Heitur brauðréttur með kjúklingi og beikoni


IMG_1281

Um daginn ákvað ég að búa til brauðrétt og að nota í hann kjúkling fremur en hefðbundna skinku eða pepperóni. Úr varð afar ljúffengur og matarmikill brauðréttur sem hentar vel á fermingarhlaðborðin sem eru í vændum næstkomandi mánuð. Við erum boðin í þrjár fermingar nú um páskana sem mér finnst afar skemmtilegt. Þegar við bjuggum í Svíþjóð misstum við af öllum fermingarveislum hjá vinum og ættingjum og þegar ég flutti til Íslands, 36 ára gömul, hafði ég einungis farið í eina fermingarveislu frá því að ég var unglingur, það var hjá stjúpsyni mínum! 🙂 Ég kann því afar vel að meta að geta verið með og fagnað á tímamótum í lífi fólksins í kringum okkur. Maður áttar sig kannski ekki á því hversu dýrmætt það er fyrr en maður býr erlendis. En aftur að uppskriftinni! Ég mæli með því að þið prófið þennan brauðrétt, hann er gómsætur! 🙂

Heitur brauðréttur með kjúklingi og beikoni:
  • ca. 15 brauðsneiðar
  • 500 g kjúklingabringur eða lundir, skorin í bita (ég notaði Rose Poultry)
  • 250 g sveppir, skornir í sneiðar
  • 1 lítill rauðlaukur, saxaður smátt
  • ólífuolía og/eða smjör til steikingar
  • 1 msk kjúklingakraftur
  • 200 g Philadelphia ostur með papriku og lauki
  • 4-5 dl matreiðslurjómi
  • 1 msk sojasósa
  • Heitt pizzakrydd frá Pottagöldrum
  • salt & pipar
  • 200 g beikon
  • fersk steinselja
  • rifinn ostur
Ofn hitaður í 200 gráður. Mesta skorpan skorin frá brauðinu sem er síðan skorið í teninga og dreift á botn eldfasts móts. Kjúklingur, sveppir og laukur steikt á pönnu upp úr ólífuolíu og/eða smjöri. Þá er kjúklingakrafti bætt út á pönnuna. Því næst er Philadelphia osti, rjóma og sojasósu bætt út á pönnuna og sósan svo smökkuð til með heitu pizzakryddi, salti og pipar. Látið malla við vægan hita í smá stund, athugið að sósan á að vera þunn. Því næst er sósunni hellt yfir brauðið í eldfasta mótinu. Beikon er steikt og skorið í litla bita og dreift yfir sósuna. Þá er steinseljan söxuð smátt og henni dreift yfir beikonið. Að lokum er rifnum osti dreift yfir réttinn. Hitað í ofni í 20-25 mínútur eða þar til osturinn hefur fengið góðan lit.
IMG_1288IMG_1291
Auglýsingar

Hægeldað kálfa ribeye með rauðvínssveppasósu og ofnbökuðum kryddjurtakartöflum


IMG_0430Síðastliðinn mánuður hefur verið afar annasamur því um síðustu mánaðarmót fluttum við í nýja húsið okkar sem við höfum verið að gera upp síðan í byrjun desember. Það gekk mikið á í flutningunum. Það kom ákkurat leiðindarveður með roki og hláku þannig að elsta dóttir okkar datt og fótbrotnaði, það kom gat á vatnsleiðslu í gólfi og allskonar önnur ævintýri gerðust í kringum flutningana. Ofan á allt saman var húsið ekki alveg tilbúið þannig að við höfum búið við fremur frumstæðar aðstæður fram að þessu með iðnaðarmenn, endalaust ryk og óupptekna kassa um allt hús. Núna er hins vegar farið að sjást fyrir endan á þessu öllu og páskafríið verður nýtt út í hið ýtrasta til að koma okkur fyrir. Nýja eldhúsið er komið í gagnið og ég er afskaplega ánægð með það. Ég held að ég muni hreinlega blogga alveg sérstaklega um það við fyrsta tækifæri. Nú þegar framkvæmdum fer að ljúka get ég loksins farið að snúa mér að fullum krafti í matargerðina og fyrst á dagskrá verða auðvitað góðar páskamáltíðir. Ég veit að ég er búin að setja inn margar uppskriftir að hægelduðu kjöti undanfarið en ég er bara svo hrifin af því! Hér bætist enn ein í safnið og að þessu sinni hægeldað kálfakjöt. Eftir Ítalíuferðina, þar sem ég fékk mér kálfakjöt við hvert tækifæri á veitingastöðum, hef ég uppgötvað að það fæst ákaflega gott frosið kálfakjöt (ég fékk mitt í Bónus Ögurhvarfi) hér heima, merkt Ekro, einstaklega meyrt og ljúffengt. Við það að hægelda kjötið þá varð það meyrt eins og smjör, það þurfti varla hníf til þess að skera það! Ég er líka ofsalega hrifin af meðlætinu með kjötinu, það passar vel við aðrar tegundir af kjöti líka.

Hægeldað kálfa ribeye með rauðvínssveppasósu (fyrir 5)

  • 1 kíló Ekro kálfa ribeye
  • 1-2 msk smjör
  • 1 msk ólífuolía
  • salt & nýmalaður svartur pipar
  • plastfilma

Rauðvínssósa

  •  2-3 stórir skarlottulaukar, saxaðir smátt
  • 250 g sveppir, skornir í sneiðar
  • 1 msk smjör
  • 4 dl rauðvín
  • 500 ml nautasoð
  • 100 g rjómaostur
  • salt og pipar

Kjötið er látið þiðna í ísskáp í minnst einn sólarhring. Nokkrum tímum áður en kjötið er eldað er það tekið úr ísskáp, snyrt við þörfum og látið ná stofuhita. 1 msk ólífuolía og 1 msk smjör er sett á pönnu og látið hitna vel. Þá er kjötið kryddað með pipar og steikt við háan hita í ca. 2 mínútur á öllum hliðum. Því næst er það látið kólna í um það bil 5-10 mínútur. Bakarofn hitaður í 60 gráður við undir- og yfirhita. Nú er kjötinu vafið þétt inn í plastfilmu nokkra vafninga. Kjötmæli er stungið í kjötið (í gegnum plastið) og það sett inn í 60 gráðu heitan ofn í um það bil 3 ½ – 4 tíma eða þar til kjarnhiti kjötsins hefur náð 60 gráðum (það þarf ekki að hafa áhyggjur af því að setja plastið inn í ofn því það hvarfast engin efni úr því við 60 gráðu hita).

IMG_0377

Skarlottulaukurinn er steiktur í 2-3 mínútur á sömu pönnu og kjötið var steikt á, smjöri bætt við ef þarf. Svo er sveppunum bætt út á pönnuna ásamt 1 msk af smjöri, kryddað með salti og pipar eftir smekk og steikt í nokkrar mínútur til viðbótar. Rauðvíninu er þá hellt út á pönnuna og sósan látin malla þar til hún hefur soðið niður allavega um 2/3. Því næst er nautasoðinu bætt út á pönnuna og sósan látin malla þar til hún fer að þykkjast. Að lokum er rjómaosti bætt út í og sósan krydduð meira ef með þarf.

IMG_0384

Þegar kjötið hefur náð 60 gráðu kjarnhita er það tekið út úr ofninum, plastið tekið af og kjötið steikt örstutta stund upp úr smjöri og ólífuolíu á heitri pönnu á öllum hliðum, kryddað með salti og meiri pipar ef með þarf. Að lokum er kjötið látið hvíla undir álpappír í minnst 15 mínútur áður en það er skorið niður. Óhætt er að láta kjötið bíða í klukkustund undir álpappír og handklæði.

Borið fram með rauðvínssósu, ofnbökuðum kryddjurtakartöflum og steiktri grænmetisblöndu.

Ofnbakaðar kryddjurtakartöflur

  • 1 kíló meðalstórar kartöflur (af svipaðri stærð)
  • 1 msk ólífuolía
  • 1 msk smjör
  • 15 g fersk basilika
  • 15 g fersk flatblaða steinselja
  • maldon salt og nýmalaður pipar

IMG_0379

Ofn hitaður í 220 gráður við undir- og yfirhita. Kartöflurnar eru þvegnar, þerraðar og skornar í tvennt. Þá er þeim velt upp úr ólífuolíu, salti og pipar. Ofnplata smurð með smjöri og kartöflunum raðað á plötuna með skornu hliðina niður. Því næst eru þær hitaðar í ofni í 25-30 mínútur eða þar til kartöflurnar eru orðnar mjúkar í gegn og hafa tekið góðan lit. Á meðan er basilika og steinselja söxuð smátt og sett í skál ásamt 1 matskeið af smjöri. Þegar kartöflurnar koma úr ofninum eru þær strax settar í skálina og blandað vel saman við smjörið og kryddjurtirnar. Kryddað með salti og pipar eftir smekk.

Steikt spergilkál og kúrbítur með spínati

  • 1 msk ólífuolía
  • 1 msk smjör
  • 500 g spergilkál
  • 1 meðalstór kúrbítur
  • 1 gulur laukur
  • 2 hvítlauksrif
  • 200 g spínat
  • salt og pipar
  • chili flögur

Spergilkálið er skorið niður í bita ásamt kúrbítnum. Laukurinn skorin í litla bita og hvítlaukur saxaður fínt. Panna hituð með smjöri og olíu. Kúrbítur, spergilkál, hvítlaukur og laukur steikt á pönnunni við meðalhita í um það bil 10 mínútur þar til að grænmetið er orðið mjúkt. Kryddað með salti, pipar og chili flögum. Þegar um það bil 1 mínúta er eftir af steikingartímanum er spínatinu bætt út í.

Wyndham-Sævar Már vínþjónn mælir með rauðvíninu Wyndham Bin 555 Shiraz með þessum rétti. Því er lýst á eftirfarandi hátt: Dökkkirsuberjarautt. Meðalfylling, ósætt, fersk sýra, miðlungstannín. Höfugt. Dökk ber, minta.

IMG_0421

Kjúklingur með ostasnakki, sætum kartöflufrönskum og kryddjurtasósu með hvítlauki


IMG_1316

Ég rakst á ostasnakk inni í skáp hjá mér sem er skrítið þar sem að ég held að enginn í fjölskyldunni borði þannig snakk. Ég reyni hins vegar alltaf að nýta allt og fór að velta því fyrir mér hvort ég gæti ekki notað það í eitthvað. Ég ákvað að reyna að búa til rasp úr ostasnakkinu fyrir kjúkling og úr varð, að mér fannst allavega, sjúklega góður kjúklingur með sósu og sætum frönskum sem eru í uppáhaldi hjá mér. Ég notaði heilar bringur því mér finnst þær vera safaríkastar. Ég prófaði bæði að steikja kjúklinginn á pönnu og baka í ofni og hélt fyrirfram að sá steikti yrði líklega betri en mér fannst eiginlega ofnbakaði kjúklingurinn betri. Sósan er einföld en hrikalega góð en Herbes de Provence kryddið er einmitt svo gott í svona sósur. Þegar ég var síðast í Stokkhólmi kom ég við í búðinni hjá Leila Lindholm, sem er þekktur sjónvarpskokkur þar í landi, og keypti meðal annars þessar sniðugu skálar og svo pappír til að leggja í þær. Það er alveg óskaplega gaman að bera fram heimagerðan skyndibita á svona skemmtilegan máta.

IMG_1321

Uppskrift:

  • 4 kjúklingabringur (ég notaði frá Rose Poultry)
  • 1 dós jógúrt án ávaxta (180 g)
  • 1 eggjahvíta     snakk
  • 1 msk dijon sinnep
  • 60 g ostasnakk
  • 50 g kornflex
  • 1/2 tsk cayanne pipar
  • 1/2 hvítlaukskrydd
  • 1 tsk paprikukrydd
  • 1/2 tsk oregano
  • 1/2 tsk basilika
  • salt & pipar
  • ólífuolía
  • 500 g sætar kartöflur.

Ofn er hitaður í 200 gráður. Ofnplata er klædd bökunarpappír og pappírinn smurður með ólífuolíu. Sætu kartöflurnar er skornar í hæfilega stóra bita líkt og franskar kartöflur. Þeim er velt upp úr ólífuolíu, salti, pipar og öðru góðu kryddi, t.d. ítölsku kryddi. Því næst er þeim dreift yfir annan helming bökunarplötunnar.

IMG_1301

Kornflex og ostasnakk er mulið í matvinnsluvél og blöndunni síðan blandað saman við cayanne pipar, salt, hvítlaukskrydd, paprikukrydd, oregano og basiliku. Í annarri skál er jógúrti, eggjahvítu, dijon sinnepi og salti blandað saman. Kjúklingabringunum er dýft vel ofan í jógúrt blönduna og svo velt upp úr ostasnakks-blöndunni þannig að kjötið sé alveg þakið. Kjúklingabringunum er raðað á ofnplötuna, þær penslaðar með smá ólífuolíu og bakaðar í ofni í ca. 30-35 mínútur ásamt sætu kartöflunum eða þar til kjúklingurinn er eldaður í gegn. Athugið að tíminn fer eftir stærðinni á bringunum. Borið fram með kryddjurtasósu með hvítlauki.

Kryddjurtasósa með hvítlauki

  • 1 dós sýrður rjómi (t.d. 10% eða 18%)
  • ca. 2 tsk Herbes de Provence frá Pottagöldrum
  • 1 hvítlauksrif, pressað
  • salt og pipar

Öllu blandað vel saman með gaffli eða skeið.

IMG_1319

IMG_1328

Hér er svo kjúklingur steiktur.

IMG_1303

Kjúklingabringur fylltar með döðlum, beikoni og fetaosti


IMG_1246

Ég tók í mig fyrir nokkru að mig langaði svo mikið í einhverskonar kjúklingarétt með döðlum og beikoni. Síðan þá hef ég prófað mig áfram með nokkrar útgáfur. Til dæmis pófaði ég að vefja slíkri fyllingu upp í úrbeinuðum kjúklingalærum ásamt fleiri tilraunum. Það var ekki fyrr en að mér datt í hug að bæta við fetaosti og lauki við blönduna og setja hana inn í vasa á kjúklingabringu að mér fannst rétturinn smella saman. Satt best að segja finnst mér þetta einn besti kjúklingaréttur sem ég hef fengið lengi og vona að ég sé ekki ein um það! 🙂 Mér finnst alveg nauðsynlegt að hafa sætkartöflumúsina og fetaosta- og hvítlaukssósuna með réttinum, það setur punktinn yfir i-ið.

IMG_1254

Uppskrift:

  • 4 kjúklingabringur (ég notaði Rose Poultry)
  • 200 g beikon, skorið í bita
  • 1 meðalstór rauðlaukur, saxaður smátt
  • 200 g döðlur, saxaðar fremur smátt
  • 180 g fetaostur (fetaostakubbur)
  • salt & pipar
  • chiliflögur
  • 1 dós tómatar í dós (ca. 411 g)
  • 1 1/2 msk tómatmauk
  • 1 1/2 tsk paprikukrydd

Ofn hitaður í 200 gráður. Djúpur vasi er skorinn í kjúklingabringurnar og þess gætt að þær séu ekki gataðar. Bringurnar eru svo kryddaðar með salti, pipar og chiliflögum. Fyrir þá sem vilja er hægt að snöggsteikja bringurnar, ca. 1 mínútu á hvorri hlið á þessum tímapunkti, til þess að þær fái steikingarhúð.

Beikon er steikt á pönnu og þegar það nálgast að verða stökkt er lauk og döðlum bætt út á pönnuna og allt steikt í ca. 3-4 mínútur. Að lokum er fetaosturinn mulinn út á pönnuna og öllu blandað saman. Helmingurinn af blöndunni er tekinn af pönnunni, skipt á milli kjúklingabringanna og vasarnir á þeim fylltir. Því næst er tómötum í dós bætt á pönnuna út í restina af döðlu- og beikonblönduna. Þá er tómatmauki og paprikukryddi bætt út í og leyft að malla í 3-4 mínutur. Að lokum er tómatmaukblöndunni hellt í botninn á eldföstu móti og kjúklingabringunum raðað ofan á. Hitað í ofni við 200 gráður í um það bil 20 mínútur eða þar til kjúklingurinn hefur eldast í gegn. Borið fram með sætkartöflumús og fetaosta- og hvítlaukssósu.

Fetaosta- og hvítlaukssósa:

  • 70 g fetaosturinn (restin af fetaostakubbinum)
  • 1 dós sýrður rjómi 18% (180 g)
  • 1-2 hvítlauksrif
  • salt og pipar

Öllum hráefnunum er blandað saman með töfrasprota eða í matvinnsluvél og smakkað til með salti og pipar.

IMG_1252IMG_1258

Ananaskaka


IMG_1076

Ég bakaði þessa ananasköku í vikunni við mikla gleði fjölskyldunnar enda er hún afar mjúk, safarík og ljúffeng. Frábær kaka til að grípa til þegar mann langar að baka eitthvað einfalt, fljótlegt og gott.

IMG_1075

Uppskrift

  • 1 dós ananas (ca. 450 g)
  • 4 egg
  • 3 dl sykur
  • 1 msk lyftiduft
  • 2 tsk vanillusykur
  • 100 g smjör, brætt
  • 1 dl mjólk
  • 1 dl safi frá ananasinum
  • 5 ½ dl hveiti
  • flórsykur til skrauts

Ofn hitaður í 200 gráður við undir- og yfirhita. Anansinn skorinn í minni bita og settur í sigti þannig að safinn renni af, ananassafanum haldið til haga.  Egg og sykur hrært þar til létt og ljóst. Þá er lyftidufti, vanillusykri og hveiti bætt út í og hrært. Að lokum er smjöri, mjólk og ananassafa bætt út í og hrært saman þar deigið verður slétt. Form (ca. 25×38 cm ) smurt að innan og deginu hellt í formið. Ananasbitarnir eru kreistir létt þannig að mesti safinn renni úr þeim og þeim stungið ofan í deigið með jöfnu millibili. Bakað í ofni í 20-25 mínútur eða þar til kakan er bökuð í gegn. Kökunni leyft að kólna dálítið í forminu og flórsykri dreift yfir kökuna áður en hún er borin fram.

IMG_1072IMG_1086IMG_1087

 

Ofnbakaður lax með klettasalati og fetaosti


IMG_1130

Mér finnst fátt betra en ferskur lax og oftast er hann bestur þegar hann er útbúinn á sem einfaldasta máta. Þessi uppskrift er bæði fljótleg og einstaklega ljúffeng. Ég mæli með því að þið prófið! 🙂

Uppskrift f. 4

Lax

  • 800 g lax
  • 50 g klettasalat
  • 3 msk olífuolía
  • salt & pipar
  • chiliflögur
  • 150 g fetaostur (kubbur – ekki með olíu)
  • 8 kartöflur

Dillsósa:

  • 1 dós sýrður rjómi (180 g)
  • ferskt dill (ca 15 g)
  • 1 hvítlauksrif, pressað
  • salt & pipar

IMG_1105

Ofn hitaður í 200 gráður við undir- og yfirhita. Kartöflur eru skornar í báta, velt upp úr salti og pipar, þær lagðar á annan helming ofnplötu (klædda bökunarpappír) og hún sett inn í ofn í um það bil 15 mínútur. Á meðan er laxinn er skorinn í 4 bita. Klettasalatið er saxað gróft og blandað saman við ólífuolíu, salt, pipar og chiliflögur. Þegar kartöflurnar eru teknar úr ofninum eru laxabitarnir lagðir á hinn helming ofnplötunnar. Klettasalatsblöndunni er dreift yfir laxabitana og því næst er fetaosturinn mulinn yfir. Ofnplatan er sett aftur inn í ofn í um það bil 15 mínútur eða þar til laxinn og kartöflurnar eru eldaðar í gegn. Borið fram með grænmeti (ég steikti sveppi, brokkolí og kokteiltómata upp úr hvítlaukssmjöri) og dillsósu.

Dillsósa: Dillið er saxað smátt og hrært saman sýrða rjómann ásamt hvítlauki og kryddi.

IMG_1125

 

Marengsterta með karamellurjóma og hindberjum


IMG_0561

Nú er kominn einn og hálfur mánuður frá því að við fengum nýja húsið okkar afhent og þar eru miklar framkvæmdir í gangi. Eins og gengur og gerist þá vinda svona framkvæmdir upp á sig og staðan er núna sú að við erum að skipta um eiginlega allt í húsinu, allt frá rafmagni og lögnum upp í innréttingar og gólfefni. Þetta eru afar spennandi framkvæmdir og að mörgu að huga, margar ákvarðanir sem þarf að taka. Við hjónin erum sem betur fer svo skemmtilega samstíga að við erum yfirleitt sammála um allt og ákaflega fljót að taka ákvarðanir sem hentar vel í svona framkvæmdum. Það er þó eitt þessa dagana sem við sveiflumst fram og tilbaka með, það eru borðplötur í eldhúsinu. Við vorum ákveðin í að hafa svartar granítplötur (eldhúsinnréttingin er hvít) en svo fór ég efast eftir að hafa lesið á netinu um að sumum finnist of kalt að hafa granít á öllu, að það glamri mikið í öllu sem maður leggur frá sér og að það sjáist mikið á svörtu graníti. Í eldhúsinu sem við erum með núna er granít í einu horninu og svo eikarborðplötur á restinni. Mér finnst frábært að hafa granítið, gott að hnoða deig á því og ég legg allt heitt beint úr ofninum á það. En það er spurning hvort að það sé of mikið að hafa granít á öllu. Endilega segið mér frá ykkar reynslu af borðplötum og hverju þið mælið með!

En víkjum að þessari dásemd!

IMG_0577

Bóndadagurinn er á morgun og ég ætla sannarlega að dekra við minn bónda. Rauðvín og steik hljómar algjörlega í takt við daginn en ég held líka að ein svona hnallþóra yrði ekki óvinsæl á borðum bænda landsins! 🙂 Mér finnst Dumle súkkulaðiðfrauðið svo gott að ég ákvað að prófa mig áfram með það í tertu og hér er gómsæt útkoman:

IMG_0571

Dumlerjómi með hindberjum:

  •   5 dl rjómi
  •   120 g Dumle orginal, saxaðar eða klipptar í minni bita
  •   300 g hindber (fersk eða afþýdd)

Marengs:

  •   220 sykur
  •   4 eggjahvítur (stór egg)
  •   3 bollar Kornflex
  •   1 tsk lyftiduft

Dumle snacks krem:

  •   4 eggjarauður
  •   4 msk flórsykur
  •   175 g Dumle Snacks, saxað
  •   50 g 50-70% súkkulaði, saxað
  •   3-4 msk rjómi
  •   Til skrauts. Nokkrir Dumle snacks molar saxaðir niður og hindber.

Dumlerjómi: Rjómi hitaður í potti og þegar hann er kominn nálægt suðu er karamellunum bætt út rjómann og hrært þar til þær hafa bráðnað. Gæta þarf þess að rjóminn sjóði ekki. Rjómablöndunni er því næst hellt í skál og sett í kæli þar til blandan er orðin alveg köld, í minnst 3-4 tíma, best er að geyma hana í kælinum yfir nóttu. Þegar rjómablandan er orðin alveg köld er hún stífþeytt og þá er hindberjunum blandað varlega saman við með sleikju.

Marengs: Ofn hitaður í 120 gráður við blástur. Eggjahvítur, lyftiduft og sykur er þeytt þar til marengsinn er orðinn stífur. Þá er kornflexi bætt varlega út í með sleikju. Diskur eða kökuform sem er ca. 23 cm í þvermál er lagt á bökunarpappír og strikaður hringur eftir disknum. Þetta er gert tvisvar. Marengsinum er skipt í tvennt og hann settur á sitt hvorn hringinn. Því næst er slétt jafnt úr marengsinum innan hringsins með sleikju eða spaða. Að lokum er marengsinn bakaður við 120°C, blástur í ca. 50 – 60 mínútur. Best er að láta marengsinn kólna í ofninum. Þegar marengsinn er orðinn kaldur er Dumlerjóminn með hindberjunum settur á milli botnanna og og Dumle snacks kremið sett ofan á.

Dumle Snacks krem: Eggjarauður og flórsykur þeytt vel saman. Dumle snacks og súkkulaði er sett í pott ásamt 3-4 msk af rjóma eða mjólk og brætt við meðalhita, hrært í blöndunni á meðan. Súkkulaðiblöndunni er því næst blandað út í eggjakremið og kreminu svo leyft að standa í smá stund (jafnvel í ísskáp) þar til það stífnar hæfilega. Kreminu er því næst dreift yfir marengstertuna. Skreytt með berjum, t.d. hindberjum og/eða jarðaberjum ásamt nokkrum niðursöxuðum Dumle snacks molum.

IMG_0569

IMG_0576

Hægeldaður kjúklingur


IMG_1024Það er með ólíkindum hversu mjúkt og safaríkt kjöt verður þegar það er hægeldað. Um helgar finnst mér fátt betra en að hægelda lambalæri eða lambahrygg. Ef ég elda nautakjöt þá elda ég það „sous vide“. Reyndar þá á ég ekki sérstakar græjur til þess en ég hef notað skothelda aðferð frá Lækninum í eldhúsinu, ég vef nautalundinni inn í plastfilmu og hægelda í ofni við 60 gráður í nokkra tíma og steiki það svo snöggt á öllum hliðum, þannig verður kjötið lungamjúkt og dásamlega gott.

Um síðastliðna helgi var ég með heilan kjúkling í matinn og fór að hugleiða hvort ég gæti ekki hægeldað hann. Ég keypti heilan frosin kjúkling frá Rose (fékk hann í Fjarðarkaup – hef líka séð hann í Hagkaup), mér hann svo mjúkur og góður en ekki síst er frábært hversu stór hann er, 1600 gr, þá þarf ég ekki að elda tvo heila kjúklinga. Ég tók kjúklinginn úr frystinum á laugardegi og setti hann inn í ísskáp. Á sunnudeginum hægeldaði ég kjúklinginn og mikið óskaplega varð hann ljúffengur! Það var dálítið fyndið að fylgjast með viðbrögðum fjölskyldunnar sem settust öll við borðið á mismunandi tíma. Þau brugðust öll nákvæmlega eins við, „ummmm“ heyrðist í þeim eftir fyrsta bita og svo spurðu þau hissa, „hvernig kjúklingur er þetta?!“ Ég mæli því óhikað með þessari eldunaraðferð ef þið viljið fá dásamlega safaríkan kjúkling. Með honum hafði ég allskonar grænmeti, meðal annars fenniku sem mér finnst svo góð með sínum milda anískeimi en það er hægt að notað hvaða rótargrænmeti sem er í þessa uppskrift.

Uppskrift:

  • 1 heill kjúklingur, ca. 1600 g (ég notaði frá Rose)
  • Kalkúnakrydd
  • 50 g smjör
  • 1/2 dl sojasósa
  • 1 appelsína, skorin í báta
  • 1 heill hvítlaukur, afhýddur
  • 1 sæt kartafla, skorin í bita
  • 8 meðalstórar kartöflur
  • 1 fennika, skorin í bita
  • 1 lítil sellerírót, skorin í bita
  • ca. 2 msk hveiti
  • 3 dl matreiðslurjómi
  • rifsberjahlaup
  • salt og pipar

IMG_1016

Bakarofn hitaður í 110 gráður við undir- og yfirhita. Kjúklingur er afþýddur, skolaður og þerraður. Þá er hann fylltur með appelsínubátum og hvítlauksrifum. Kjúklingurinn er settur í ofnpott. Smjör og sojasósa er brætt saman í potti og hellt yfir kjúklinginn og hann nuddaður vel á öllum hliðum upp úr smjörbráðinni og því næst kryddaður vel. Þá er grænmeti raðað þétt í kringum kjúklinginn. Lokið er sett yfir ofnpottinn og hann settur inn í ofn við 110 gráður í um það bil 3 klukkustundir, +/- hálftíma, fer eftir stærð kjúklingsins. Gott er að nota kjöthitamæli og stinga honum djúpt milli bringu og læris, þar eldast fuglinn seinast. Þegar hitinn er kominn í ca. 70 gráður er lokið tekið af pottinum og hitinn hækkaður í 200 gráður í ca. 15 mínútur eða þar til kjúklingurinn hefur tekið fallegan lit. Þá er ofnpotturinn tekinn úr ofninum og kjúklingurin færður á disk undir álpappír. Grænmetið er veitt upp úr pottinum og vökvanum hellt í pott í gegnum sigti. Vökvinn er látinn standa í pottinum um stund þar til fitan flýtur upp á yfirborðið. Þá er hún veidd af og pískuð saman við hveiti þar til blandan verður þykk. Suðan er látin koma upp á soðinu og hveitibollan pískuð saman við á meðan. Þá er rjómanum bætt út í og sósan látin malla þar til hún hefur þykknað passlega (við þörfum er hægt að nota sósujafnara og sósulit). Gott er að smakka sósuna til með rifsberjahlaupi og salti & pipar.

diablo

Sævar Már vínþjónn mælir með því að njóta kjúklingsins með silkimjúka hvítvíninu Casillero del Diablo Chardonnay. Það er ljóssítrónugult. Meðalfylling, ósætt, fersk sýra. Sítrus, hunangsmelóna,eik.

IMG_1023IMG_1033IMG_1042

Vanilluís með Dumle-núggati og smjörsteiktum kanileplum


IMG_0779Eins og ég hef sagt frá kom yfir mig ísgerðarlöngun nú í desember og ég bjó til nokkra mismunandi ísa fyrir hátíðarnar. Ég var dálítið ánægð með mig þegar ég var búin að þróa uppskriftina að þessum ís því mér fannst hann svo himneskt góður og smjörsteiktu kanileplin settu algjörlega punktinn yfir i-ið. Mér fannst ofboðslega gott að fá svona stökka núggat áferð á Dumle molana í ísnum og lítið mál að búa það til. Stórfjölskyldunni var boðið upp á þennan ís yfir hátíðarnar og gáfu honum öll toppeinkunn! 😉 Það er varla hægt að vera með hátíðlegri eftirrétt nú um áramótin og reyndar er þetta eftirréttur sem sómir sér vel allt árið um kring! 🙂 IMG_0761

Uppskrift f. 6

  • 2 pokar Dumle Orginal karamellur (samtals 240 g)
  • 5 eggjarauður
  • 5 msk sykur
  • 5 dl rjómi, léttþeyttur
  • 2 vanillustangir, klofnar í tvennt og fræin skafin úr

Ofn er hitaður í 180 gráður við blástur. Dumle karamellunum er raðað á ofnplötur  klæddar bökunarpappír. Sett inn í ofn við 180 gráður í um það bil 5-7 mínútur eða þar til karamellurnar hafa bráðnað. Gæta þarf þess að þær brenni ekki. Þegar karamellurnar hafa kólnað eru þær saxaðar niður.IMG_0747IMG_0753IMG_0756

Rjómi þeyttur. Eggjarauður og sykur þeytt saman þar til blandan verður ljós og loftmikil. Þá er þeyttum rjóma, vanillufræjum og Dumle-núggati bætt varlega út í og blandað vel saman með sleikju. Sett í ísform eða 24 cm smelluform og fryst í minnst 5 tíma. Borið fram með heitum smjörsteiktum kanileplum.

Smjörsteikt kanilepli:

  • 4 rauð epli
  • 3/4 dl púðursykur
  • 1 tsk kanill
  • 1 msk smjör.

Eplin eru afhýdd og skorin í fremur þunna báta. Púðursykri og kanil blandað saman og eplunum velt upp úr blöndunni. Smjör hitað á pönnu og eplin steikt í nokkrar mínútur á meðalhita þar til þau hafa mýkst vel. IMG_0765

Hægeldaður lambahryggur í jólaöli


Hægeldaður lambahryggur í jólaöliÞegar ég var barn þá skildi ég ekkert í því að lambalæri og lambahryggur væri álitið sunnudagsmatur því mér fannst það alls ekki gott. Núna finnst mér lambakjöt einn sá besti matur sem ég fæ og lambahryggur er orðinn einn af mínum uppáhaldsréttum. Mér finnst best að hægelda hrygginn og hef gaman að prófa mig áfram með mismunandi sósur. Að þessu sinni notaði ég það sem hendi var næst og hægeldaði hrygginn í jólaöli. Það kom frábærlega vel út og gerði sósuna svo góða. Í stað þess að nota jólaöl er líka hægt að nota pilsner.

Með hryggnum steikti ég ferskt grænmeti. Með því að steikja grænmetið upp úr smjöri og nota grænmetiskraft, sem gefur seltu og krydd, þá verður það algjört sælgæti. Ég prófaði líka að steikja gulrætur upp úr brúnuðu smjöri og maukaði þær síðan, dásamlega gott. Að auki var ég með ofnbakaðar kartöflur og sætarkartöflur sem meðlæti. Mér finnst mjög gott að bræða saman smjör og ólífuolíu í potti og hella yfir kartöflurnar ásamt góðu kryddi áður en þær fara inn í ofn, það gefur svo góða áferð og bragð.

IMG_0946 Þessi máltíð var svo góð að þetta verður nýársmaturinn hjá okkur að þessu sinni, ekki slæmt að byrja nýtt og spennandi ár á slíkum herramannsmat! 🙂

Uppskrift, lambahryggur fyrir ca. 6:

  • 1 lambahryggur (3 kíló)
  • 400 ml jólaöl – ég notaði tilbúna blöndu af Malti og Appelsíni (eða pilsner)
  • 1 hvítlaukur (ég notaði solo hvítlauk), afhýddur og skorinn í báta
  • ca. 1 msk hunangs-dijon sinnep
  • kryddið „Bezt á lambið“
  • 2-3 dl rjómi
  • ca. 2 msk hveiti
  • ca. 1/2 -1 msk sojasósa
  • ca. 1/2 msk rifsberjahlaup
  • 1-2 tsk nautakraftur
  • salt og pipar
  • sósujafnari + sósulitur við þörfum

IMG_0936

Ofninn er hitaður í 100 gráður við undir og yfirhita. Lambahryggurinn er snyrtur ef með þarf, skolaður og þerraður. Því næst er hnífsoddi stungið hér og þar í hrygginn og 10-12 hvítlauksrifum stungið ofan í raufarnar. Þá er hryggurinn smurður með þunnu lagi af dijonsinnepi og því næst kryddaður vel með kryddinu „Bezt á hrygginn“. Nú er hryggurinn settur ofan í ofnpott og jólaölinu hellt ofan í pottinn. Lokið er sett á ofnpottinn og hryggurinn eldaður við 100 gráður í ca 4 – 5 tíma (fer eftir þykkt hryggsins og hversu mikið steiktan maður kýs að hafa hann). Best er að nota kjöthitamæli og stinga honum þar sem vöðvinn er þykkastur. Hryggurinn er tilbúinn þegar hitinn er komin í ca. 65-70 gráður, við 65 gráður er kjötið enn fremur bleikt. Þegar ca. 10 mínútur eru eftir af tímanum er ofnpotturinn tekinn út úr ofninum, vökvanum hellt af í skál. Ofninn er hitaður í 220 gráður á grillstillingu. Hryggurinn er settur aftur ofan í ofnpottinn án loks og hann hitaður í ofninum í ca. 6-8 mínútur (áfram á grillstillingu og sama hita) eða þar til puran verður dökkbrún – fylgist vel með hryggnum. Þá er hryggurinn tekinn út og leyft að jafna sig áður en hann er skorinn niður. Á meðan þessu stendur er sósan útbúin. IMG_0942

Sósa: Vökvinn er sigtaður ofan í pott og látinn standa í smástund á kaldri hellu þannig að fitan fljóti upp á yfirborðið. Þá er hún veidd af og pískuð saman við hveiti með gaffli þar til smjörbollan verður passlega þykk. Suðan er látin koma upp á soðinu og smjörbollunni bætt út í og hrært vel á meðan. Því næst er rjómanum bætt út í og sósan smökkuð til með sojasósu, rifsberjahlaupi, nautakrafti og kryddum. Ef sósan er of þunn er notaður sósujafnari og sósan dekkt við þörfum með sósulit.

IMG_0965

Smjörsteikt grænmeti: 

  • 1 brokkolíhaus, skorinn í bita
  • 250 g sveppir, skornir í beta
  • 1 rauð paprika, skorin í bita
  • 1 lítill rauðlaukur, skorin í sneiðar
  • 2-3 msk smjör
  • 1-2 tsk grænmetiskraftur (ég notaði frá Oscars)
  • salt og pipar

Smjörið er brætt á pönnu og grænmetið steikt í nokkrar mínútur þar til það er hæfilega eldað. Kryddað með grænmetiskrafti, salti og pipar.

IMG_0939

Gulrótarmauk í brúnuðu smjöri:

  • 300 g gulrætur
  • 80 g smjör
  • salt og pipar

IMG_0941

Gulræturnar eru skornar í bita. Smjörið er brætt í potti og gulræturnar látnar malla í smjörinu í um það bil 15 mínútur við meðalhita og hrært öðru hvoru í pottinum. Þegar smjörið hefur brúnast og gulræturnar orðnar dökkar eru þær maukaðar og kryddaðar með salti og pipar.
IMG_0957

Sævar Már vínþjónn mælir með rauðvíninu Campo Viejo Gran Reserva með þessari máltíð. Lýsingin á víninu er eftirfarandi: Dökkkirsuberjarautt. Þétt meðalfylling, ósætt, fersk sýra, miðlungs tannín. Skógarber, plóma, krydd, jörð, eik.rioja