru tillögur að góðum aðalréttum fyrir páskana. Svo vill til að þetta er hér um bil allt hægeldað kjöt. Það er nú ekki nein tilviljun því þannig verður kjötið svo afskapalega meyrt og gott. Eins höfum við nægan tíma um páskana til að leyfa matnum að malla hægt. Hér er svo hægt að finna uppskriftir að kartöflum á 10 vegu. Svo er ekki úr vegi að skrolla niður þennan lista og finna þar einhverja góða eftirrétti til að njóta um páskana! Gleðilega páska!

Hægeldaður lambahryggur í jólaöli.

IMG_0954

Hægeldað lambalæri

IMG_7414

Hægelduð nautalund

img_7387

Kalkúnn

IMG_0796

Ofnbakaður þorskur með pistasíusalsa

þorskur

Hægeldað kálfa ribeye með rauðvínssveppasósu

ofnbakaðar1

Auglýsingar

Kartöflur á 10 vegu


Um daginn ákváðum við nokkrir matarbloggarar að hittast og fara út að borða saman. Auk mín var það Albert hjá Albert eldar, Berglind hjá Gulur, rauður, grænn og salt, Ragnar Freyr hjá Læknirinn í eldhúsinu, Svava hjá Ljúfmeti, Thelma hjá Freistingar Thelmu og Eva Laufey hjá EvaLaufeyKjaran. Þið getið rétt ímyndað ykkur valkvíðann þegar sjö matarbloggarar ætla að ákveða veitingastað, matur skiptir okkur nefnilega frekar miklu máli! 🙂 Fljótlega kom MAT BAR upp í umræðunni, nýr veitingastaður sem hefur bæst við nýkomnu veitingahúsaflóruna á Hverfisgötu. Albert hafði farið þangað áður, en hann er duglegur að taka út veitingahús bæjarins. Þegar hann sagði okkur að þessi veitingastaður hefði strax farið upp í topp þrjú sætin í hans bókum þá gátum við ekki beðið eftir að prófa! Það er skemmst frá því að segja að við áttum frábæra kvöldstund saman. Það er æðisleg stemmning á Matbar, staðurinn sérstaklega vel heppnaður í hönnun en það allra mikilvægasta, maturinn stórkostlegur! Hér er hægt að lesa nánari úttekt hjá Alberti um þennan frábæra stað. Það er svo skemmtilegt hvernig Hverfisgatan er að verða ein mest spennandi og besta veitingahúsagata borgarinnar, ekki hefði mann grunað það fyrir nokkrum árum! 🙂 Næst á dagskrá hjá hópnum er að hittast seinna í vor í eldhúsi læknisins, honum Ragnari Frey, og elda saman. Það verður eitthvað! 🙂

Desktop

Recently Updated

Frábær matur í yndislegum félagsskap!

Hér að neðan hef ég tekið saman 10 góðar kartöfluuppskriftir. Ég elska kartöflur og finnst alltaf gaman að breyta til í matreiðslunni á þeim. Manni hættir oft til að festast í sama meðlætinu og matreiða það á sama hátt. Hér eru tíu tillögur að gómsætum kartöflum sem gætu  sæmt sér vel með hátíðarmatnum um páskana sem færast óðfluga nær! 🙂

Krumpaðar kartöflur

krumpaðar 

 Uppskrift:

  • 60 gr. smjör
  • 1 kg kartöflur
  • maldon salt
  • nýmalaður svartur pipar.

Þvoið kartöflurnar vel með hýðinu á. Hitið smjörið í potti. Látið kartöflurnar út í og steikið í nokkrar mínútur, gætið þess að hafa hitann ekki of háan. Kryddið með salti og pipar. Lækkið hitann og látið steikjast áfram í um það bil 40 mín undir loki (fer eftir stærð og fjölda), hristið pottinn vel öðru hverju.

Kartöflur í kryddi

 kryddaðar

 Uppskrift:

  • 1 kg kartöflur
  • 40 g furuhnetur
  • 2 hvítlauksrif
  • 1 búnt basilika
  • 1 búnt steinselja
  • 1 tsk. salt
  • 2 msk ólífuolía

Sjóðið kartöflurnar í saltvatni í 20 mín og sigtið síðan. Setjið hnetur, krydd og olíu í matvinnsluvél og maukið. Blandið svo saman heitar kartöflurnar. Einnig má blanda saman við brytjaðar kartöflur og baka í ofni í 45 mín.

  

Parmesanristaðar kartöflur

 parmesan

 Uppskrift:

  • 700 g kartöflur
  • 3 msk ólífuolía
  • 60 g ferskur parmesan, rifinn fínt
  • ca 1 1/2 tsk maldon salt
  • grófmalaður svartur pipar
  • 1 tsk paprikukrydd

Ofn hitaður í 220 gráður við undir- og yfirhita. Kartöflurnar þvegnar vel og skornar í bita á þennan hátt (mér finnst best að hafa hýðið með). Parmesan osti og kryddi blandað saman. Kartöflunum er velt upp úr olíunni og svo blandað vel saman við parmesanblönduna. Kartöflunum er síðan raðað á ofnplötu klædda bökunarpappír, dreift vel úr þeim. Bakað í ofni í 30-40 mínútur, mikilvægt er að snúa við kartöflunum 2-3svar á meðan þær eru í ofninum. 

Hasselback kartöflur

hasselback

 Uppskrift:

  • 8 stórar kartöflur
  • 50 gr. smjör + 25 gr. bætt við þegar kartöflurnar eru í ofninum
  • 2 msk. ólífuolía
  • Maldon salt.

Hitið bakarofn í 220 gráður. Kartöflur þvegnar eða skrældar (ég mæli með að hafa hýðið á, mikið betra!) Raufar skornar í kartöflurnar með nokkra millimetra millibili. Skera skal djúpt niður en þó ekki þannig að kartaflan detti í sundur. Smjör og olía brædd saman í potti. Kartöflum raðað í ofnskúffu og smjörinu og olíunni hellt yfir kartöflurnar. Snúið kartöflunum nokkrum sinnum og veltið þeim þannig vel upp úr smjörinu. Stráið Maldon salti yfir kartöflurnar. Setjið í ofn og bakið í ca. 50 – 60 mínútur, fer eftir stærð kartaflanna, eða þar til þær eru gullinbrúnar. Þegar bökunartímin er rúmlega hálfnaður hafa kartöflurnar opnað sig aðeins og þá er gott að bæta við smá smjörklípu ofan á hverja kartöflu.

Chili kartöflur með papriku

 papriku

 Uppskrift:

  • 2 rauðar paprikur sneiddar gróft
  • 600 gr. kartöflur
  • 2 hvítlauksgeirar, hakkaðir fínt
  • 2-3 msk ólífuolía
  • 1 tsk. Sambal Oelek (chilimauk)
  • 1 tsk. paprikuduft
  • maldon salt og nýmalaður pipar

Bakarofn hitaður í 220 gráður. Kartöflur skrældar eða þvegnar og því næst skornar í helminga (eða báta ef þær eru mjög stórar) og lagðar í eldfast mót með paprikunni. Sambal oelek, ólífuolíu og hvítlauk hrært saman og dreift yfir. Kryddað með salti og pipar og smá skvettu af ólífuolíu helt helt yfir. Hitað í ofni í ca. 30 mínútur eða þar til kartöflurnar eru tilbúnar.

 

Brúnaðar kartöflur

 brúnaðar

Uppskrift:

  • 35 gr smjör
  • 100 gr sykur
  • 0,25 dl rjómi
  • 1 kíló kartöflur

Kartöflur soðnar og afhýddar. Smjör og sykur hitað á pönnu þar til blandan hefur bráðnað og dökknað þá er kartöflunum bætt út í. Rjómanum bætt við og kartöflunum vellt upp úr bráðinni á fremur háum hita þar til þær eru allar sykurhúðaðar jafnt. 

 

Kartöflugratín f. 8-10

gratíngratíngratín1

 Uppskrift:

  • ca 1,5 kíló kartöflur
  • 4 dl rjómi
  • 4 dl mjólk
  • hálfur rauðlaukur, skorin í strimla
  • 3 hvítlauksrif, söxuð smátt
  • 1 grænmetisteningur
  • Töfrakrydd, salt og pipar
  • rifinn ostur

Kartöflurnar skolaðar vel (gott að hafa hýðið á) og svo skornar í skífur, sumir vilja hafa þær næfurþunnar, mér finnst best að hafa þær ca 1 cm á þykkt. Hvítlaukur og laukur skorinn niður. Mjólk og rjómi settur í stóran pott ásamt hvítlauk, lauk, grænmetisteningi og kryddi. Ég nota Töfrakrydd frá pottagöldrum, það er góð kryddjurtablanda með cheddar osti sem hentar vel en það er hægt að nota hvaða krydd sem hugurinn girnist. Sjóðið við vægan hita í 15-20 mínútur (fer svolítið eftir þykkt kartaflanna), eða þar til þær eru orðnar vel mjúkar. Hellið kartöflublöndunni í eldfast mót, dreifið rifnum osti yfir og hitið í ofni við 200 gráður í 20-25 mínútur eða þar til osturinn er bráðnaður og orðin gullinbrúnn.

 

Kartöflustappa með beikoni

stappa

Uppskrift:

  • 1 kg kartöflur
  • 200 g beikon
  • 3 dl matreiðslurjómi eða nýmjólk
  • 50 g smjör
  • salt og pipar

Kartöflurnar eru soðnar, flysjaðar, settar í pott og stappaðar vel. Beikonið er skorið í litla bita og steikt þar til það er stökkt.  Við vægan hita er smjöri, rjóma (eða mjólk) hrært saman við stöppuna ásamt 200 g af steiktum beikonbitum. Kryddað með salti og pipar.

 

Ofnbakaðar kryddjurtakartöflur

ofnbakaðarofnbakaðar1 

Uppskrift:

  • 1 kíló meðalstórar kartöflur (af svipaðri stærð)
  • 1 msk ólífuolía
  • 1 msk smjör
  • 15 g fersk basilika
  • 15 g fersk flatblaða steinselja
  • maldon salt og nýmalaður pipar

Ofn hitaður í 220 gráður við undir- og yfirhita. Kartöflurnar eru þvegnar, þerraðar og skornar í tvennt. Þá er þeim velt upp úr ólífuolíu, salti og pipar. Ofnplata smurð með smjöri og kartöflunum raðað á plötuna með skornu hliðina niður. Því næst eru þær hitaðar í ofni í 25-30 mínútur eða þar til kartöflurnar eru orðnar mjúkar í gegn og hafa tekið góðan lit. Á meðan er basilika og steinselja söxuð smátt og sett í skál ásamt 1 matskeið af smjöri. Þegar kartöflurnar koma úr ofninum eru þær strax settar í skálina og blandað vel saman við smjörið og kryddjurtirnar. Kryddað með salti og pipar eftir smekk.

  

Steiktar kartöfluskífur:

skífur 

Uppskrift:

  • kartöflur
  • smjör og ólífuolía
  • salt & pipar
  • annað krydd (t.d. rósmarín, timjan)

Kartöflurnar þvegnar vel (ekki afhýddar) og skornar í fremur þykkar skífur. Skífurnar eru forsoðnar í nokkrar mínútur og vatnið látið renna vel af skífunum. Smjörið og ólífuolían hituð á pönnu og kartöflurnar steiktar upp úr kryddinu og olíunni við meðalhita og þeim snúið oft þar til allar skífurnar eru steiktar í gegn.

Brownies með söltu karamellukremi og lakkrís


IMG_4899

Ég hef undanfarið verið að vinna nokkrar uppskriftir fyrir lítið fjölskyldufyrirtæki sem heitir Urta. Þau eru staðsett í fallegu og sjarmerandi húsi í hjarta Hafnarfjarðar, Gömlu matarbúðinni, þar sem þau eru að búa til skemmtileg sölt, te, jurtasýróp og kryddsultur úr íslenskum jurtum. Vörurnar þeirra fást í Gömlu matarbúðinni og  í Hagkaup í Kringlunni.

IMG_4913

Ég má til með að setja hér í safnið mitt uppskriftina af svo himneskum brownies sem ég gerði með ”fugde” seigu karamellukremi, gerðu úr Marabou súkkulaði með saltlakkrís. Ofan á kremið er svo stráð skemmtilega svörtu lava salti sem vegur ákkurat passlega vel upp á móti sæta súkkulaðinu. Þetta eru algjörlega ómótstæðilegar brownies sem fjölskyldan gat ekki hætt að borða, þær eru  hættulega góðar! 🙂

IMG_4922

Uppskriftin er fyrir fremur stórt form en það er hægt að hafa hana helmingi minni og nota þá minna form, jafnvel hringform.

Uppskrift

  • 250 g smjör
  • 
4.5 dl sykur
  • 
2 dl kakó
  • 
4 tsk vanillusykur
  • 
4 egg
  • 
3 dl hveiti

saltað “fudge” karamellukrem með lakkrís

  • 1 ½ dl rjómi
  • 200 g Marabou súkkulaði með saltlakkrís (eða suðusúkkulaði)
  • ½ tsk smjör
  • Svart lava flögusalt (frá Urtu)

Ofn stilltur á 175 gráður við undir- og yfirhita. Smjörið brætt í potti og potturinn tekinn af hellunni. Sykri, kakó, vanillusykri og eggjum bætt út í pottinn og hrært með písk. Loks er hveiti bætt út og hrært þar til deigið er orðið slétt. Ferkantað kökunarform sem er um það bil 35 x 25 cm er smurt að innan (gott að klæða formið með bökunarpappír) og deiginu hellt í formið. Bakað við 175 gráður í um það bil 20-25 mínútur (kakan á að vera dálítið blaut þegar hún er tekin út), kakan er látin kólna í forminu.

Kremið: Rjóminn er settur í pott og látinn ná suðu, þá er slökkt undir pottinum. Súkkulaðinu og smjörinu er bætt út í pottinn og látið bráðna, hrært í pottinum á meðan. Þá er kreminu hellt í skál og kælt í ísskáp þar til kremið er passlega þykkt (tekur um það bil 1-2 klukkustundir). Kreminu er dreift yfir kökuna og hún sett í kæli ef að kremið þarf að stífna meira. Áður en kakan er borin fram er saltflögunum stráð yfir hana. Þessi kaka er helst góð nokkra daga.

IMG_4896IMG_4921IMG_4930

Smjördeigskörfur með ís-rjóma, banönum, Daim og Nutella.


IMG_4738

Ég elska góða eftirrétti sem eru fljótgerðir. Ég er með nokkrar uppskriftir að eftirréttum sem ég nota oftar en aðrar þegar ég hef lítinn tíma til að undirbúa matarboð. Núna bætist þessi uppskrift klárlega í þann hóp, hrikalega góður eftirréttur sem tekur skotstund að gera. Ég er vandræðalega hrifin af smjördegi og kaupi það yfirleitt tilbúið frosið. Það tekur bara örfáar mínútur að þiðna eftir að plöturnar eru teknar í sundur og þá er hægt að búa til allskonar dásemdir úr því.

IMG_4695

Á myndunum sést nýjasta viðbótin í eldhúsið mitt. Þetta eru dásemdar vörur frá Willamia fyrir eldhúsið, Knit Factory. Það er hægt að fá dúka, tuskur, eldhúshandklæði, svuntur og margt fleira ofboðslega flott í þessari línu.

IMG_4750

Hér að ofan sést t.d. dásamlegi löberinn sem prýðir eldhúsborðið mitt. 🙂

En aftur að uppskriftinni. Hráefnin eru fá en smellpassa svo vel saman, bananar, rjómi, Daim og Nutella getur aldrei klikkað! 🙂 Ég notaði fremur stór muffinsform en það er auðvelt að aðlaga stærðina bara eftir þeim formum sem maður á heima.

IMG_4699

Uppskrift (6 stórar smjördeigskörfur)

  • 3 plötur smjördeig
  • örlítið hveiti
  • 2.5 dl rjómi
  • 1-2 dl vanilluís, látinn bráðna dálítið (má sleppa)
  • 2-3 bananar, skornir í sneiðar
  • 4 lítil Daim, söxuð smátt
  • ca. 1 dl Nutella

IMG_4703

Ofn hitaður í 200 gráður. Smjördeigsplötunum þremur er skipt í tvennt og þær allar flattar vel út með kökukefli á hveitistráðu borði. Stór muffinsform klædd að innan með útflöttu smjördegi og bakað í um það bil 12 mínútur við 200 gráður eða þar til smjördegið er orðið gullinbrúnt. Á meðan er rjóminn þeyttur. Það er rosalega gott að bæta við bráðnuðum vanilluís út í rjómann þegar hann er næstum fullþeyttur en þvi má sleppa. Því næst er banönum blandað saman við þeytta rjómann og helmingnum af saxaða Daim súkkulaðinu. Þegar smjördegið er tilbúið er það látið kólna (kólnar mjög fljótt), hver karfa síðan fyllt með banana/Daim-rjóma og restinni af Daim súkkulaðinu er stráð yfir. Loks er Nutella hitað í örbylgjuofni í ca. 30 sekúndur eða þar til auðveldlega er hægt að dreifa því yfir smjördeigskörfurnar.

IMG_4716

IMG_4742IMG_4723IMG_4708IMG_4769

Rice Krispies turn


img_4688

Það er afar algengt og vinsælt að bjóða upp á Rice Krispies turna í til dæmis fermingarveislum og skírnarveislum. Oft og tíðum eru Rice Krispies turnarnir hugsaðir sérstaklega fyrir yngstu gestina en ég hef tekið eftir því að hér um bil allir fullorðnir fá sér líka bita enda er svona Rice krispies biti mikið sælgæti. Hráefnið í Rice Krispies turn er ódýrt og það er auðvelt og fremur fljótgert að búa hann til. Það eina sem gæti staðið manni fyrir þrifum er að það þarf að nota sérstök form fyrir turninn, kransakökuform. Ég var svo heppin að græða gamalt og gott danskt kransakökuform frá mömmu vinkonu minnar sem var að losa sig við dót í flutningum. En ég veit að formin eru til sölu í mörgum búsáhaldaverslunum og kosta í kringum 5-6000 krónur þegar þetta er skrifað, prófið bara að gúggla kransakökuform til að finna út hvar þau eru seld.

img_4638

Ég hef prófað nokkrar uppskriftir að Rice Krispies og hef fundið það út að mér finnst langbest að nota Bónus hjúpsúkkulaði á móti Pralin karamellufylltu súkkulaði. Nú nota ég almennt súkkulaðihjúp ekki mikið, kýs yfirleitt að nota vandað suðusúkkulaði, en einhverra hluta vegna passar þetta hjúpasúkkulaði svo vel í Rice Krispies uppskriftina, það gefur voðalega góðan karamellukeim. Ég nota yfirleitt dökka hjúpsúkkulaðið en hef stundum notað eina ljósa plötu á móti tveimur dökkum.

img_4618

Það eru nokkrir hlutir sem er gott að hafa í huga við turnagerðina. Kransakökuformin eru með þremur hringum hvert en það er of þétt að nota þau öll samtímis. Það er því best að nota ysta og innsta hringinn fyrst og gera svo miðjuhringina eftir á. Annað er að þegar losað er um hringina þá hjálpar til að klæða fyrst formin plastfilmu. Ég hef stundum sleppt plastfilmunni og losa bara varlega um hringina með hníf og það hefur alltaf gengið vel.

img_4640

En ég mæli samt með plastfilmunni til að komast örugglega hjá því að hringirnir brotni þegar þeir eru losaðir. Það þarf líka að huga að stærðunum á hringjunum, þ.e. að vera viss um að maður sé að raða þeim í réttri stærðarröð í turninn. Þegar turninn er settur saman þá finnst mér ekki gott að hafa alltof mikið brætt súkkulaði á milli hringjanna og ég reyni því að nota lítið magn af brædda súkkulaðinu. Það hefur alltaf gengið vel hjá mér því hringirnir eru frekar klístraðir af sírópinu og þegar turninn fer svo í frysti þá finnst mér hann alltaf festast mjög vel saman. En þetta er smekksatriði og ég sé oft að margir nota mikið af bræddu súkkulaði á milli hringjanna, það þéttir jú líka turninn upp á útlitið að gera. En ég vil nota minna af bræddu súkkulaði til þess að Rice Krispies hringirnir njóti sín betur upp á bragðið að gera. Þarna þarf maður kannski að vega og meta útlitið/stöðugleikann á móti bragði.

img_4652

Ég nota þessa uppskrift fyrir 18 hringja turn og hún rétt sleppur fyrir þá stærð. Það er hins vegar misjafnt hversu þykka og þétta hringi fólk gerir. Ég mæli því með að þið að þið annað hvort endið á að móta stærstu hringina (og gerið þá færri hringi en 18 ef uppskriftin dugir ekki) eða aukið aðeins við uppskriftina ef þið viljið vera örugg á magninu.

Ein hugmynd sem ég vil koma á framfæri er að ég gerði eitt sinn svona turn fyrir fermingarveislu og það var bara gert ráð fyrir fyrir einum turni og því bara til skreytingar fyrir einn turn. Á síðustu stundu fóru veisluhaldara að hafa áhyggjur yfir því að einn turn myndi ekki duga. Ég gerði því eina og hálfa uppskrift og gerði einn og hálfan turn. Ég mótaði 8 eða 9 hringja turn úr minnstu hringjunum og hafði hann inni í 18 hringja turninum þannig að þegar hann var hálfnaður í veislunni þá kom annar minni turn í ljós inni í hinum. Það getur verið sniðug lausn ef maður er ekki öruggur með að einn turn dugi en finnst tveir of margir.

img_4663

Uppskrift:

  • 300 g Bónus hjúpsúkkulaði (dökkt)
  • 200 g Pralín karamellufyllt súkkulaði
  • 454 g síróp í grænu dósinni (lítil)
  • 160 g smjör
  • 300 g Rice Krispies
  • 100-200 g dökkt hjúpsúkkulaði eða suðusúkkulaði til að festa hringina saman
  • skreytingar á turninn
  • (gott er að nota silikonhanska og Pam sprey þegar hringirnir eru mótaðir)

Kransakökuformin eru klædd með plastfilmu. Hjúpsúkkulaði og Pralín súkkulaði er brytjað ofan í pott ásamt sírópi og smjöri. Allt brætt við meðalhita og hrært í á meðan (blandan má alls ekki brenna). Þegar blandan er orðin þykk og karamellukennd er henni blandað mjög vel saman við Rice Krispies (gætið þess að það verði engar ”skellur” eftir, þ.e. súkkulaðilaust Rice Krispies inn í miðri blöndunni).

img_4620+img_4625

img_4629

img_4634

Á meðan blandan er enn heit eru hringirnir mótaðir í formin, einungis ysti og innri hringurinn í fyrstu umferðinni. Gott er að móta hringina með fingrunum og það er gott að vera með silikon hanska og Pam sprey til þess að forðast að blandan festist ekki við fingurnar. Mér finnst gott að reyna að hafa hringina dálítið slétta að ofan þannig að þeir leggist síðar vel saman. Það er jafnvel hægt að leggja eitthvað þungt ofan á hringinga, t.d. bók (með smjöpappír á milli) til að ná jöfnu og flötu formi. Hringirnir eru svo settir í frysti í 10-15 mínútur. Þá eru hringirnir losaðir varlega, settir á bökunarpappír og geymdir áfram í frysti á meðan miðjuhringirnir eru mótaðir og frystir í ca. 15 mínútur. Því næst er súkkulaðið, sem notað er til að festa hringina saman, brætt í örbylgjuofni. Hringirnir eru teknir úr frysti, lagðir á bökunarpappír og raðað í stærðarröð. Stærsti hringurinn er lagður á disk, það er gott að bera dálítið brætt súkkulaði undir hringinn til að hann festist á disknum. Þá er dálítið brætt súkkulaði borið á hringinn, næsti lagður á og svo koll af kolli. Það getur þurft að bræða súkkulaðið aftur ef það fer að storkna. Hér skreytti ég turninn með fiðrildum (úr Allt í köku) og ég festi þau með bræddu súkkulaði.

img_4643

img_4667

img_4679

 

Ostakaka með hvítu súkkulaði og mangó


img_4601

Ég held að ég geti með fullvissu sagt að ostakaka er uppáhalds eftirrétturinn minn. Ég er ekki ein um það. Hér á heimilinu hefur nefnilega ríkt ostakökuæði, allir í fjölskyldunni elska ostakökur! Við höfum aldeilis gert vel við okkur undanfarið því ég hef bakað þrjár ostakökur á jafnmörgum vikum. Meira að segja elsta dóttirinn, sem er að jafnaði ekki hrifin af kökum, finnst ostakökur æðislegar. Fyrstu tvær ostakökurnar sem ég bakaði voru okkar uppáhalds, bökuð ostakaka með hindberjum, algjört sælgæti. Núna síðast ákvað ég hins vegar að gera smá tilraun, nota eftirlætishráefnin mín,  mangó og hvítt súkkulaði, en hafa ostakökuna ekki bakaða heldur bara kælda með matarlími. Þessi ostakaka sló ekki síður í gegn hjá fjölskyldunni og það hefur verið tilhlökkunarefni okkar Elfars að gæða okkur á einni sneið á kvöldin þessa vikuna. Þessi ostakaka verður nefnilega betri með hverjum deginum og ég held svei mér þá að bitinn í kvöld, á fjórða degi, hafi verið bestur! Ég mæli sannarlega með þessari köku! 🙂

img_4616

Uppskrift:

Botn:

  • 250 gr Digestive kex
  • 100 gr smjör
  • 2 tsk kanill

Fylling:

  • 2 dl rjómi
  • 600 gr Philadelphia rjómaostur
  • 1 dós sýrður rjómi
  • 2 dl flórsykur
  • 2 tsk vanillusykur
  • 100 g hvítt súkkulaði
  • 5 blöð matarlím matarlím
  • 1 límóna (lime) – safi og börkur
  • 1 msk vatn

Ofan á:

  • 2 blöð matarlím
  • 250 g mangó (frosið eða ferskt)
  • 1 límóna (lime)
  • 1 msk vatn

Aðferð:

Botn: Smjör brætt og kex mulið í matvinnsluvél eða mixer og því blandað saman við smjörið og kanil. Sett í bökunarform með lausum botni og blöndunni þrýst i í botninn og aðeins upp í hliðar á forminu. Botnin er settur í kæli á meðan fyllingin er búin til.

Fylling: Rjómi þeyttur og lagður til hliðar. 5 matarlímsplötur eru settar í kalt vatn í minnst 5 mínútur, þær eiga að verða mjúkar og þykkar. Rjómaosturinn, sýrði rjóminn, flórsykur og vanillusykur er hrært saman í hrærivél. Hvíta súkkulaðið er saxað niður og brætt varlega í örbylgjuofni eða yfir vatnsbaði, því er svo bætt út í rjómaosblönduna. Safinn úr límónu ásamt 1 msk af vatni er sett í pott og hitað. Matarlímsblöðin eru tekin úr vökvanum, vatnið kreist úr þeim og þau sett út í heitan vökvann. Hrært þar til matarlímið hefur bráðnað saman við vökvann. Þá er matarlímsblöndunni hellt út í rjómaostablönduna. Því næst er þeytta rjómanum bætt út í og hrært í stutta stund. Börkurinn af límónunni er rifinn fínt (þess gætt að fara ekki ofan í hvíta lagið undir því græna) og honum bætt út að síðustu. Blöndunni er hellt ofan á botninn og kakan kæld í minnst 4 klukkustundir áður en mangóið er sett ofan á.

Ofan á: þegar kakan hefur stífnað nægilega eru 2 matarlímsblöð sett í kalt vatn í minnst 5 mínútur. Mangóið er afþýtt, ef það er frosið, og svo maukað í matvinnsluvél eða með töfrasprota. Safinn úr límónunni ásamt vatninu er sett i pott og hitað. Matarlímsblöðin eru tekin úr vökvanum, vatnið kreist úr þeim og þau sett út í heitan vökvann. Hrært þar til matarlímið hefur bráðnað saman við vökvann. Þá er matarlímsblöndunni hellt út í maukaða mangóið og því svo dreift yfir ostakökuna, hún er síðan kæld. Ostakakan er best daginn eftir að hún hefur verið gerð og batnar bara með hverjum deginum.

img_4607img_4611

 

Þorskur með fetaosti, ólífum og tómötum.


img_3975

Eins og mér finnst gaman að standa og dunda mér í matarstússi um helgar og á öðrum frídögum þá finnst mér að matargerðin eigi að ganga fljótt og einfaldlega fyrir sig á virkum dögum. En maturinn verður samt alltaf að vera góður, lífið er alltof stutt fyrir vondan mat! 😉 Þess fyrir utan er ég stöðugt að reyna að hafa kvöldmatinn tilbúinn upp úr klukkan 18 en það gengur misvel. Einn af stóru kostunum við fiskrétti, fyrir utan það hvað íslenski fiskurinn er ofboðslega ljúffengur, er hversu auðveldir og fljótlegir þeir eru í matreiðslu. Þessi dásamlega góði fiskréttur eldar sig næstum því sjálfur skal ég segja ykkur og gómsætur er hann líka! 🙂

Uppskrift: 

  • 900 g þorskhnakkar eða þorskflök (hægt að nota annan góðan hvítan fisk)
  • salt & pipar
  • ítalskt hvítlaukskrydd (eða annað gott krydd)
  • ca. 1 msk ólífuolía
  • 1 dós tómatar með basiliku
  • 2-3 hvítlauksrif, pressuð
  • 2 tsk grænmetiskraftur
  • ca. 15 g steinselja, söxuð smátt
  • ca. 15 g basilika, söxuð smátt
  • 1/2 fetaostkubbur (ca 125 g)
  • 250 g kokteiltómatar, skornir niður
  • ca. 20 svartar ólífur, saxaðar gróft

img_3972

Ofn hitaður í 180 gráður við undir- og yfirhita. Þorskurinn er kryddaður vel (og ef notuð eru flök þá eru þau skorin í hæfilega bita) og honum raðað í eldfast mót. Ólífuolíunni er dreift yfir fiskinn. Tómatar í dós eru látnir malla á pönnu ásamt hvítlauki, grænmetiskrafti, steinselju og basiliku. Látið malla í nokkrar mínútur við meðalhita, sósunni er síðan hellt yfir fiskinn. Því næst er fetaosti, kokteiltómötum og ólífum dreift yfir. Bakað í ofni við 180 gráður í 15-20 mínútur (fer eftir þykkt fisksins) eða þar til fiskurinn er eldaður í gegn.

img_3978img_3979

Caprese kjúklingur


img_3587

Í þessu vorveðri sem ríkt hefur undanfarið höfum við fjölskyldan verið upptekin af því að hugleiða hvernig við viljum verja sumarfríinu. Það varð ofan á að prófa húsaskipti. Við höfum reyndar gert húsaskipti allavega sex sinnum áður en þá alltaf við vinafólk. Núna skráðum við okkur á alþjóðlega húsaskiptasíðu. Þegar við skoðuðum heimilin á síðunni, sem eru út um allan heim, þá leið okkur dálítið eins og að koma að hlaðborði sem svignar af kræsingum. Það var um svo ótal margt að velja, marga áfangastaði og margskonar hús. Ég lá yfir síðunni kvöld eftir kvöld, skoðaði og spekúleraði. Eftir að hafa spáð í flug og fleira fórum við að senda öðrum fjölskyldum boð um skipti. Eftir ýmisskonar samningaviðræður enduðum við á því að festa húsaskipti við indæla fjölskyldu í Montpellier í Suður-Frakkalandi. Við munum eyða þar rúmum tveimur vikum í fallegu húsi með sundlaug. Á leiðinni heim ætlum við að stoppa nokkra daga í París og erum búin að bóka Airbnb íbúð þar. Við erum ákaflega spennt fyrir væntanlegu ferðalagi og hlökkum mikið til! 🙂

En að uppskrift dagsins sem er ofsalega einfaldur og góður kjúklingaréttur. Caprese er þekktur ítalskur réttur, oftast forréttur, með ferskum mozzarellaosti, tómötum, basiliku, ólífuolíu, salti og pipar. Hér eru þessi hráefni notuð með kjúklingi og úr verður fljótgerður og gómsætur kjúklingaréttur.

Uppskrift:

  • 4 kjúklingabringur
  • Pasta Rossa krydd frá Santa Maria (eða annað gott krydd)
  • salt & pipar
  • 2 msk ólívuolía
  • 4 hvítlauksrif (pressuð)
  • 250 g kokteiltómatar, skornir í tvennt
  • 1 msk balsamedik
  • ca. 20-30 g fersk basilika, laufin söxuð gróft.
  • 240 g ferskur mozzarella ostur (2 kúlur), skorinn í fremur þunnar sneiðar

Kjúklingabringurnar kryddaðar með pastakryddinu, salti og pipar. Um það bil 1 msk af olíu er hituð á pönnunni og kjúklingurinn steiktur báðum megin þar til hann hefur fengið góða steikingarhúð og er hér um bil steiktur í gegn. Þá eru kjúklingabringurnar veiddar af pönnunni og settar til hliðar. Því næst er 1 msk af olíu bætt á pönnuna og tómatar og hvítlaukur látið malla í ca. 5 mínútur ásamt balsamediki. Nú er basiliku bætt á pönnuna auk þess sem kjúklingabringurnar eru settar aftur á pönnuna. Mozzarellasneiðunum er raðað ofan á kjúklingabringurnar. Lok er sett á pönnuna og öllu leyft að malla í nokkrar mínútur þar til að kjúklingurinn er fulleldaður og osturinn hefur bráðnað. Saltað og piprað við þörfum.

img_3572img_3583img_3591

 

Fetaostabuff í rjómasósu með karamelluseruðum lauki


img_4261

Ég tók eftir því um daginn að gömul uppskrift héðan af Eldhússögum er farin á flug á Facebook, Ostafylltur kjöthleifur, henni hefur verið deilt nokkur þúsund sinnum upp á síðkastið. Ég hef ekki búið til þennan rétt í nokkur ár, mundi ekkert hvernig hann bragðaðist og lék forvitni á að vita hvers vegna uppskriftin væri orðin svona vinsæl. Varla gat það verið vegna myndanna því þær eru ekkert voðalega girnilegar, það er nefnilega frekar erfitt að taka girnilegar nautahakksmyndir! 🙂  Ég prófaði að elda þennan rétt í kvöld og það rifjaðist upp hversu góður hann er en ekki síður hversu einfaldur hann er. Ég gerði mér lífið enn auðveldara og sleppti lauknum í hakkinu, kryddaði bara meira í staðinn. Sósan er ægilega góð en ég bætti um betur og setti nautakraft í sósuna sem mér fannst gera mikið, ég uppfærði uppskriftina og bætti inn nautakraftinum.

Nautahakk er svo sniðugt því það er hægt að elda svo ótal mismunandi rétti úr því. Um daginn gerði ég þessi fetaostabuff með hrikalega góðri lauksósu, ég elska svona heimilismat eða ”husmanskost” eins og Svíarnir kalla hann! 🙂

img_4262

Uppskrift:

  • 800 g nautahakk
  • smör til steikingar
  • 1 egg
  • 2/3 dl brauðmylsna
  • 2-3 hvítlauksrif, pressuð
  • 2 tsk oreganokrydd
  • 150 g fetaostur (kubbur)
  • 2 msk fersk blaðsteinselja, söxuð smátt
  • salt og pipar

Sósa:

  • 2 – 3 gulir laukar, skorinn í sneiðar
  • ca. 30 g smjör
  • 2 msk hveiti
  • 3 dl vatn
  • 3 dl rjómi
  • salt og pipar

Ofn hitaður í 160 gráður. Hráefnunum fyrir buffin er blandað vel saman í höndunum og mótuð ca.7 buff. Smjör brætt á pönnu og buffin steikt vel báðum megin þar til góð steikingarhúð hefur náðst. Þá er buffin færð yfir í eldfast mót og sett inn í 170 gráðu heitan ofn á meðan sósan er útbúin. Smjörinu fyrir sósuna er því næst bætt út á sömu pönnu. Þá er laukurinn steiktur á pönnunni við fremur lágan til meðalhita í minnst 15-20 mínútur (því lengur því betra), hrært reglulega í lauknum. Því næst er hveitinu sáldrað yfir laukinn og vökvanum bætt út í smátt og smátt á meðan hitinn er hækkaður undir pönnunni og hrært stöðugt. Kryddað með salti og pipar. Ef sósan er of þunn er hún þykkt með sósujafnara.

Buffin eru borin fram með lauksósunni, soðnum kartöflum eða kartöflumús, grænmeti og góðri sultu.

img_4266img_4259

Hægelduð nautalund


img_7387img_8178

Ljúfir jóladagar eru liðnir sem voru dálítið sérstakir fyrir þær sakir að þetta voru fyrstu jól okkar fjölskyldunnar í nýja húsinu. Það er ólíkt rúmbetra heldur en gamla húsið okkar en það hús var hins vegar alltaf ákaflega notalegt þrátt fyrir smæðina. Við erum afar ánægð með að hafa tekist að gera þetta stóra hús ekki síður heimilislegt og það var gott að vera hér um jólin og geta til dæmis haldið 20 manna jólaboð án nokkurra vandkvæða.

fullsizerender

Árið 2016 var viðburðarríkt og einkenndist af miklum framkvæmdum og flutningum. Þessa dagana erum við oft að rifja upp þegar við fjölskyldan, á gamlárskvöldi í fyrra, skutumst upp í hús rétt fyrir miðnætti. Við klofuðum yfir spýtur og verkfæri til þess að komast upp á efstu hæð og horfa á útsýnið út úr nýja húsinu á miðnætti.

fullsizerender-2

Þá var búið að rífa bókstaflega allt út úr húsinu og meira að segja saga úr stóran hluta af útveggjunum þannig að það var erfitt að ímynda sér að þetta yrði nokkurn tímann notalegt heimili. Það er því alltaf jafn skemmtilegt og í raun ótrúlegt að virða fyrir sér breytingarnar.

eldhusfrastofuimg_2181IMG_0825img_2179IMG_0820img_2177img_3459img_3460img_3461img_3462img_4785img_4907

img_5019

img_2186

En nú er gamlárskvöld að renna upp og ekki seinna vænna að víkja að matseldinni. Venjulega höfum við kalkún í matinn á gamlárskvöld en ég er farin að kaupa kalkúnabringur í stað þess að hafa heilan kalkún. Kalkúnabringurnar hægelda ég, geri góða sósu og allskonar gómsætt meðlæti. Að þessu sinni var ég hins vegar með kalkúnabringur í jólaboði á annan í jólum og við erum enn að borða afgangana. Við ákváðum því að breyta til fyrir gamlárskvöld og hafa eitthvað sem er líka í miklu eftirlæti hjá okkur, hægeldaða nautalund. Fyrir nokkru rakst ég á frábæra uppskrift frá Ragnari Frey, lækninum í eldhúsinu, sem ég styð mig við og síðan þá hefur nautalundin hjá mér alltaf heppnast fullkomlega. Ragnar Freyr er mikið að nota sous vide hægeldun en til þess þarf sérstakar græjur. Ég er alls ekki mikil græjumanneskja í eldhúsinu og var því afar glöð þegar ég sá að Ragnar benti á aðra frábærlega einfalda aðferð sem hægt væri að nota til þess að ná fram sömu hægelduninni. Og ég segi það og skrifa, þessi aðferð er algjörlega skotheld, nautalundinn verður fullkomlega elduð á þennan hátt! Sumir hafa áhyggjur af því að plastið fari inn í ofn. Ragnar Freyr, sem bæði er læknir og snillingur í eldhúsinu, fullyrðir það þurfi ekki að hafa áhyggjur af því þar sem það hvarfast engin efni úr plastinu við 60 gráðu hita. Með þessari lungamjúku og hægelduðu nautalund er gott að bera fram góðar kartöflur, t.d. kartöflugratín eða Hasselback kartöflur. Ég prófaði um daginn að gera Hasselback kartöflur úr sætkartöflum og mæli algjörlega með því.

IMG_2328 img_7304

Mér finnst bearnaise-sósa ómissandi með nautalundinni og er með góða uppskrift að henni hér. Ég skal hins vegar líka benda ykkur á frábæra og einfalda leið til þess að verða ykkur út um góða bearnaise-sósu til að einfalda lífið. Bestu tilbúnu bernaisesósurnar fást hjá Hamborgarabúllunni og í Seljakjör á Seljabraut (sósa sem þau búa til sjálf), mæli með þeim! 🙂

Hægelduð nautalund (f. ca. 4)

  • 1 kíló nautalund
  • 1-2 msk smjör
  • 1 msk ólífuolía
  • salt & nýmalaður svartur pipar
  • plastfilma

Ef nautalundin er frosin þá er hún látið þiðna í ísskáp í einn til tvo sólarhringa. Nokkrum tímum áður en kjötið er eldað er það tekið úr ísskáp, snyrt við þörfum og látið ná stofuhita. Bakarofn hitaður í 60 gráður við undir- og yfirhita.  1 msk ólífuolía og 1 msk smjör er sett á pönnu og látið hitna vel. Þá er kjötið kryddað með pipar og steikt við háan hita í ca. 2 mínútur á öllum hliðum. Því næst er það látið kólna í um það bil 5-10 mínútur. Bakarofn hitaður í 60 gráður við undir- og yfirhita. Nú er kjötinu vafið þétt inn í plastfilmu nokkra vafninga. Kjötmæli er stungið í kjötið (í gegnum plastið) og það sett inn í 60 gráðu heitan ofn í um það bil 3 ½ – 4 tíma eða þar til kjarnhiti kjötsins hefur náð 60 gráðum. Þá er það tekið út úr ofninum, plastið tekið af og kjötið steikt örstutta stund upp úr smjöri og ólífuolíu á heitri pönnu á öllum hliðum, kryddað með salti og meiri pipar ef með þarf. Að lokum er kjötið látið hvíla undir álpappír í minnst 15 mínútur áður en það er skorið niður. Óhætt er að láta kjötið bíða upp undir klukkustund undir álpappír og handklæði/viskastykki.

img_8165img_8171img_8172