Sebrakaka

Birt þann af
17

Ég gat ekki staðist mátið að prófa þessa köku eftir að ég sá hana á netinu. Tvennt fannst mér afar spennandi, annað var skemmtilegt útlit kökunnar og hitt var að í henni var kók! Ég hef aldrei bakað úr kóki áður þó ég sé nú hrifin af þeim drykk! 🙂 Þetta er í raun tilbrigði við hefðbundna marmaraköku, bara mikið flottari, mýkri og bragðbetri kaka. Ég var nú ekki viss um að ná sebraútlitinu, hélt að það væri kannski afskaplega erfitt. Annað kom þó á daginn, þetta var ægilega auðvelt og skemmtilegt. Jóhönnu Ingu fannst afar gaman að fylgjast með gerð kökunnar og það var hún sem tók myndirnar þegar ég var að setja deigið í kökuformið. Ég notaði svona nestispoka frá Íkea sem hægt er að loka til þess að sprauta deiginu. Smellan helst vel lokuð og pokarnir eru þykkir, það er því lítil hætta á því að deigið fari út um allt. Mikilvægt er að klippa bara örlítið gat á eitt hornið til þess að deigið renni ekki alltof hratt, maður vill geta haft góða stjórn á því. Ég setti til skiptis ljóst og dökkt deig frekar þétt, það er líka hægt að hafa breiðari renndur, setja þá meira af deigi í hverjum skammti. Það kemur líka mjög flott út. Þetta er virkilega góð kaka, það gerir hana afar safaríka að nota kók en það er líka hægt að nota sódavatn til að ná sömu eiginleikum fyrir þá sem ekki vilja nota kók.

Uppskrift:

  • 5½ dl hveiti + 3 msk
  • 3 msk kakó
  • 3 dl sykur
  • 1 tsk vanillusykur
  • 2 tsk lyftiduft
  • 4 stór egg
  • 2 dl matarolía, (ekki ólífuolía)
  • 2 dl kók eða sódavatn

Ofninn er stilltur á 160 gráður á blæstri eða 180 gráður á undir og yfirhita. Egg og sykur þeytt þar til blandan er létt og ljós. Vanillusykri bætt út í. Hveiti og lyftidufti sigtað út í og blandað við deigið. Því næst er matarolíunni hellt út í og þá gosdrykknum. Deiginu er skipt jafnt í tvær skálar. Í aðra þeirra er kakói sigtað út í og blandað saman við deigið með sleikju. Út í hina skálina er þremur matskeiðum af hveiti sigtað út í og blandað við deigið með sleikju. Kringlótt smelluform eða silikonform er smurt að innan (ca. 24 cm). Blöndurnar eru settar í sitt hvorn pokann og þeim lokað vel, örlítið gat er klippt á annað hornið á báðum pokunum. Smávegis af ljósa deiginu er sprautað á miðjuna á botn kökuformsins, því næst er dökka deiginu sprautað ofan í það ljósa. Þannig er haldið áfram koll af kolli þar til báðar blöndurnar eru búnar. Miðjan mun færast til út í kantana á bökunarforminu, það er allt í lagi. Það er örugglega líka hægt að hella bara úr skálunum beint í formið en þá eru kannski meiri líkur á því að litirnir blandist ekki alveg eins og maður vill, erfiðara að hafa stjórn á bununum. Bakað við 160 gráður á blæstri (180 gráður undir/yfir hita) í 40-45 mínútur.

Laxaborgarar með mangósósu og sætum frönskum kartöflum

Birt þann af
6

Fyrir löngu síðan fór ég með nokkrum frábærum stelpum úr líkamsræktarhópnum mínum í kraftgöngu vestur á Seltjarnarnes sem endaði svo með notalegri máltíð á Nauthól. Þá voru þeir með á matseðlinum gómsæta laxaborgara með ,,sætkartöflufrönskum“! Þetta var svo ljúffengur matur að ég hef oft hugsað um að endurgera réttinn heima og lét loksins verða af því í kvöld. Namm namm … þetta var svo gott! Meira að segja krakkarnir elskuðu þennan rétt. Það er mjög fljótgert að búa til borgarana, ég setti bara allt hráefnið í matvinnsluvél. En ef maður vill grófari borgara er hægt að mauka hráefnið saman með gaffli. Ég las mér til í sænskri uppskriftabók að það væri mikið betra að sjóða laxinn örstutt áður en búnir eru til borgarar úr þeim, þannig héldust þeir safaríkari. Ég gerði það og borgararnir voru afar safaríkir en ég hef svo sem ekkert viðmið. Ég bar laxaborgarana fram í hamborgarabrauði en þess þarf ekkert endilega. Það er líka gott að bera þá fram með grænmeti, sósu og sætkartöflufrönskum og þá er hægt að kalla þetta laxabuff! Sósan var rosalega góð, ég notaði blöndu af frosnu og fersku mangói en það er hægt að nota bara annað hvort. Þessa sósu er örugglega gott að nota líka með til dæmis grilluðum kjúklingi. En laxaborgararnir og meðlæti er ofsalega ferskur og bragðgóður réttur, mæli með honum!

Laxaborgarar (ca 5-6 borgarar, fer eftir stærð):

  • 1 kíló laxaflök
  • 1/2 – 1 lítill rauðlaukur, saxaður smátt
  • 1 dl brauðmylsna
  • 2 egg
  • 1 tsk Sambal Oelek (chilimauk) eða 1/2 rautt chili, kjarnhreinsað og saxað smátt (meira ef maður vill sterka borgara)
  • 1 dl ferskt kóríander, saxað (hægt að nota steinselju í staðinn)
  • 2 hvítlauksrif, söxuð smátt
  • börkur af einni límónu (lime), gróft rifinn
  • salt og pipar

Aðferð:

Léttsaltað vatn sett í pott og suðan látin koma upp. Laxinn soðinn í ca. 4 mínútur, síðan er hann veiddur upp úr og roðið tekið af. Öll hráefnin í borgarana sett í matvinnsluvél og keyrt þar til blandan er maukuð saman, ekki of lengi samt, best er að hafa hráefnið í borgarana gróft og ef hráefnið er hrært of lengi geta þeir orðið seigir. Það má líka píska hráefnin saman með gaffli, þá verða borgararnir grófari. Olía og smá smjör sett á pönnu og borgararnir steiktir í nokkrar mínútur á hvorri hlið.

Borið fram með laxaborgurunum:

  • hamborgarabrauð
  • klettasalat
  • salat
  • gúrka
  • tómatar
  • avókadó
  • mangósósa
  • sætar franskar kartöflur

Mangósósa:

  • 2 dl grísk jógúrt
  • 2 dl mangó (frosið eða ferskt)
  • 3 msk mango chutney
  • safi úr 1/2 límónu (hægt að nýta límónuna úr laxaborgara uppskriftinni)
  • salt og pipar

Öllu hráefninu blandað saman með töfrasprota eða í matvinnsluvél. Gott að smakka sósuna til með meiri límónusafa, mangó, mangó chutney og/eða salti og pipar eftir þörfum.

Sætar franskar kartöflur:

Sætar kartöflur skornar í aflangar sneiðar eins og franskar kartöflur. Þeim er svo velt upp úr ólífuolíu, maldon salti, grófum pipar og góðri kryddjurtablöndu, til dæmis Best á allt frá Pottagöldrum. Kartöflurnar bakaðar við 220 gráður í ca. 30 mínútur.

Kjúklingur í himneskri sósu

Birt þann af
8

Ég bjó eiginlega til þennan rétt með hálfum hug. Ég er nefnilega ekkert of hrifin af sólþurrkuðum tómötum, finnst þeir bara góðir ef þeir eru ekki of afgerandi í uppskriftunum. Þetta er afsakaplega einfaldur réttur, mjög fljótlegt að búa hann til og það kom mér síðan skemmtilega á óvart hvað hann var góður! Elfari fannst hann afar góður líka en það sem kom kannski mest á óvart var að Alexander fannst þetta vera besti rétturinn sem ég hef nokkurn tíma gert! Það er reyndar býsna auðvelt að elda fyrir hann, honum finnst allt gott sem ég geri! 🙂 En sósan var sem sagt sú bragðbesta sem hann hefur borðað hingað til, ekki slæm einkunn það! Í upprunalegu uppskriftinni er talað um að nota krydd sem heitir ungversk paprika, það er sætara paprikukrydd en þetta hefðbundna. Það er til frá Pottagöldrum en ég átti það ekki til og notaði því bara hefðbundið paprikukrydd.

Uppskrift:

  • 4 kjúklingabringur
  • salt & pipar
  • ungversk paprika eða venjulegt paprikukrydd

sósa:

  • 6-8 sólþurrkaðir tómatar + 2 msk af olíunni
  • 1-2 dl vatn
  • 1 msk balsamedik
  • 1 msk tómatpúrra
  • 1 msk sojasósa
  • 1 msk nautakraftur
  • 1 dós sýrður rjómi
  • 1-2 dl rjómi
  • salt & pipar
  • sósujafnari (eða maizenamjöl)
  • 1/2- 2/3 poki af ferskri steinselju

Kjúklingabringurnar eru skornar í 3 bita og kryddaðar paprikukryddi, salti og pipar. Kjúklingabitarnir eru svo steiktir á pönnu upp úr smjöri og olíu þar til að þeir hefur náð lit á öllum hliðum. Kjúklingurinn er því næst veiddur af pönnunni og vatninu þeytt saman við feitina, sem eftir var á pönnunni, með písk. Sólþurrkuðu tómatarnir saxaðir smátt og bætt út á pönnuna ásamt tveimur matskeiðum af olíunni af sólþurrkuðu tómötunum. Því næst er tómatpúrru, sojasóusu, nautakrafti, sýrðum rjóma og rjóma bætt út í og sósan smökkuð til með salti, pipar og paprikukryddi. Dálítið af sósujafnara bætt út í til að þykkja sósuna. Kjúklingurinn er nú settur aftur út í sósuna (og safinn sem mögulega hefur runnið af honum á meðan hann beið) og látið malla í 10-15 mínútur. Steinselja er söxuð smátt og bætt út í rétt áður en rétturinn er borinn fram.  Ég bar fram með réttinum ofnsteiktar kartöflur og sætar kartöflur ásamt fersku salati. Það er örugglega líka gott að bera fram hrísgrjón eða kúskús með réttinum.

Apríkósukaka með karamellukókos

Birt þann af
3

Ég prófaði að baka þessa köku í fyrsta sinn í gær og tók hana með mér í saumó. Hún var svakalega góð þó hún væri svolítið blaut þegar hún var enn heit, hún varð bara meira djúsí við það. Ég held ástæðan fyrir því að hún var blaut var að ég notaði aðeins of stórt form þannig að kakan náði ekki nógu mikillri hæð, apríkósurnar hefðu þurft að vera þaktar betur með deigi. Það kom samt ekkert að sök, kakan var guðdómlega góð! Ég var með form sem er 25×35 sem er aðeins of stórt, það er betra að nota bökunarform sem er 20×30, nú eða auðvitað að stækka bara uppskriftina fyrir stærra form. Það væri ekkert vitlaust að tvöfalda uppskriftina og setja hana í ofnskúffu, þetta er svo góð kaka að hún klárast alltof fljótt! Mæli virkilega með henni með laugardagskaffinu á morgun! 🙂

Uppskrift:

  • 2 egg
  • 4 dl sykur
  • 6 dl hveiti
  • 4 tsk lyftiduft
  • 3 dl mjólk
  • 200 g smjör
  • 250 g niðursoðnar apríkósur
  • 2-3 msk kókós (f. kökuformið)

Karamellukókos:

  • 4 msk smjör, brætt
  • 1 dl rjómi
  • 3 dl ljóst síróp
  • 200 gr kókosmjöl

Ofninn stilltur á 200. gráður. Bökunarform, ca. 20×30 cm, þakið bökunarpappír og ca. 2-3 matskeiðum af kókosmjöli stráð yfir. Apríkósurnar þerraðar og skornar í litla bita. Smjörið brætt í potti og látið kólna dálítið. Egg og sykur þeytt þar til blandan er létt og ljós. Hveiti og lyftidufti bætt út í ásamt mjólkinni og brædda smjörinu. Helmingnum af deiginu er hellt í bökunarformið, dreift úr því út í öll horn. Apríkósunum dreift jafnt yfir deigið og svo restinni af deiginu hellt yfir. Bakað í miðjum ofni við 200 gráður í ca. 15 mínútur.

Á meðan er karamellukókos útbúið. Öllum hráefnunum hellt í pottinn og látið malla í 10 mínútur. Kakan er tekin út eftir 15 mínútur og karamellukókos dreift yfir kökuna og hún svo bökuð í 10-15 mínútur í viðbót. Gott er að bera kökuna fram heita með þeyttum rjóma eða vanilluís. Hún er líka ægilega góð köld!

Ostakjötbollur með pasta og mjúkri tómatsósu

Birt þann af
13

Þessi réttur er ofsalega mildur og bragðgóður auk þess að vera einstaklega barnvænn! Engin óvinsæll laukur eða sterk krydd en samt voru kjötbollurnar bragðmiklar með piparostinum og sósan mjúk og bragðgóð. Rétturinn fékk 11 í einkunn af 10 mögulegum hjá yngstu börnunum, ,,sjúklega gott“ hljómaði dómurinn! Ég var að fara í saumaklúbb hjá glæsilega matarbloggaranum henni Svövu vinkonu minni og ég ætlaði sko ekki að mæta södd þangað! 🙂 En börnin þurftu eitthvað að borða (bæði stór og smá!) og ég ákvað að búa til eitthvað sem þeim yngri þætti reglulega gott. Jóhanna Inga var búin að tala um að sig langaði í kjötbollur. Ég átti hakk og bjó til þennan rétt úr því hráefni sem ég átti í ísskápnum og það heppnaðist afar vel.

Kjötbollur:

  • 700 gr hakk piparostur
  • 1 box rifinn piparostur
  • 1 dl brauðmylsna
  • 1 egg
  • 1 tsk basilika
  • salt og pipar
  • smjör eða olía til steikingar

Sósa:

  • 1 ferna eða dós „passerade“ tómatar (þessir sem eru alveg fínmaukaðir, eins og þykkur tómatsafi)
  • 2 dl rjómi eða matargerðarjómi
  • 1 msk tómatpúrra
  • 1 msk tómatsósa
  • 1/2 msk sojasósa
  • 1/2 tsk kjötkraftur
  • salt og pipar
  • annað krydd, t.d. steinselja, origano og basilika (má sleppa)

Pasta: soðið eftir leiðbeiningum

Öllum hráefnunum í kjötbollurnar blandað saman (ég reyndi að mauka ostinn vel með höndunum) og litlar kjötbollur mótaðar. Olía eða smjör, eða blanda af hvor tveggja, sett á pönnu og bollurnar steiktar við fremur háan hita þar til þær eru nærri því gegnumsteiktar, bollunum snúið við þörfum. Tómatþykkninu („passerade“ tómatar) hellt út á pönnuna ásamt, rjóma, tómatpúrru, tómatsósu, sojasósu, kjötkrafti og kryddi. Sósunni leyft að malla þar til kjötbollurnar eru eldaðar í gegn. Áður en sósan er borin fram er hún smökkuð til með  til dæmis kryddi og sojasósu. Ef maður vill þykkari sósu er hægt að nota dálítinn sósujafnara eða maizenamjöl. Borið fram með pasta.

Haframúffur með banönum

Birt þann af
3

Samkvæmt skilgreiningu Nönnu Rögnvaldar sem var að gefa út nýja og girnilega múffubók þá er munurinn á bollakökum og múffum eftirfarandi. Bollakökur eru dísætar en múffur er eitthvað sem maður getur hugsað sér að borða í morgunmat. Ég veit ekki alveg með þessar múffur, þær eru alls ekki dísætar, enda með haframjöli í. En maður myndi seint kannski bjóða upp á þær í morgunmat! Þetta er eitthvað millistig þarna á milli, kannski múffukökur! Þetta eru einfaldar ,,múffukökur“, mjúkar og afar góðar, allavega voru þær allar horfnar örstuttu eftir að ég bakaði þær! Formin sem ég notaði fékk ég í Svíþjóð og eru meira eins og lítil kökuform. En það er auðvitað hægt að nota venjuleg múffuform undir þær. Deigið er frekar blautt þannig að formin þurfa að vera vel stíf.

Uppskrift, ca. 15-20 múffur

  • 60 gr mjúkt smjör
  • 1 dl púðursykur
  • 1 dl sykur
  • 2 egg
  • 1 1/2 dl mjólk eða súrmjólk
  • 1 1/2 dl haframjöl
  • 2 1/2 dl hveiti
  • 1 tsk lyftiduft
  • 1/2 tsk negull
  • 1 tsk vanillusykur
  • 2 bananar, mjög vel þroskaðir

Ofninn stilltur á 225 gráður. Smjör, sykur og púðursykur hrært þar til blandan verður létt og ljós. Eggjum bætt út í, einu í senn, því næst er mjólkinni bætt út í. Haframjöli, hveiti, lyftidufti, negul og vanillusykri er því næst hrært við blönduna. Að lokum eru bananar stappaðir og þeim bætt út í blönduna.  Múffuform eru fyllt að 3/4 hluta. Bökuð við 225 gráður í 15-20 mínútur.

Þorskur með balsamik-lauk og sellerímús‏

Birt þann af
1

 
Þorskur með balsamik-lauk og sellerímús‏
Ég hef sett inn uppskrift af þorskrétti áður sem er himneskt góður! Þá uppskrift er að finna hér. Í kvöld prófaði ég aðra uppskrift af þorskrétti sem er svipað uppbyggð en með allt öðrum hráefnum. Þessi réttur var dásamlega góður! Látið ekki laukinn hræða ykkur í burtu! Ég til dæmis borða alls ekki hráan lauk, finnst hann hræðilega vondur. En hér er búið að meðhöndla laukinn þannig að hann verður algjört hnossgæti. Það er mikilvægt að gefa sósunni smá tíma, leyfa balsamikedikinu að sjóða vel niður og líka að smakka sósuna vel til. Sellerí- kartöflumúsin er rosalega góð, skemmtileg tilbreyting að fá bragð af sellerírótinni með kartöflunum. Ég fékk sellerírót í Nettó en hún er líka stundum til í Bónus minnir mig. Svo er líka hægt að svissa aðeins í uppskriftunum, nota t.d. sætukartöflumúsina úr hinum þorksréttinum sem ég minntist á, með þessum rétti.
 

Þorskur:

  • 800 gr þorskflök, skorinn í bita
  • salt og pipar

Balsamik-laukur

  • 14-16 skarlottulaukar
  • ólífuolía
  • 2 msk sykur
  • 2 dl balsamedik
  • 2 dl fiskisoð (vatn+fiskikraftur)
  • 2 msk ósaltað smjör

Sellerí- og kartöflumús 

  • 1 sellerírót, skorin í teninga
  • 8-10 kartöflur
  • 2 msk smjör
  • mjólk
  • sykur
  • salt og pipar
Sellerírót afhýdd og skorin í tenginga sem settir eru í pott. Kartöflur einnig settar í pott, hvort tveggja soðið þar til orðið mjúkt (í sitt hvorum pottinum). Vatninu hellt af, kartöflur afhýddar. Sellerírót og kartöflum stappað saman og smjöri bætt út í. Bragðbætt með salti, pipar og sykri (ef maður kýs að gera hana sætari). Einnig er hægt að bæta örlítið af mjólk út í.
 
Ofninn hitaður í 180 gráður. Þorskurinn saltaður og pipraður, skorinn í hæfilega bita og lagður í eldfast mót. Bakaður í ofni við 180 gráður í ca 15-20 mínútur. Fiskurinn tekinn úr ofninum, álpappír lagður yfir hann í ca. þrjár mínútur áður en hann er borinn á borð.
 
Skarlottulaukurinn afhýddur og ef hann er stór er gott að skera hann í tvennt á lengdina. Laukurinn látinn malla í olíu í potti, á fremur lágum hita, þar til hann er orðinn vel mjúkur. Sykri bætt út í og hann látinn bráðna. Því næst er balsamedik bætt út í og látinn malla þar til að það er vel soðið niður (verður næstum því að sírópi). Þá er fiskisoðinu bætt út í og soðið niður þar til sósan er orðin fremur seigfljótandi. Það er mikilvægt að smakka sósuna til, ef hún er til dæmis of súr þarf að bæta við sykri, ef hún er of sölt (fiskikrafturinn) þarf að bæta við örlitlu vatni. Smjörinu er svo bætt við rétt áður en sósan er borin fram.
img_9239-1

Mascarpone þeytingur með berjum og Toffypops

Birt þann af
16

Í gærkvöldi hittist matarklúbburinn okkar sem er alltaf tilhlökkunarefni. Eitt af því dásamlega við þennan klúbb, fyrir utan frábæra félagsskapinn, er að strákarnir elda og skipuleggja allt, við konurnar mætum bara og látum dekstra við okkur með mat og víni! 🙂 Þeir koma alltaf jafnmikið á óvart og galdra fram hvern gómsæta réttinn á fætur annars í hverju boði. Í gær kom það í hlut Elfars að gera eftirréttinn. Hann kom heim frá Stokkhólmi seinni partinn í gær og réðst strax í eftirréttagerð. Þessi eftirréttur heppnaðist svo rosalega vel hjá honum að rétturinn fær klárlega sína eigin færslu hér á blogginu!

Uppskrift f. 8-10:

  • 750 g mascarpone ostur
  • 6 dl rjómi, þeyttur
  • 300 g flórsykur
  • 2 msk vanillusykur
  • 1 vanillustöng, klofin á lengdina og kornin skafin úr
  • 3 pakkar Toffypops kex
  • ber til skreytingar t.d. jarðaber, hindber, bláber, blæjuber og ástaraldin.

Rjóminn þeyttur og geymdur í ísskáp. Toffypops kexið er saxað niður og það sett í botninn á eldföstu móti. Örlítið af kexinu tekið til hliðar til að dreifa yfir réttinn í blálokin. Mascarpone ostinum, flórsykri, vanillusykri og vanillukornum blandað saman og þeytt þar til blandan verður létt. Þeytta rjómanum bætt varlega út í með sleikju. Rjómaostakremið smurt yfir Toffytops kexið. Skreytt með berjum og restinni af kexinu stráð yfir.

Cesar salat

Birt þann af
Svara

Cesar salatið er klassískt og hrikalega gott! Sá sem á heiðurinn af salatinu var Bandaríkjamaðurinn Cesar Cardini, sem var af ítalsk-mexíkóskum uppruna. Hann átti heima í San Diego en vann á veitingastað í Tijuana, Mexíkómegin við landamærin og sagan segir að salatið hafi orðið til á þjóðarhátíðardegi Bandaríkjanna árið 1924. Það var svo mikið að gera á veitingastaðnum hjá Cesari að hráefnin kláruðust og síðustu gestir kvöldsins fengu þetta salat sem hann gerði úr þeim hráefnum sem eftir voru í eldhúsinu.

Í dag er Cesar salatið til í ótal útgáfum. En upprunalega uppskriftin er með romansalati, brauðteningum, parmesan osti og dressingu. En svo er oft bætt við við kjúklingi, beikoni og einnig hefur ansjósum verið bætt í dressinguna nú á síðari tímum og mörgum finnst þær gefa ómissandi bragð.

Mér finnst mikilvægast að nota rétt salat og búa til brauðteningana sjálf, þeir verða svo ljúffengir að hægt er að borða þá eintóma! En auðvitað er líka hægt að kaupa þá tilbúna líka.

Þegar kemur að dressingunni er, eins og áður var sagt, mjög algengt að nota ansjósur. Ég hef ekki notað þær fyrr en í þetta sinn. Ég verð að viðurkenna að þessi litlu kvikindi eru ekki girnileg að sjá! Ég held að ég hafi notað aðeins of mikið af þeim því mér fannst ansjósu bragðið verða of yfirgnæfandi (ég minnkaði magnið í uppskriftinni hér að neðan). Svo fannst mér þær svo ólystugar í útliti að ég held að það hafi haft áhrif á upplifununni á dressingunni! En ansjósur fást í t.d. Hagkaup, þær eru í kæli hjá síldinni og kavíarnum (í litlum pakkninum eins og niðursoðnar sardínur). Cesar salat er auðvelt að búa til og einstaklega ljúffengt!

Uppskrift:

  • kjúklingabringur eða kjúklingalundir
  • romansalat (ég fann það ekki í Hagkaup og keypti íssalat sem er þykkt og stökkt og kom því vel út), rifið niður gróft
  • parmesan ostur, rifinn gróft t.d. með ostaskera eða grófu hliðinni á rifjárni
  • beikon, steikt þar til það verður stökkt, skorið í bita
  • brauðteningar
  • salatdressing

Brauðteningar:

Hitið ofn í 200 gráður. 10 sneiðar af góðu franskbrauði (helst allavega dagsgamalt) skornar í teninga og velt upp úr blöndu af ca. 2 dl af góðri ólífuolíu, 3-4 rifnum eða fínsöxuðum hvítlauksgeirum og maldonsalti. Það er hægt að bæta við 1/2 tsk af basilku og timjan fyrir þá sem vilja.  Brauðteningunum er raðað á ofnplötu, klæddri bökunarpappír og þeir bakaðir við 200 gráður þar til teningarnir eru passlega stökkir og dökkir (ca. 20 mínútur).

Kjúklingabringur:

Kjúklingabringur eru kryddaðar með salti, pipar og jafnvel kjúklingakryddi (ég notaði Best á allt) og grillaðar á útigrilli eða snöggsteiktar á pönnu og svo settar í ofn þar til þær eru eldaðar í gegn. Þegar bringurnar hafa jafnað sig eftir eldun eru þær sneiddar niður.

Salatdressing:

  • 1.5 dl góð ólívuolía
  • 1 fersk eggjarauða
  • 2-3 ansjósur (má sleppa)
  • 3 hvítlauksgeirar, pressaðir eða saxaðir mjög smátt
  • 1 msk Worchestershire-sósa
  • 2 msk Dijon sinnep
  • 1 sítróna, safinn pressaður
  • 2 tsk hvítvínsedik (má sleppa)
  • salt og pipar

Öll hráefni, fyrir utan ólífuolíu, eru sett í matvinnsluvél eða mixer. Ólífuoíunni er hellt út í með mjórri bunu á meðan hrært er. Dressingin verður þá þykk og góð.

Salatið er sett í skál og dressingunni bætt saman við. Brauðteningum og rifna parmesan ostinum er bætt saman við og loks er kjúklingi og beikoni dreift yfir.

Sænskir snúðar með vanillu- og rjómaostakremi

Birt þann af
5

Þegar ég sá þessa uppskrift á sænsku bloggi þá fannst mér hún fyrir það fyrsta líta afar girnilega út en að auki leit hún út fyrir að vera voðalega auðveld! Ég hafði rétt fyrir mér, þessi snúðar eru svakalega góðir og þetta er fljótgerð og auðveld uppskrift. Samt tókst mér næstum því að klúðra henni! Ég er ekki alveg viss um hvað ég gerði rangt en snúðarnir hjá mér voru ekkert líkir fyrirmyndinni! Aðallega var það vanillukremið sem var allt öðruvísi í útliti, bragðið var reyndar rosalega gott. En kremið átti samkvæmt upphaflegu uppskriftinni að vera meira gult og ekki að brúnast svona í ofninum. Ég held að ég viti ástæðuna fyrir því að kremið hjá mér var hvítt, ég hef líklega þeytt þeytt það alltof mikið, ég hugsa að það eigi bara að hræra það saman létt með gaffli. Ég hins vegar þeytti það í hrærivélinni það til kremið varð létt og ljóst. Að auki klikkaði næstum því hjá mér bökunartíminn, það var á mörkunum að ég bakaði snúðana nóg, þeir voru orðnir vel dökkir að utan en samt á mörkunum að vera bakaðir í gegn. Ég bakaði þá í rúmar 15 mínútur, 20 mínútur eru líklega nær lagi. En góðir voru þeir! Alveg hrikalega góðir meira að segja! Ég hvet ykkur til að prófa og gera ekki mín mistök og athuga hvort snúðarnir verði ekki fallegri en mínir!

Uppfærsla: það var nú svo skrítið að daginn eftir voru snúðarnir allt öðruvísi í útliti, kremið hafði sest betur og var orðið gulleitt eins og hjá fyrirmyndinni. Þannig að þetta var kannski ekkert svo galið hjá mér eftir allt saman! 🙂 En ég mæli samt með því að píska bara kremið létt með gaffli.

Uppskrift, ca. 20 snúðar:
5 dl mjólk
150 gr smjör, við stofuhita
1 pakki þurrger
1 dl sykur
0,5 tsk salt
10-13 dl hveiti
Fylling (ath. það varð talsverður afgangur af þessari uppskrift, 2/3 nægir alveg):
150 g smjör, við stofuhita
200 g philadelphia rjómaostur
3 dl flórsykur
2 msk vanillusykur
Egg til að pensla með
sænskur perlusykur (pärlsocker – sjá færslu um hann hér).
Hitið mjólkina þannig að hún verði volg og hrærið gerið út í. Bætið við linu smjöri, sykri, salti og hveitinu. Hnoðið deigið þar til það verður slétt. Hellið deginu í ofnskúffu (ég klæddi hana með smörpappír) og þrýstið deginu út í alla kanta þannig að yfirborðið verði slétt. Látið hefast í ca. 30 mínútur. Búið til holur í degið með ca. þremur fingrum með jöfnu millibili (ca. 20 eða 5×5). Blandið saman hráefnunum í kremið (ég sem sagt þeytti kremið en það á að hræra hráefnin létt saman með gaffli) og setjið væna klípu af kremi í hverja holu (ca. 1 msk). Það er líka gott að prófa að setja t.d. jarðaberjasultu með ofan í nokkrar holur. Ég ætla að prófa það næst! Penslið deigið með eggi og ef þið eigið sænskan perlusykur (pärlsocker) má strá honum yfir. Bakið í ofni við 200 gráður í 15- 20 mínútur. Leyfið snúðunum að kólna aðeins áður en þeir eru skornir niður í 20 bita, með krem í miðju hvers bita.
Þeir líta kannski bara þokkalega út þar til að þið fáið að sjá fyrirmyndina …..