Brownie-kaka með hindberjarjóma í Kökublaði Vikunnar

Birt þann 23.11.2012 af Eldhússögur

Kökublað Vikunnar var að koma út, spennandi blað eins og venjulega með allskonar köku uppskriftum, þið sjáið ekki eftir því að fjárfesta í eintaki! 🙂 Ég var beðin um að gefa uppskrift af einni köku sem ég gerði auðvitað með glöðu geði. Ég bakaði Brownieköku með hindberjarjóma. Ástæðan fyrir því var einföld, þessi kaka er himnesk! Súkkulaði og hindber er tvenna sem er ómótstæðileg í mínum huga. Ég get sjaldan horft framhjá uppskriftum sem í er hvort tveggja og ég varð því að prófa þessa köku þegar ég sá hana á sænskri netsíðu. Ég varð ekki fyrir vonbrigðum, þetta varð strax ein af mínum uppáhaldskökum. Þetta er fullkomin blanda af sætu og seigu súkkulaði á móti léttum og frískum hindberjarjóma. Að auki er afar auðvelt að búa kökuna til sem er alltaf kostur. Ég hef gert aðra útfærslu af henni fyrir eftirrétt. Þá baka ég botninn, skipti honum í eftirréttaskálar og set svo hindberjarjómann yfir ásamt þeyttum rjóma og ferskum hindberjum. Þá er komin ljúffengur og fallegur eftirréttur. Myndirnar í blaðinu eru teknar af ljósmyndara Vikunnar, sem sést að störfum hér fyrir neðan, en ég tók myndirnar í þessari færslu.

Ég breytti uppskriftinni (get aldrei hamið mig!) en upphaflega var í hindberjarjómanum pektín sultusykur en þá fannst mér hindberjarjóminn ekki hlaupa nógu vel, hann varð ekki nógu fallegur. Ég breytti því yfir í venjulegan sykur og matarlím, þannig varð kakan miklu fallegri.

Uppskrift

Brownie-botn

120 gr suðusúkkulaði
100 gr smjör
2 1/2 dl sykur
2 egg
1 ½ msk vanillusykur
¼ tsk salt
1 ½ dl hveiti

Hindberjarjómi

300 gr. frosin hindber, afþýdd
1 dl sykur
4 blöð matarlím
2 tsk vanillusykur
3 dl rjómi

þeyttur rjómi til skreytingar
fersk hindber til skreytingar

Brownie-botn: Bakarofn hitaður í 175°C. Smelluform (ca. 22 cm.) smurt að innan, bökunarpappír sniðinn og klipptur eftir botninum á forminu og lagður ofan á botninn. Súkkulaði og smjör sett í skál og brætt yfir vatnsbaði. Þegar blandan er bráðnuð er hún tekin af hitanum og sykri bætt út í. Hrært þar til blandan er slétt. Eggjum bætt út í, einu í senn. Því næst er vanillusykri og salti hrært út í. Að lokum er hveitið sigtað út í, blandað varlega saman með sleikju og deiginu hellt í formið. Kakan er bökuð við 175°C í um það bil 30 mínútur (athugið að kakan á að vera blaut). Kakan látin kólna. Því næst er smelluforminu smellt af og kökunni hvolft á kökudisk. Þá er auðvelt að fjarlægja bæði botninn á kökuforminu og bökunarpappírinn. Því næst er smelluforminu smellt aftur utan um kökuna á kökusdisknum til þess að halda við hindberjarjómann sem kemur ofan á.

Hindberjarjómi: Hindber maukuð í matvinnsluvél eða með töfrasprota. Maukinu er síðan hellt í fínt sigti og fræin þannig síuð frá og þeim hent. Matarlímsblöð lögð eitt í einu í skál með vel köldu vatni og látin liggja þar í 5-7 mínútur. Hindberjamauk, sem nú er laust við fræ, er sett í pott ásamt sykrinum og suðan látin koma upp. Þegar matarlímsblöðin eru orðin mjúk og þykk eru þau tekin upp úr skálinni, vatnið kreist úr þeim og þeim svo bætt út í hindberjamaukið í pottinum og hrært þar til blöðin eru uppleyst. Potturinn er tekinn af hitanum og vanillusykri þá bætt við (vanillusykri má aldrei blanda við sjóðandi vökva, þá verður hann beiskur) , blandan svo látin bíða þar til hún kólnar. Rjóminn þeyttur. Þegar hindberjablandan hefur kólnað er henni blandað saman við þeytta rjómann. Hindberjarjómanum er því næst dreift yfir kaldan brownie-botninn (formið látið sitja áfram utan um kökuna). Kakan kæld í minnst þrjá klukkutíma, gjarnan yfir nóttu. Skreytt með þeyttum rjóma og ferskum hindberjum.

Pavlova í fínu formi

Birt þann 7.9.2012 af Eldhússögur

Ég hef áður sett hér inn uppskrift af Pavlovu, þeirri dásemdar tertu. Þetta er hins vegar rosalega góð öðruvísi útgáfa af Pavlovu, bökuð af móður minni, gestabloggara dagsins! 🙂 Hér er marengsinn settur í eldfast mót sem getur verið handhægt og sniðugt. Nóa kroppi er svo bætt út í rjómann sem gerir réttinn sérstaklega góðan! Það er líka hægt að nota súkkulaðirúsínur ef maður kýs það frekar. Ofan á rjómann er hægt að nota hvaða ávexti eða ber sem er. Hér notaði mamma jarðaber, vínber og íslensk bláber.

Uppskrift:

8 eggjahvítur
400 gr sykur
1/2 tsk salt
3 tsk edik
1/2 líter rjómi
Nóa kropp eða súkkulaðirúsínur
ávextir og/eða ber
100 gr suðusúkkulaði

Eggjahvítur stífþeyttar, sykri bætt smám saman út í ásamt edik og salti. Marengsinn settur í eldfast mót og bakaður við 175 gráður í 30 mínútur, þá er lækkað niður í 135 gráður og bakað í 30 mínútur til vibótar. Eftir það er slökkt á ofninum og marengsinn látin kólna í ofninum, helst yfir nóttu. Rjómi þeyttur, Nóa kroppi bætt út í og rjómanum síðan smurt yfir marengsinn. Skreytt með berjum og eða ávöxtum, t.d. jarðaberjum, bláberjum, hindberjum, kiwi eða ástaraldin. Að lokum er suðusúkkulaði brætt og dreift yfir berin og ávextina. Það er hægt að dreifa brædda súkkulaðinu yfir réttinn með skeið. En það er líka hægt að setja súkkulaðið í lítin poka, klippa örlítið gat á eitt hornið og sprauta því svo yfir (það má þó ekki vera það heitt að það bræði pokann).

Brownie ostakaka með kasjúhnetum og karamellukremi

Birt þann 1.9.2012 af Eldhússögur

Þessi kaka heitir á frummálinu ,,brownie-fudge“ ostakaka. Mér finnst vanta frekar mörg orð yfir hráefni og eldamennsku í íslensku. Til dæmis er ekkert íslenskt orð yfir brownies sem hefur náð fótfestu. Stundum er reyndar notað orðið „brúnkur“. ,,Fudge“ þýðir ljós karamella en mér finnst það alls ekki eins lýsandi orð eins og ,,fudge“. En það er allt að gerast í þessari köku þrátt fyrir skort á íslenskum lýsingarorðum! Brownie, saltar hnetur, ostakaka, karamellukrem … blanda sem getur ekki annað en kitlað bragðlaukana. Það er hægt að nota ósaltar kasjúhnetur eða pekanhnetur en best er að nota saltar. Ég hef reyndar ekki fundið saltar pekanhnetur enn, en það er hægt að kaupa kasjúhnetur saltar.

Ostakökublanda

300 gr Philadelphia ostur
¾ dl sykur
1 tsk vanillusykur

Hrærið saman Philadelphia osti, sykri og vanillusykri þar til blandan verður slétt. Geymið blönduna.

Brownie deig:

2 egg
100 gr smjör
2 dl sykur
3 msk kakó
2 dl hveiti
½ tsk lyftiduft
1 dl kasjúhnetur eða pekanhnetur, saxaðar gróft

Þeytið egg og sykur þar til blandan verður létt og ljós. Setjið smjör og kakó í pott og hitið á vægum hita þar til smjörið er bráðnað og hefur blandast við kakóið, hellið svo smjörblöndunni út í eggjablönduna og hrærið. Sigtið hveiti og lyftiduft út í deigið, bætið við grófsöxuðum hnetunum og blandið varlega saman við.

Hitið bökunarofninn í 180 gráður. Smyrjið bökunarform með lausum botni (gott að nota lítið form, t.d. 20 eða 22 cm). Hellið helmingnum af kökudeiginu í formið og sléttið úr því. Hellið svo varlega ostablöndunni ofan á og sléttið úr henni út í alla kanta. Að lokum er restinni af kökudeginu hellt yfir og dreift vel yfir ostablönduna. Bakið neðarlega í ofninum við 180 gráður í ca. 30 mínútur. Látið kökuna kólna í forminu.

Karamellukrem

40 gr smjör
1 msk mjólk
1½ dl flórsykur
2 msk kakó
kasjú hnetur eða peacan hnetur til að skreyta með

Bræðið smjör og mjólk saman í potti. Bætið flórsykri og kakó út í. Hrærið og látið malla í 2-3 mínútur. Leyfið kreminu aðeins að kólna og notið síðan sleikju til að dreifa því jafnt yfir kökuna. Skreytið með grófsöxuðum hnetum. Látið kökuna standa í kæli þar til kremið hefur harðnað. Best er að leyfa kökunni að standa í kæli yfir nóttu. Berið fram með þeyttum rjóma.

Gullterta með vanillukremi og hindberjamauki

Birt þann 27.8.2012 af Eldhússögur

Amma bakar stundum köku sem hún kallar gulltertu. Það eru tveir svampbotnar bakaðir með marengs ofan á sem eru síðan lagðir saman með rjóma á milli. Mér hefur alltaf fundist þetta svo góð terta og hef verið að hugsa um það undanfarið að baka svipaða tertu. Ég ákvað að bæta við tveimur hráefnum sem eru afar sænsk, það er vanillukrem annars vegar og hindberjamauk hinsvegar. Vanillukrem og vanillusósur eru eiginlega uppstaðan í bakelsi hjá Svíum. Þessi svampbotn afar gómsætur og ekkert líkur svampbotnum sem hægt er að kaupa tilbúna. Það þarf að skipta honum í þrjá hluta en ég er ægilegur klaufi að skera beint! Það kom sér því vel að ég hafði keypt fyrir nokkru voða sniðugt og einfalt tæki til þess einmitt að skera tertubotna (í Íkea) og það þrælvirkaði. Mér fannst þessi terta ljúffeng og mér skilst að sama hafi átt við um þá sem nutu hennar með mér!

Uppskrift:

Svampbotn:

3 egg
2 dl sykur
1 dl kartöflumjöl
1 dl hveiti
1 tsk lyftiduft

Hitið ofninn í 175 gráður. Þeytið saman egg og sykur þar til það verður létt og ljóst. Bætið við kartöflumjöli, hveiti og lyftidufti. Hellið deginu í smurt smelluform (ég notaði 20 cm form til að fá hæð í kökuna) og bakið við 175 gráður í ca. 35 mínútur. Látið botninn kólna og skiptið honum svo í þrjá hluta.

Vanillukrem:

Heimatilbúið vanillukrem á sænska vísu er hrikalega gott og til margvíslegra nota. Kremið er afar einfalt að búa til, það mikilvægasta er að láta það ekki sjóða eða brenna við botninn.

2 eggjarauður
3 dl mjólk
3 msk sykur
1 msk kartöflumjöl
1 vanillustöng

Kljúfið vanillustöng í tvennt, skafið fræin innan úr og setjið í lítinn pott. Bætið í restinni af hráefnunum út í pottinn. Pískið stöðugt á meðan suðan kemur upp og kremið er að þykkna. Kremið má alls ekki sjóða og það þarf að passa að það brenni ekki við botninn. Þegar passlegri þykkt er náð (þannig að kremið sé hægt að setja á kökubotn án þess að það leki) er kreminu helt úr pottinum og það látið kólna. Þetta vanillukrem er hægt að nota á kökur, í tertur og í snúða svo eitthvað sé nefnt.

Hindberjamauk:

3 dl hindber (afþýdd)
2 msk flórsykur
1 msk kartöflumjöl

Setjið öll hráefnin í pott á meðalhita og hrærið þar til að blandan er orðin að föstu mauki. Látið kólna.

Marengs:

3 eggjahvítur
1/2 tsk edik
1/2 tsk salt
1 dl sykur
+1 peli rjómi, þeyttur

Skiptið svampbotninum í þrjá hluta. Setjið vanillukremið á neðsta botninn og setjið miðjubotninn yfir. Ofan á hann er svo sett hindberjamaukið. Ofan á hindberjamaukið er settur þeyttur rjómi. Eggjahvíturnar eru þeyttar ásamt ediki og salti. Sykri bætt við smátt og smátt og þeytt þar til marengsinn er orðinn stífur. Efsti hluti svampbotnsins er lagður á ofnplötu með smjörpappír á og marengsinn er settur yfir botninn. Gerið toppa í marengsinn hér og þar. Bakið í ofni við 175 gráður í 8-10 mínútur eða þar til marengsinn hefur fengið smá lit. en hann á að vera mjúkur í miðjunni. Þegar marengsbotninn hefur kólnað er hann lagður ofan á tertuna. Þetta er terta sem er jafnvel enn betri daginn eftir.

Ostakaka með mangó og ástaraldin

Birt þann 25.8.2012 af Eldhússögur

Ég setti inn um daginn uppskrift af bakaðri ostaköku. Þá talaði ég um að mér þætti þær eiginlega betri en óbakaðar ostakökur en ég veit ekki lengur, ég get bara ekki gert upp á milli þeirra! Ég prófaði nefnilega óbakaða ostaköku með mangó og ástaraldin og hún var afar ljúffeng! Ég sló saman tveimur uppskriftum af ostakökum. Annars vegar úr sænsku kökubókinni Lomelinos Tårtor, sú ostakaka er borin fram frosin og þess vegna ekki með matarlími. Mér finnst hins vegar frekar snúið að bera fram frosnar tertur í veislum, oft eru þær of frosnar og harðar í byrjun veislunnar en orðnar of linar í lokin. Mér fannst hins vegar mjög spennandi í þessari uppskrift hvernig mangói var blandað við sjálfa ostakökuna (já, ég elska mangó!). Hins vegar notaði ég uppskrift af óbakaðri ostaköku (með matarlími) sem borin er fram með ástaraldin (sem mér finnst næstum því jafn gott og mangó!). Þó ég segi sjálf frá þá var ég nú bara býsna ánægð með útkomuna af þessum samankurli úr tveimur uppskriftum!

Stundum, þegar þeyttur rjómi er í uppskrift, finnst fólki óljóst hvaða mælieiningu er um að ræða. Ef í uppskriftinni er einn desilíter rjómi, þeyttur, er það þá óþeyttur desilíter eða þeyttur? Það magn sem gefið er upp í uppskriftum er alltaf óþeyttur rjómi (nema annað sé tekið fram). Í þessari uppskrift er einn peli rjómi og þá er sem sagt verið að tala um einn pela af óþeyttum rjóma sem verður svo auðvitað meira magn að umfangi þegar búið er að þeyta hann.

Uppskrift:

Botn:

250 gr Digestive kex
100 gr smjör
1 msk sykur

Fylling

300 gr Philadelphia rjómaostur
250 gr. ricotta ostur (má nota rjómaost)
1 peli rjómi
50 gr sykur
3 msk appelsínusafi (eða annar safi)
4 stk matarlím
250 gr mangó (ferskt eða frosið)
6 stk ástaraldin (passion fruit)

Aðferð:

Ofn stilltur á 175 gráður. Smjör brætt og kex mulið í matvinnsluvél eða mixer og því blandað saman við smjörið og sykur. Sett í bökunarform með lausum botni og blöndunni þrýst i í botninn og aðeins upp í hliðar á forminu. Botnin bakaður í 10 mínútur og látin kólna.
Þeytið rjóma og geymið í ísskáp.
Vinnið Philadelphia ost, ricotta ost og sykur þar til osturinn er orðinn mjúkur.
Leggið matarlímsblöðin eitt í einu í skál með vel köldu vatni og látið liggja í 5-10 mínútur. Þegar tíminn er liðinn eru blöðin orðin mjúk og þykk. Takið þau úr vökvanum og kreistið vatnið úr þeim. Hitið ávaxtasafann í potti eða örbylgjuofni, setjið matarlímið út í heitan vökvann. Hrærið þar til matarlímið hefur bráðnað saman við og hellið matarlímsblöndunni út í ostablönduna. Því næst er þeytta rjómanum bætt út í.
Ef notað er frosið mangó þá er það afþýtt. Mangó er maukað saman með töfrasprota eða í matvinnsluvél. Blandið mangómaukinu saman við ostablönduna, en bara lauslega þannig að það myndist marmaraáferð í ostablöndunni.
Hellið ostablöndunni yfir kexbotninn og kælið vel í 4-6 tíma, en best er kakan daginn eftir.
Ástaraldin skorin í tvennt, aldinið skafið innan úr þeim og því dreift yfir kökuna áður en hún er borin fram.

Frönsk súkkulaðikaka

Birt þann 26.7.2012 af Eldhússögur

Eldhússaga dagsins er frönsk súkkulaðikaka, saga sem verður aldrei of oft sögð! 🙂 Strangt til tekið eru klassískar franskar súkkulaðikökur ekki með kremi, en þessi fær undanþágu án nokkurra vandkvæða! Ljúffeng súkkulaðikakan leidd saman við gómsæt kremið, það er bara ekki hægt að standa í vegi fyrir slíkri sameiningu, enda les líklega engin frönsk kökulögga þetta blogg! Ég skreyti oftast þessa frönsku dásemd með jarðaberjum eða hindberjum. En verandi stödd á Vestfjörðunum þurfti ég að grípa til þess sem í boði var. Það var annars vegar kiwi og hins vegar nýtínd bláber frá bláberjalyngi við fjallsrætur Brella þó enn sé júlí. Einkenni franskra súkkulaðikaka eru að í þeim er lítið, jafnvel ekkert hveiti. Kakan er dökk, þétt og þung og á að vera eins og hún sé dálítið klesst. Þetta er einföld kaka sem flestum þykir góð, þetta er til dæmis uppáhaldskaka yngstu barnanna á heimilinu.

Uppskrift

Botn:

2 dl sykur
200 g smjör
200 g suðusúkkulaði
1 dl hveiti
4 stk egg

Súkkulaðikrem:

150 g suðusúkkulaði
70 g smjör
2-3 msk síróp

Aðferð-botn:

Þeytið eggin og sykurinn vel saman. Bræðið smjörið og súkkulaðið saman við vægan hita í potti. Blandið hveitinu saman við eggin og sykurinn. Bætið bráðnu súkkulaðinu og smjörinu að lokum varlega út í deigið. Bakið í vel smurðu tertuformi (ath. ekki lausbotna) við 170°C í 30 mínútur.

Aðferð – krem:

Látið allt saman í pott og bræðið saman við vægan hita. Kælið bráðina svolítið og berið hana síðan á kökuna þegar hún hefur kólnað.

Kakan á að vera blaut í miðjunni. Gott er að bera kökuna fram með rjóma eða ís og berjum, til dæmis jarðaberjum, hindberjum eða bláberjum.

Amerísk ostakaka með bláberjum

Birt þann 9.7.2012 af Eldhússögur

Jæja, tölum um ostakökur, þær dásemdarkökur! Það eru til tvenns konar útfærslur á ostakökum, bakaðar og óbakaðar. Uppistaðan í þessum óbökuðu er rjómaostur og þeyttur rjómi. Þær eru einungis kældar og því þarf oftast að setja í þær matarlím til að þær haldi forminu. Í bökuðum ostakökum, stundum kallaðar New York ostakökur, er uppistaðan líka rjómaostur, í sumum uppskriftum er að auki sýrður rjómi en sammerkt með þeim öllum er að í þeim eru egg. Bakaðar ostakökur eru, eins og segir sig sjálft, bakaðar í ofni en bornar fram kaldar. Hér áður fyrr gerði ég oftar óbakaðar ostakökur en núna er ég farin að gera oftar bakaðar. Þessi uppskrift af bakaðri ostaköku (kemur frá sænska kökukrúttinu henni Leilu) er mín uppáhalds hingað til, ég mun þó örugglega halda áfram að prófa fleiri uppskriftir! Ég held að galdurinn við hana sé hvíta súkkulaðið. Það er ótrúlegt hvað hvítt súkkulaði getur gert mikið fyrir kökur og eftirrétti! Í upphaflegu uppskriftinni er þessi ostakaka bökuð með bláberjum. Sú útgáfa hjá mér sést á myndinni hér að ofan (borin fram á dásamlega mánaðarstellinu sem ég fékk frá ömmu). En mér finnst hins vegar ekki verra að sleppa bláberjunum og skreyta hana með hindberjum og bera fram með hindberjasósu sem er himnesk með þessari ostaköku! Það er heldur ekkert sem segir að ekki sé hægt að baka hana með bláberjunum og bera fram með hindberjasósu! Þið sem elskið „Cheescake Factory“ ostakökur verðið að prófa þessa!

Uppskrift

300 gr Digestive kex
150 gr ósaltað smjör
1 dl sykur
1 dl maizenamjöl
2 tsk vanillusykur
600 gr Philadephia rjómaostur
1 dós sýrður rjómi 10%
3 egg
1 dl rjómi
200 gr hvítt súkkulaði
2.5 dl. bláber (má nota frosin ber sem búið er að afþýða)

Hindberjasósa:

300 gr hindber (má nota frosin ber sem búið er að afþýða)
2-3 msk sykur

Aðferð:

Ofn stilltur á 175 gráður. Smjör brætt og kex mulið í matvinnsluvél eða mixer og því blandað saman við smjörið. Sett í bökunarform með lausum botni og blöndunni þrýst i í botninn og aðeins upp í hliðar á forminu. Botnin bakaður í 10 mínútur og látin kólna.
Ofninn lækkaður í 160 gráður. Sykri, maizenamjöli og vanillusykri blandað saman í skál. Sýrðum rjóma og rjómaosti bætt við og þeytt þar til að blandan verður kremkennd. Eggjum bætt við og þeytt vel, en þó ekki of lengi eftir að eggjum hefur verið bætt við. Rjómanum smám saman bætt við og þeytt á meðan. Súkkulaði brætt yfir vatnsbaði og bætt út í. Hellið blöndunni yfir kexbotninn og dreifið báberjunum yfir kökuna.
Bakið við 160 gráður í 45-55 mínútur, eða þar til að kakan er bökuð að öllu leiti nema bara dálítið blaut í miðjunni. Þá er slökkt á ofninum og henni leyft að standa í ofninum í allavega hálftíma í viðbót. Notið álpappír yfir kökuna ef hún fer að dökkna mikið þegar líður á bökunartímann. Athugið að ostakakan verður ekki beint stíf þegar hún er tilbúin, sjáið þetta myndband við ca. 2.55 mínútur, þarna er sýnt að kakan getur ,,dansað“ svolítið þó hún sé tilbúin. Síðan sígur hún dálítið og jafnar sig. Það koma oft sprungur í yfirborðið en það er algengt, látið það ekki á ykkur fá! Ostakakan látin bíða í ísskáp yfir nóttu eða í minnst 6-8 tíma áður en hún er borin fram.
Fyrir þá sem vilja prófa hindberjasósuna með! Afþýðið 300 gr. af hinberjum, bætið við 2-3 msk. af sykri og hrærið vel saman með gafli eða töfrasprota. Bætið við örlitlu vatni ef sósan er of þykk. Það er hægt að hella sósunni ofan á kökuna og bera hana þannig fram eða bera sósuna fram með kökunni. Ég mæli með þessum frosnu hindberjunum í Kosti, þau eru alveg eins og þau séu fersk þegar þau eru afþýdd. Þau eru rándýr, 2000 kr. fyrir tæpt kíló. En það er samt mun ódýrara en að kaupa fersk ber, auk þess eru þau öll í lagi (maður fær oft ónýt fersk ber), hægt að næla sér í skammt í frystinn hvenær sem er og svo eru þau stór og ljúffeng!

Pavlova

Birt þann 7.7.2012 af Eldhússögur

Ég bakaði Pavlovu í vikunni þegar Vilhjálmur hélt upp á 12 ára afmælið sitt. Á myndinni er ég einmitt að horfa inn um stofugluggann á forviða afmælisgesti sem skildu ekkert í af hverju ég skaust út í garð með tertuna áður en hún var borin á borð! 🙂 Ég nota Pavlovu uppskrift frá Jóa Fel sem mér finnst mjög góð, ég hef þó aukið við magnið af rjómanum í uppskriftinni. Tertan er stór þannig að það þarf að gera ráð fyrir stórum kökudisk. Þá kom sér vel nýi flotti kökudiskurinn frá Brynju!

Pavlova er ein af mínum uppáhaldstertum. Stökkur marengs sem er mjúkur í miðjunni og þakinn rjóma og berjum, gerist ekki betra! Það er hægt að velja hvaða ber sem er á tertuna, mér finnst sérstaklega gott að nota ástaraldin og hindber. Ég var með að auki jarðarber á þessari tertu. Tertan er nefnd eftir Önnu Pavlovu, sem var þekkt rússnesk ballerína. Þegar hún heimsótti Ástralíu og Nýja Sjálandi á öðrum áratug síðustu aldar var þessi terta fundin upp þar henni til heiðurs (það var nú samt örugglega eins og að kasta perlum fyrir svín, ég get samt ekki ímyndað mér að ballerínur borði mikið af marengstertum! ). Það sem er frábrugðið við marengsinn í Pavlovunni er að í hann er sett edik. Hann gerir það að verkum að marengsinn helst mjúkur í miðjunni.

Uppskrift

Botn:
8 stk eggjahvítur
400 g sykur
1 1/2 tsk edik
1/2 tsk vanilludropar
1/2 tsk salt

Rjómakrem:
4-5 dl rjómi
4 msk flórsykur
1/2 tsk vanilludropar

Fersk ber eða ávextir eftir smekk

Þeytið eggjahvítur og bætið sykri, ediki, salti og vanilludropum við. Þeytið þar til sykur er vel uppleystur og marengsinn er orðinn stífur. Smyrjið marengsinn út á smjörpappír 26 cm hring (verið óhrædd, marengsinn á að vera svona stór og hár) setjið á plötu og bakið við 100° í 2 klukkustundir. Slökkvið á ofninum og látið kólna í honum.

Þeytið rjóma og blandið flórsykri og vanilludropum saman við. Setjið ofan á tertuna og skreytið með berjum og eða ávöxtum. Dæmi: jarðarber, hindber, ástaraldin, bláber, kíwi, blæjuber, brómber og mangó.

Dásamleg kirsuberjaterta

Birt þann 2.7.2012 af Eldhússögur

Þessa mynd tók ég fyrir um það bil ári síðan þegar ég gerði þessa dásamlegu kirsuberjatertu í fyrsta sinn og tók hana með til góðra vina í Grjótaþorpinu. Ég hafði séð upppskriftina á ýmsum sænskum matarbloggum og gat ekki annað en prófað. Síðan þá hef ég gert þessa tertu nokkrum sinnum, breytt og aðlagað uppskriftina og núna er þetta ein af mínum uppáhaldstertum. Það er mikilvægt að gera tertuna deginum áður og leyfa henni að brjóta sig í kæli yfir nóttu áður en hún er borin fram. Botnarnir verða þá blautir, eiginlega eins og súkkulaðifrauð eða búðingur sem er einstaklega ljúffengt í bland við gómsæta kirsuberjakremið! Í uppskriftinni er mascarpone ostur en ég hef líka notað rjómaost og mér finnst það alveg jafn gott. Kirsuber fást yfirleitt aldrei á veturnar og þá er hægt að skreyta tertuna með öðrum berjum. En núna eru kirsuber til í mörgum verslunum þannig að það er ákkurat rétti tíminn til að prófa þessa dásemd! Það tekur dálítin tíma að gera tertuna þar sem að það þarf að baka þrjá botna og búa til tvenns konar krem. En ég get lofað að það er þess virði! 🙂

Hér bakaði ég tertuna við annað tækifæri og skeytti hana með jarðaberjum í stað kirsuberja

Uppskrift

Kökubotnar

2 egg
2 dl sterkt kaffi
2½ dl súrmjólk
1,25 dl matarolía
200 g hveiti
420 g sykur
85 g kakó
1 tsk lyftiduft
2 tsk matarsódi
1 tsk salt
1 tsk vanillusykur

Ofninn hitaður í 160 gráður á blæstri. Þrjú bökunarform, 20 cm í þvermál, smurð að innan. Gott er að klæða formin að innan með bökunarpappír til að auðveldara sé að losa botnana.

Eggjum, kaffi, matarolíu og súrmjólk er hrært saman í stutta stund, því næst er þurrefnunum bætt út í og hrært þar til deigið er jafnt og kekkjalaust.

Deiginu er svo skipt í formin þrjú og bakað í ca. 35 mínútur. Athugið að botnarnir munu líta út fyrir að vera blautir. Botnarnir eru látnir kólna. Það er hægt að setja botnana í frysti í ca. 30 mínútur áður en kremið er sett á til þess að auðvelda fyrir ásetningu kremsins.

Kirsuberjakrem

500 g mascarpone ostur
3 dl rjómi
2½ dl kirsuberjasósa (t.d. frá Den gamle fabrik)
120 g sykur
½ tsk vanilusykur

Rjóminn er þeyttur og geymdur í ísskáp. Því næst er mascarpone ostur, sykur og vanillusykur þeytt saman þar til blandan er kekkjalaus. Þá er þeytta rjómanum bætt varlega út í mascarpone blönduna með sleikju ásamt kirsuberjasósunni.

Einn kökubotn er settur á kökudisk og hann smurður kirsuberjakremi, þetta er er endurtekið með hina tvo kökubotnana. Kirsuberjakreminu er svo smurt ofan á kökuna og á hliðarnar. Tertan kæld í ísskáp á meðan súkkulaðikremið er búið til.

Súkkulaðikrem

175 g suðusúkkulaði
½ dl rjómi
1 msk smjör
1msk síróp

Súkkulaði, rjómi, smjör og síróp er hitað saman í potti við vægan hita. Gott er að hræra blöndunni öðru hvoru þar til hún er orðin slétt og samfelld. Þá er súkkulaðiblöndunni leyft að kólna þar til hún hefur þykknað passlega mikið. Að lokum er súkkulaðikreminu hellt yfir tertuna og það látið leka dálítið niður með köntunum. Þá er kirsuberjunum dreift yfir tertuna með stilknum á, ef kirsuber eru ekki fáanlega er hægt að nota jarðaber. Þetta er terta sem bragðast best daginn eftir!

Hindberjasúkkulaðiterta

Birt þann 19.6.2012 af Eldhússögur

Í gær var sannarlega tilefni til þess að taka upp nýju uppskriftabókina þar sem að eiginmaðurinn átti afmæli. Það var erfitt að velja bara eina tertu af öllum þessum girnilegu tertum úr Lomenlinos tårtor. En ein þeirra höfðaði sérstaklega vel til mín; ,,Hallonbrownie“ eða Hindberjabrownie. Hindber og súkkulaði saman getur bara aldrei klikkað! Ekki spillti fyrir að í uppskriftinni var Muscovado hrásykur sem mér finnst gott að nota í kökur og tertur. Hann er til bæði dökkur og ljós, sá dökki er með dálitlum lakkrískeimi en sá ljósi með karmellukeimi. Ég fann bara dökkan Muscovado sykur í Hagkaup en í uppskriftinni átti að vera ljós, held að tertan hafi samt ekkert orðið verri fyrir það. Þessi terta er langbest daginn eftir að hún er bökuð og hefur fengið að brjóta sig aðeins.

Uppskrift:

Hindberjabrownie-botnar:

225 gr. smjör
200 gr. 70% súkkulaði
3 dl. ljós Muscovado hrásykur
1.5 dl. sykur
4 stór egg
4.5 dl. hveiti
1 dl. kakó
1 tsk. lyftiduft
100 gr. hindber (helst fersk en má nota frosin)

Marengs-smjörkrem með hindberjum (ATH. þessa uppskrift gerði ég eina og hálfa til þess að hún dyggði, hér að neðan er hún einföld)

4 stórar eggjahvítur
2 1/3 dl. sykur (200 gr)
250 gr. ósaltað smjör (við stofuhita)
100 gr. hindber
rauður matarlitur ef vill

Súkkulaðikrem

100 gr. 70% súkkulaði
50 gr. smjör

Aðferð:

Hindberjabrownie-botnar:

Ofninn hitaður í 175 gráður.
Tvö 15 cm. lausbotna kökuform smurð (þetta eru mjög lítil form, ég notaði 20 cm. form sem ég fékk í Húsasmiðjunni snemma síðastliðið í vor)
Smjör og súkkulaði brætt við vægan hita í skál í vatnsbaði.
Muscovado sykur, sykur og egg þeytt létt og ljóst.
Sigtið saman hveiti, kakó og lyftidufti í skál.
Hellið brædda súkkulaðinu og smjörinu varlega saman við eggjamassann og þeytið þar til blandan verður slétt. Blandið hveiti, kakói og lyftidufti saman við með sleikju. Setjið deigið í vel smurð kökuformin og stingið hindberjunum ofan í deigið. Bakið við 175°C í 45-50 mínútur. (Ég minnkaði tímann um 10 mínútur þar sem að kökuformin mín voru breiðari og hæð kökubotnanna þar með lægri).

Marengs-smjörkrem

Setjið eggjahvítur og sykur í skál og yfir vatnsbað með sjóðandi vatni. Þeytið allan tímann blönduna með þeytara (hefðbundnum, ekki rafmagns) þar til að hún er orðin 65 gráður eða þar til sykurkristallarnir eru horfnir.
Setjið blönduna í hrærivél og haldið áfram að þeyta þar til að blandan verður stíf og slétt og er orðin köld (getur tekið upp í 10 mínútur)
Bætið við smjörinu, litlum bita í senn. Þegar allt smjörið er komið út í marengsinn, þeytið í 3-5 mínútur í viðbót
Maukið hindberin með töfrasprota eða í matvinnsluvél. Sigtið maukið í gegnum fínt sigti til að losna við litlu kjarnanna.
Hellið hindberjamaukinu út í smjörkremið og þeytið þar til það er slétt. Bætið við rauðum eða bleikum matarlit til að fá sterkari lit.

Kljúfið botnana í tvennt með góðum hníf (brauðhníf). Setjið ein af nú fjórum tertubotnum á tertudisk og smyrjið kreminu á hann og svo koll af kolli. Smyrjið síðan þunnt lag af kremi utan um alla tertuna og setjð í ísskáp í um það bil 20 mínútur. Bætið þá við kremið þar til að tertan er með jöfn og falleg. Setjið tertuna í ísskáp aftur á meðan súkkulaðikremið er útbúið.

Súkkulaðikrem:

Súkkulaði og smjör brætt yfir vatnsbaði við vægan hita. Blandan látin kólna þar til að hún byrjar að þykkna dálítið. Mikilvægt er að blandan renni enn til en sé þó ekki of þunn.

Hellið súkkulaðikreminu yfir kökuna og látið það renna aðeins yfir kantana. Það þarf að vinna hratt áður en súkkulaðikremið stífnar, notið spaða til að dreifa úr því við þörfum. Skreytið með hindberjum.

Afraksturinn var útlitslega nokkuð langt frá frumgerðinni en góð var hún! Þetta er terta sem er betra að búa til deginum áður en hún er borin fram. Þessa terta er dálítið keimlík þessari á forsíðumynd bloggsins, Kirsuberjadraumnum, en í því kremi er Masacarpone ostur (eða rjómaostur), skelli þeirri uppskrift inn við tækifæri.

Kakan og pakkarnir biðu eiginmannsins þegar hann kom heim úr vinnunni. Jóhanna Inga bjó til styttu í skólanum í vor handa pabba sínum en geymdi hana heima hjá vinkonu sinni þar til í dag: ,,annars myndi ég freistast til að gefa pabba hana fyrir afmælið hans“! 🙂 Í dag voru þær hér þrjár vinkonurnar að baxa við að pakka inn styttunni í stóran kassa og svo í fínan bleikan pappír og slaufur! 🙂