Kjúklinganúðlur í Hoisin sósu


IMG_6667Það er gaman að segja frá því að um þessar mundir er að detta inn í matvöruverslanir veglegur bæklingur með kjúklingauppskriftum sem ég vann fyrir Rose Poultry kjúklinginn góða. Í bæklingnum eru fjölmargar einfaldar og ljúffengar kjúklingauppskriftir og verður bæklingurinn ókeypis. Ég mæli með því að þið svipist um eftir Rose Poultry kjúklingnum í frystinum í næstu búðarferðum og grípið með ykkur þennan uppskriftabækling í leiðinni. Bæklinginn er oftast nær að finna nálægt Hunts grillsósunum en svo getið þið líka náð í hann rafrænt hér! Það er dálítið misjafnt hvaða tegundir af Rose Poultry kjúklingi fæst í hvaða búðum, þ.e. bringur, úrbeinuð læri eða lundir, en í uppskriftun í bæklingnum er alltaf hægt að nota hvaða kjúklingahluta sem er. Núna er ég með dálítið æði fyrir kjúklingalundunum, þær eru svo ofsalega mjúkar og góðar. Ég varð því mjög glöð þegar ég sá að verslunin Iceland er með Rose lundirnar til sölu því þær fást ekki alltaf í öðrum verslunum. 20140522-165140 Eins og þeir vita sem fylgjast reglulega með Eldhússögum þá nota ég mikið Green Gate matarstellið og finnst það óendanlega fallegt! Í bæklingnum sést í fjölmargar tegundir af Green gate matarstellinu en slóðin á verslunina er ekki alveg rétt í bæklingnum, hún er Cupcompany.is en ekki .com í lokin eins og gefið er upp. Ég fer einmitt reglulega þangað inn og dáist að nýjasta stellinu sem er blúndustell! Það heitir Lace warm gray og er klárlega efst á óskalista mínum um þessar mundir! 🙂 Í tilefni af útkomu bæklingsins þá ætla ég að setja hér inn eina uppskrift úr honum. Þetta er ofureinfaldur kjúklingaréttur með núðlum en ó svo góður! Það er svo langt síðan að ég gerði uppskriftirnar fyrir þennan bækling að ég var búin að steingleyma þessum rétti þar til að ég sá hann núna í nýprentuðum bæklingnum. Ég var því mjög spennt að búa hann til aftur í kvöld og rifja upp hvort að hann væri jafn góður og okkur fjölskylduna minnti – sem hann var. Kjúklingur, núðlur og wokgrænmeti finnst mér alltaf svo gott saman en þá verður allt þetta þrennt að vera bundið saman með góðri asískri sósu. Í þessari uppskrift er sósan mjög einföld en að sama skapi afskaplega góð. Þessi réttur er mjög fljótlegur að útbúa, sem er alltaf kostur í dagsins önn, en líka einstaklega bragðgóður. Kjúklingalundirnar eru fljótar að þiðna. Stundum tek ég þær úr frystinum rétt fyrir matargerð, set þær í örbylgjuofn á lægstu stillinguna í örstutta stund til þess að taka mesta frostið úr þeim, sker þær svo niður hálffrosnar og þá þiðna þær á afar skömmum tíma. IMG_6668 Kjúklinganúður í Hoisin sósu f. 3-4

  • 700 g úrbeinuð kjúklingalæri eða kjúklingalundir frá Rose Poultry
  • ólífuolía til steikingar
  • saltflögur (Falksalt)
  • grófmalaður svartur pipar
  • ca. 30 g ferskt kóríander, saxað
  • 1.5 dl hoisin sósa frá Blue Dragon
  • 2 dl chili sósa frá Heinz
  • 1/2 dl hunang
  • 2 msk ferskt engifer, rifið
  • 300 g medium egg noodles frá Blue Dragon
  • 500 g frosið wok grænmeti

Kjúklingurinn er skorinn í bita og kryddaður með salti og pipar. Hoisin sósa, chili sósa, hunang, engifer og kóríander er hrært saman í skál. Kjúklingurinn er því næst steiktur á pönnu upp úr ólífuolíu þar til hann hefur náð góðum lit. Þá er sósunni hellt á pönnuna og látið malla við vægan hita. Þegar kjúklingurinn er hér um bil eldaður í gegn er wokgrænmetinu bætt á pönnuna og látið malla þar til grænmetið og kjúklingurinn er tilbúið. Á meðan eru núðlurnar soðnar örlítið styttra en leiðbeiningar segja til um, ef uppgefinn tími er 4 mínútur passar að elda þær í 3 – 3 ½ mínútur (eldunin á þeim klárast þegar þær fara á pönnuna). Að lokum er núðlunum bætt á pönnuna og öllu blandað vel saman við meðalhita. Rétturinn er borinn strax fram þá er gott að strá yfir hann fersku kóríander. IMG_6664

Asískar kjötbollur


IMG_3461

Um síðustu helgi hélt stóra stelpan mín upp á tvítugsafmælið sitt. Ég keypti hluta af veitingunum frá Osushi og bjó til eitthvað af þeim sjálf. Það var dálítið vatnsmelónuþema í gangi, við gerðum vatnsmelónu mojito sem var víst ákaflega góður drykkur. Hann er gerður úr Bacardi Melon (romm með vatnsmelónubragði), lime, vatnsmelónu, sírópi og fullt af ferskri myntu – ég set inn uppskriftina hér við tækifæri. Einn af þeim matréttum sem ég bjó til voru kjötbollur með asískri sósu. Ég gerði þær litlar og notaði þær sem smárétt en í raun er ekkert því til fyrirstöðu að búa til máltíð úr þeim og hafa þá til dæmis hrísgrjón með. Myndirnar voru teknar í miklum flýti og eru ekkert til að hrópa húrra fyrir en ekki láta þær fæla ykkur frá! 🙂

Asískar kjötbollurUppskrift (ca. 50 litlar kjötbollur):

  • 900 g nautahakk
  • 2 tsk sesamolía
  • 2.5 dl brauðmylsna
  • 1 tsk engifer (krydd)
  • salt & pipar
  • 2 egg
  • 3-4  hvítlauksrif, pressuð eða skorin smátt
  • 1 búnt vorlaukur (hvíti hlutinn saxaður smátt – græni hlutinn geymdur)
 Sósa:
  • 2 dl Hoisin sósa
  • 4 msk hrísgrjónaedik (rice vinegar)
  • 2 hvítlauksrif, pressuð
  • 2 msk sojasósa
  • 1 tsk sesamolía
  • 1 tsk engifer (krydd)
  • Sesam fræ og græni hlutinn af vorlauknum notað til skreytingar.

Ofn hitaður í 200 gráður. Nautahakkið er sett í skál ásamt kryddi, eggjum, brauðmylsnu, hvítlauki og vorlauki, blandað vel saman. Litlar bollur eru mótaðar úr hakkinu og raðað á ofnplötu klædda bökunarpappír. Bakað í ofni við 200 gráður í ca. 10-12 mínútur eða þar til bollurnar eru tilbúnar.

Á meðan bollurnar eru í ofninum er sósan útbúin. Öllum hráefnunum í sósuna er blandað vel saman. Þegar bollurnar eru tilbúnar er þeim velt upp úr sósunni eða henni hellt yfir bollurnar. Græni hlutinn af vorlauknum er saxaður og dreift yfir ásamt sesamfræjum.

Asískar kjötbollur

Kjúklinga „stir fry“ með kasjúhnetum


Kjúklinga "stir fry" með kasjúhnetumEnn ein helgin flogin hjá. Ég ætla að gera svo mikið um helgar en ég held að ég sé alltaf að misreikna hversu langar þær eru í raun og veru. Ég afrekaði þó ýmislegt skemmtilegt þessa helgina. Hún byrjaði með frábærri vasaljósagöngu seinnipartinn á föstudag þar sem bekkjarfélagar Jóhönnu Ingu ásamt foreldrum fóru upp á Vatnsenda í myrkrinu með vasaljós og krakkarnir leituðu að földum endurskinsmerkjum, drukku heitt kakó og borðuðu piparkökur. Um kvöldið þjófstörtuðum við aðventunni með jólamynd. Við fjölskyldan höfum þá hefð að horfa saman á jólabíómynd á föstudagskvöldum yfir aðventuna.

Aldrei þessu vant var Elfar í helgarfríi og í gær fórum í miðbæinn með krakkana og upplifðum jólastemmninguna þar. Ég var mjög spennt að komast í ráðhúsið á bókamessuna og skoða allar nýju barnabækurnar fyrir bókasafnið mitt. Jóhanna Inga var ekkert lítið glöð að hitta þar fyrir Gunnar Helgason og fá hjá honum áritað eintak af Rangstæður í Reykjavík. Þó svo að hún hafi engan áhuga á fótbolta þá finnst henni þessar bækur frábærar og hún hefur hlustað á hljóðbókina af Aukaspyrnu á Akureyri örugglega meira en tíu sinnum! Um kvöldið fór ég með vinkonum út að borða á Vegamót og svo sáum við leiksýninguna Hús Bernhörðu Ölbu.  Í dag fórum við í notalegt kaffiboð til ömmu og afa þar sem við fengum pönnukökurnar hennar ömmu, mæli með þeim! Sem sagt, margt skemmtilegt brallað um helgina á milli hefðbundnu heimilisverkanna.

Helginni var lokið með sérlega góðum kjúklingarétti. Mér finnst voðalega gott að fá mér svona „stir fry“ rétti á asískum stöðum með kjúklingi, fullt af grænmeti og kasjúhnetum. Í kvöld ákvað ég að reyna að búa til eigin útgáfu af slíkum rétti og mér fannst takast afar vel til. Fjölskyldan var voðalega ánægð með þennan rétt og lofaði hann bak og fyrir. Enn og aftur sannast að það þarf ekki að vera flókið að búa til holla, einfalda og ljúffenga rétti. Ég mæli með því að þið prófið þessa uppskrift við fyrsta tækifæri! 🙂

Uppskrift f. ca. 4-5

  • 700 g kjúklingalundir (ég notaði frystar frá Rose Poultry)
  • ólífuolía til steikingar
  • 4-5 hvítlauksrif, söxuð smátt
  • 1 rauður chili, kjarnhreinsað og saxað smátt
  • 1 stór eða 2 litlir laukar, skornir í sneiðar
  • 1 meðalstór haus brokkolí, skorið í bita
  • 1 meðalstór haus blómkál, skorið í bita
  • 1 púrrlaukur, skorinn í sneiðar
  • 1 stór eða 2 litlar rauðar paprikur, skornar í sneiðar
  • 150 g kasjúhnetur
  • 1.5 dl hoisinsósa
  • 1 tsk fiskisósa
  • 1.5 dl vatn
  • salt & pipar
  • chili flögur (má sleppa)

Kasjúhneturnar eru ristaðar á heitri og þurri pönnu þar til þær fá lit og þær lagðar til hliðar. Kjúklingur er skorinn í bita. Góð sletta af ólífuolíu er sett á pönnu og hitað. Þá er chili og hvítlauk bætt út á pönnuna í stutta stund. IMG_1520 Því næst er kjúklingnum bætt við og hann steiktur í 3-4 mínútur, saltað og piprað.

IMG_1529 Svo er öllu grænmetinu bætt út á pönnuna (olíu bætt við ef þarf) og steikt þar til grænmetið fer að mýkjast, hrært í reglulega. Þá er hoisinsósu, fiskisósu og vatni bætt út á pönnuna og látið malla í nokkrar mínútur. Að lokum er ristuðu kasjúhnetunum bætt út í réttinn. IMG_1536Ef maður vill hafa réttinn sterkari er hægt að krydda hann aukalega með chiliflögum. Borið fram með hrísgrjónum eða núðlum. Njótið!

IMG_1553

Grilluð tikka masala kjúklingapizza


Grilluð tikka masala pizza

Ég er ákaflega spennt að setja inn þessa uppskrift en í henni mætast tveir gómsætir matarheimar, sá ítalski annars vegar og hins vegar sá indverski. Þeir sem hafa prófað að grilla venjulega pizzu á útigrilli vita hversu góðar slíkar pizzur eru. Hér nota ég naan-brauð sem botn og ofan á þennan indversk ættaða pizzubotn bjó ég til gómsæta indversk/ítalska pizzusósu og  karamelluseraðan lauk. Einnig setti ég á naan-pizzuna papriku, mozzarella ost og tikka masala kjúkling auk tandoori kjúklings. Með þessum fáu hráefnum og einföldu matargerð skapaði ég himneskar naan-pizzur sem bæði börn og fullorðnir á heimilinu kolféllu fyrir. Naan pizzurnar eru ljúfengar á bragðið og það kemur á óvart hversu vel passar að nota naan brauðin sem pizzubotn. Með því að grilla brauðin fæst gómsætur botn sem er passlega mjúkur í miðjunni, með mátulega stökkum köntum og smellpassar við áleggið. Ég prófaði að nota bæði tikka masala kjúkling og tandoori kjúkling.

IMG_1573Hráefnið í Tandoori pizzuna

Hvor tveggja var ákaflega gott, mér fannst fyrrnefnda útgáfan aðeins betri en það voru skiptar skoðanir í fjölskyldunni hvor sósan væri betri. Það tekur smá tíma að karamellusera laukinn en það er alveg þess virði, bragðið af honum verður svo sætt og gott.

IMG_1632Tandoori kjúklingapizza

Ég er mikið búin að nota innfluttan frosinn kjúkling frá Rose Poultry undanfarið. Þegar ég bjó í Svíþjóð notaði ég alltaf frystan kjúkling og fannst hann afar bragðgóður en umfram allt meyr. Mér finnst kjúklingurinn frá Rose Poultry í sambærilegum gæðaflokki, hann er ofsalega mjúkur og meyr. Svo finnst mér æðislega þægilegt að eiga alltaf frystar kjúklingalundir, úrbeinuð innanlæri eða aðra kjúklingabita tilbúna í frystinum. Kjúklingalundirnar þiðna á örskömmum tíma og þær smellpassa á þessar gómsætu naan-pizzur.

kjúklingur1

Uppskrift fyrir 4-5:
  • 700 g kjúklingalundir (ég notaði 1 poka af frystum kjúklingalundum frá Rose Poultry)
  • 1/2 krukka Tandoori paste eða Tikka masala paste frá Patak’s
  • 1/2 dós grísk jógúrt (eða ca. 170 g)
  • ca 1 1/2 msk ólífuolía
  • 2/3 tsk salt
  • 1 stór laukur
  • 1/2 dós niðursoðnir tómatar (ca. 200 g)
  • 1/2 rauð paprika
  • ca. 200 g rifinn mozzarella ostur
  • 3 Naan brauð (ég notaði „garlic & coriander“ naan brauð frá Patak’s)
  • ólífuolía til að pensla naan brauðið
Kjúklingalundirnar eru afþýddar og skornar í hæfilega stóra bita. Tandoori eða tikka masala maukið og gríska jógúrtin eru hrærð saman í skál og kjúklingnum blandað út í. Látið standa við stofuhita á meðan laukurinn er skorinn í sneiðar og paprikan skorin í fremur þunna strimla. Ólífuolía er sett á pönnu eða í pott við meðalhita og lauknum og saltinu bætt út í. Laukurinn er látinn malla við vægan hita í ca. 20-30 mínútur. Lauknum er snúið reglulega, hann á að brúnast en ekki brenna. Olíu er bætt við ef með þarf og jafnvel örlitlu vatni. Á meðan laukurinn mallar er kjúklingurinn í sósunni steiktur upp úr ólífuolíu á pönnu þar til hann er steiktur í gegn. Þá er kjúklingurinn veiddur af pönnunni en eins mikið af sósunni og hægt er, skilin eftir á pönnunni. Tómötunum er bætt út á pönnuna og þeir hrærðir vel saman við sósuna. Sósan er látin malla við meðalhita í nokkrar mínútur þar til hún hefur þykknað dálítið. Naan brauðið er smurt með ólífuolíu á báðum hliðum og sett á grillið í 2-3 mínútur á hvora hlið við góðan hita eða þar til grillrenndur eru komnar í brauðið.
Þá er brauðið tekið af grillinu og það er smurt með sósunni. Því næst er sett dálítið af rifnum osti, þá er kjúklingnum dreift yfir, því næst lauki og papriku og endað á rifna ostinum.
Naan-bauðið er sett aftur á grillið og slökkt undir þeim brennara sem er beint undir brauðinu en annar og/eða þriðji brennarinn stilltur á fremur háan hita. Grillinu er lokað og naan-pizzan grillað í um það bil 8-10 mínútur. Fylgast þarf með hitanum og færa bauðið til ef það fer að verða of dökkt. Njótið!
IMG_1650
Tikka masala kjúklingapizza
Hér er smá myndasería af pizzugerðinni:
IMG_1583
Naan-brauðið grillað
IMG_1596
Smurt með tikka masala sósu
IMG_1584eða tandoori sósu
IMG_1605
Rifnum osti dreift yfir sósuna og því næst kjúklingnum
IMG_1607Þá er lauk og papriku dreift yfir (gott að hafa meiri lauk en á myndinni).
IMG_1593Það er endað á rifnum osti
IMG_1645
Grillað við óbeinan hita í ca. 10 mínútur
IMG_1658
Njótið vel!

Indverskur nautakjötspottréttur með raita jógúrtsósu


Indverskur nautakjötspottréttur með raita jógúrtsósu
Síðastliðnir dagar hafa verið afar annasamir en skemmtilegir. Í dag lauk yfir 200 manna ráðstefnu sem Elfar stjórnaði. Þeir sem fylgjast með Eldhússögum á Instagram hafa fengið að sjá myndir frá þessum dögum. Ég er á Instagram undir „eldhussogur“.

Ráðstefnan byrjaði síðastliðin miðvikudag og það hefur verið mikið að gera síðan þá. Elfar var mættur eldsnemma a morgnana í Hörpu og seinnipartinn mætti ég til þess að vera með í „social“ dagskránni sem stóð fram á nótt öll kvöldin. Samtímis var mikið að gera í báðum vinnunum mínum og yngstu krakkarnir að klára skólann með tilheyrandi tilstandi og sýningum. Ráðstefnan heppnaðist frábærlega vel, ekki síst fyrir tilstilli fyrirtækisins Athygli ráðstefnur, stelpurnar þar eru snillingar! Dagskráin var afar metnaðarfull og flott. Ég einstaklega ánægð með matinn öll kvöldin, allstaðar fengum við frábærlega góðan mat þrátt fyrir að hópurinn væri stór. Við höfum legið á bæn varðandi veðrið. Vikan byrjaði jú ekki vel með slagviðri og hræðilegu veðri. Þar rættist samt ótrúlega vel úr veðrinu sem betur fer.

Á miðvikudagskvöldið byrjaði dagskráin seinni partinn á því að hópurinn kom saman í nýja salnum í Hörpunni, Björtuloft. Ótrúlega fallegur salur með risastórum svölum. Útsýnið þaðan er algjörlega frábært og við fengum meira að segja sólskin! Þar fengu gestir drykki og girnilega  smárétti undir lifandi tónlist. Því næst kom stór bátur og sótti okkur í höfnina við Hörpu og þaðan var haldið út í Viðey. Í Viðey var boðið upp á dásamlega góðan mat og skemmtilega kvöldstund. Hér koma nokkrar Instagram myndir.

IMG_0550 IMG_0551 IMG_0560
Á fimmtudeginum fórum við í heimsókn í Hellisheiðarvirkjun og því næst lá leiðin á veitingastaðinn Fjöruborðið á Stokkseyri. Þar fengum við frábæra humarmáltíð. Við enduðum kvöldið á Slippbarnum með hluta af Svíunum og Íslendingunum – það náðust því ekki margir svefntímar þá nóttina! Í gær var farið í Bláa lónið. Þegar upp úr lóninu var komið beið okkar dásamlega gott hlaðborð í stórkostlega flottum nýlegum sal, Lava. Lava salurinn er byggður inn í hraunið sem umlykur Bláa Lónið. Einn veggur staðarins er náttúrulegur steinveggur en hinir eru háir glerveggir með útsýni yfir lónið. Hápunktur kvöldsins var þegar Eyþór Ingi og félagar tróðu upp, þeir slógu í gegn með frábærum söng og spili! Því næst kom Siggi Hlö og þeytti skífum og það var dansað fram eftir nóttu við mikla stemmningu.

IMG_0575 IMG_0580IMG_0579
IMG_0583
Núna erum við hjónin svolítið eins og sprungnar blöðrur eftir þetta allt saman. Ég fór í garðvinnuna í dag en hún hefur algjörlega setið á hakanum vegna annríkis en líka vegna veðurs. Ég hef aldrei verið svona sein að setja niður grænmetið áður. Ég hafði hvorki tíma né nennu til þess að elda í kvöld og við gæddum okkur í fyrsta sinn á BK-kjúklingi í kvöldmatinn, hann var nú bara alveg ágætur. En uppskriftin sem ég ætla að gefa í dag gerði ég í fyrr í vikunni við góðar undirtektir fjölskyldumeðlima. Ég er alltaf að prófa mig áfram með uppskriftir þar sem ég get notað gúllasið sem ég pantaði af býli. Ókosturinn við gúllas er að oft þarf að elda það mjög lengi eða láta það liggja í maríneringu lengi, það hentar illa fyrir upptekið fólk eins og mig. Þessi réttur er hins vegar fremur fljótlegur og kjötið naut sín vel, virkilega góður réttur! Það er hægt að stjórna hversu sterkur rétturinn er með karrímaukinu. Ég gef upp þrjár matskeiðar í uppskriftinni en það gerir réttinn sterkan, það er því gott að prófa sig áfram með magnið. Raita jógúrsósan er dásamlega góð, hún gefur jafnvægi við kryddið og kallar betur fram góða bragðið.

Uppskrift:

  • 600 nautakjöt í bitum (ég notaði nautagúllas, líka hægt að nota lambakjöt)
  • 4 msk olía
  • 2 laukar, saxaðir smátt
  • 3 hvítlauksrif, pressuð eða söxuð smátt
  • 2 msk rifið ferskt engifer
  • 5 lárviðarlauf
  • 3 msk currypaste (rautt), gott samt að prófa sig áfram með magnið, 3 msk gera réttinn sterkan)
  • 1,5 msk garam masala
  • 3 msk tómatpúrra
  • 2 msk mango chutney
  • 2-3 dl vatn (líka gott að nota helming vatn og helming rjóma)
  • 1-2 grænar paprikur, skornar í strimla
  • 2-3 tómatar, skornir í bita
Kjötið er steikt á pönnu upp úr olíunni þar til það hefur náð dálitlum lit. Þá er lauknum og hvítlauknum bætt út í og steikt áfram. Því næst er engifer, lárviðarlaufum (þau eru svo fjarlægð áður en rétturinn er borinn fram), currypaste, garam masala, tómatpúrru og mango chutney bætt út í og steikt í nokkrar mínútur til viðbótar. Allt er svo flutt yfir í pott, vatni bætt út, lok sett á pottinn og látið malla í 30-40 mínútur eða þar til kjötið er orðið meyrt. Þegar um það bil 10 mínútur eru eftir af eldunartímanum er paprikunni og tómötunum bætt út í. Borið fram með hrísgrjónum, salati, mango chutney og raita jógúrtsósu.

IMG_0152
Raita jógúrsósa:

Gúrkan er skoluð og rifin niður með rifjárni. Mesti vökvinn er pressaður úr gúrkunni. Henni er svo blandað saman við jógúrt, hvítlauk, myntu og hunang. Sósan er svo smökkuð til með salti og pipar. Ef notuð er grísk jógúrt er sósan þynnt með dálitlu vatni, ca. 1/2 dl, sósan á að vera fremur þunn.

Asískur pottréttur með grilluðum ananas og sweet chili-jógúrtsósu


Asískur pottréttur með grilluðum ananas og sweet chili-jógúrtsósu

Það er nú meiri snilldin að það sé „aftur“ komin helgi eftir bara einn vinnudag! Sérstaklega er ljúft að eiginmaðurinn á líka fríhelgi en þær eru ekki á hverju strái. Í dag fórum við á vortónleika hjá börnunum, í hjólaferð og svo bökuðum við mæðgurnar. Eins og venjulega þegar Jóhanna Inga fær að ráða þá er bökuð eplakaka en hún fær aldrei nóg af eplakökum í allskonar útfærslum. Þó hún sé bara átta ára þá er hún farin að baka hér um bil sjálfstætt og hefur afar gaman af. Í sumar mun hún fara á matreiðslunámskeið sem hún fór á í fyrra líka, hún hlakkar mjög mikið til.

Ég ákvað að elda eitthvað í kvöld úr gúllasinu sem ég fékk þegar ég keypti nautakjötið frá Mýranauti. Einhvern veginn þá vill það kjöt oft verða það sem ég nýti síst. Mig langaði að búa til eitthvað rosalega gott og lagðist yfir uppskriftabækur og netuppskriftir. Ég endaði á því að nýta hugmyndir héðan og þaðan, breyta og bæta. Og vá hvað maturinn varð góður! Meðlætið var frekar óvenjulegt og passaði ákaflega vel saman. Jógúrtsósan er alveg hreint dásamlega góð og ég mun pottþétt gera hana aftur sem allra fyrst! Mest á óvart kom ananasinn! Ég kryddaði hann með cajunkryddi og grillaði. Þetta var himneskt meðlæti með réttinum og sósunni góðu. Það var nú svolítið fyndið að ég ætlaði að krydda ananasinn með karrí en greip óvart cajun kryddið. Hins vegar þá kom það ofsalega vel út, ég mun örugglega halda mig við cajunkryddið þegar ég geri ananasinn aftur! 🙂 En við kolféllum sem sagt öll fyrir þessum himneska rétti og átum á okkur gat – þetta var veisla fyrir bragðlaukana! Gúllasið var meyrt og gott enda var ég með frábært kjöt beint af býli. Ég hugsa að það sé líka mjög gott að nota kjúklingakjöt í þennan rétt. Jógúrtsósan og grillaði ananasinn smellpassa allavega örugglega með kjúklingi. Ég veit ekki hvort þessi matreiðsla virkar flókin en hún er það alls ekki, þvert á móti, þetta var allt ákaflega einfalt og fljótlegt (ég reyndar skellti kjötinu í marineringuna fyrr um daginn). Á meðan kjötið mallaði á pönnunni grillaði ég ananasinn og hrærði í sósuna. Aldrei þessu vant voru ekki einu sinni hrísgrjónin tilbúinn þegar allt hitt var tilbúið, þó hafði ég byrjað á þeim.

IMG_9574

Uppskrift: 

  • 1 kíló nautagúllas (eða kjúklingabitar)
  • ca. 100 g belgbaunir (má sleppa)
  • 200 g sveppir
  • 1/2 tsk nautakraftur

Marinering:

  • 4 hvítlauksrif, fínsöxuð eða pressuð
  • 1.5 dl sojasósa
  • 2 msk sesamfræ
  • 2 tsk sambal oelek (chili mauk)
  • 1 dl ólífuolía
  • ferskmalaður svartur pipar

Hráefninu í marineringuna hrært saman. Kjötið lagt í marineringuna, annað hvort í poka eða skál og látið bíða í ísskáp í minnst 30 mínútur en því lengur því betra. Sveppirnir skornir í bita og steiktir á pönnu upp úr smjöri og/eða olíu, kryddaðir með nautakraftinum. Sveppirnir eru svo veiddir af pönnunni. Kjötið er tekið úr marineringunni og steikt á pönnu í 2-3 mínútur. Þá er restinni af marineringunni bætt á pönnuna ásamt sveppum og belgbaununum. Það er hægt að bæta við dálitlu af vatni til þess að búa til meiri sósu ef með þarf. Látið malla í nokkrar mínútur þar til kjötið er tilbúið. Borið fram með sweet chili – jógúrtsósu, grilluðum cajun-ananas og hrísgrjónum.

IMG_9539

Cajun-ananas:

  • 1/2 – 2/3 ferskur ananas
  • ca 1 tsk cajun krydd

IMG_9568

Ananasinn er skorin í bita. Best er að skera ananasinn á þennan hátt (byrjar við 1.20 mín í myndbandinu). Hann er svo kryddaður með cajun kryddi og grillaður við meðalhita í 2-3 mínútur á báðum hliðum.

IMG_9572

Sweet chili – jógúrtsósa:

  • 2 dl grísk jógúrt
  • 4 tsk sweet chili sósa
  • 1-2 hvítlauksrif, pressað
  • ca. 2 tsk fínsaxaður ferskur kóríander

Öllum hráefnunum blandað vel saman.

IMG_9579

IMG_9588

Grænmetislasagna með ostrusósu, engifer og kókos


Þá er helginni að ljúka. Ég hef setið og skrifað ritgerðina mína alla helgina með þó smá hléum. Í gær var Jóhanna að dansa á danssýningu en hún er búin að vera í Hiphop dansi þessa önn. Ég, Inga frænka og mamma mættum og horfðum á, að sjálfsögðu stóð hún sig með sóma stelpan ásamt Gyðu vinkonu sinni. Pabbinn hafði öðrum hnöppum að hneppa því á sama tíma var hann að syngja með Fjallabræðrum á tónleikum í Háskólabíói. Við fórum af danssýningunni á seinni tónleikana og sáum þessa snillinga. Að sjálfsögðu fannst fjölskyldunni okkar maður bera af á sviðinu! 🙂 Við hjónin enduðum svo á bar niðri í bæ með öllum kórnum og hljómsveitinni þar sem staðurinn var tekinn yfir með söng og spili fram á rauða nótt. (myndir af Fjallabræðrum teknar af Kristjáni Söebeck)

Það var því lítið um eldamennsku í gær og deginum áður var snædd pizza. En fyrr í vikunni gerði ég nýjan rétt sem öllum fannst býsna góður. Ég fékk þá uppskrift úr íslensku blaði, aldrei þessu vant, norðlenska blaðinu Vikudagur. Mér fannst uppskriftin hljóma svo ákaflega spennandi að ég varð bara að prófa hana, þetta var ekki líkt neinu lasagna sem ég hef borðað áður! Ég varð ekki fyrir vonbrigðum, þetta grænmetislasagna var ofsalega gott og það kom mér á óvart hvað það var matarmikið, mér fannst eins og í því væri mikið meira en bara grænmeti. Elfar var sérstaklega hrifinn af þessum rétti, mér skilst að hann sé búinn að auglýsa hann vel í vinnunni sinni og lofa uppskriftinni á bloggið! 🙂 Kókosflögurnar komu  afar vel út fannst mér, næst ætla ég að setja enn meira af þeim. Það lítur kannski út fyrir að vera mörg hráefni í þessum rétti en ekki láta það hræða ykkur, margt af því er eitthvað sem maður á til. Ég notaði til dæmis það grænmeti sem ég fann í ísskápnum og svo átti ég satt besta að segja allt annað hráefni til fyrir utan kókosmjólk og svo vantaði mig meiri ostrusósu. Þetta var því afar ódýr réttur að útbúa.

Uppskrift

  • 3 msk. olía
  • 1 kg blandað grænmeti, skorið í bita t.d. laukur, paprika, blómkál, spergilkál, baunir, kúrbítur, gulrætur, sætar kartöflur eða hvað sem hver vill
  • lasagneblöð
  • rifinn ostur
  • kókosflögur

Ostrusósa

  •  4 dl ostrusósa (oyster sauce)
  • ½ dl tómatssósa
  • ½ dl sætt sinnep
  • 2 msk. balsamik edik
  • 2 msk. hunang
  • 1 msk. paprikuduft
  • ½ msk karrí
  • 1 tsk. rósapipar
  • 2 msk. rifið engifer
  • 5 hvítlauksgeirar
  • ½ chili aldin

Allt hráefnið sett í matvinnsluvél og maukað vel.

Kókossósa

  • 300 ml kókosmjólk
  • 2 hvítlauksgeirar
  • 2 tsk. múskat
  • salt
  • pipar
  • sósujafnari

Setjið allt nema sósujafnara í pott og hleypið suðunni upp. Þykkið þá sósuna með sósujafnara.

Ofn hitaður í 200 gráður. Steikið grænmetið í olíu á pönnu í ca. 2 mín. Hellið ostrusósunni á pönnuna og látið krauma í aðrar 2 mín. Leggið lasagneblöð í botnin á eldföstu móti. Setjið þunnt lag af kókossósunni yfir lasagneblöðin og dreifið hluta af grænmetinu yfir kókossósuna. Leggið lasagneblöð yfir grænmetið og endurtakið þannig að það verði 3-4 lög af grænmeti. Dreifið rifnum osti yfir. Bakið við 200°C í 20 mín. Þegar 5 mín. eru eftir af eldunartímanum er rétturinn tekinn út og kókosflögum dreift yfir, svo aftur inn í ofninn restina af tímanum. Borið fram með góðu brauði.

Karríkjúklingur með sætum kartöflum


Við erum búin að borða þennan ljúffenga rétt tvö kvöld í röð! Ég eldaði mjög stóran skammt í fyrrakvöld og í gærkvöldi fengum við okkur afganginn snemma og drifum okkur svo í kvöldsund með krakkana. Jemundur minn hvað það var notalegt! Ég er búin að sitja í svo margar vikur og skrifa ritgerðina mína að ég endaði á því að fá þursabit í bakið. Ég hef aldrei fengið svona í bakið áður, það er ákaflega óþægilegt og algjört vesen þegar maður þarf að sitja við tölvu allan daginn. Ég var svo glöð að uppgötva að Árbæjarlaugin er opin til klukkan 22 núna, en þeir voru búnir að draga svo úr opnunartímanum fyrr í ár. Ekki nóg með það heldur var kominn glænýr heitur pottur með allskonar nuddtækjum! Ég kom heim stálslegin og allt önnur í bakinu og krökkunum fannst dásamlegt að fara í kvöldsund. Við ætlum að reyna að gera þetta reglulega.

En að uppskrift dagsins! Mér finnst kjúklingur ákaflega góður, eins er ég afar hrifin af sætum kartöflum og mér finnst karrí mjög gott. Þegar ég fann uppskriftina af þessum rétti var ég viss um að mér myndi líka hann vel. Í réttinum eru fá hráefni en öll þessi ofangreindu sem mér finnst svo góð, hann er mjög einfaldur að matreiða og dásamlega litríkur. Það kom á daginn að mér líkar ekki bara rétturinn, ég elska hann! 🙂 Ég get varla beðið eftir því að búa hann til aftur og er strax farin að hugleiða hverjum ég á að bjóða í mat í þennan rétt! Ég var ekki ein um að falla fyrir þessum rétti, öllum í fjölskyldunni fannst hann ofsalega góður, meira að segja yngstu krökkunum. Ég notaði,,mild curry paste“ sem ég fann í Þinni verslun, ég fann ekkert slíkt á hraðferð minni í gegnum Bónus. Rétturinn var því mjög mildur en einkar bragðgóður. Ég átti ekki nóg af kókosmjólk en hins vegar átti ég rjóma þannig að ég setti ca. 1/3 rjóma í stað kókosmjólkur en það er líka hægt að nota bara kókosmjólk. Þessi réttur minnir dálítið á Massaman curry réttinn sem byggist einmitt upp á kartöflum, kjöti, curry paste, kókosmjólk og fleira hráefni. Sá réttur er ofsalega góður en mér finnst þessi eiginlega betri út af sætu kartöflunum og hann er klárlega mildari og einfaldari að útbúa.

Uppskrift:
  • 800 gr sætar kartöflur
  • 2 msk olía
  • salt og pipar
  • 2-3 msk curry paste (grænt, milt, sterkt – eftir smekk)
  • 1 msk olía
  • 700 gr kjúklingabringur eða lundir
  • 1 dl kröftugt kjúklingasoð (kjúklingakraftur + sjóðandi vatn)
  • 1 dós kókosmjólk
  • 1 límóna (lime), safinn + fínrifinn börkur
  • kóríander, grófsaxað

Bakarofn hitaður í 220 gráður. Sætar kartöflur skrældar, skornar í bita og dreift í ofnskúffu. Olíu, salt og pipar bætt við og hitað við 220 gráður í ca. 20 mínútur. Á meðan er kjúklingurinn skorinn í bita. Olíunni (1 msk) hellt á pönnu og curry paste bætt út á pönnuna. Látið malla í ca. 2 mínútur, hrært í á meðan. Kjúklingabitunum bætt út á pönnuna og steikt þar til þeir hafa náð lit á öllum hliðum. Þá er kókosmjólk, kjúklingasoði, safa og berki frá límónunni bætt út og látið malla í ca. 10 mínútur. Þegar sætu kartöflurnar eru hér um bil eldaðar í gegn er þeim bætt út í kjúklingaréttinn (allt fært í stóran pott ef pannan er of lítil) og leyft að malla með kjúklingnum í nokkrar mínútur í viðbót. Borið fram með hrísgrjónum og fersku kóríander stráð yfir réttinn.

Tælenskur kjúklingur í grænu karrí


Ég er að berjast við löngunina að skrifa ekki karrí með ý! Karrí er víst skrifað með venjulegu i í íslensku en einhvern vegin finnst mér karrý líta betur út á prenti, ætli það sé ekki enskuvæðingunni að kenna! En burtséð frá því þá er tælenskur kjúklingur í grænu karrí ákaflega góður réttur! 🙂 Þó svo að ég leitist yfirleitt við að elda allan mat frá grunni þá er ég líka alltaf á höttunum eftir fljótlegum, einföldum og góðum matréttum eins og örugglega flestar aðrar uppteknar fjölskyldur. Sérstaklega þessa dagana þegar ég er að skrifa ritgerðina mína bókstaflega dag og nótt. Ég ákvað að prófa green curry mix frá Santa Maria og blanda því við kjúkling, bætti svo bara við lauk, hvítlauk og papriku ásamt kókosmjólk. Gæti ekki verið einfaldara og rétturinn sló í gegn hér heima. Það sem kom mér mest á óvart var að yngstu krakkarnir hámuðu í sig matinn og fannst hann svo góður! Rétturinn er bragðmikill en samt ekki of sterkur. Ég spurði þau einmitt hvort þeim þætti hann ekkert of sterkur, en svo var ekki! Það er líka til rautt karrí mix sem ég ætla að prófa næst.

Uppskrift:

  • 3-4 kjúklingabringur, skornar í litla bita
  • 1 bréf Green Curry Spice Mix
  • 1 dós kókosmjólk
  • 2 hvítlauksrif, söxuð smátt
  • 1/2 -1 laukur, saxaður í þunnar sneiðar
  • 1 rauð paprika, söxuð í þunnar sneiðar
  • smjör til steikingar

Laukur, hvítlaukur og paprika steikt upp úr smjörinu í þar til það verður mjúkt. Þá er kjúklingnum bætt út í og hann steiktur á öllum hliðum. Því næst er kryddinu bætt út í blandað vel. Þá er kókosmjólk hellt út á pönnuna og látið malla þar til kjúklingurinn er eldaður í gegn. Borið fram með hrísgrjónum.

Kjúklinganúðlur í satay-hnetusósu


 

Ég finn pressuna magnast vegna meistararitgerðarinnar minnar! Það gengur svo sem ágætlega að skrifa en afar hægt. Elfar var að vinna alla helgina en ég náði samt að vinna í ritgerðinni fyrripartinn í gær. Seinni partinn fór ég með Jóhönnu og vinkonu hennar í Krakkahöllina. Ég ætlaði að vera voða sniðug, nýta tímann og setja saman vikumatseðil á meðan ég beið á eftir þeim. Hins vegar kom í ljós að Krakkahöllin býður ekki upp á netsamband. Ég fór því í Bónus fremur illa undirbúin en var þó með óljósar hugmyndir um hina og þessa rétti sem ég keypti í fyrir vikuna. Mér finnst reyndar gaman að reyna að elda úr því hráefni sem ég á til, það verður því skemmtileg áskorun að setja saman rétti og spinna úr því sem ég keypti í gær. Ég er búin að hugsa lengi um að búa til einhvers konar rétt úr Satay hnetusósu. Ég hef skoðað á netinu uppskriftir af slíkri sósu en í Bónus rakst ég á nýja tilbúna gerð Satay sósu sem ég ákvað að prófa. Það átti bara að bæta við vatni en ég ákvað að bæta frekar við kókosmjólk auk vorlauks, hvítlauks, engifers, spínats og papriku. Þetta var afar fljótlegur réttur og góður.

Uppskrift f. 4 

  • 6-800 gr kjúklingalundir eða kjúklingabringur, skornar í litla bita
  • góður bútur af engifer, saxað smátt
  • 2 hvítlauksrif, söxuð smátt
  • 1 búnt vorlaukur, saxaður smátt
  • 1 rauð paprika, skorin í þunnar strimla
  • 2 pakkar Satay sósa (sjá mynd), líka hægt að nota satay sósu í krukku
  • 2 dl kókosmjólk (það er hægt að nota alla dósina en þá verður hnetusósan bragðminni og meira kókosbragð)
  • 1/3 poki spínat
  • 250 gr eggjanúðlur

 

Eggjanúðlurnar soðnar eftir leiðbeiningum (passa þarf að ofsjóða þær alls ekki) Vorlaukur, hvítlaukur og engifer saxað smátt og steikt upp úr olíu á pönnu í ca. 1 mínútu án þess að það brenni. Blandan er svo veidd upp úr og lögð til hliðar. Kjúklingur steiktur á pönnunni þar til að hann hefur náð góðum lit og paprikunni bætt við. Því næst er laukblöndunni bætt aftur út í (ef pannan er lítil gæti verið gott að færa allt yfir í pott) Sósunni hellt út á ásamt kókosmjólkinni og látið malla í ca. 5 mínútur. Í lokin er spínatinu bætt út í. Kjúklingasósunni er svo blandað við eggjanúðlurnar og borið strax fram (ég stráði dálítið af söxuðum pistasíuhnetum yfir réttinn)