Grilluð sirloin nautasteik með piparsósu


Á afmælisdaginn óskaði eiginmaðurinn sér nautasteikar með piparsósu sem hann auðvitað fékk! Fyrir valinu urðu vænir sirloin bitar úr versluninni ,,Til sjávar og sveita“ í Ögurhvarfi. Kjötið var marinerað í pipar/papriku marerningu og grillað á útigrilli. Meðlætið var: Grillað grænmeti (gulrætur, zuccini, sveppir og paprika) sem var saltað og piprað og aðeins skvett á það ólivuolíu. Að grillun lokinni bætti ég út í kokteiltómötum, rifnum Parmesan osti, ferski basiliku og steinselju.

Ofnsteiktar sætar kartöflur með olivuolíu, ferskri basiliku, steinselju og oreganó ásamt Maldon salti og nýmöluðum pipar.

Piparsósa:

  • 400 ml. nautasoð (helst heimatilbúið, líka hægt að panta það í kjötverslunum en einnig hægt að nota tilbúinn ,,Tasty pipar sósugrunnur“.
  • 1.5 dl. rjómi
  • 1 tsk. koníak
  • 1-2 tsk. piparkorn (ég nota blönduð piparkorn, svört, græn og rósapipar, grófmöluð og heil)
  • 1 msk. rifsberjahlaup
  • 1 tsk. soyasósa

Nautasoð sett í pott ásamt soyasósu og koníaki og piparkornum og suðan látin koma upp, hrært í á meðan. Þessu leyft að sjóða í nokkrar mínútur. Bætið við rjóma, rifsberjahlaupi og leyfið sósunni að malla á lágum hita í dágóðan tíma. Ef sósan er of þykk, bætið við meiri rjóma, ef hún er of þunn, þykkið með sósujafnara. Ferskt salat: salatblöð, spínat, klettasalat, kokteiltómatar, gúrka, mango, avokado  og fetaostur.

Það eru fleiri góðar sósur sem passa vel með nautakjöti. Hér er ég með uppskrift af ljúffengri heimagerðri bearnaise sósu. Svo er hér uppskrift af góðri sveppasósu.

Kjötið var afar meyrt og gott og allir sáttir við afmælismatinn, ekki síst eiginmaðurinn! 🙂 Jóhanna Inga fékk sér forrétt! Hún er á matreiðslunámskeiði þessa vikuna hjá matreiðslukennaranum í Laugarnesskóla. Fyrsta daginn eldaði hún tómatsúpu, bakaði brauðbollur og útbjó ís! Hún var býsna sátt við þetta námskeið! Best fannst henni að þau fengu að gera allt sjálf, brjóta eggin, hræra í heitum pottum, skera niður lauk og svo framvegis. En samkvæmt henni fá þau ekki að gera slíkt sjálf í matreiðslutímum í Seljaskóla. Ég vona reyndar að það sé ekki rétt hjá henni, það væri synd ef svo væri. Krakkar geta eiginlega gert flest í matargerð mjög snemma. Jóhanna hefur til dæmis bakað sjálf undir leiðsögn frá því að hún var 4-5 ára, brotið eggin, mælt hráefni, hrært og saxað. En allavega þá fékk hún sér tómatsúpu og brauð í forrétt og allir fengu að smakka, afar ljúffengt hjá henni! 🙂

Varðandi afmælistertuna, ef einhver ætlar að prófa hana þá er hún margfalt betri daginn eftir þegar hún hefur fengið að brjóta sig svolítið ….. það get ég vitnað um (tékkaði sko nokkrum sinnum á því! ;)) Endilega bakið hana því daginn áður en hún er borin fram!

Hindberjasúkkulaðiterta


Í gær var sannarlega tilefni til þess að taka upp nýju uppskriftabókina þar sem að eiginmaðurinn átti afmæli. Það var erfitt að velja bara eina tertu af öllum þessum girnilegu tertum úr Lomenlinos tårtor. En ein þeirra höfðaði sérstaklega vel til mín; ,,Hallonbrownie“ eða Hindberjabrownie. Hindber og súkkulaði saman getur bara aldrei klikkað! Ekki spillti fyrir að í uppskriftinni var Muscovado hrásykur sem mér finnst gott að nota í kökur og tertur. Hann er til bæði dökkur og ljós, sá dökki er með dálitlum lakkrískeimi en sá ljósi með karmellukeimi. Ég fann bara dökkan Muscovado sykur í Hagkaup en í uppskriftinni átti að vera ljós, held að tertan hafi samt ekkert orðið verri fyrir það. Þessi terta er langbest daginn eftir að hún er bökuð og hefur fengið að brjóta sig aðeins.

Uppskrift:

Hindberjabrownie-botnar:

  • 225 gr. smjör
  • 200 gr. 70% súkkulaði
  • 3 dl. ljós Muscovado hrásykur
  • 1.5 dl. sykur
  • 4 stór egg
  • 4.5 dl. hveiti
  • 1 dl. kakó
  • 1 tsk. lyftiduft
  • 100 gr. hindber (helst fersk en má nota frosin)

Marengs-smjörkrem með hindberjum (ATH. þessa uppskrift gerði ég eina og hálfa til þess að hún dyggði, hér að neðan er hún einföld)

  • 4 stórar eggjahvítur
  • 2 1/3 dl. sykur (200 gr)
  • 250 gr. ósaltað smjör (við stofuhita)
  • 100 gr. hindber
  • rauður matarlitur ef vill

Súkkulaðikrem

  • 100 gr. 70% súkkulaði
  • 50 gr. smjör

Aðferð:

Hindberjabrownie-botnar:

  1. Ofninn hitaður í 175 gráður.
  2. Tvö 15 cm. lausbotna kökuform smurð (þetta eru mjög lítil form, ég notaði 20 cm. form sem ég fékk í Húsasmiðjunni snemma síðastliðið í vor)
  3. Smjör og súkkulaði brætt við vægan hita í skál í vatnsbaði.
  4. Muscovado sykur, sykur og egg þeytt létt og ljóst.
  5. Sigtið saman hveiti, kakó og lyftidufti í skál.
  6. Hellið brædda súkkulaðinu og smjörinu varlega saman við eggjamassann og þeytið þar til blandan verður slétt. Blandið hveiti, kakói og lyftidufti saman við með sleikju. Setjið deigið í vel smurð kökuformin og stingið hindberjunum ofan í deigið. Bakið við 175°C í 45-50 mínútur. (Ég minnkaði tímann um 10 mínútur þar sem að kökuformin mín voru breiðari og hæð kökubotnanna þar með lægri).

Marengs-smjörkrem

  1. Setjið eggjahvítur og sykur í skál og yfir vatnsbað með sjóðandi vatni. Þeytið allan tímann blönduna með þeytara (hefðbundnum, ekki rafmagns) þar til að hún er orðin 65 gráður eða þar til sykurkristallarnir eru horfnir.
  2. Setjið blönduna í hrærivél og haldið áfram að þeyta þar til að blandan verður stíf og slétt og er orðin köld (getur tekið upp í 10 mínútur)
  3. Bætið við smjörinu, litlum bita í senn. Þegar allt smjörið er komið út í marengsinn, þeytið í 3-5 mínútur í viðbót
  4. Maukið hindberin með töfrasprota eða í matvinnsluvél. Sigtið maukið í gegnum fínt sigti til að losna við litlu kjarnanna.
  5. Hellið hindberjamaukinu út í smjörkremið og þeytið þar til það er slétt. Bætið við rauðum eða bleikum matarlit til að fá sterkari lit.
Kljúfið botnana í tvennt með góðum hníf (brauðhníf). Setjið ein af nú fjórum tertubotnum á tertudisk og smyrjið kreminu á hann og svo koll af kolli. Smyrjið síðan þunnt lag af kremi utan um alla tertuna og setjð í ísskáp í um það bil 20 mínútur. Bætið þá við kremið þar til að tertan er með jöfn og falleg. Setjið tertuna í ísskáp aftur á meðan súkkulaðikremið er útbúið.
Súkkulaðikrem:
Súkkulaði og smjör brætt yfir vatnsbaði við vægan hita. Blandan látin kólna þar til að hún byrjar að þykkna dálítið. Mikilvægt er að blandan renni enn til en sé þó ekki of þunn.
Hellið súkkulaðikreminu yfir kökuna og látið það renna aðeins yfir kantana. Það þarf að vinna hratt áður en súkkulaðikremið stífnar, notið spaða til að dreifa úr því við þörfum. Skreytið með hindberjum.

Afraksturinn var útlitslega nokkuð langt frá frumgerðinni en góð var hún! Þetta er terta sem er betra að búa til deginum áður en hún er borin fram. Þessa terta er dálítið keimlík þessari á forsíðumynd bloggsins, Kirsuberjadraumnum, en í því kremi er Masacarpone ostur (eða rjómaostur), skelli þeirri uppskrift inn við tækifæri.

Kakan og pakkarnir biðu eiginmannsins þegar hann kom heim úr vinnunni. Jóhanna Inga bjó til styttu í skólanum í vor handa pabba sínum en geymdi hana heima hjá vinkonu sinni þar til í dag: ,,annars myndi ég freistast til að gefa pabba hana fyrir afmælið hans“! 🙂 Í dag voru þær hér þrjár vinkonurnar að baxa við að pakka inn styttunni í stóran kassa og svo í fínan bleikan pappír og slaufur! 🙂

Ný espresso kaffivél


Gamla espresso kaffivélin okkar gaf upp öndina eftir stöðuga notkun í átta ár. Að auki hafði hluti af henni lent í örbylgjuofni og hún hafði beyglast og bráðnað við það! Ekki spyrja, það gerast oft svona ævintýri heima hjá okkur! 😉

Eins venja er þegar fjárfesta þarf í nýjum græjum þá er það ég sem leggst í alsherjar rannsókn á lýðnetinu! Heimilisfaðirinn vill bara „manual“ alvöru espressovél og eftir að ég fann þessa kaffivél frá Delonghi kom engin önnur til greina. Hún fær góða dóma, er á þokkalegu verði en fyrst og fremst er hún svo dásamlega falleg á litinn! Þessi vél fæst ekki hér á landi en heimilisfaðirinn keypti hana í einni Stokkhólmsferðinni.

Núna er ég búin að mastera Café latte gerð, takk Youtube! Galdurinn við góðan Café latte liggur í flóuðu mjólkinni. Fyrst er búinn til góður espresso bolli, þetta er kaffið sem við notum:

 Því næst þarf að flóa mjólkina, best er að nota nýmjólk fyrir Café latte en G-mjólk fyrir Cappuccino. Munurinn á Cappuccino og Café latte er að í latte er mjólkin flóuð, engar loftbólur eiga að vera í drykknum og hlutfallið milli kaffisins og mjólkur er 1:4. En í Cappuccino er mjólkin freydd og hlutfallið er 1/3 kaffi, 1/3 heit mjólk og 1/3 mjólkurfroða. Þegar mjólkin er flóuð þarf að nota stálkönnu og mikilvæg er að mjólkin sé köld, sumir kæla líka könnuna. Þegar mjólkin er flóuð fyrir latte þarf að gæta þess að ná góðri hringrás í mjólkina, án þess að hún myndi stórar loftbólur. Ekki má flóa mjólkina of lengi, hún á ekki að vera heitari en 65-75 gráður og hægt er að nota hitamæli til að vera nákvæmur.

Því næst er mjólkinni og kaffinu helt saman í glas.

Nú þarf ég bara að vinna í tvennu, læra að gera munstur á yfirborðið og fara að drekka kaffi! 🙂

Þjóðhátíðardagur og grillaðir hamborgarar!


Að venju fór fjölskyldan í þjóðhátíðarskrúðgöngu frá Hagatorgi með Ingu frænku. Reyndar þurfti húsfaðirinn að vinna og langt síðan að tvö elstu börnin voru með í för á þessum degi, þetta voru því bara ég og tvö yngstu börnin með Ingu frænku. Ég stakk upp á því að víkja frá hefðinni og sitja ekki á Arnarhóli og horfa á alla misskemmtilegu dagskrána sem er í boði þar. Börnin tóku vægast sagt afar illa í þá hugmynd! Það skyldi setið á hólnum, borðað candyfloss og pylsur á meðan reynt væri að temja alltof stórar gasblöðrur! Við hittum afa og ömmu ásamt Báru Margréti frænku og fjölskyldu.

I

Jóhanna Inga valdi sér stóra Hello Kitty blöðru sem sprakk svo í árekstri við steinvegg í Hólavallakirkjugarði í lok dagsins þegar leiði ömmu Villu var vitjað. Það var staðsetning við hæfi til að gefa upp öndina á!

Þegar heim var komið var ráðist í grillun á hamborgurum. Fyrst grillaði ég grænmeti til að setja á hamborgarana, rauða papriku, rauðlauk og sveppi. Að auki grillaði ég beikonið. Mér finnst langbest að grilla það á útigrillinu, þannig verður það bragðgott, aukafitan lekur af og maður sleppur við bræluna inni! Ég grilla það á hæsta hitanum, fylgist vel með því og sný við þörfum (já eða skipti mér af því hvernig yfirgrillarinn gerir þetta! 🙂 ).

 Þá er komið að hamborgurunum. Ég kaupi hamborgara úr 100% kjöti, þeir eru bæði bragðbetri og hollari. Ég krydda hamborgarana með salti og pipar og set bæði ost og Gullost ofan á þá á grillinu.

grill

Ofan á hamborgarana setjum við ferska basiliku, hunangsdijon sinnep, tómatsósu, kál, gúrku, tómata ásamt beikoninu og grillaða grænmetinu.

Það er alltaf svo gott veður og skjólsælt í garðinum okkar að við gátum borðað úti. Hrefna vinkona Jóhönnu borðaði með okkur og Jóhanna vildi fá drauga andlitsmálningu eins og hún! Húsfaðirinn nýtti sér hins vegar tæknina og var með boltann á kantinum! 🙂

Nýr kökudiskur og uppskriftabók


Mín kæra vinkona Brynja kom í örstutta heimsókn til Íslands frá Stokkhólmi og við náðum að hittast í nokkrar mínútur á hlaupum. Af sinni alkunnu hugulsemi hafði hún rogast með stóran pakka á milli landa sem hafði að geyma fertugsafmælisgjöf til mín! Í pakkanum leyndist spennandi sænsk köku og tertu uppskriftabók ásamt dásamlega fallegum kökudisk. Bókin heitir  Lomelinos Tårtor en höfundurinn heldur úti flottu matarbloggi á bæði sænsku og ensku: http://www.callmecupcake.se/ Gjöf sem hitti sannarlega í mark og ég hlakka mikið til að vígja hvor tveggja! 🙂

Mango Chutney kjúklingaréttur


Þessi kjúklingaréttur er klassískur og til í mismunandi útgáfum. Ég geri yfirleitt eftirfarandi útgáfu en nota það grænmeti sem ég á hverju sinni. Það er líka hægt að nota t.d. papriku, púrrlauk og aðrar grænmetistegundir.

Hráefni:

  • Kjúklingabringur
  • Mango Chutney
  • 1 dós kókosmjólk
  • 1 peli rjómi
  • Rauðlaukur
  • Hvítlaukur
  • Sveppir
  • Gulrætur
  • Brokkolí

Meðlæti:

Hrísgrjón eða kúskús

  • Ristað kókosmjöl
  • Sýrður rjómi
  • Niðursneiddir bananar

Aðferð:

Rauðlaukur og hvítlaukur sneiddur smátt og steiktur á pönnu. Hvítlaukur þarf styttri steikingartíma en laukur. Það er því best að byrja á lauknum, bæta svo hvítlauknum út í, hafa háan hita og steikja í ca. hálfa mínútu. Eftir það brennur hvítlaukurinn auðveldlega. Ég tek svo laukinn og hvítlaukinn af pönnunni á meðan ég steiki grænmetið og kjúklinginn til þess að brenna ekki laukinn.

Því næst steiki ég niðursneidda sveppi og gulrætur (líka gott að nota rauða papriku) og bæti svo kjúklingi út í.

Krydda með salti (kryddjurtasalt), pipar, basiliku, óregano og „Best á allt“ (Pottagaldrar).

Nú bæti ég lauknum aftur út í, 1 dós kókosmjólk, 1 pela rjóma (eða matreiðslurjóma) ásamt Mango Chutney.

Leyfi réttinum að malla um stund og bæti við kryddi eftir þörfum. Nokkrum mínútum áður er rétturinn er borinn fram bæti ég við fersku brokkolí. Ég vil að brokkolíið haldist stökkt auk þess vil ég ekki malla öllu hollu vítamínin úr því, þess vegna bæti ég út undir lokin.

Með þessu ber ég fram hrísgrjón eða kúskús, ristað kókosmjöl (ristað snöggt á heitri pönnu, sýrðan rjóma og niðursneidda banana ásamt fersku salati.

 

Túlípanar


Túlípanar eru í uppáhaldi hjá mér. Tími túlípana er frá jólum fram í febrúar en þegar líður á vorið eru þeir oftast orðnir lélegir úr blómabúðum og standa illa þegar heim er komið. Þá hef ég brugðið á það ráð að taka inn túlípana úr garðinum hjá mér. Þeir eru fallegir, standa þráðbeinir  og duga lengi! Annars eru nokkur ráð til að láta aðkeypta túlípana endast lengur. Í fyrsta lagi á að láta túlípana standa í vatninu í allavega 1-2 klukkutíma með umbúðunum á, það kemur í veg fyrir að þeir fara strax að hanga. Það á bara að vera lítið vatn í vasanum, þó þarf að fylgjast með því að það klárist aldrei. Vatnið á að vera ískallt, enn betra er að setja klaka út í. Á nóttunni er gott að setja túlípanana á kaldari stað, þá endast þeir mun lengur.

Sólskinskaka með eplum


Þegar við Elfar hófum búskap í janúar 1992 var ég 19 ára gömul. Það fyrsta sem ég keypti til heimilisins var bók til að skrifa uppskriftir í. Framalega í bókinni, sem er orðin ansi lúin í dag, er uppskrift af sólskinsköku með eplum. Samviskusamleg hef ég skráð að uppskriftin er skrifuð niður árið 1993 og kemur frá mömmu! 🙂 Þetta er einföld en góð eplaka. Ég hef breytt henni lítisháttar. Í uppskriftinni er eplunum velt upp úr sykri eingöngu. Ég velti þeim upp úr kanil og örlitlum sykri. Auk þess hef ég minnkað sykurmagnið dálítið í kökunni. Um daginn voru hér nokkuð mörg börn í húsinu eins og svo oft áður í sumarfríinu. Ég ákvað því að baka þessa köku fyrir kaffitímann og fékk með mér litla hjálparkokka í verkið!

Hráefni:

  • 150 gr. smjör
  • 3 egg
  • 1.5 dl. sykur
  • 2.5 dl. hveiti
  • 1 tsk. lyftiduft.
  • 3 græn epli, afhýdd og sneidd í báta, velt upp úr kanil og dálítlum sykri.

Aðferð:

Ofninn er stilltur á 180 gráður og kringlótt smelluform smurt. Smjör brætt og kælt dálítið. Sykur og egg þeytt létt og ljóst og smjöri hrært saman við. Hveiti og lyftidufti bætt út í og deiginu helt í kökuformið. Eplin eru afhýdd, kjarninn skorin úr og þau sneidd í báta. Þeim velt upp úr kanel og smá sykri og stungið ofan í deigið. Reyndar notuðum við aðferð sem hjálparkokkunum hugnaðist vel, settum bara allt í poka og hristum!

Kökuformið er frábærlega sniðugt, keypt í Duka fyrir nokkrum árum. Diskurinn þolir bæði ofn og frysti og formið hentar því vel fyrir kökur sem maður vill ekki þurfa að hvolfa til þess að ná þeim úr forminu, t.d. ostakökur. Smelluformið er bara losað og kakan borin beint fram á disknum sjálfum.

Kakan er bökuð í ca. 40 -50 mínútur og borin fram heit. Ekki er verra að bera fram með henni þeyttan rjóma eða ís á tyllidögum! Hluti af kökunni hjá okkur var eplalaus þar sem eitt barnanna vildi eplalausa eplaköku! 🙂

Kjúklingur með heimagerðu pestói í pönnukökum


Þetta er einn af fáum réttum sem er í uppáhaldi hjá öllum fjölskyldumeðlimum, þar með talin afkvæmin fjögur frá 7-24 ára en það er býsna óvenjulegt að þeim öllum líki sami rétturinn!

Hugmyndina fékk ég frá uppskrift í Gestgjafanum en hef breytt henni töluvert.

Hráefni:

  • Kjúklingabringur (kryddaðar með „Best á allt“ frá Pottagöldrum).
  • Tortillur
  • Ferskur Mozzarella ostur
  • Sveppir
  • Rauðlaukur
  • Rauð paprika
  • Spínat
  • Klettasalat (Ruccola)
  • Basilika
  • Steinselja
  • Hvítlaukur
  • Ólivuolía
  • Furhnetur (eða kasjúhnetur)
  • Salt og Pipar

Aðferð:

Rauðlaukur, sveppir og paprika skorin niður, krydduð með pipar og salti og steikt á pönnu eða grilluð. Ég er með sérstaka grillgrind fyrir grænmeti sem ég nota mikið í stað þess að steikja grænmeti á pönnu.

Kjúklingabringur kryddaðar með „Best á allt“ frá Pottagöldrum, uppáhalds kjúklingakryddinu mínu! En þetta er blanda af meðal annars salti, pipar, kryddjurtum og smá púðursykri sem ég held að geri gæfumuninn! Kjúklingurinn er grillaður en það má líka hita bringurnar í ofni. Ég grilla bringurnar á háum hita, í nokkrar mínútur á hvorri hlið. Tek þær svo af grillinu rétt áður en þær eru tilbúnar, vef inn í álpappír og leyfi þeim að klára að eldast í eigin hita, þannig verða þær lungnamjúkar

Pestó útbúið, hráefni sett í matvinnsluvél. Ég nota oftast nær blöndu af ferskri basiliku, steinselju, spínati og klettasalati og prófa mig bara áfram hvaða magn ég nota af hverju. En fyrir 8 tortillur nota ég oftast 2/3 af spínatpoka, hálfan klettasalatpoka, nokkra steinseljukvisti og 2/3 af basiliku í boxi, 3-4 hvítlauksrif, 1 til 1 ½ dl. ólivuolíu, 4 msk. furuhnetur eða kasjúhnetur ásamt salti og pipar. Strangt til tekið á að vera ferskur Parmesan ostur í heimatilbúnu Pestói (ca. 4 msk fyrir þessa uppskrift) en ég sleppi honum oft fyrir þennan rétt og finnst það eiginlega bara betra.

Mozzarellaostur er skorinn niður í sneiðar auk þess sem kjúklingurinn er skorinn niður í sneiðar þegar hann hefur fengið að jafna sig í nokkrar mínútur eftir eldun. Það er líka hægt að nota venjulegan rifinn ost í stað Mozzarella, eitt barnanna minna til dæmis kann ekki gott að meta og vill ekki Mozzarella! 🙂

Þá er komið að því að útbúa pönnukökurnar. Pestói er smurt á hálfa Tortilla köku, kjúklingi raðað á pönnukökuna, því næst er Mozzarella osti raðað á kjúklinginn og að lokum sett grillað grænmeti yfir og pönnukökunni lokað.

Pönnukökurnar settar á ofnplötu og hitaðar í ofni við 180 gráður í ca. 7-8 mínútur eða þar til að osturinn er farin að bráðna og Tortilla kakan farin að taka smá lit. Það er líka hægt að grilla pönnukökuna á útigrilli, nokkrar mínútur á hvorri hlið en ég er farin að nota auðveldu leiðina og skelli þeim bara öllum í ofninn!

Borið fram strax með fersku salati.