Ég eldaði þennan laxarétt í fyrsta sinn í fyrradag. Ég vissi svo sem að hann hlyti að vera góður þar sem að uppistaðan í réttinum eru nokkur af uppáhaldshráefnunum mínum, lax, mangó og avókadó. En vá hvað þetta er bragðgóður, léttur og ljúffengur réttur, þið bara verðið að prófa! Mikilvægt er að vera með vel þroskað mangó og avókadó, ég skrifaði ráð hér hvernig hægt er að hraða fyrir þroska þeirra. Ég átti avókadó sem ég hafði geymt á þennan hátt og var orðið rétt þroskað. Síðan var ég svo heppin að finna fullkomlega þroskað mangó í Nettó. Ég keypti síðan ljúffengan lax hjá Fiskbúð Hólmgeirs í Mjóddinni en ég kaupi allan fisk af þeim. Þetta er ekki erfiður réttur að útbúa og hann er fljótlegur, það þarf bara að gefa sér tíma fyrir mareneringuna. Þessi uppskrift dugir fyrir þrjá sem aðalréttur en fyrir sex sem forréttur. Ég var með hann í aðalrétt og bar fram með honum naanbrauð með smjöri og salti, uppskriftina er að finna hér.
Límónumarineruð laxaspjót
- 900 gr. ferskur lax, skorinn í teninga (ca 2,5 x 2,5 cm)
- 1/2 dl ólífuolía
- 2 hvítlauksrif, saxað smátt
- 1/2 límóna (lime), safi og börkur
- 1/4 tsk sykur
- salt og pipar
- kóríander, saxað smátt (hægt að nota flatblaða steinselju í stað kóríanders)
Blandið saman hráefnunum fyrir mareneringuna. Laxinn skorinn í eins jafna teninga (ca. 2.5 cm x 2.5 cm) og hægt er og hann settur í plastpoka. Mareneringunni helt yfir og laxinum velt varlega upp úr henni, geymið í ísskáp í minnst einn tíma, lengur ef hægt er.
Þrír til fimm laxateningar þræddir upp á grillspjót. Ef þið notið tréspjót, leggið þá spjótið í bleyti í ca. hálftíma fyrir notkun til þess að þau brenni ekki. Grillið spjótinn á meðalhita þar til þau eru tilbúin. Reynið að snúa þeim sjaldan til að koma í veg fyrir að laxinn losni af spjótunum. Það þarf að leyfa spjótunum að grillast vel í byrjun áður en þeim er snúið fyrst, þá er lítið mál að snúa þeim eftir það.
Mangó- og avókadósalsa
Á meðan laxinn er að marinerast er salsað útbúið:
1 stórt mangó, skorið í teninga- 2 avókadó, skornir í teninga
- 1/2-1 rauðlaukur, fínsaxaður
- 1/2-1 rautt chili, kjarnhreinsað og fínsaxað
- 1/2 límóna (lime)
- 2 msk góð ólífuolía
- 1 msk hvítvínsedik
- salt og pipar
- ferskt kóríander, saxað (hægt að nota flatblaða steinselju í stað kóríanders)
Mangó, avókadó og lauk blandað varlega saman. Chili bætt við ásamt safanum úr límónunni, ólífuolíu og hvítvínsediki. Kryddið með salt, pipar og kóríander og blandið öllu varlega saman. Geymið í ísskáp.
Berið fram grilluðu laxaspjótin á mangó- og avókadósalsanu, kreystið smá límónusafa yfir og njótið gjarnan með vínsglasi!
Eldhússögur 
þettta hljómar himneskt einmitt mín uppáhalds ingredients … takk fyrir að deila
Glettilega góður réttur. Laxinn frelsast af offitunni með að fara umbúðalaust á grillið, en heldur safanum. Salsaviðbótinn fer með þig alla leið. Ég fann það að það sem rann ofan í mig var hollt og lúxus. Skotheldur forréttur eða aðalréttur fyrir sadda sælkera 🙂
Þetta er án efa besti fiskiréttur sem ég hef smakkað!
Bakvísun: Kjúklingavefjur með mangó, beikoni og avókadósósu | Eldhússögur
Þetta er sjúklega gómsætt!!! Takk kærlega fyrir dásamlegt blogg!
Takk fyrir það! 🙂
Vááá hvað þetta er girnilegt. Prófa þennan í sumar ! 🙂
Já, ég mæli sannarlega með því! Þetta er ein af mínum uppáhalds uppskriftum! 🙂
Bakvísun: Tíu tillögur af páskamat | Eldhússögur
Ætla að elda thennan fyrir Ragnhildi & Thorhall um helgina;-)
Takk fyrir skemmtilegt og vel útfært blogg!!!!
Kveðja
Álfhildur
Gaman að heyra það Álfhildur! 🙂 Ég bið að heilsa Flosason family og vona að þau verði sátt við matinn! 🙂
Gerdi tessa marineringu um daginn a laxinn a spjoti og tetta var ofsalega gott
Frábært að heyra Halla! 🙂
Erum að elda þennan rétt núna 🙂 spennandi réttur,
Við elduðum kjúklingavefjurnar í síðustu viku,geggjaðar.
Takk kærlega að vera með þessa uppskrifta síðu.
Kveðja frá hitabylgjunni í Köben 🙂
En hvað þetta var gaman að heyra Guðrún! Takk fyrir góða kveðju og gleðilega hitabylgju til ykkar í Köben! 🙂