Vinsælustu eftirréttirnir

Birt þann 28.12.2013 af Eldhússögur

Nú þegar árinu er senn að ljúka er við hæfi að taka saman vinsælustu og bestu uppskriftirnar héðan af Eldhússögum á árinu. En þar sem að mér finnst sjálfri svo dæmalaust gaman að skoða svona vinsældarlista þá ákvað ég að gera fleiri en einn lista í ár. Ég er sjálf að skipuleggja hvaða eftirrétt ég á að útbúa fyrir gamlárskvöld og ákvað í framhaldi af því að gaman gæti verið að taka saman lista yfir 15 vinsælustu eftirréttina hér á Eldhússögum frá upphafi. Kannski getið þið nýtt ykkur uppskrift af þessum lista fyrir gamlárskvöld! 🙂

1. Snickerskaka

Langvinsælasta uppskriftin á Eldhússögum frá upphafi er þessi gómsæta Snickerskaka en uppskriftin hefur verið skoðuð yfir 30 þúsund sinnum. Kakan sómir sér vel sem sætur eftirréttabiti með þeyttum rjóma eftir góða máltíð.

2. Karamellu marengsterta

Þessi dásemdar marengsterta er hér um bil jafn vinsæl og Snickerskakan góða. Ástæðan er sú að hún er bara nákvæmlega eins og frábærar marengstertur eiga að vera – algjör æðibiti!

3. Frönsk súkkulaðikaka

Það hefur ekki borið mikið á þessari uppskrift á Eldhússögum en hægt og í hljóði hefur hún klifrað upp á topp tíu listann yfir mest skoðuðu uppskriftirnar á síðunni. Ég hef ekki hitt nokkurn fyrir sem ekki dásamar þessa köku, hún er algjörlega öruggt spil við allar aðstæður!

4. Súkkulaðikaka með Pipp karamellukremi

Frábær súkkulaðikaka sem er frábær nýbökuð og heit en jafnvel enn betri daginn eftir. Ekki spillir fyrir hversu auðvelt er að búa hana til, það þarf enga hrærivél! Endilega prófið aðrar útgáfur af Pippinu, til dæmis nýja Pippið með Irish Cream, það passar vel fyrir gamlárskvöld!

5. Kladdkaka með karamellukremi

Ég er ekkert hissa á því að sænska kladdkakan (klessukaka) með karamellukremi sé svona vinsæl eins og raun ber vitni. Kakan er ljúffeng og karamellukremið út úr þessum heimi gott!

6. Klessukaka með Daimrjóma

Næst í röðinni er önnur kladdkaka, að þessu sinni með Daimrjóma. Það þarf varla að skýra út hvers vegna hún er vinsæl, myndirnar ljúga ekki! 😉

7. Pavlova

Þið eruð kannski farin að sjá regluna í þessum lista … súkkulaðikökur í bland við smá marengs – augljóst hvað er vinsælast hjá landanum! 🙂 Pavlova er auðvitað klassísk, stökkur marengsinn með „chewy“ miðju, þeyttur rjómi og fersk ber, gerist ekki betra!

8. Banana-karamellubaka

Þessa uppskrift setti ég hér inn á Eldhússögur í árdögum síðunnar eins og sést á myndunum. En í guðanna bænum látið ekki myndirnar fæla ykkur frá, þessi baka er svo ótrúlega ljúffeng enda er þetta áttunda mest lesna eftirrétta uppskriftin.

9. Súkkulaðikaka með Pipp bananakremi

Þessi ljúffenga kaka hlaut fyrstu verðlaun í uppskriftasamkeppni Nóa og Siríus og uppskriftin var birt í bæklingnum þeirra. Það þarf varla að hafa um þetta fleiri orð, ekki lýgur Nói … hvað þá Siríus! 🙂

10. Heit súkkulaðikaka með mjúkri miðju

Enn ein súkkulaðikakan á topplistanum – hvað get ég sagt ágætu lesendur – þið elskið einfaldlega súkkulaði! 😉 Þessi litla dásemd er auðvitað frábær eftirréttur fyrir gamlárskvöld. Það er hægt að undirbúa hann fyrirfram og stinga formunum bara beint í ofninn í ca. 12-15 mínútur áður en hann er borinn fram.

11. Einfaldur Snickerseftirréttur með perum

Þetta er ljúffengur og ákaflega einfaldur eftirréttur sem hentar sérstaklega vel ef maður er með marga í mat. Það er hægt að útfæra hann á nokkra vegu en mér finnst best að nota mars súkkulaðið og niðursoðnar perur.

12. Súkkulaðikaka með “fudge” kremi

Já, þetta er að gerast – enn ein súkkulaðikakan á topplistanum! Þessi kaka er hálfgerð blanda af öllum þessum súkkulaðikökum í listanum hér að ofan. Þið verðið ekki svikin ef þið veljið þessa fyrir gamlárskvöld, ég ábyrgist það! 🙂

13. Brownie-kaka með hindberjarjóma

Það er ekki nóg með að þessi kaka sé einstaklega gómsæt heldur er hún augnayndi að auki. Hún er einfaldari að útbúa en halda mætti, endilega prófið!

14. Pavlova í fínu formi

Hér er Pavlova í eldföstu móti – einföld, ljúffeng og falleg!

15. Döðlueftirréttur

Ef þið hafið ekki enn uppgötvað hversu góðar döðlur eru í eftirrétti þá er núna tækifærið! Þessi réttur er svolítið retró og ó svo góður. Karamellusósan setur sannarlega punktinn yfir i-ið í þessum rétti.

Þar með er topplistinn yfir 15 mest lesnu eftirrétta-uppskriftirnar hér á Eldhússögum tæmdur. Hins vegar langar mig að bæta við sex uppskriftum (og mig langaði að hafa þær mikið fleiri!) sem mér finnst að eigi heima ofarlega á þessum lista. Trúið mér, þessar uppskriftir eru skotheldar! 🙂

Hvítt súkkulaðifrauð með hindberjasósu

Gott og fallegt – fallegt og gott! Hvað get ég sagt, hindber, rjómi og hvítt súkkulaði, þetta er bara ómótstæðileg blanda!

Súkkulaðipannacotta með karamellu

Pannacotta er svo ótrúlega einfalt að útbúa en að sama skapi dásamlega gott. Ég bauð ömmu þessa útgáfu og henni fannst þetta besti eftirrétturinn sem hún hefur bragðað … þá erum við að tala um á 85 árum – ef það er ekki góð einkunn þá veit ég hvað! 😉

Ostakökubrownie með hindberjakremi

Ég þarf varla að útskýra af hverju þessi kaka er á mínum topplista, hér er hreinlega allt það sem er gott sett saman í eina dásemdarköku!

Súkklaðimús með karamelliseruðum perum

Ég er með nokkarar útgáfur af súkkulaðimús á síðunni minni og hefði viljað setja þær allar hingað á listann. Mjúk og bragðgóð súkkulaðimús er svo frábær endir á ljúffengri máltíð. Ég valdi samt þessa útgáfu af súkkulaðimús. Hér er hún færð upp á annað stig með því að lauma gómsætum karamelliseruðum perum í botninn – algjört gúrmei!

Bismarkbaka með súkkulaðisósu

Ákaflega hátíðlegur og góður eftirréttur sem ég bauð upp á gamlárskvöldi í fyrra og á jólunum árið áður. Það hlýtur að vera afar góð einkunn! 🙂

Ís með heimatilbúnu frönsku núggati og súkkulaðisoðnum perum

Ég kom næstum því sjálfri mér á óvart með því að setja ís á þennan lista, venjulega er ís nefnilega eini eftirrétturinn sem ég stenst auðveldlega. En þetta er enginn venjulegur ís skal ég segja ykkur – núggatið gerir hann ómótstæðilegan! Bætið síðan súkkulaðisoðnu perunum við og rétturinn verður toppurinn á gamlárskvöldi! 🙂

Heimalagað rauðkál

Birt þann 27.12.2013 af Eldhússögur

Það er bara einn ókostur við jólin, þau eru of stutt og líða alltof hratt! Við höfum átt afar notalega jóladaga. Elfar var í fríi um þessi jól en það er alltaf svo gott þegar hann fær hátíðardagana óskerta með okkur fjölskyldunni án þess að þurfa að fara á sjúkrahúsið. Við vorum hér heima á aðfangadagskvöld með foreldrum mínum og ömmu og afa. Það má með sanni segja að allir hafi fengið góðar gjafir og börnin voru himinlifandi og þakklát fyrir allt sem þau fengu. Það var svolítið gaman að því að Eldhússögur fengu jólagjöf í ár! 🙂

Anna Sif vinkona útbjó þennan sniðuga hitaplatta úr vintöppum og að auki fylgdi með heimatilbúin chili/sólberjasulta. Eldhússögur þakka fyrir þessa frábæru gjöf! 🙂

Yngstu börnin á aðfangadagskvöld

Á jóladag hittist stórfjölskyldan í ljúffengum brunch heima hjá mömmu og pabba. Hér er hægt að sjá fleiri myndir frá Eldhússögum á Instagram. Það er alltaf mjög afslappað í jóladagsboðinu, til dæmis mættu mín börn í náttfötunum og Bára litla frænka kom í prinsessubúningi. Ég er eiginlega að hugsa um að leggja fram þá tillögu að allir mæti bara í náttfötunum eða í prinsessubúningum að ári! Næsta jólaboð er ekki fyrr en á sunnudaginn þannig að við áttum daginn í gær alveg fyrir okkur. Það var því bara sofið, spilað, lesið, leikið með jólagjafirnar og seinnipartinn fórum við niður á tjörn á skauta og höfðum með okkur heitt kakó.

Um kvöldið fengum við okkur hangikjöt sem ég eldaði í ofninum. Hér er hægt að sjá uppskriftina. Með hangikjötinu finnst mér alveg nauðsynlegt að hafa grænar Ora baunir, heimalagað rauðkál, laufabrauð og kartöfluuppstúf ásamt jólaöli.

Eftir matinn var haldið áfram með afslöppun við kertaljós og kósýheit. Öll fjölskyldan horfði á kvikmyndina Hobbitann þar sem að bíóferð á Hobbitann 2 er í bígerð um helgina.

En víkjum að rauðkálinu með hangikjötinu – það er ekkert erfitt að útbúa eigið rauðkál. Eini ókosturinn er að lyktin sem kemur þegar það er búið til er ekkert sérlega góð – en góða bragðið bætir hana upp! 🙂 Það er svo mikill munur á heimalögðuðu rauðkáli og því tilbúna að þessu tvennu er ekki saman að jafna.

Uppskrift:

1 miðlungsstór rauðkálshaus, kjarninn fjarlægður og kálið sneitt fínt.
2 græn epli, flysjuð og skorin í teninga
2/3 dl rauðvínsedik,
1 dl sykur
2/3 dl óblönduð sólberjasaft
1/2 tsk salt
1 msk smjör
til hátíðarbrigða er hægt að sjóða rauðkálið með 2-3 negulnöglum eða stjörnuanís ásamt 1-2 kanilstöngum.

Látið allt saman í stóran pott og hitið rólega upp, látið sjóða við vægan hita í einn og hálfan til tvo tíma. Smakkið til þegar helmingur er liðinn af suðutíma, ef kálið er of súrt þá er sykri bætt við en ef það er of sætt þá þarf að bæta við aðeins meira af edik eða sólberjasaft. Nauðsynlegt er að smakka til rauðkálið á þessum tímapunkti, þ.e. eftir hálfan suðutíma til þess að það verði gott. Þegar suðu lokið er kálið sett í krukkur, leyft að kólna aðeins og svo sett ísskáp.

Jólagrauturinn hennar ömmu

Birt þann 24.12.2013 af Eldhússögur

Svara

Aðfangadagur er runninn upp og það ríkir mikil tilhlökkun hér á heimilinu. Allir krakkarnir (líka þessi stærstu) fengu náttföt í skóinn en Kertasníkir hefur aldrei brugðið útaf venjunni varðandi þá hefð. Auk þess er þar alltaf að finna gúmmelaði sem gott er að maula yfir barnaefninu og ásamt ískaldri kók í gleri sem ratar ávallt í skóinn á aðfangadag . Hann er sniðugur þessi Kertasníkir! 🙂

Ég er farin að huga að jólamatnum en í kvöld koma foreldrar mínir til okkar auk ömmu, afa og Ingu frænku. Það verður ekki brugðið útaf venjunni í kvöld frekar en önnur aðfangadagskvöld. Amma mun koma með jólagrautinn sem hún verður búin að standa yfir og elda með natni í nokkrar klukkustundir. Hún hefur eldað jólagrautinn á sama hátt í 60 ár og það er ekkert sem slær honum við, hann er dásamlega þykkur, mjúkur og gómsætur. Það er einn af hápunktum jólanna að borða jólagrautinn hennar ömmu með ljúffengri heimatilbúinni krækiberjasaft og kanelsykri. Hefðirnar eru það miklar í kringum jólagrautinn að amma kemur meira að segja með sérstakt kar og skeið undir kanelsykurinn sem er frá langömmu minni.

Mikil spenna ríkir varðandi möndluna og það er regla að sá sem fær möndluna feli hana þar til allir eru búnir að borða grautinn sinn. Þegar krakkarnir hafa fengið möndluna hafa þau verið ótrúlega klár að halda pókerandliti og fela möndluna undir tungunni alla máltíðina, jafnvel þó þau hafi verið mjög ung að árum. 🙂 Hér vann hins vegar amma möndluna! 🙂

Jólasteikin okkar er hamborgarhryggur með dásamlega góðri sósu og hefðbundu meðlæti og í eftirrétt er heimatilbúinn Toblerone ís og vanilluís ásamt konfekti að sjálfsögðu. Ég ætla að skrá hjá mér hér í uppskriftasafnið á Eldhússögum uppskriftina að jólagrautnum hennar ömmu þó svo að ég viti að það sé varla hægt að elda grautinn eins og hún gerir hann.

Við mamma í eldhúsinu, ég í meðlætinu og mamma að hella jólagrautnum yfir í tarínuna.

Uppskrift:

4 bollar hrísgjón (River)
vatn
3 lítrar nýmjólk + 1 líter
salt

Hrísgrjónin sett í pott ásamt vatni (vatnið látið fljóta aðeins yfir hrísgrjónin). Suðan látin koma upp, hitinn lækkaður og hrísgrjónin soðin í klukkutíma, vatni bætt við eftir þörfum. Eftir klukkutíma eru þremur lítrum af mjólk bætt við smátt og smátt út í pottinn og hrært oft og reglulega í grautnum. Grauturinn er smakkaður til með salti. Eftir þrjá tíma kemur amma með grautinn heim til mín, hitar hann upp aftur í pottinum og hrærir um það bil 1 líter af mjólk út í grautinn eða þar til hann verður mátulega þykkur. Grauturinn er borinn fram með krækiberjasaft og kanelsykri.

Hátíðarmatur og nýjung á Eldhússögum

Birt þann 19.12.2013 af Eldhússögur

Það styttist óðfluga í jólin og líkt og flestir þá er ég farin að huga að matarinnkaupunum fyrir jólin. Hátíðar snúast um hefðir og ég þarf ekkert að finna upp hjólið þegar matseðillinn er settur saman. Við snæðum hamborgarhrygg á aðfangadag, hangikjöt á jóladag en á annan í jólum er misjafnt hvað ég útbý, oft hef ég góða fiskmáltíð sem hentar vel eftir kjötmáltíðirnar dagana á undan. Allar uppskriftirnar að þessum réttum eru hér á Eldhússögum en í dag kynni ég frábæra nýjung sem ég er ákaflega spennt yfir. Ég er komin í samstarf við sommalier (vínþjón) sem ætlar að hjálpa mér að para saman góð vín með uppskriftunum mínum. Eins og ég hef talað um áður þá finnst mér voða gott að dreypa á smá léttvíni með góðri máltíð en þekking mín á vínum er afar lítil. Það verður því ákaflega gaman að geta fengið faglega hjálp við val á vínum með máltíðunum og ekki síður að geta gefið ykkur ábendingar um hvaða vín henta með uppskriftunum sem ég gef upp.

Vínþjónninn sem kominn er í samstarf við Eldhússögur heitir Sævar Már Sveinsson framreiðslumeistari sem hefur sérhæft sig í léttvínum. Sævar hefur unnið titilinn vínþjónn ársins 5 ár í röð og keppt í fjölmörgum alþjóðlegum keppnum. Hann hefur meðal annars starfað á Hótel Holti, Sommelier Brasserie og á Grillinu á Hótel Sögu. Sævar mun para saman vín með réttunum hér á Eldhússögum miðað við það hráefni sem er í uppskriftunum svo að vínið falli vel að matnum og öfugt. Þá hefur Sævar í huga atriði eins og; sætu, sýru, beiskju og seltu. Oftast gildir sú regla að setja vín með matnum sem hefur álíka eiginleika. Það þýðir að réttur með sætu meðlæti passar vel með víni með sætum ávaxtakeim og svo framvegis.

Sævar er þegar búinn að skoða nokkrar uppskriftir að hátíðarmat hér á Eldhússögum og para við þær ljúffeng léttvín.

Tillögur að gómsætum hátíðarmat og drykk sem henta vel yfir jól og áramót:

Gljáður hamborgarhryggur með kóksósu

Hangikjöt með kartöfluuppstúf

Kalkúnn með brúnuðum kartöflum, sætkartöflumús, gljáðum gulrótum, waldorfsalati, rósakáli með beikoni og himneskri sósu

Hægeldað lambalæri með kartöflum, rjómasósu, grænmeti og sætum kartöflum

Hægeldaður lambahryggur með rauðvínssósu og hunangsgljáðu grænmeti

Roastbeef með bearnaise sósu, kartöflugratíni og spínatsalati með jarðaberjum

Grillað nautaribeye með heimagerðri bearnaise sósu og chilikartöflum með papriku

Ofnbakaður þorskur með pistasíusalsa, sætkartöflumús og sojasmjörsósu

Ofnbakaður humar með heimatilbúnu hvítlaukssmjöri

Freyðandi myntu- og sítrónudrykkur

Ís með heimatilbúnu frönsku núggati og súkkulaðisoðnum perum

Hvítt súkkulaðifrauð með hindberjasósu

Ofnbakaður lax með mangósósu

Birt þann 14.12.2013 af Eldhússögur

Það er með eindæmum hversu annasöm aðventan er, það er svo margt að gera og margt um að vera. Þetta er skemmtilegur og viðburðaríkur tími en vissulega mætti sólarhringurinn vera aðeins lengri. Í vikunni sem leið var margt um að vera bæði í vinnunni minni og utan hennar. Ég hélt til dæmis jólasaumaklúbb fyrir „sænska“ saumaklúbbinn minn sem er alltaf tilhlökkunarefni, pakkaleikurinn okkar er alltaf sérstaklega spennandi! Ég bauð stelpunum upp á ekta jólamat, kalkúnabringur með öllu tilheyrandi meðlæti. Alexander átti einnig afmæli í vikunni og ég hélt matarboð í tilefni þess. Sökum anna á öllum vígstöðum ákvað ég að hafa matarboðið eins einfalt og hugsast gæti. Satt best að segja þurfti ég að taka á honum stóra mínum varðandi einfaldleikann. Ef ég býð fólki í mat þá finnst mér mikilvægt að allt sé spikk og span og er kannski ekki alltaf með einfaldasta matinn. Mér varð hins vegar hugsað til Jóhönnu Ingu dóttur minnar þegar hún var svona sex ára. Þá var ég í loftköstum að undirbúa matarboð, lagaði til og þreif milli þess sem ég undirbjó matinn. Jóhanna var fremur hissa á þessum látum í mér og spurði hvers vegna ég væri á svona miklu spani að laga til. Ég svaraði því til að það væru að koma gestir. Þá sagði hún: „Mamma, það verður hvort sem er drasl þegar gestirnir fara, það er mikið sniðugra að laga bara til eftir á!“ Svo bætti hún við: „þú skalt bara hafa góða stemmningu í matarboðinu, lækka ljósin, setja á rólega tónlist og kveikja á fullt af kertum, þá kemur svo góð stemmning!“ Þarna hitti sex ára dóttir mín naglann á höfuðið og það kemur örugglega ekki þeim á óvart sem þekkja þennan snilling.

Ég bað Alexander að skoða bloggið mitt og koma með óskir mat. Hann kom bara með eina ósk og hún var um meðlæti, mangósósuna sem hann dýrkar – honum fannst aukaatriði hvað væri með mangósósunni! Þetta hentaði mér fullkomlega, ég valdi það sem var fljótlegt en örugglega gómsætt, ofnbakaðan lax.

Uppskrift f. ca 3

1 flak lax (ca 800 g)
salt og pipar
2-3 msk mango chutney
2-3 msk sesamfræ

Ofn hitaður í 180 gráður. Laxinn er lagður í eldfast mót og hann kryddaður með salti og pipar. Því næst er mango chutney smurt á laxinn og sesamfræunum stráð yfir. Bakað í ofni í ca 20 mínútur, fer eftir þykkt laxins, eða þar til hann er eldaður í gegn. Borið fram með ofnbökuðum kartöflum og sætum kartöflum, fersku salati og mangósósu.

Mangósósa:

2 dl grísk jógúrt
2 dl mangó (frosið – sem búið er að afþýða eða ferskt)
2-3 msk mango chutney
salt og pipar

Öllu hráefninu blandað saman með töfrasprota eða í matvinnsluvél.

Blómkálssúpa með heimagerðum brauðteningum

Birt þann 10.12.2013 af Eldhússögur

Svara

Ég ætlaði að byrja þessa færslu með sömu rullunni og svo oft áður þegar ég blogga um súpur, að í raun sé ég ekkert sérstaklega hrifin af súpum en þessi súpa sé ein af undantekningunum. Þá rann upp fyrir mér ljós að það gæti eiginlega ekki verið rétt. Ég hef sett hingað á Eldhússögur margar súpuuppskriftir sem mér finnst allar ægilega góðar, sérstaklega fiski- og kjúklingasúpurnar. Mér finnst eiginlega bara tvennt dálítið pirrandi við súpur. Það er þegar þær eru sjóðheitar og brenna mann á tungunni og þegar þær skvettast út um allt! Hvort tveggja er auðvelt að laga. Láta bara súpuna standa í smástund og leyfa henni að kólna dálítið áður en hún er borðuð og ekki borða með brussugangi og látum! Niðurstaðan er sem sagt sú að með bættum borðsiðum þá geta súpur vel verið í uppáhaldi hjá mér! 🙂 Í kvöld bjó ég til ákaflega góða súpu úr hráefnum sem ég fann í ísskápnum hjá mér. Það er alltaf jafn gefandi að búa til góðan mat og nýta hráefnin í ísskápnum út í ystu æsar í leiðinni. Til dæmis gerði ég þennan brauðrétt í fyrradag og skar af brauðinu alla skorpu. Ég notaði skorpuna til að búa til gómsæta brauðteninga sem pössuðu eins og hönd í hanska við blómkálssúpuna í kvöld. Í súpuna notaði ég Philadelphia ost með chili og okkur fannst hann gefa súpunni afar gott og mikið bragð. Fyrir þá sem vilja mildari súpu er hægt að nota natural Philadelphia ost.

Uppskrift:

1 stór blómkálshaus
1 meðalstór gulur laukur
2-3 tsk olía
1.2 l kjúklingasoð (4 tsk kjúklingakraftur leystur upp í 1.2 líter af sjóðandi vatni)
1 msk hveiti
1 dós Philadelphia ostur með chili (eða natural fyrir mildari súpu)
salt og pipar

Blómkálið er skorið í hæfilega stóra bita og laukurinn saxaður smátt. Laukurinn er steiktur upp úr olíu í stórum potti þar til hann verður mjúkur. Þá er blómkálinu bætt út og það steikt í smá stund þar til það hefur tekið dálítinn lit og mýkst, hveitinu er þá bætt út í pottinn. Því næst er kjúklingasoðinu hellt út í og súpunni leyft að malla undir loki í ca. 20 mínútur eða þar til blómkálið er orðið vel mjúkt. Þá er Philadelphia ostinum bætt út í og súpan krydduð eftir smekk. Það er hægt að mauka súpuna með töfrasprota eða bera hana fram með blómkálsbitunum í. Borin fram með brauðteningum. Ég setti líka nýjar og ferskar baunspírur út í súpuna sem komu til mín í áskrift í dag sem gáfu súpunni extra gott bragð.

Brauðteningar:

Brauð eða skorpa af brauði
ólífuolía
heitt pizzakrydd (eða mildara ítalskt krydd fyrir þá sem vilja bragðminni brauðteninga)
salt & pipar

Ofn hitaður í 200 gráður. Brauðið er skorið í hæfilega stóra bita og settir í skál. Ólífuolíu hellt yfir brauðteningana og þeim velt vel upp úr olíunni ásamt kryddinu. Passa þarf að nota vel af olíu. Brauðteningunum er því næst raðað á ofnplötu klædda bökunarpappír og bakað í ofni í ca. 10 mínútur eða þar til brauðteningarnir hafa náð góðum lit.

Æðislegur brauðréttur

Birt þann 8.12.2013 af Eldhússögur

Annar sunnudagur í aðventu … tíminn þýtur svo sannarlega áfram. Í dag fórum við í árlegt aðventukaffi til Ingu frænku í tilefni afmælis hennar. Að vanda bauð hún upp á gómsætar veitingar, uppskriftir að flestum þeirra er einmitt að finna hér á Eldhússögum! 🙂 Jóhanna Inga tók rafmagnsgítarinn sinn með og tróð upp með afmælissöng og jólalögum. Hún er ansi dugleg á gítarinn þrátt fyrir að hafa bara lært á hann í eina önn. Ég hins vegar er orðin liðtækur rótari og get meira að segja stillt gítarinn fullkomlega þökk sé snilldar gítarstillingar-appi á símanum mínum, eins gott að það er til, annars væri lítið gagn í mér. Því miður varð Jóhanna Inga veik í boðinu og núna er hún komin með háan hita og er slöpp, vonandi jafnar hún sig fljótt af því.

Fyrir utan allar gómsætu veitingarnar sem Inga útbjó sjálf þá gerði ég einn brauðrétt auk þess sem Inga keypti gómsætar vestfirskar hveitikökur (sem eru ómótstæðilegar með smjöri og reyktum silungi!) af Önnu frænku okkar, sem er snilldar konditor, ásamt ljúffengum mömmukökum . Ég mæli sannarlega með því að þið kíkið á básinn hjá Önnu konditorí í jólaþorpinu í Hafnarfirði eða í bakaríið hennar og kaupið ykkur jólagott.

Brauðrétturinn sem ég gerði er ein af þeim uppskriftum sem var næstum því fallinn í gleymskunnar dá þótt að þetta sé „æðislegur brauðréttur“ eins og segir í titlinum. Mér finnst dálítið kjánalegt að láta einhvern rétt heita „æðislegur“ en ákvað bara að láta titilinn standa eins og hann stendur í gömlu uppskriftabókinni minni. Um daginn minnti Hildur vinkona mín mig á þennan brauðrétt og sagðist hafa fengið uppskriftina hjá mér. Hún fór að tala um að rétturinn hefði slegið í gegn hjá henni í saumaklúbbi. Ég mundi ómögulega eftir þessum brauðrétti og fletti í gegnum gömlu uppskriftabókina mína en ég hélt mig hafa fært allar uppskriftirnar hingað inn á bloggið. Svo var greinilega ekki því ég fann þessa uppskrift á snjáðri síðu í bókinni og það rifjaðist upp fyrir mér hversu vinsæll þessi brauðréttur hefur verið í veislum hjá mér í gegnum tíðina. Það er svo skemmtilegt við þennan rétt að það er ekki á honum rifinn ostur heldur þeyttar eggjahvítur með dálitlu majónesi og kryddum.

Uppskrift í fremur lítið eða meðalstórt form (á myndinni er ég með tæplega tvöfalda uppskrift í stóru formi):

ca. 12-14 brauðsneiðar skornar í teninga (ég sker skorpuna af)
2 dl majónes
1 dós sýrður rjómi
200 g skinka, skorin í sneiðar
aspas í dós (ca. 400 gramma dós)
2 hvítlauksrif, söxuð smátt eða sett í hvítlaukspressu
ca 150 g sveppir, skornir í sneiðar
1 stór rauð paprika, skorin í bita
ca. 1 tsk karrí
1/4 tsk cayanne pipar
salt & pipar

Ofan á brauðréttinn:

ca. 2-4 eggjahvítur (fer eftir stærð formsins)
3 msk majónes
hnífsoddur karrí
hnífsoddur cayanne pipar

Ofn hitaður í 200 gráður. Brauðteningunum er dreift í smurt eldfast mót. Gott er að bleyta aðeins upp í því með aspassafanum.Majónesi, sýrðum rjóma, skinku, aspas, sveppum og hvítlauki er hrært saman. Kryddað með cayanne pipar, karrí, salti og pipar. Gott er að byrja með minna en meira af karrí og cayanne pipar og smakka sig svo áfram. Blöndunni er svo dreift yfir brauðið. Eggjahvíturnar eru stífþeyttar. Því næst er majónesi og örlítið af cayanne pipar og karrí hrært varlega saman við og blöndunni smurt yfir brauðréttinn. Hitað í ofni í ca. 25-30 mínútur.

Borið fram heitt.

Pannacotta með súkkulaði-hnetumulningi

Birt þann 7.12.2013 af Eldhússögur

Þó svo að það hafi verið ákaflega kalt undanfarna daga þá verð ég að viðurkenna að snjórinn og kuldinn gerir allt svo mikið jólalegra en ella. Ég tók þessar myndir í vikunni fyrir utan húsið mitt eftir snjókomuna. Þó svo að ég hafi sett „dash“ af gervisnjó og glimmer á kransinn minn þá er enn fallegra þegar á hann snjóar ekta snjó.

Mikið vona ég að það snjói svona fallega á jólunum líka.

Við fjölskyldan áttum saman ljúfan laugardag í dag sem byrjaði með jólatónleikum barnanna á vegum tónlistarskólans þeirra. Vilhjálmur spilaði flókið verk á píanó og Jóhanna var að spila á rafmagnsgítar á sínum fyrstu tónleikum. Þau stóðu sig ofsalega vel og við foreldrarnir vorum að vonum afar stolt. Því næst var jólatréð valið af kostgæfni en við þurftum að fara á nokkra staði áður en nægilega fallegt jólatré fannst. Þá tók við dálítið búðarráp sem endaði með notalegri stund á veitingastað og loks endað á ísbúð Vesturbæjar eftir góðan dag.

Ég hef sett inn nokkuð margar uppskriftir að eftirréttum hér á síðuna að undanförnu og nú bætist enn ein uppskriftin við. Mér finnst bara svo dæmalaust skemmtilegt að útbúa eftirrétti og ennþá skemmtilegra að borða þá! Pannacotta er einn einfaldasti og ljúffengasti eftirrétturinn sem hægt er að gera, afar fljótlegur og hægt að útbúa hann með fyrirvara sem er góður kostur fyrir matarboð. Um daginn þegar ég var með matarboð fyrir fjölskylduna bjó ég til súkkulaðipannacotta með karamellu sem ömmu fannst vera besti eftirréttur sem hún hafði bragðað. Í síðustu viku komu amma og afi aftur til okkar í mat og ég ákvað að gera aðra útfærslu af pannacotta – ekki vildi ég valda ömmu vonbrigðum! Það er einmitt svo sniðugt hversu margar útfærslur er hægt að gera af þessum rétti. Að þessu sinni notaði ég niðursoðna sætmjólk í stað sykurs hún gerði pannacottað dásamlega karamellukennt og bragðgott. Ofan á dreifði ég heimatilbúnum hnetumulningi með hnetum og kornflexi sem velt var upp úr bræddu súkkulaði, dæmalaust gott! Mér skilst að það sé ekki hægt að fá niðursoðna sætmjólk lengur í Kosti en hún ætti að fást í asískum matvöruverslunum og í Kolaportinu. Mögulega á fleiri stöðum – einhver sem veit?

Uppskrift f. 6:

5 dl rjómi
1 dós niðursoðin sætmjólk (sweetened condensed milk- ca. 350 g)
50 g suðusúkkulaði
2 blöð matarlím (3 blöð fyrir þá sem vilja stífari búðing)
skreytt með þeyttum rjóma, berjum og súkkulaði-hnetumulningi

Matarlímsblöðin eru lögð í kalt vatn í allavega fimm mínútur. Rjómi og sætmjólk sett í pott og látið ná suðu. Því næst er vökvinn kreistur úr matarlímsblöðunum, þeim bætt út í pottinn og hrært þar til þau hafa bráðnað saman við blönduna. Þá er potturinn tekinn af hellunni, súkkulaðið brotið í litla bita og því bætt út í pottinn. Hrært þar til súkkulaðið hefur bráðnað. Hellt í skálar eða bolla og kælt í ísskáp í minnst 2 klukkutíma. Áður en rétturinn er borinn fram er hann skreyttur með þeyttum rjóma, berjum og súkkulaði-hnetumulningi.

Súkkulaði-hnetumulningur:

1/2 dl heslihnetur (eða önnur tegund af hnetum)
1/2 dl macadamia hnetur (eða önnur tegund af hnetum)
1/2 dl kornflex
50 g suðusúkkulaði

Hnetur saxaðar og kornflex mulið. Súkkulaði brætt yfir vatnsbaði og hnetum og kornflexi bætt út í. Blöndunni er dreift á bökunarpappír og sett í frysti í minnst hálftíma. Rétt áður en pannacotta er borið fram er súkkulaði-hnetumulningurinn tekinn úr frystinum og saxað niður í smærri bita. Dreift yfir pannacotta.

Karrífiskur með kasjúhnetum og banönum

Birt þann 2.12.2013 af Eldhússögur

Í gær kveiktum við á fyrsta kertinu, spádómskertinu, í aðventukransinum sem ég bjó til auk þess sem við kveiktum á dagatalskertinu. Þó ég sé mikið jólabarn þá slær yngsta skottið (9 ára) mig út, hún er alveg að missa sig af jólaspenningi og hennar eina áhyggjuefni þessa dagana er að það verði ekki hvít jól. Ekki þarf hún að hafa áhyggjur af jólagjöfum, hún föndraði nefnilega jólagjafir fyrir alla stórfjölskylduna og pakkaði þeim inn í október!

Ég ætla að færa inn fiskuppskrift hingað á síðuna í dag sem er svo framúrskarandi góður. Sumarið 1992 skráði ég í gömlu uppskriftabókina mína uppskrift að karrífisk sem ég fékk hjá samstarfsfélaga mínum í Íslandsbanka þar sem ég var í sumarvinnu. Í uppskriftinni er meðal annars fiskur, karrí, bananar og rjómi. Ljúffengur réttur sem Elfar hefur sérstaklega haldið upp á í gegnum tíðina. Í dag, 21 ári seinna, hef ég breytt uppskriftinni svo mikið að í raun og veru er þetta alls ekki sama uppskrift lengur en í grunninn er enn fiskur, karrí og bananar.

Holl og góð hráefni

Mér finnst þessi fiskréttur einkar góður. Það finnst ekki öllum gott að nota banana í heita rétti en mér finnst sérlega gott að fá sæta bananabragðið á móti karríbragðinu. Ég þreytist ekki á að dásama brakandi fersku og ljúffengu Ecospírurnar en þær eru fullkomnar sem meðlæti með svona góðum fiskrétti.

Uppskrift:

1 kíló góður hvítur fiskur, hér notaði ég lönguhnakka
salt og pipar
200 g sveppir, skornir í sneiðar
1 stór rauð paprika, skorin í bita
1 rauður chili, kjarnhreinsaður og saxaður smátt
1-2 tsk karrí
1 msk rifið ferskt engifer
1/2 límóna (lime) – safinn
4 msk mango chutney
1 dós kókosmjólk (ca. 400 ml)
1-2 bananar, skornir í sneiðar
125 kasjúhnetur
rifinn ostur

Ofn hitaður í 200 gráður. Eldfast mót smurt, fiskurinn skorinn í hæfilega stóra bita, hann kryddaður með salti og pipar og raðað í mótið. Olía sett á pönnu og paprika, sveppir og chili steikt þar til það verður mjúkt og kryddað með karrí. Engifer, mango chutney, limesafi og kókosmjólk bætt við á pönnuna og látið malla í stutta stund, sósan smökkuð til og ef til vill bætt við meira af mango chutney, limesafa eða kryddum.

Bananasneiðum raðað ofan á fiskinn, fjöldinn fer eftir smekk hvers og eins. Karrísósunni hellt ofan á (varlega svo að bananarnir haldist ofan á fisknum). Að lokum er rifnum osti og kasjúhnetum dreift yfir. Bakað í ofni í ca. 20 mínútur (fer eftir þykkt fisksins) eða þar til fiskurinn er eldaður í gegn. Borið fram með hrísgrjónum og salati.Njótið!

Smákökur með súkkulaðibitum

Birt þann 30.11.2013 af Eldhússögur

Mér finnst yndislegt að aðventan sé byrjuð. Í vikunni sem leið bjó ég til sörur með mömmu og Ingu frænku eins og alltaf. Við gerðum 420 sörur sem við skiptum á milli okkar, frábært að eiga þessar litlu dásemdir í frystinum!

Í vikunni kom saumaklúbburinn minn líka saman og við bjuggum til kransa. Ég gerði einn á útidyrnar og einn aðventukrans. Það er mikið lán að í klúbbnum er Fríða æskuvinkona mín sem er einn færasti blómaskreytirinn á landinu (auk þess að vera farastjóri og kennari með meiru!). Það eru nokkur ár síðan við tókum upp á því að föndra kransana saman. Ég hafði aldrei gert krans áður og án Fríðu þá væru kransarnir mínir ansi dapurlegir. Verandi bókasafns- og upplýsingafræðingur þá er ég mikið fyrir röð og reglu. Ég hef til dæmis tilhneigingu til þess að vilja raða könglunum í röð … alveg jafnt … jafnvel í stærðarröð! Nokkuð sem virkar vel á bókasafni en er hörmung þegar um aðventukransa er að ræða! Fríða er búin að kenna okkur að búa til þétta og fallega kransa, raða könglum í grúppum, nota náttúrlegt skraut eins og greinar en síðast en alls ekki síst; nota glimmer og snjó í miklu magni! Það er með ólíkindum hversu miklu glimmer og gervisnjór getur breytt og lagað!

Hér er rignir glimmerinu yfir kransinn

Falleg skreyting í vinnslu hjá meistaranum

Greini, greinar, könglar, glimmer og snjór – gerist ekki fallegra!

Meistarinn með hurðarkransinn sinn

En ef ég sný mér nú að smákökunum sem eru uppskrift dagsins. Þegar ég var barn bakaði mamma allskonar gómsætar smákökutegundir eins og svo algengt var á þeim tíma. Loftkökur, vanilluhringi, hálfmána með sultu og fleiri tegundir, allir í fjölskyldunni áttu sér sínar uppáhalds smákökur. Kökurnar voru allar tryggilega geymdar í kökuboxum fram að jólum og við krakkarnir biðum óþreyjufull alla aðventuna eftir því að fá að gæða okkur á kræsingunum. Eftir að ég stofnaði til minnar eigin fjölskyldu hélt ég í hefðina og baka ýmisskonar smákökur á aðventunni. Snemma á aðventunni bökum við krakkarnir alltaf piparkökur sem við svo málum og skreytum saman auk þess sem ég fer í sörubaksturinn með mömmu og Ingu frænku. Þetta er þær kökur sem ég geymi fram að jólum ásamt jólagotti líkt og Bounty kúlur, Oreokúlur og öðru gotteríi. Annars baka ég ekki smákökur og safna í kökubox, mér finnst nefnilega smákökur bestar nýbakaðar. Þannig að öðru hvoru á aðventunni baka ég eina og eina tegund af smákökum sem að má, og hreinlega á, að borða heitar og nýbakaðar! Fjölskyldan lætur ekki segja sér það tvisvar og við eigum því litlar, notalegar jólastundir á aðventunni með nýbökuðum, volgum smákökum og mjólkurglasi. Í dag bjó ég til afskaplega góðar smákökur með súkkulaðibitum sem við gæddum okkur á. Þær eru stökkar að utan og mjúkar í miðjunni, alveg eins og góðar súkkulaðikökur eiga að vera.

Uppskrift:

160 g smjör
200 g púðursykur
2 stór egg
260 g Kornax hveiti
1 pakki Royal karamellu búðingur (90 g) – duftið notað
2 tsk vanillusykur
1 tsk matarsódi
100 g suðusúkkulaðidropar
100 g hvítir súkkulaðidropar

Ofn hitaður í 180 gráður. Smjör og púðursykur hrært vel saman. Þá er einu eggi bætt út í senn, hrært vel á milli. Því næst er búðingsduftinu, hveiti, vanillusykri og matarsóda bætt út í og hrært vel. Að síðustu er súkkulaðidropunum bætt út í deigið. Um það bil teskeið af deigi er raðað á ofnplötu klædda bökunarplötu, passa að hafa gott pláss á milli þeirra. Bakað í ofnið við 180 gráður í 8-10 mínútur eða þar til kökurnar eru tilbúnar. Gott að baka þær aðeins minna heldur en meira.