Gulrótarkaka

Birt þann 27.9.2017 af Eldhússögur

Svara

Ég hef lengi skoðað litríkar Kitchen aid hrærivélar með stjörnur í augum og stúderað alla þá liti sem eru í boði. Ég er ekki mikið fyrir króm eða svart, er meira svona pasteltýpan. Bláu litirnir hafa alltaf höfðað mest til mín en núna, þegar kom loksins að því að velja lit, þá kolféll ég hins vegar fyrir pistasíugrænu vélinni.

Ég gæti ekki verið sáttari með nýju vélina og þennan fallega lit. Ég gat ekki beðið eftir því að nota nýju vélina og jómfrúarbaksturinn var ein af mínum uppáhaldskökum, gulrótarkaka. Ég er eiginlega jafnhrifin af gulrótarkökum og eplakökum (ég elska góðar eplakökur!) og þessi uppskrift er algjörlega skotheld. Dúnmjúk, safarík og góð gulrótarkaka sem er ákaflega einfalt að baka. Ég mæli með! 🙂

Uppskrift:

150 g gulrætur, rifnar
ca 70 g maukaður ananas (án vökva)
4 egg
4 dl sykur
2 dl matarolía
1 msk lyftiduft
2 tsk vanillusykur
2 tsk kanill
4 dl hveiti

Rjómaostakrem

200 g rjómaostur
100 g smjör, við stofuhita
4 dl flórsykur

Ofn hitaður í 180 gráður við undir- og yfirhita. Egg og sykur þeytt saman þar til létt og ljóst. Þá er matarolíu, rifnum gulrótum og maukuðum ananas bætt út í. Því næst er lyftidufti, vanillusykri, kanil og hveiti bætt út í og hrært þar til deigið er slétt. Þá er deiginu hellt í smurt form ( ca. 30 cm x 25 cm eða hringlaga form), klætt bökunarpappír. Kakan er bökuð við 180 gráður neðarlega í ofninum í ca. 40-45 mínútur. Kakan er kæld áður en kremið er sett á.

Rjómaostakrem: öllum hráefnunum er hrært saman þar til kremið verður létt og ljóst. Kremið er sett á kalda kökuna.

Kladdkaka með kókoskaramellu

Birt þann 9.7.2017 af Eldhússögur

Við stórfjölskyldan, sem er reyndar ekkert svo ofsalega stór, höfum þá hefð að hittast í sunnudagskaffi hvern einasta sunnudag. Oftast er kaffiboðið heima hjá foreldrum mínum og þangað mæta amma og afi, bræður mínir og fjölskyldur þeirra ásamt mér og mínum. Þetta er þó engin kvöð, þeir mæta bara sem geta, yfirleitt mæta þó flestir. Þetta finnst mér góð hefð því oft er það þannig að fjölskyldur eru alltaf á leiðinni að hittast en ekkert verður úr því allir eru svo uppteknir og tíminn þýtur síðan áfram án samverustunda. Stundum breytum við til og borðum saman kvöldmat á sunnudögum, þá sé ég um matargerðina. Mamma ber hins vegar hitann og þungann af kaffiboðunum þó svo að við hin komum stundum með eitthvað smávægilegt á kaffiborðið. Um daginn gerði ég þessa ljúffengu köku fyrir sunnudagskaffið sem sló í gegn og mamma meira að segja óskaði eftir því að ég bakaði hana aftur fyrir afmælið sitt skömmu seinna. Þessi kaka er algjört sælgæti, ég mæli með að þið prófið! 🙂

Uppskrift:

180 g mjúkt smjör
3 dl sykur
1 ½ dl bökunarkakó
½ dl ljós síróp
3 egg
1 ½ dl hveiti

Ofn hitaður í 175 gráður við undir/yfirhita. Smjör og sykur hrært þar til létt og ljós. Þá er kakói og sírópi bætt út í. Því næst er eggjum bætt út í, einu í senn. Að lokum er hveitinu hrært saman við. Form (ca. 25cm x 35cm) er klætt bökunarpappír og deiginu hellt í formið og dreift úr því jafnt. Þá er kakan bökuð við 175 gráður í um það bil 30 mínútur, kakan á að vera dálítið klesst. Kakan er látin kólna á meðan kókoskaramellan er útbúin.

kókoskaramella:

75 g smjör
1 ½ dl ljóst síróp
¾ dl rjómi (eða matreiðslurjómi)
2 dl sykur
200 g gróft kókosmjöl

Smjörið er brætt í potti ásamt sírópi, rjóma og sykri og látið malla í um það bil 5 mínútur. Þá er kókosmjöli bætt út í og blandan látin ná suðu. Þá er blöndunni hellt yfir kökuna (þegar hún hefur kólnað vel) og bakað áfram í 10 mínútur við 175 gráður.

Brownies með söltu karamellukremi og lakkrís

Birt þann 27.3.2017 af Eldhússögur

Ég hef undanfarið verið að vinna nokkrar uppskriftir fyrir lítið fjölskyldufyrirtæki sem heitir Urta. Þau eru staðsett í fallegu og sjarmerandi húsi í hjarta Hafnarfjarðar, Gömlu matarbúðinni, þar sem þau eru að búa til skemmtileg sölt, te, jurtasýróp og kryddsultur úr íslenskum jurtum. Vörurnar þeirra fást í Gömlu matarbúðinni og í Hagkaup í Kringlunni.

Ég má til með að setja hér í safnið mitt uppskriftina af svo himneskum brownies sem ég gerði með ”fugde” seigu karamellukremi, gerðu úr Marabou súkkulaði með saltlakkrís. Ofan á kremið er svo stráð skemmtilega svörtu lava salti sem vegur ákkurat passlega vel upp á móti sæta súkkulaðinu. Þetta eru algjörlega ómótstæðilegar brownies sem fjölskyldan gat ekki hætt að borða, þær eru hættulega góðar! 🙂

Uppskriftin er fyrir fremur stórt form en það er hægt að hafa hana helmingi minni og nota þá minna form, jafnvel hringform.

Uppskrift

250 g smjör
 4.5 dl sykur
 2 dl kakó
 4 tsk vanillusykur
 4 egg
 3 dl hveiti

saltað “fudge” karamellukrem með lakkrís

1 ½ dl rjómi
200 g Marabou súkkulaði með saltlakkrís (eða suðusúkkulaði)
½ tsk smjör
Svart lava flögusalt (frá Urtu)

Ofn stilltur á 175 gráður við undir- og yfirhita. Smjörið brætt í potti og potturinn tekinn af hellunni. Sykri, kakó, vanillusykri og eggjum bætt út í pottinn og hrært með písk. Loks er hveiti bætt út og hrært þar til deigið er orðið slétt. Ferkantað kökunarform sem er um það bil 35 x 25 cm er smurt að innan (gott að klæða formið með bökunarpappír) og deiginu hellt í formið. Bakað við 175 gráður í um það bil 20-25 mínútur (kakan á að vera dálítið blaut þegar hún er tekin út), kakan er látin kólna í forminu.

Kremið: Rjóminn er settur í pott og látinn ná suðu, þá er slökkt undir pottinum. Súkkulaðinu og smjörinu er bætt út í pottinn og látið bráðna, hrært í pottinum á meðan. Þá er kreminu hellt í skál og kælt í ísskáp þar til kremið er passlega þykkt (tekur um það bil 1-2 klukkustundir). Kreminu er dreift yfir kökuna og hún sett í kæli ef að kremið þarf að stífna meira. Áður en kakan er borin fram er saltflögunum stráð yfir hana. Þessi kaka er helst góð nokkra daga.

Rice Krispies turn

Birt þann 26.2.2017 af Eldhússögur

Það er afar algengt og vinsælt að bjóða upp á Rice Krispies turna í til dæmis fermingarveislum og skírnarveislum. Oft og tíðum eru Rice Krispies turnarnir hugsaðir sérstaklega fyrir yngstu gestina en ég hef tekið eftir því að hér um bil allir fullorðnir fá sér líka bita enda er svona Rice krispies biti mikið sælgæti. Hráefnið í Rice Krispies turn er ódýrt og það er auðvelt og fremur fljótgert að búa hann til. Það eina sem gæti staðið manni fyrir þrifum er að það þarf að nota sérstök form fyrir turninn, kransakökuform. Ég var svo heppin að græða gamalt og gott danskt kransakökuform frá mömmu vinkonu minnar sem var að losa sig við dót í flutningum. En ég veit að formin eru til sölu í mörgum búsáhaldaverslunum og kosta í kringum 5-6000 krónur þegar þetta er skrifað, prófið bara að gúggla kransakökuform til að finna út hvar þau eru seld.

Ég hef prófað nokkrar uppskriftir að Rice Krispies og hef fundið það út að mér finnst langbest að nota Bónus hjúpsúkkulaði á móti Pralin karamellufylltu súkkulaði. Nú nota ég almennt súkkulaðihjúp ekki mikið, kýs yfirleitt að nota vandað suðusúkkulaði, en einhverra hluta vegna passar þetta hjúpasúkkulaði svo vel í Rice Krispies uppskriftina, það gefur voðalega góðan karamellukeim. Ég nota yfirleitt dökka hjúpsúkkulaðið en hef stundum notað eina ljósa plötu á móti tveimur dökkum.

Það eru nokkrir hlutir sem er gott að hafa í huga við turnagerðina. Kransakökuformin eru með þremur hringum hvert en það er of þétt að nota þau öll samtímis. Það er því best að nota ysta og innsta hringinn fyrst og gera svo miðjuhringina eftir á. Annað er að þegar losað er um hringina þá hjálpar til að klæða fyrst formin plastfilmu. Ég hef stundum sleppt plastfilmunni og losa bara varlega um hringina með hníf og það hefur alltaf gengið vel.

En ég mæli samt með plastfilmunni til að komast örugglega hjá því að hringirnir brotni þegar þeir eru losaðir. Það þarf líka að huga að stærðunum á hringjunum, þ.e. að vera viss um að maður sé að raða þeim í réttri stærðarröð í turninn. Þegar turninn er settur saman þá finnst mér ekki gott að hafa alltof mikið brætt súkkulaði á milli hringjanna og ég reyni því að nota lítið magn af brædda súkkulaðinu. Það hefur alltaf gengið vel hjá mér því hringirnir eru frekar klístraðir af sírópinu og þegar turninn fer svo í frysti þá finnst mér hann alltaf festast mjög vel saman. En þetta er smekksatriði og ég sé oft að margir nota mikið af bræddu súkkulaði á milli hringjanna, það þéttir jú líka turninn upp á útlitið að gera. En ég vil nota minna af bræddu súkkulaði til þess að Rice Krispies hringirnir njóti sín betur upp á bragðið að gera. Þarna þarf maður kannski að vega og meta útlitið/stöðugleikann á móti bragði.

Ég nota þessa uppskrift fyrir 18 hringja turn og hún rétt sleppur fyrir þá stærð. Það er hins vegar misjafnt hversu þykka og þétta hringi fólk gerir. Ég mæli því með að þið að þið annað hvort endið á að móta stærstu hringina (og gerið þá færri hringi en 18 ef uppskriftin dugir ekki) eða aukið aðeins við uppskriftina ef þið viljið vera örugg á magninu.

Ein hugmynd sem ég vil koma á framfæri er að ég gerði eitt sinn svona turn fyrir fermingarveislu og það var bara gert ráð fyrir fyrir einum turni og því bara til skreytingar fyrir einn turn. Á síðustu stundu fóru veisluhaldara að hafa áhyggjur yfir því að einn turn myndi ekki duga. Ég gerði því eina og hálfa uppskrift og gerði einn og hálfan turn. Ég mótaði 8 eða 9 hringja turn úr minnstu hringjunum og hafði hann inni í 18 hringja turninum þannig að þegar hann var hálfnaður í veislunni þá kom annar minni turn í ljós inni í hinum. Það getur verið sniðug lausn ef maður er ekki öruggur með að einn turn dugi en finnst tveir of margir.

Uppskrift:

300 g Bónus hjúpsúkkulaði (dökkt)
200 g Pralín karamellufyllt súkkulaði
454 g síróp í grænu dósinni (lítil)
160 g smjör
300 g Rice Krispies
100-200 g dökkt hjúpsúkkulaði eða suðusúkkulaði til að festa hringina saman
skreytingar á turninn
(gott er að nota silikonhanska og Pam sprey þegar hringirnir eru mótaðir)

Kransakökuformin eru klædd með plastfilmu. Hjúpsúkkulaði og Pralín súkkulaði er brytjað ofan í pott ásamt sírópi og smjöri. Allt brætt við meðalhita og hrært í á meðan (blandan má alls ekki brenna). Þegar blandan er orðin þykk og karamellukennd er henni blandað mjög vel saman við Rice Krispies (gætið þess að það verði engar ”skellur” eftir, þ.e. súkkulaðilaust Rice Krispies inn í miðri blöndunni).

Á meðan blandan er enn heit eru hringirnir mótaðir í formin, einungis ysti og innri hringurinn í fyrstu umferðinni. Gott er að móta hringina með fingrunum og það er gott að vera með silikon hanska og Pam sprey til þess að forðast að blandan festist ekki við fingurnar. Mér finnst gott að reyna að hafa hringina dálítið slétta að ofan þannig að þeir leggist síðar vel saman. Það er jafnvel hægt að leggja eitthvað þungt ofan á hringinga, t.d. bók (með smjöpappír á milli) til að ná jöfnu og flötu formi. Hringirnir eru svo settir í frysti í 10-15 mínútur. Þá eru hringirnir losaðir varlega, settir á bökunarpappír og geymdir áfram í frysti á meðan miðjuhringirnir eru mótaðir og frystir í ca. 15 mínútur. Því næst er súkkulaðið, sem notað er til að festa hringina saman, brætt í örbylgjuofni. Hringirnir eru teknir úr frysti, lagðir á bökunarpappír og raðað í stærðarröð. Stærsti hringurinn er lagður á disk, það er gott að bera dálítið brætt súkkulaði undir hringinn til að hann festist á disknum. Þá er dálítið brætt súkkulaði borið á hringinn, næsti lagður á og svo koll af kolli. Það getur þurft að bræða súkkulaðið aftur ef það fer að storkna. Hér skreytti ég turninn með fiðrildum (úr Allt í köku) og ég festi þau með bræddu súkkulaði.

Ostakaka með hvítu súkkulaði og mangó

Birt þann 23.2.2017 af Eldhússögur

Ég held að ég geti með fullvissu sagt að ostakaka er uppáhalds eftirrétturinn minn. Ég er ekki ein um það. Hér á heimilinu hefur nefnilega ríkt ostakökuæði, allir í fjölskyldunni elska ostakökur! Við höfum aldeilis gert vel við okkur undanfarið því ég hef bakað þrjár ostakökur á jafnmörgum vikum. Meira að segja elsta dóttirinn, sem er að jafnaði ekki hrifin af kökum, finnst ostakökur æðislegar. Fyrstu tvær ostakökurnar sem ég bakaði voru okkar uppáhalds, bökuð ostakaka með hindberjum, algjört sælgæti. Núna síðast ákvað ég hins vegar að gera smá tilraun, nota eftirlætishráefnin mín, mangó og hvítt súkkulaði, en hafa ostakökuna ekki bakaða heldur bara kælda með matarlími. Þessi ostakaka sló ekki síður í gegn hjá fjölskyldunni og það hefur verið tilhlökkunarefni okkar Elfars að gæða okkur á einni sneið á kvöldin þessa vikuna. Þessi ostakaka verður nefnilega betri með hverjum deginum og ég held svei mér þá að bitinn í kvöld, á fjórða degi, hafi verið bestur! Ég mæli sannarlega með þessari köku! 🙂

Uppskrift:

Botn:

250 gr Digestive kex
100 gr smjör
2 tsk kanill

Fylling:

2 dl rjómi
600 gr Philadelphia rjómaostur
1 dós sýrður rjómi
2 dl flórsykur
2 tsk vanillusykur
100 g hvítt súkkulaði
5 blöð matarlím matarlím
1 límóna (lime) – safi og börkur
1 msk vatn

Ofan á:

2 blöð matarlím
250 g mangó (frosið eða ferskt)
1 límóna (lime)
1 msk vatn

Aðferð:

Botn: Smjör brætt og kex mulið í matvinnsluvél eða mixer og því blandað saman við smjörið og kanil. Sett í bökunarform með lausum botni og blöndunni þrýst i í botninn og aðeins upp í hliðar á forminu. Botnin er settur í kæli á meðan fyllingin er búin til.

Fylling: Rjómi þeyttur og lagður til hliðar. 5 matarlímsplötur eru settar í kalt vatn í minnst 5 mínútur, þær eiga að verða mjúkar og þykkar. Rjómaosturinn, sýrði rjóminn, flórsykur og vanillusykur er hrært saman í hrærivél. Hvíta súkkulaðið er saxað niður og brætt varlega í örbylgjuofni eða yfir vatnsbaði, því er svo bætt út í rjómaosblönduna. Safinn úr límónu ásamt 1 msk af vatni er sett í pott og hitað. Matarlímsblöðin eru tekin úr vökvanum, vatnið kreist úr þeim og þau sett út í heitan vökvann. Hrært þar til matarlímið hefur bráðnað saman við vökvann. Þá er matarlímsblöndunni hellt út í rjómaostablönduna. Því næst er þeytta rjómanum bætt út í og hrært í stutta stund. Börkurinn af límónunni er rifinn fínt (þess gætt að fara ekki ofan í hvíta lagið undir því græna) og honum bætt út að síðustu. Blöndunni er hellt ofan á botninn og kakan kæld í minnst 4 klukkustundir áður en mangóið er sett ofan á.

Ofan á: þegar kakan hefur stífnað nægilega eru 2 matarlímsblöð sett í kalt vatn í minnst 5 mínútur. Mangóið er afþýtt, ef það er frosið, og svo maukað í matvinnsluvél eða með töfrasprota. Safinn úr límónunni ásamt vatninu er sett i pott og hitað. Matarlímsblöðin eru tekin úr vökvanum, vatnið kreist úr þeim og þau sett út í heitan vökvann. Hrært þar til matarlímið hefur bráðnað saman við vökvann. Þá er matarlímsblöndunni hellt út í maukaða mangóið og því svo dreift yfir ostakökuna, hún er síðan kæld. Ostakakan er best daginn eftir að hún hefur verið gerð og batnar bara með hverjum deginum.

Marengsterta með Freyju karamellurjóma og Hrískúlum

Birt þann 15.10.2016 af Eldhússögur

Ég hef talað um það áður hér á blogginu, að þegar ég sé nýtt sælgæti á markaðnum, þá er ég alltaf spenntust fyrir því að finna því einhvern skemmtilegan farveg í uppskriftum. Það fyrsta sem ég hugsaði þegar ég sá nýja Hrísið með Freyjukaramellubragði var að þessar súkkulaðikúlur myndu passa eins og hönd í hanska við gómsæta marengstertu. Mér datt síðan í hug að búa til karamellurjóma úr Freyju karamellum. … og herregud hvað þetta varð geggjaður rjómi!

Það munaði litlu að hann kæmist ekki á milli botnanna því ég þurfti ”aðeins” að smakka hann til dálítið of oft! 😉 Það væri örugglega geggjað að útbúa svona karamellurjóma og bera fram með berjum og ávöxtum eða með góðri súkkulaðiköku. Það er allavega næst á dagskrá hjá mér. Það er ekkert flókið að búa hann til, bara tvennt sem þarf að passa. Annars vegar að láta ekki rjómann sjóða og hins vegar að gefa honum góðan tíma til að kólna alveg. Það er því mjög hentugt að nota hann á marengstertu því það er einmitt terta sem maður bakar oftast daginn áður. Ég bakaði marengsbotnanna að kvöldi ásamt því að útbúa rjómann. Daginn eftir þeytti ég rjómann og setti saman tertuna, einfalt og fljótlegt. Ég tók hana með með í vikulega sunnudagskaffið hjá okkur fjölskyldunni og sló tertan í gegn. Þetta er terta sem verður sannarlega bökuð aftur og aftur!

Uppskrift:

Marengs:

300 g sykur
6 eggjahvítur
3 bollar Kornflex eða Rice krispies
1 tsk lyftiduft

Rjómafylling:

5 dl rjómi
150 g Freyju karamellur, klipptar í litla bita
200 g Hrís með Freyjukaramellum
250 g fersk jarðarber, skorin í bita

Súkkulaðikrem:

6 eggjarauður
6 msk flórsykur
200 g suðusúkkulaði
50 g Freyjukaramellur, klipptar í litla bita
1-2 msk rjómi eða mjólk

Marengs: Ofn hitaður í 140 gráður við blástur. Eggjahvítur eru þeyttar ásamt lyftidufti og sykri smá saman bætt út í þar til marengsinn er orðinn stífur. Þá er Kornflexi eða Rice krispies bætt varlega út í marengsinn með sleikju. Diskur eða kökuform sem er ca. 23 cm í þvermál er lagt á bökunarpappír og strikaður hringur eftir disknum. Þetta er gert tvisvar. Marengsinum er skipt í tvennt og hann settur á sitt hvorn hringinn. Því næst er slétt jafnt úr marengsinum innan hringsins með sleikju eða spaða. Þá er marengsinn bakaður í 120°C (blástur) í heitum ofni í ca. 60 mínútur. Best er að láta marengsinn kólna í ofninum.

Karamellurjómi: Rjómi hitaður í potti og þegar hann er kominn nálægt suðu lækkað í meðalhita og karamellunum, sem búið er að klippa í minni bita, er bætt út rjómann. Þá er hrært þar til karamellurnar hafa bráðnað. Athugið að rjóminni má alls ekki sjóða! Rjómablöndunni er því næst hellt í skál og sett í kæli, í minnst 4 tíma, eða þar til blandan er orðin alveg köld. Best er að geyma hana í kælinum yfir nóttu. Þegar rjómablandan er orðin alveg köld er hún stífþeytt og loks er jarðaberjunum og hrískúlunum blandað varlega saman við með sleikju.

Súkkulaðikrem: Eggjarauður og flórsykur þeytt vel saman. Suðusúkkulaði og karamellur er sett í pott ásamt 1-2 msk af rjóma eða mjólk (eftir þörfum) og brætt við meðalhita. Þegar súkkulaðiblandan er bráðnuð er hún látin kólna dálítið og því næst bætt út í eggjarauðu- og flórsykurblönduna. Kreminu er því næst dreift yfir marengstertuna. Ef súkkulaðiblandan er mjög þunn er hægt að setja hana í ísskáp í dálítla stund til þess að hún þykkni áður en henni er dreift yfir tertuna. Skreytt með berjum, t.d. jarðarberjum, hindberjum og blæjuberjum.

Kanilsnúða-rúlluterta

Birt þann 4.10.2016 af Eldhússögur

Svara

Svíar eru svo miklir snillingar, halda upp á dag kanilsnúðarins í dag! Af hverju eigum við ekki svona skemmtilega daga hér á Íslandi? Ég elska kanilsnúða og bara allt bakkelsi með kanil. Ég sá þessari kanilsnúða rúllutertu bregða fyrir á nokkrum sænskum bloggum og gat ekki stillt mig um að prófa. Reyndar breytti ég uppskriftinni dálítið, skipti t.d. út hveiti fyrir kartöflumjöl því það gerir kökuna léttari. Kosturinn við rúllutertur eru að þær eru svo rosalega fljótlegar í bakstri, það tók mig innan við hálftíma að baka þessa. Vissulega eru þetta engir ”kanilsnúðar”, þótt rúllutertan sé kennd við kanilsnúða, heldur er það aðallega kanillinn sem minnir á snúðana góðu og svo fyllingin. En herre gud hvað þetta er hættulega góð kaka!! Kremið gæti ég borðað með skeið .. kannski gerði ég það, smá .. ekki dæma mig! 😉 Þetta er nýjasta uppáhalds ”my go to” kaka þegar ég þarf að búa til rosalega góða köku á stuttum tíma. Fram af þessu hefur það verið þessi kaka sem ég hef bakað vandræðalega oft! Það ætti ekki að koma á óvart að sú kaka heitir líka ”kanilsnúða” eitthvað þó engir kanilsnúðar komi við sögu … ég bara elska kökur sem innihalda kanil! 🙂

Uppskrift:

3 egg
2 dl sykur
0,5 dl mjólk
1 dl hveiti
1 dl kartöflumjöl
1 tsk lyftiduft
1 msk vanillusykur
2 tsk kanill

Fylling

150 g smjör, við stofuhita
1 msk kanill
2 msk vanillusykur
1 dl flórsykur
+ perlusykur og/eða sykur

Ofn stilltur á 250 gráður við undir- og yfirhita. Egg og sykur þeytt létt og ljóst. Kartöflumjöli, hveiti, lyftidufti, vanillusykri og kanil er blandað saman og bætt varlega út í, ásamt mjólkinni, með sleikju. Því næst er deiginu helt á ofnplötu, klædda bökunarpappír, og dreift úr deiginu þannig að það myndi ferning. Bakað við 250 gráður í ca. 4-5 mínútur. Um leið og kakan kemur úr ofninum er henni hvolft á sykurstráðan bökunarpappír.

Hráefnum í fyllinguna er þeytt saman í ca. 2-4 mínútur. Fyllingunni er því næst dreift yfir kaldan botninn og kökunni rúllað upp á lengdina með hjálp bökunarpappírsins.

Marengsterta með súkkulaðirúsínum og eplum

Birt þann 27.9.2016 af Eldhússögur

img_4036-6

Í síðasta mánuði átti yngsta barnið í fjölskyldunni 12 ára afmæli.

Hún hefur alltaf haft ákveðnar skoðanir á því hvernig afmælisveislurnar eigi að vera og það hefur alltaf verið eitthvað þema í gangi. Í ár var þemað til fyrir tilviljun þegar við mæðgur byrjuðum á því að kaupa servíettur sem við féllum fyrir, okkur fannst þær svo fallegar. Í kjölfarið ákváðum við að það yrði bara einhverskonar fallegt pastel þema.

Ég bað Önnu frænku hjá Önnu konditori að gera uppáhaldstertu afmælisbarnsins (svampbotnar, hindber og karamellukrókant) og hafa hana í stíl við servíetturnar. Það var ekki að spyrja að því, þessi listakona bjó til frábærlega fallega tertu sem skreytt var með blómum og hjóli með blómakörfu, alveg í stíl við servíetturnar.

Ég bjó til súkkulaðiköku og skreytti hana í pastellitum. Ég notaði skúffukökuuppskrift og hafði botnana fjóra (smjörkrem á milli), þá verður kakan fallega há. Hins vegar er ekki gott að skera hana þannig því sneiðarnar verða alltof stórar. Ég hafði því harðspjald á milli botnanna (tveir botnar með kremi á milli – kringlótt harðspjald – tveir botnar með kremi á milli) þannig að fyrst var efsta lag kökunar skorið og síðan sú neðri, mjög praktísk og einföld lausn ef maður vill hafa kökur háar. Ég hef stundum hreinlega líka notað botninnn úr lausbotna kökuforminu og haft hann á milli ef ég hef ekkert annað.

Ein tertan sem ég var með var marengsterta og ég ákvað að gera tilraun og setja eitthvað nýtt í rjómann. Ég notaði súkkulaðirúsínur og græn epli, ótrúlega ferskt og gott. Ég mæli sannarlega með þessari bombu í næstu veislu! 🙂

Uppskrift:

Marengs:

3 dl sykur
5 eggjahvítur
3 bollar Rice Krispies

Ofn hitaður í 120 gráður við blástur (ef baka á báða botnana samtímis) eða 130 gráður við undir- og yfirhita. Eggjahvítur þeyttar og sykri bætt út í smátt og smátt þar til marengsinn er orðinn stífur. Þá er Rice Krispies bætt varlega út í marengsinn með sleikju. Diskur eða kökuform sem er um það bil 23 cm. í þvermál er lagt á bökunarpappír og strikaður hringur eftir disknum. Þetta er gert tvisvar. Marengsinum er skipt í tvennt og hann  settur á sitt hvorn hringinn. Því næst er slétt jafnt úr marengsinum innan hringsins með sleikju eða spaða. Þá er marengsinn bakaður í 120°C (blástur) í heitum ofni í um það bil 60 mínútur. Best er að láta marengsinn kólna í ofninum.

Rjómafylling:

5 dl rjómi
3-4 græn epli (fer eftir stærð), skorin smátt
150 g súkkulaðirúsínur

Rjóminn er þeyttur og eplum ásamt súkkulaðirúsínum er blandað út í rjómann. Rjómablandan er svo sett á milli marengsbotnanna þegar þeir eru orðnir kaldir.

Súkkulaði krem:

5 eggjarauður
5 msk flórsykur
100 g Síríus pralín súkkulaði með karamellu
100 g suðusúkkulaði

Eggjarauður og flórsykur þeytt vel saman. Pipp og suðursúkkulaði er brotið niður í skál og brætt yfir vatnsbaði. Ef súkkulaðiblandan er of þykk er hægt að bæta örlítilli mjólk eða rjóma út í. Þegar súkkulaðið hefur bráðnað og kólnað örlítið er þvi bætt varlega út í eggjarauðu- og flórsykurblönduna. Kreminu er því næst dreift yfir marengstertuna. Skreytt með berjum, t.d. jarðaberjum, bláberjum, hindberjum, rifsberjum og blæjuberjum. Tertan er geymd í ísskáp og er líka góð daginn eftir.

img_4035-5

Kladdkaka með mjúkum marengs

Birt þann 12.4.2016 af Eldhússögur

Mikið er nú dásamlegt að snjórinn sé farin, farið sé að hlýna og að birtan sé loksins komin! Dagsbirtan er svo mikill vinur matarbloggara, það er ægilega leiðinlegt að taka matarmyndir í skammdeginu. Við fjölskyldan erum smátt og smátt að hreiðra um okkur í nýja húsinu. Ég er að vinna í blogginnleggi með myndum um nýja eldhúsið sem mun birtast innan skamms. Ég er ægilega ánægð með eldhúsið og finnst það hafa lukkast mjög vel, sem og allar endurbæturnar á húsinu.

Að þessu sinni ætla ég að skrá hér inni á síðuna enn eina kladdköku uppskrift, þær verða aldrei of margar. Í þessari uppskrift kemur saman sænska kladdkakan og rússneska mjúka marengs Pavlovan með ”dash” af súkkulaðihnetusmjöri, sem er skemmtileg og ljúffeng blanda.

Súkkulaðikaka:

150 g smjör
300 g suðusúkkulaði
1.5 dl sykur
3 egg
2 dl hveiti
2 msk kakó

Marengs:

4 eggjahvítur
1.5 dl sykur
1 tsk ljóst edik
2 msk sterkja (t.d. majsenamjöl)
ca. 1 dl súkkulaðihnetusmjör

Bakarofn stilltur á 175 gráður við undir- og yfirhita. Smelluform (24 cm) er klætt bökunarpappír. Smjör og súkkulaði er brætt saman yfir vatnsbaði. Egg og sykur þeytt saman og síðan er hveiti og kakói bætt út í. Þá er súkkulaði-smjörblöndunni bætt út í smátt og smátt þar til allt hefur blandast saman. Deigið er sett í formið og bakað í ofni við 175 gráður í ca. 20 mínútur. Þá er kakan tekin út og ofninn hækkaður í 200 gráður. Eggjahvíturnar eru stífþeyttar og sykrinum bætt út í smátt og smátt á meðan. Því næst er ediki og sterkju bætt út í. Súkkulaðihnetusmjörið er hitað í örbylgju ofni í ca. 20 sekúndur eða þar til það verður dálítið fljótandi en þó alls ekki of heitt. Þá er því bætt varlega út í marengsinn með sleikju en fallegt er að blanda því bara létt saman við marengsinn svo að hann verði fallega marmaramunstraður. Marengsinn er settur yfir kökuna og bakað í ca. 20-25 mín til viðbótar. Gott er að fylgjast vel með kökunni þvi marengsinn getur orðið dökkur og því þarf mögulega að setja álpappír yfir hana þegar um helmingur af bökunartímanum er liðinn. Gott er að bera kökuna fram með þeyttum rjóma.

Marengsterta með karamellurjóma og hindberjum

Birt þann 21.1.2016 af Eldhússögur

Nú er kominn einn og hálfur mánuður frá því að við fengum nýja húsið okkar afhent og þar eru miklar framkvæmdir í gangi. Eins og gengur og gerist þá vinda svona framkvæmdir upp á sig og staðan er núna sú að við erum að skipta um eiginlega allt í húsinu, allt frá rafmagni og lögnum upp í innréttingar og gólfefni. Þetta eru afar spennandi framkvæmdir og að mörgu að huga, margar ákvarðanir sem þarf að taka. Við hjónin erum sem betur fer svo skemmtilega samstíga að við erum yfirleitt sammála um allt og ákaflega fljót að taka ákvarðanir sem hentar vel í svona framkvæmdum. Það er þó eitt þessa dagana sem við sveiflumst fram og tilbaka með, það eru borðplötur í eldhúsinu. Við vorum ákveðin í að hafa svartar granítplötur (eldhúsinnréttingin er hvít) en svo fór ég efast eftir að hafa lesið á netinu um að sumum finnist of kalt að hafa granít á öllu, að það glamri mikið í öllu sem maður leggur frá sér og að það sjáist mikið á svörtu graníti. Í eldhúsinu sem við erum með núna er granít í einu horninu og svo eikarborðplötur á restinni. Mér finnst frábært að hafa granítið, gott að hnoða deig á því og ég legg allt heitt beint úr ofninum á það. En það er spurning hvort að það sé of mikið að hafa granít á öllu. Endilega segið mér frá ykkar reynslu af borðplötum og hverju þið mælið með!

En víkjum að þessari dásemd!

Bóndadagurinn er á morgun og ég ætla sannarlega að dekra við minn bónda. Rauðvín og steik hljómar algjörlega í takt við daginn en ég held líka að ein svona hnallþóra yrði ekki óvinsæl á borðum bænda landsins! 🙂 Mér finnst Dumle súkkulaðiðfrauðið svo gott að ég ákvað að prófa mig áfram með það í tertu og hér er gómsæt útkoman:

Dumlerjómi með hindberjum:

5 dl rjómi
120 g Dumle orginal, saxaðar eða klipptar í minni bita
300 g hindber (fersk eða afþýdd)

Marengs:

220 sykur
4 eggjahvítur (stór egg)
3 bollar Kornflex
1 tsk lyftiduft

Dumle snacks krem:

4 eggjarauður
4 msk flórsykur
175 g Dumle Snacks, saxað
50 g 50-70% súkkulaði, saxað
3-4 msk rjómi
Til skrauts. Nokkrir Dumle snacks molar saxaðir niður og hindber.

Dumlerjómi: Rjómi hitaður í potti og þegar hann er kominn nálægt suðu er karamellunum bætt út rjómann og hrært þar til þær hafa bráðnað. Gæta þarf þess að rjóminn sjóði ekki. Rjómablöndunni er því næst hellt í skál og sett í kæli þar til blandan er orðin alveg köld, í minnst 3-4 tíma, best er að geyma hana í kælinum yfir nóttu. Þegar rjómablandan er orðin alveg köld er hún stífþeytt og þá er hindberjunum blandað varlega saman við með sleikju.

Marengs: Ofn hitaður í 120 gráður við blástur. Eggjahvítur, lyftiduft og sykur er þeytt þar til marengsinn er orðinn stífur. Þá er kornflexi bætt varlega út í með sleikju. Diskur eða kökuform sem er ca. 23 cm í þvermál er lagt á bökunarpappír og strikaður hringur eftir disknum. Þetta er gert tvisvar. Marengsinum er skipt í tvennt og hann settur á sitt hvorn hringinn. Því næst er slétt jafnt úr marengsinum innan hringsins með sleikju eða spaða. Að lokum er marengsinn bakaður við 120°C, blástur í ca. 50 – 60 mínútur. Best er að láta marengsinn kólna í ofninum. Þegar marengsinn er orðinn kaldur er Dumlerjóminn með hindberjunum settur á milli botnanna og og Dumle snacks kremið sett ofan á.

Dumle Snacks krem: Eggjarauður og flórsykur þeytt vel saman. Dumle snacks og súkkulaði er sett í pott ásamt 3-4 msk af rjóma eða mjólk og brætt við meðalhita, hrært í blöndunni á meðan. Súkkulaðiblöndunni er því næst blandað út í eggjakremið og kreminu svo leyft að standa í smá stund (jafnvel í ísskáp) þar til það stífnar hæfilega. Kreminu er því næst dreift yfir marengstertuna. Skreytt með berjum, t.d. hindberjum og/eða jarðaberjum ásamt nokkrum niðursöxuðum Dumle snacks molum.