Kornflex marengsterta með karamellukurli


Kornflex marengsterta með karamellukurliÞegar það er yfirvofandi óveður í júlí þá er bara eitt ráð í stöðunni, að borða eitthvað gott! Reyndar finnst mér það vera óbrigðult ráð í öllum stöðum. 🙂 Það er eitthvað ómótstæðilegt við marengstertur og þessi terta er þar engin undantekning. Marengsinn er með Kornflexi og það er líka hægt að nota Rice Krispies ef maður kýs það heldur. Mér finnst óskaplega gott að nota karamellukurl og banana saman í svona marengstertur og jarðaberin og banana-Pippið kóróna verkið. Þetta er „must try“ fyrir marengstertu-aðdáendur gott fólk! 🙂
IMG_6218IMG_6235
Marengs:
  • 220 sykur
  • 4 eggjahvítur (stór egg)
  • 2.5 bollar Kornflex
  • 1 tsk lyftiduft

Rjómafylling:

  • 5 dl rjómi
  • 150 g Nóa karamellukurl (1 poki)
  • 250 g fersk jarðaber, skorin í bita
  • 1-2 þroskaðir bananar, skornir í bita

Karamellukrem:

  • 4 eggjarauður
  • 4 msk flórsykur
  • 100 g Pipp súkkulaði með bananakremi
  • 2 msk rjómi eða mjólk
Ofn hitaður í 120 gráður við blástur Eggjahvítur, lyftiduft og sykur er þeytt þar til marengsinn er orðinn stífur. Þá er kornflex bætt varlega út í marengsinn með sleikju. Diskur eða kökuform sem er ca. 23 cm í þvermál er lagt á bökunarpappír og strikaður hringur eftir disknum. Þetta er gert tvisvar. Marengsinum er skipt í tvennt og hann
settur á sitt hvorn hringinn. Því næst er slétt jafnt úr marengsinum innan hringsins með sleikju eða spaða. Þá er marengsinn bakaður í 120°C (blástur) í heitum ofni í ca. 50 – 60 mínútur. Best er að láta marengsinn kólna í ofninum.

Rjóminn er þeyttur og Nóa karamellukurlinu ásamt jarðaberjunum og banönunum er bætt út í rjómann. Rjómablandan er svo sett á milli marengsbotnanna.

IMG_6219IMG_6220

Eggjarauður og flórsykur þeytt vel saman. Pippið er sett í skál ásamt 2 msk af rjóma eða mjólk og brætt yfir vatnsbaði. Eggjarauðu- og flórsykurblöndunni er svo blandað út í súkkulaðið. Kreminu er því næst dreift yfir marengstertuna. Skreytt með berjum, t.d. jarðaberjum.

IMG_6231

 

Brúnku-ostakaka með Dumle karamellukremi


Brúnku-ostakaka með Dumle karamellukremi

Þá erum við hjónin komin heim eftir dásamlega New York ferð. Sem betur fer rétt sluppum við fyrir horn með flugmannaverkfallið. Öll Evrópuflug féllu niður þennan dag en það var flogið til Bandaríkjana þrátt fyrir nokkra tíma seinkun. Við áttum helgina í fríi saman en svo sótti Elfar ráðstefnu og hélt þar erindi. Á meðan gekk ég New York þvera og endilanga og IMG_3022lét mér sko ekki leiðast! Mér finnst svo gaman að fara í svona borgarferðir og skoða þar menninguna, umhverfið, mannlífið svo ekki sé minnst á matarmenninguna. Þó ég haldi mest upp á gamlar og virðulegar Evrópuborgir líkt og París þá er líka eitthvað svo heillandi  við New York. Borgin er einstök, engin hverfi í borginni eru eins og Central Park er í raun ótrúlegur garður – byggður algjörlega af manna höndum fyrir 150 árum.

Áður en ég fer í svona ferðir þá undirbý ég þær afar vel. Þó það sé líka gaman að ráfa um stefnulaust og skoða það sem fyrir augu ber í ókunnugri borg þá gefur það manni langmest að vera vel undirbúinn. Til dæmis þá leiðist mér ákaflega mikið að eyða óþarfa tíma við að leita að veitingastöðum og enda svo kannski á því að fá vondan og óspennandi mat. Ég er því alltaf búin að bóka borð á veitingastöðum öll kvöldin sem við dveljumst í borginni, betra að vera búin að bóka og afpanta þá frekar ef plönin breytast. Ég skoða mikið síður eins og Tripadvisor þar sem aðrir ferðalangar segja frá sínum upplifunum, svo skoða ég staðsetningu, matseðla og verð á viðkomandi veitingastöðum. Á mjög mörgum veitingastöðum verður hreinlega að bóka með margra vikna fyrirvara sökum vinsælda. Ég skrifa líka hjá mér nokkra góða hádegisverðarstaði í helstu hverfunum og get þá droppað inn í hádeginu þar sem ég er stödd hverju sinni á þeim veitingastöðum sem ég veit að eru góðir. Okkur hefur reynst best að fara á meðaldýra og ódýra veitingastaði í svona ferðum. Oft eru dýrir og fínir veitingastaðir ekkert með betri mat en hægt er að fá annarsstaðar (sérstaklega hér Íslandi IMG_7660þar sem matur á gæða veitingastöðum er einstaklega góður) og verðið á veitingastöðum í stórum borgum er afar hátt. Til dæmis var besti maturinn sem við fengum að þessu sinni djúpsteiktur kjúklingur á pínulitlum stað í Greenwitch Village sem er eiginlega bara „take away“ staður – ég get svarið það – ég fæ bara vatn í munninn þegar ég hugsa um hann núna! 🙂 Þetta var jafnframt ódýrasta máltíðin sem við borðuðum í ferðinni! Við fórum þangað fyrsta daginn og töluðum um þennan kjúkling það sem eftir lifði ferðar. Staðurinn heitir Sticky´s Finger Joint (ef vel er að gáð þá sést í okkur hjónin á þessari mynd! 🙂 ) og þið megið ekki láta hann framhjá ykkur fara ef þið eruð í New York. Við deildum með okkur nokkrum tegundum og mér fannst mozzarellafyllti kjúklinginn bestur en Elfar var hrifnastur af Wasabi kjúklingnum. IMG_3023Þetta verður sannarlega fyrsti viðkomustaður okkar í næstu ferð til New York! 🙂

IMG_7691Við gerðum margt annað skemmtilegt. Á vegum ráðstefnunnar var ofslega flott galakvöld á American Museum of Natural History. Þar var í boði þriggja rétta dásamlega góður málsverður í þessu frábæra umhverfi. Einnig tróð upp magnaður gospel kór og í kjölfarið frábær hljómsveit sem spilaði undir dansi fram á nóttu. Hápunkturinn var hins vegar Broadway sýningin sem við fórum á, Jersey Boys. Hún byggist á skrautlegum ferli hljómsveitarinnar Frankie Valli and the Four Seasons. Þeir áttu marga smelli sem lifa góðu lífi í dag. Á sviðinu í Broadway er svo brjálæðislega hæfileikaríkt fólk að það er eiginlega sama hvaða sýningu maður sér, þær eru allar frábærar. Við vorum reyndar einstaklega ánægð með þessa sýningu því við vorum svo hrifin af lögunum. Til dæmis er lagið Begging búið að hljóma í Ipodi okkar beggja stanslaust undanfarna daga. Ef skoðaður er listinn á Tripadvisor yfir topp „attractions“ í New York þá trónir einmitt Jersey Boys söngleikurinn efst þar á lista. Ég mæli með að nota TKTS básana til að kaupa miða á Broadway sýningar með 50% afslætti. Við fengum miða á 73 dollara per mann sem er sannarlega hvers dollara virði.

En svo ég víki frá New York að Eldhússögu dagsins þá segir sú saga frá einstaklega djúsí og góðri köku! Þessi kaka hæfir sérstaklega vel sem eftirréttur því hún er sæt og góð og hæfilegt að fá sér bara eina sneið og satt best að segja hefur hún slegið í gegn hjá öllum þeim sem hafa smakkað hana hjá mér. Að blanda saman brownie og ostaköku er bara snilld og kremið sjúklega gott, súkkulaði, karamella og hnetur brætt saman … þetta er bara klikkuð blanda börnin góð! 🙂

IMG_4584

Uppskrift: 

Rjómaostablanda

  • 300 gr Philadelphia ostur
  • ¾ dl sykur
  • 1 tsk vanillusykur

Philadelphia ostur, sykur og vanillusykur er þeytt saman þar til blandan verður slétt. Blandan er geymd á meðan brúnkudeigið er útbúið.

Brúnku deig:

  • 2 egg
  • 100 gr smjör
  • 2 dl sykur
  • 3 msk bökunarkakó
  • 2 dl hveiti
  • ½ tsk lyftiduft
  • 1 dl pistasíur frá Ültje, saxaðar gróft

Bökunarofn hitaður í 180 gráður. Egg og sykur þeytt þar til blandan verður létt og ljós. Á meðan er smjör og kakó sett í pott og hitað við vægan hita þar til smjörið er bráðnað og hefur blandast saman við kakóið. Því næst er smjörblöndunni bætt út í eggjablönduna. Að lokum er hveiti, lyftidufti og grófsöxuðum pistasíum blandað varlega saman við deigið með sleikju. Bökunarform (22 cm) er smurt að innan, helmingnum af brúnkudeiginu er hellt í formið og slétt úr því. Því næst er rjómaostablöndunni dreift varlega yfir brúnkudeigið. Að lokum er restinni af brúnkudeiginu dreift yfir rjómaostablönduna. Bakað neðarlega í ofni við 180 gráður í 30-40 mínútur. Kakan á að vera vel blaut í miðjunni þegar hún kemur úr ofninum. Kakan er látin kólna í forminu.

Dumle karamellu-hnetukrem

  • 1 poki Dumle go nuts (175 g)
  • 1-2 msk rjómi

Dumle go nuts bitarnir (gott að geyma um það bil þrjá bita til að skreyta með) eru settir í pott og bræddir við vægan hita. Rjóma er bætt út í þar til blandan hefur náð passlegri þykkt. Þegar kakan er orðin köld er hún tekin úr bökunarforminu og Dumle hnetu kreminu dreift yfir kökuna. Nokkrir Dumle bitar eru saxaðir gróft og stráð yfir kremið. Best er að geyma kökuna í kæli yfir nóttu áður en hún er borin fram.

 

IMG_4569 IMG_4637

 

Fazermint marengsterta


IMG_4594

 

IMG_4600Í gær var ég svolítið eins og sprungin blaðra, ánægð blaðra – en sprungin! 🙂 Fermingin hans Vilhjálms var í fyrradag og heppnaðist ákaflega vel. Ég er orðin hressari núna og nýt þess að vera loksins í fríi. Ég á eftir að blogga meira um þennan dásamlega fermingardag, matinn, uppskriftir og skreytingar en ég þarf að vinna úr myndunum betur áður.

Á meðan ætla ég hins vegar að setja hér inn í dag uppskrift að frábærri marengstertu með myntusúkkulaði. Það er fátt sem slær út gómsætum marengstertum og ég mæli með að þið skellið þessa og bjóðið sem eftirrétt eftir góða páskamáltíð!

IMG_4611

Marengs:

▪   2 dl sykur
▪   1 dl púðursykur
▪   4 eggjahvítur
▪   3 bollar Rice Krispies

Ofn hitaður í 120 gráður við blástur (ef baka á báða botnana samtímis) eða 130 gráður við undir- og yfirhita. Eggjahvítur, púðursykur og sykur er þeytt þar til marengsinn er orðinn stífur. Þá er Rice Krispies bætt varlega út í marengsinn með sleikju. Diskur eða kökuform sem er um það bil 23 cm. í þvermál er lagt á bökunarpappír og strikaður hringur eftir disknum. Þetta er gert tvisvar. Marengsinum er skipt í tvennt og hann
settur á sitt hvorn hringinn. Því næst er slétt jafnt úr marengsinum innan hringsins með sleikju eða spaða. Þá er marengsinn bakaður í 120°C (blástur) í heitum ofni í um það bil 60 mínútur. Best er að láta marengsinn kólna í ofninum.

Fazermint marengsterta

Rjómafylling:

▪   5 dl rjómi
▪   250 g fersk jarðaber, skorin í bita
▪   ca. 200 g fersk bláber
▪   8 molar Fazermint (ca. 60 g), saxaðir smátt

Rjóminn er þeyttur og berjunum ásamt Fazermint molunum er blandað út í rjómann. Rjómablandan er svo sett á milli marengsbotnanna þegar þeir eru orðnir kaldir.

Fazermint krem: 

  • 4 eggjarauður
  • 4 msk flórsykur
  • 12 molar Fazermint (ca. 90 g)
  • 100 g Toms extra súkkulaði 70%

IMG_4925

Eggjarauður og flórsykur þeytt vel saman. Toms extra súkkulaðið er brotið niður í skál ásamt Fazermint molunum og brætt yfir vatnsbaði. Ef súkkulaðiblandan er of þykk er hægt að bæta örlítilli mjólk eða rjóma út í. Eggjarauðu- og flórsykurblöndunni er svo blandað út í súkkulaðið. Kreminu er því næst dreift yfir marengstertuna. Skreytt með berjum, t.d. jarðaberjum, bláberjum, hindberjum, rifsberjum og blæjuberjum. Tertan er geymd í ísskáp og er góð, ef ekki betri, daginn eftir.

IMG_4585

Djöflaterta


DjöflatertaFlensan heldur enn fjölskyldunni í heljargreipum. Ég er aðeins að skána en börnin eru enn veik. Vetrarfríið hefst á morgun og aldrei þessu vant verður heimilisfaðirinn í fríi líka. Sem betur fer vorum við búin að ákveða að taka því rólega og vera bara heima. Vonandi fer krökkunum samt að skána þannig að við getum gert eitthvað skemmtilegt saman í fríinu.

Í þó nokkurn tíma hefur mig langað í góða sneið af djöflatertu. Þetta var töpuð barátta frá byrjun, auðvitað endaði það með því að ég bakaði djöflatertuna – enda ber tertan nafn með rentu! Ég hef verið að skoða og prófa mig áfram með smjör annars vegar og olíu hins vegar í súkkulaðikökur. Ef notuð er olía í súkkulaðiköku þá verður hún mjög mjúk, mýkri en súkkulaðikökur sem í er smjör. Hins vegar verða kökur með smjöri bragðbetri. Þegar notað er smjör er líka auðveldara að hræra lofti í deigið, það verður „flatara“ með olíu. Að þessu sinni notaði ég smjör og var afar sátt við djöflatertusneiðina sem ég gat loksins notið eftir margra daga löngun! 🙂

IMG_3919IMG_3929

Uppskrift:

  • 250 ml sjóðandi vatn
  • 6 msk bökunarkakó, sigtað
  • 120 g dökkur muscovado sykur eða púðursykur
  • 130 g smjör, við stofuhita
  • 150 g sykur
  • 2 stór egg
  • 230 g hveiti
  • ½ tsk lyftiduft
  • ½ tsk matarsódi
  • 2 tsk vanillusykur

Ofn hitaður í 180 gráður og tvö 20 cm form smurð að innan (ath. þetta eru fremur lítil form). Kakó og muscovado sykur (eða púðursykur) er hrærður út í heita vatninu í skál, skálin lögð til hliðar.

Smjör og sykur hrært saman í hrærivél þar til að blandan verður létt í sér. Þá er eggjunum bætt út í, einu í senn, hrært á milli. Því næst er hveiti, lyftidufti, matarsóda og vanillusykri bætt út. Að lokum er vatninu sem búið var að blanda með sykri og kakó bætt út í og deiginu blandað vel saman. Deiginu er svo skipt á milli bökunarformanna tveggja og bakað í um það bil 30 mínútur við 180 gráður eða þar til kökurnar eru bakaðar í gegn. Kökurnar eru látnar kólna alveg áður en kremið er sett á milli botnanna og smurt utan á kökuna.

IMG_3907IMG_3909

Krem:

  • 120 g smjör, við stofuhita
  • 5 msk kakó
  • 3 msk síróp
  • 250 g flórsykur
  • 1 tsk vanillusykur
  • 1 msk mjólk
Smjörið hrært þar til það er orðið kremkennt. Flórsykur, vanillusykur og kakó sigtað saman og blandað smátt og smátt við smjörið. Ef kremið er of þykkt er hægt að bæta við meiri mjólk. Að lokum er sírópi hrært saman við. Kremið er sett á milli botnanna og smurt á alla kökuna þegar hún er orðin alveg köld.
IMG_3925
IMG_3943 IMG_3910

Súkklaðikaka með lakkrís og karamellukremi


Súkkulaðikaka með lakkrís

Núna erum við hjónin komin heim úr hreint út sagt dásamlegri ferð. Við dvöldum 6 nætur á Rhodos þar sem Elfar sótti ráðstefnu. Mikið var yndislegt að komast í sólina, slaka á og auðvitað borða góðan mat. Þeir sem fylgjast með Eldhússögum á Instagram hafa getað fylgst með myndum úr ferðinni en það er líka hægt að skoða þær hér á síðunnni, velja forsíðu og þar er hægra meginn á síðunni dálkur merktur „Eldhússögur á Instagram“. Eftir frábæra daga í Grikklandi var ákaflega gott að koma heim aftur til barnanna og alls hér heima. Næstu vikur eru þéttskipaðar með allskonar skemmtilegum viðburðum. Einn af þeim er í næstu viku. Þá fer ég á námskeið hjá Salt eldhúsi í indverskri matargerð. Ég hef heyrt svo margt gott um námskeiðin þarna. Eldhúsið sjálft er rómað fyrir það hversu fallegt það er og hve góður andi er þar inni. Ég meina, hvern langar ekki til þess að elda og borða í þessu fallega umhverfi?

Salt

Það eru mjög mörg spennandi námskeið í boði og erfitt að velja bara eitt! Ég endaði á því að velja þetta námskeið, Töfrar indveskrar matargerðar. Mér finnst indverskur matur svo góður en ég hef miklað það fyrir mér að gera hann frá grunni. Shabana Zaman sem hefur búið hér um árabil kennir á námskeiðinu og mér fannst svo ótrúlega spennandi að læra um indverska matargerð hjá einhverjum sem kemur frá landinu og er sérfræðingur í matargerð.  Ég er því ekkert lítið spennt fyrir þessu námskeiði og vona að ég geti deilt með mér hér á síðunni indverskri snilld að því loknu!

En svo ég víki að uppskrift dagsins. Nói og Siríus efndu til uppskriftasamkeppni nú á dögunum. Ég hafði í nokkurn tíma hugleitt hvort ekki væri hægt að baka súkkulaðiköku með lakkrís. Súkkulaði og lakkrís eru jú þjóðarréttur okkar Íslendinga! 🙂 Mér fannst því upplagt að reyna að baka þannig köku fyrir uppskriftasamkeppnina. Ég gerði nokkrar tilraunir og endaði á því að leggja fram þessa uppskrift í samkeppnina að ljúffengri súkkulaði-lakkrísköku með karamellukremi sem sló í gegn hjá fjölskyldunni.

IMG_0033

Uppskrift:

  • 4 egg
  • 3,5 dl sykur
  • 2 tsk vanillusykur
  • 6 msk kakó
  • 3 dl hveiti
  • 200 g smjör, brætt
  • 100 g Nissa með lakkrís (hægt að nota meira)

Ofninn hitaður í 175 gráður, undir- og yfirhita, og 24-26 cm smelluform smurt að innan. Smjörið brætt og látið kólna dálítið. Egg og sykur þeytt saman. Því næst er vanillusykri, kakói, bræddu smjöri og hveiti bætt út í. Deiginu er hellt í bökunarformið og Nizzamolunum er þrýst ofan í deigið hér og þar, einum í einu. Því næst er kakan bökuð í miðjum ofni við 175 gráður (undir- og yfirhita) í ca. 30 mínútur kakan á að vera blaut í miðjunni.

Karamellukrem:

  • 1/2 dl rjómi
  • 1/2 dl síróp
  • 100 g pippsúkkulaði með karamellu
  • 50 g smjör

Rjómi, síróp og pippsúkkulaði sett í pott og látið malla í nokkrar mínútur við meðalhita þar til að blandan þykknar. Gott að hræra í blöndunni öðru hvoru á meðan. Þá er potturinn tekinn af hellunni og smjörinu bætt út í. Hrært þar til allt hefur blandast vel saman. Gott er að láta kremið standa í smá stund til að fá það þykkara. Þá er kreminu hellt yfir kökuna og hún látin kólna í ísskáp í ca. 2-3 tíma. Skreytt með lakkrís og borin fram með þeyttum rjóma.

IMG_0136

Súkkulaðiterta með bananakremi


Súkkulaðiterta með bananakremi

Ég get varla beðið eftir því að setja inn uppskriftina af þessari tertu hingað á síðuna! Ég held að flestar fjölskyldur eigi í handraðanum uppskrift að tertu eða köku sem hefur fylgt þeim lengi og er bökuð við hátíðleg tækifæri í fjölskyldunni. Árið 1971 fékk mamma þessa uppskrift frá bekkjarsystur sinni í þáverandi Fósturskóla Íslands. Þessi terta hefur verið bökuð við ófáar skírnir, fermingar og afmæli í fjölskyldunni okkar í meira en 40 ár og er alltaf jafn vinsæl. Það er langt síðan ég hef bakað tertuna en ég hafði hana í afmælinu hennar Jóhönnu Ingu um daginn og þá rifjaðist upp fyrir mér hversu dásamlega góð mér þykir hún! Ég skreyti tertuna alltaf eins og mamma gerði ávallt – með rjóma úr rjómasprautu og niðursoðnum perum. Mér finnst það alveg ómissandi! 🙂 Þessa tertu verðið þið bara að prófa!

Súkkulaðiterta með bananakremi

Uppskrift, botnar:

  • 4 egg
  • 200 g. sykur
  • 1 dl hveiti
  • 2 msk kakó
  • 1 msk kartöflumjöl
  • 1 tsk lyftiduft

 Ofn hitaður í 180 gráður við blástur. Egg og sykur þeytt saman þar til blandan verður létt og ljós. Þá er þurrefnunum blandað varlega saman við með sleikju. Tvö smelluform (24 cm) smurð að innan. Deiginu er skipt á milli formanna tveggja og bakað við 180 gráður í ca. 20-25 mínútur eða þar til kantarnir á botnunum eru farnir að losna aðeins frá formunum. Botnarnir eru látnir kólna alveg áður en bananakremið er sett á milli botnanna.

 Bananakrem:

  • 100 g. smjör (mjúkt)
  • 70 g. flórsykur
  • 4 bananar, stappaðir

Smjör og flórsykur er þeytt saman þar til blandan verður létt. Þá er stöppuðum banönum bætt út í. Gott er að kæla kremið dálítið áður en það er sett á milli botnanna.

Súkkulaðikrem ofan á:

  • 100 g. smjör (mjúkt)
  • 100 g. flórsykur
  • 120 g. suðusúkkulaði
  • 1 egg
  • 1 tsk. vanillusykur

Til skreytingar:

  • þeyttur rjómi
  • niðursoðnar perur

 Smjöri, flórsykri og egg þeytt saman. Súkkulaðið er brætt og kælt aðeins áður en því er hellt saman við blönduna. Kreminu er smurt ofan á tertuna og á hliðarnar. Það er fallegt að skreyta tertuna með þeyttum rjóma og niðursoðnum perum.

IMG_7068

Brownie-terta með ástaraldinfrauði


Brownie-terta með ástaraldinfrauði

Þegar bróðir minn kvæntist fyrir 10 árum buðu nýgiftu hjónin upp á dásamlega góða brúðartertu (frá Sandholt bakaríi að mig minnir) í brúðkaupsveislunni sinni. Mér hefur oft verið hugsað til þessarar köku síðan þá. Já, ég veit, það er smá klikkun en svona er ég með mat og kökur stöðugt á heilanum! 🙂 Ég var veislustjóri í veislunni þeirra og hafði lítinn tíma til að spá í tertuna en í henni var einhverskonar ástaraldinfrauð, súkkulaðibotn og fleira. Mér finnst ástaraldin ákaflega góð og nýti þau gjarnan í tertur og ýmisskonar eftirrétti. Ég man ekki eftir að hafa séð þau í Krónunni né í Bónus en yfirleitt eru þau til í Hagkaup og Nettó meðal annars. Þegar velja á ástaraldin þá á að velja þau aldin sem eru orðin dálítið krumpuð og dökkfjólublá. Ef ástaraldinið er slétt og ljóst þá er það ekki nægilega þroskað enn. 

ÁstaraldinÞegar ég sá uppskriftina af þessari tertu þá minnti hún mig á brúðartertuna forðum og ég bara varð að prófa. Botninn er browniekaka, því næst kemur frauð sem minnir mikið á ostaköku. Efsta lagið er ljúffengt hlaup gert úr ástaraldini. Þessi samsetning er gómsæt og ekki skemmir fyrir hvað tertan er litrík og falleg. Næst ætla ég að prófa að setja líka ferskt ástaraldin í sjálft frauðið, ég held að það sé afar gott.

IMG_1669

Brownie botn:

  • 110 g smjör
  • 2 1/4 dl sykur
  • 1 msk síróp
  • 2 egg
  • 1 1/2 dl hveiti
  • 0,5 tsk salt
  • 1 1/2 tsk vanillusykur
  • 1 dl kakó

Frauð:

  • 6 matarlímsblöð
  • 1 1/4 dl sykur
  • 2 tsk vanillusykur
  • 2 eggjarauður
  • 250 g mascarpone ostur
  • 4 dl rjómi
  • 1/2 dl hreinn suðrænn safi (Brazzi)
  • 1 stórt eða 2 lítil ástaraldin

Ástaraldinhlaup:

  • 3 stór eða 4 lítil ástaraldin
  • 2 dl hreinn suðrænn safi (Brazzi)
  • 3 matarlím

IMG_1679

Botn:

Ofn hitaður í 175 gráður. Smjör, sykur og síróp er þeytt þar til það verður létt og ljóst. Eggjum bætt við einu í einu. Þá er hveiti, salti, vanillusykri og kakó bætt út og blandað vel saman við deigið. Smelluform (ca. 24 cm) er smurt að innan og deiginu helt í formið. Bakað í 20 mínútur og kakan látin kólna.

Frauð:

Sex matarlímsblöð eru lögð í kalt vatn í fimm mínútur. Á meðan er rjóminn þeyttur og geymdur í ísskáp. Því næst er eggjarauðum, sykri og vanillusykri þeytt saman og svo er mascarpone ostinum bætt út og öllu vel blandað saman. Ávaxtasafinn er hitaður á vægum hita í potti. Matarlímsblöðin eru tekin upp úr vatninu, mesti vökvinn kreystur úr þeim og þeim bætt út í pottinn, einu og einu í senn. Þegar matarlímsblöðin eru uppleyst er vökvanum bætt út í eggjablönduna. Að lokum er aldininu innan úr ástaraldininu ásamt rjómanum bætt út í og öllu hrært saman. Blöndunni er því næst dreift yfir kaldan brownie botninn. Mikilvægt er að ná yfirborðinu jöfnu með spaða. Kakan er sett í kæli þar til frauðið hefur stífnað.

Ástaraldinhlaup:

Þrjú matarlímsblöð eru lögð í kalt vatn í fimm mínútur. 1/2 dl af safanum er settur í pott og hitaður við vægan hita. Matarlímsblöðin eru tekin upp úr vatninu, mesti vökvinn kreystur úr þeim og þeim bætt út í pottinn, einu og einu í senn. Þegar matarlímsblöðin eru uppleyst er afgangnum af safanum hellt út í pottinn. Ástaraldin ávextirnir eru skornir í tvennt, aldinið skafið innan úr með skeið og sett í skál. Vökvanum úr pottinum er því næst hellt í skálina og hrært saman. Hlaupið er látið kólna (tekur ca. 20-30 mínútur) áður en því er hellt yfir stífnað frauðið. Tertan er geymd í kæli í minnst fjóra tíma áður en hún er borin fram.

IMG_1671Njótið! 🙂

IMG_1684

Sænsk prinsessuterta


IMG_1528

Það er eiginlega skandall að ég, sem hef sænskan ríkisborgararétt (auk þess íslenska auðvitað), hafi ekki bloggað enn um sænsku prinsessutertuna! Hins vegar er varla hægt að velja betri dag en í dag, 17. júlí, til þess að birta uppskrift að hátíðartertu á síðunni minni. Í dag eigum við hjónin nefnilega 20 ára brúðkaupsafmæli! Fyrir tuttugu árum gekk ég upp að altarinu í Kópavogskirkju á þessum degi, þá nýorðin 21 árs, og gekk að eiga Elfar minn – mín stærstu gæfuspor í lífinu. ♥ Ég kíkti á færsluna sem ég skrifaði í fyrra á sama degi, hún er hér. Þá hafði ég sett inn uppskrift af dásamlega góðu naan-brauðunum. En það sem vakti athygli mína var yndislega veðrið sem var á sama tíma í fyrra, eitthvað annað en núna!

Ég held að flestir sem eitthvað þekkja til Svíþjóðar kannist við prinsessutertuna. Prinsessuterta er nokkurskonar þjóðar-hátíðarterta Svía. Við hinu ýmsu tímamót sem ber að fagna með tertuáti þá birtist sænska prinsessutertan í allskonar myndum. Sú hefðbundnasta er græna prinsessutertan með bleiku rósinni. Hún fæst í hverju einasta sænska bakaríi. Það er nefnilega afar algengt í Svíþjóð að prinsessutertan sé keypt tilbúin í bakaríum fremur en bökuð heima.

prinsesstarta

En prinsessuterturnar koma líka í ýmsum litum sem hæfa hverju tilefni. Bleikar og bláar fyrir skírnir, hvítar fyrir brúðaup, gular fyrir páskana og svo framvegis. Þessi prinsessuterta var til dæmis til sölu í öllum sænskum bakaríum þegar nýjasta sænska prinsessan, Estelle, var skírð fyrir ári síðan, „skírnarterta Estelle“ kallaðist hún:

estelle skírnarterta

Upprunalega uppskriftin af prinsessutertu kemur úr uppskriftabók frá 1948 eftir sænskan hússtjórnarkennara. Hún kenndi yfirstéttarstúlkum heimilisfræði, meðal annars þáverandi sænsku prinsessunum. Þær voru afar hrifnar af þessari tertu, þaðan kom nafnið.

Tertan er í raun afar einföld. Uppistaðan í henni er svampbotn, sulta (þó ekki alltaf – sumir Svíar telja það landráð að setja sultu í tertuna þar sem hún er ekki í upprunalegu uppskriftinni!), vanillukrem, rjómi og marsípan. Í Svíþjóð er hægt að kaupa þetta allt tilbúð og þá þarf bara að setja tertuna saman. Hér á Íslandi er í raun hægt að gera það líka nema að vanillukremið fæst ekki tilbúið. Það eru líka smá vandræði með tilbúna marsípalokið. Hér er hægt að kaupa tilbúið marsípanlok frá Odense ofan á tertuna en það er bara til í einum óspennandi drapplituðum lit. Í Svíþjóð er hægt að kaupa það grænt og bleikt eins og sést hérna:

marsipanlock í ICA

Það er lítið mál að baka svampbotninn og í raun er ekkert mál að búa til vanillukremið en það eru margir sem hræðast það. Það er alveg óþarfi, það þarf bara passa að það brenni ekki við, það getur gerst hratt þegar maður er til dæmis með spanhellur. Vanillukremið finnst mér sjúklega gott og það gerir prinsessutertuna svona góða. Svo er það bara þessi blanda, mjúkur svampbotn, hindberjasulta, vanillukrem, rjómi og marsípan, hún er einfaldlega svo konunglega góð! 🙂

sænsk prinsessuterta

Þegar við bjuggum í Stokkhólmi þá bjuggum við beint á móti bakaríi/kaffihúsi. Það besta sem Vilhjálmur minn vissi var að setjast niður á kaffihúsinu eftir leikskólann og fá að gæða sér á einni sneið af prinsessutertu. Stundum gerðum við það svona spari! 🙂 Þegar Vilhjálmur átti afmæli um daginn þá stóð prinsessuterta efst á hans óskalista fyrir afmælisveisluna. Ég kaupi oft tilbúna marsípanið í Svíþjóð og tek með mér heim en að þessu sinni átti ég það ekki til og keypti þetta ljósa sem fæst hér. Það er ekkert fallegt á litinn og hálfgegnsætt í þokkabót en það er bragðgott. Svo er auðvitað hægt að búa til sitt eigið marsípan, setja í það matarlit og fletja út – en þar dreg ég mörkin!

Uppskrift:

Svampbotn:

  • 3 egg
  • 2 dl sykur
  • 1 dl kartöflumjöl
  • 1 dl hveiti
  • 1 tsk lyftiduft

Ofninn hitaður í 175 gráður við undir- og yfirhita. Egg og sykur er þeytt saman þar til það verður létt og ljóst. Kartöflumjöli, hveiti og lyftidufti bætt varlega út í með sleikju. Deiginu er hellt í smurt smelluform (ca 22 cm) og bakað við 175 gráður í ca. 35 mínútur. Botninn er látinn kólna.

Á milli botnanna og ofan á tertuna: 

  • 1/2 líter rjómi
  • 150-200 g frosin hindber, afþýdd
  • vanillukrem
  • Odense marsipanlock

Vanillukrem:

2 eggjarauður
3 dl mjólk
3 msk sykur
1 msk kartöflumjöl
1 vanillusöng

Vanillustöngin klofin á lengdina, fræin skafin innan úr stönginni og þau sett í pott ásamt restinni af hráefnunum. Suðan er látin koma varlega upp og á meðan er stöðugt hrært í blöndunni með písk. Athugið að þegar kremið fer að þykkna þá gerist það fremur snöggt. Það þarf einnig að passa að kremið brenni ekki við botninn í pottinum á meðan suðan er að koma upp. Um leið og vanillukremið er orðið passlega þykkt (þannig að það haldist vel á kökubotni án þess að leka- ekki ósvipað hlaupi) er potturinn tekinn af hellunni og kreminu hellt í skál – látið kólna.

IMG_1387

Tertan sett saman:

Þegar hindberin hafa þiðnað eru þau maukuð saman með gaffli (hægt að bæta við 1 tsk af sykri). Gott er að sía frá svolítið af vökvanum þannig að kökubotninn verði ekki alltof blautur undan hindberjamaukinu. Svampkökubotninn er skorinn í þrennt. Ég nota svona sniðuga græju frá Íkea til þess að skurðurinn verði jafn:

4027323-origpic-806cdc

Hindberjamaukinu er smurt á fyrsta botninn. Þá er næsti botn settur á og vanillukreminu smurt yfir hann. Því næst er síðasti botninn lagður ofan á. Rjómanum er þá dreift yfir alla tertuna, þunnt lag á hliðarnar en mest ofan á botninn. Rjóminn er mótaður keilulaga þannig að mest sé af honum í miðjunni, það kemur fallegast út undir marsípaninu. Að lokum er marsípanið lagt varlega yfir alla tertuna og brotið snyrtilega inn á hliðarnar. Ég skar ræmu af marsípaninu, rúllaði þvi upp og lagði í kringum tertuna til að fela samskeytin. Að síðustu er örlitlum flórsykri sigtað yfir tertuna. Ég skrifaði töluna með gel-lit frá Wilton.

IMG_1422Langt frá því að vera bakarís-falleg en góð er hún! 🙂

Draumaterta með fílakaramellukremi


Draumaterta með fílakaramellukremi

„Hvaða hrúgald er þetta“, gætuð þið réttilega spurt ykkur að – „Draumaterta með fílakaramellukremi!“ svara ég þá! Það mætti halda að við lifðum á tertum í sumarfríinu.  Svona slæmt er þetta nú samt ekki alveg hjá okkur. Ástæðan fyrir öllum kökuuppskriftunum hér á síðunni upp á síðkastið er sú að ég var með afmælisveislu um daginn og prófaði nokkrar nýjar tertur sem mig langar að setja hér í uppskriftasafnið mitt.

Fyrir löngu síðan prentaði ég út tertuuppskrift og setti í uppskriftamöppuna mína. Ég man ekki lengur hvaðan uppskriftin kom en mér leist vel á hana og hafði hugsað mér að prófa þessa tertu við gott tækifæri. Uppskriftin féll hins vegar í gleymskunnar dá þar til ég tók til í eldhússkápunum um daginn . Ég ákvað að prófa tertuna og bjóða hana í afmælisveislunni hans Vilhjálms. En þegar ég hafði bakað botnana þá leist mér ekkert á þá. Mér fannst þeir verða harðir og bakast afar ójafnt. Ég skellti nú samt rjóma á milli botnanna og kreminu ofan á kökuna (ég smakkaði á kreminu og það var ljúffengt!). Svo tilkynnti ég afmælisgestunum að þessi kaka væri alveg misheppnuð (í ofanálag lenti hún í óhappi í ísskápnum og var hálf-löskuð!). Ég sagði gestunum að þeir mættu gjarnan smakka á tertunni, svona til að staðfesta að hún væri misheppnuð, en þyrftu ekki að vera kurteisir og klára hana. Hins vegar fór svo hún var kosin besta tertan (í afar óformlegum kosningum!) á kaffihlaðborðinu! Tertan var það vinsæl að ég náði bara einni pínulítlli sneið, eða ekki einu sinni sneið, meira svona lítilli hrúgu, til þess að taka mynd af. Myndir af þessari tertu eru því bæði af skornum skammti auk þess sem hún var ekkert sérlega falleg! Þið verðið því að taka viljann fyrir verkið og trúa afmælisgestunum mínum þegar þeir segja að tertan hafi verið ljúffeng! 🙂

Uppskrift:

  • 200 g sykur
  • 3 egg
  • 100 g pecanhnetur, saxaðar meðalgróft
  • 100 g döðlur, saxaðar meðalgróft
  • 100 g suðusúkkulaði, saxað meðalgróft
  • 50 g kornflex
  • 1 tsk lyftiduft
  • 1/2 líter rjómi

IMG_1379

Fílakaramellukrem:fílakaramella

  • 200 g fílakaramellur
  • 1 dl rjómi

Ofn hitaður í 200 gráður. Egg og sykur þeytt mjög vel saman. Þá er
pecanhnetunum, döðlunum, suðusúkkulaðinu ásamt kornflexinu og lyftidufti bætt út í varlega með sleikju.

IMG_1381

Tvö smelluform (ca. 24 cm) smurð og deiginu skipt á milli þeirra. Bakað við 200 gráður í um það bil 20-30 mínútur. Tíminn getur verið dálítið misjafn eftir ofnum, það þarf að fylgjast með botnunum og meta tímann. Botnarnir eru kældir.
1/2 líter rjómi þeyttur og settur á milli botnanna. Ég skildi dálítið eftir að rjóma til að skreyta tertuna með.

Fílakaramellur settar í pott ásamt rjómanum og hitað við vægan hita þar til karamellurnar eru bráðnaðar og hafa blandast saman við rjómann. Þá er kremið látið kólna þar til það er hæfilega þykkt – það er að það sé hægt að hella því yfir tertuna án þess að það leki of mikið. Eftir að kremið er sett á kökuna er hún geymd í ísskáp þar til að kremið er orðið kalt og stífnað.  Þá er kakan skreytt með afgangnum af þeytta rjómanum. Ég skar niður nokkrar fílakaramellur smátt og dreifði yfir tertuna en ég mæli reyndar ekki með því. Mér fannst karamellurnar of seigar undir tönn til þess að nota þær sem skraut.

IMG_1419

Ostakaka með crème brûlée


Ostakaka með creme brulee

Ég er afar hrifin af öllum eftirréttum – nema reyndar ís, ég get alveg lifað án hans. Mér finnst líka gaman að prófa mig áfram með ýmsar samsetningar á eftirréttum sem kannski eru ekki fyrirsjáanlegar. Hér er ég til dæmis með uppskrift af pönnukökum í suffle-formi – ofsalega gott!

IMG_9205

Ég hef líka prófað að gera bakaða ostaköku sameinaða með pecanhnetuböku, ljúffengt!

IMG_7826

Annað dæmi um vel heppnað eftirréttahjónaband er ostakaka, brownie og hindberjakrem, þvílíkt lostæti!

img_7125

Browniekakan með hindberjarjómanum er líka æðisleg og margir hafa sent mér póst vegna hennar, hún sló greinilega í gegn á fleiri heimilum en mínu.

IMG_0594

Að þessu sinni gerði ég bakaða ostaköku sem mér finnst lostæti. Ofan á hana setti ég crème brûlée, nokkuð sem var frábærlega vel heppnað. Crème brûlée þýðir brenndur rjómi og er eftirréttur úr nokkurskonar búðingi með karamelluskel. Búðingurinn er oftast með vanillubragði en stundum er bætt við líkjöri, súkkulaði eða ávöxtum. Karamelluskelin er gerð með því að brenna sykur á yfirborði búðingsins með gasbrennara. Venjulega er crème brûlée borið fram í litlum skálum. Í þessari uppskrift hellti ég Crème brûlée búðingnum yfir ostakökuna – hnossgæti! Til þess að búa til stökka karamelluskel notaði ég gasbrennara sem fæst meðal annars í Kokku og Duka.

IMG_1426

Það er hægt að bjarga sér án hans. Þá er kökunni brugðið inn í ofn á grillstillingu í stutta stund til þess að fá stökka yfirborðið á búðinginn. Ef myndin er af kökusneiðinni er skoðuð vel þá er eins og fyllingin sé þrískipt. Ég er ekki alveg viss en ég held að á meðan bökuninni stóð hafi búðingurinn hálfvegis sokkið ofan í ostakökuna. Það er að röndin í miðjunni sé í raun crème brûlée, ég er samt ekki viss. Kakan var allavega dásamlega góð! 🙂 Það væri gaman að heyra hvernig kakan verður hjá ykkur ef þið prófið þessa uppskrift!

IMG_1468

Ég verð að benda ykkur á snilldar kökuform sem fást í Kokku. Þessi form eru eins og kökudiskar þannig að það er hægt að bera kökurnar fram beint á disknum. Það er frábært fyrir til dæmis ostakökur sem annars getur verið erfitt að færa úr bökunarformi yfir á bökunardisk.

2412323

Uppskrift:

Botn
  • 150 g Digestive kex
  • 70 g smjör
  • 60 g púðursykur
  • 1 tsk vanillusykur

Smjör brætt og kex mulið í matvinnsluvél eða mixer og því blandað saman við smjörið, púðursykur og vanillusykur. Sett í smelluform (ca. 24-26 cm) og blöndunni þrýst i í botninn og aðeins upp í hliðar á forminu.

Ostakaka:

  • 450 g rjómaostur (ég nota Philadelphia)
  • 60 ml rjómi
  • 2 stór egg
  • 110 g sýrður rjómi
  • 2 tsk vanillusykur
  • 1 msk maízenamjöl (eða kartöflumjöl)
  • 100 g sykur

Ofn stilltur á 150 gráður undir- og yfirhita. Rjómaosturinn þeyttur í hrærivél þar til hann verður mjúkur, ca í 2 mínútur. Þá er rjómanum bætt út í og því næst eggjunum, einu í senn. Að lokum er sýrðum rjóma, vanillusykri og maízenamjöli (eða kartöflumjöli) bætt út í og hrært vel saman í stutta stund. Blöndunni er því næst hellt yfir kexbotninn og bakað í ofni við 150 gráður í um það bil 18-20 mínútur á meðan crème brûlée blandan er búin til.

Crème brûlée:

  • 5 dl rjómi
  • 4 msk sykur + ca. 4 msk sykur til viðbótar fyrir karamelluskel
  • 5 stórar eggjarauður
  • 1 vanillustöng

Eggjarauður þeyttar þar til þær verða ljósar og léttar. Rjóminn settur í pott ásamt 4 msk af sykri og hitað að suðu, þá er potturinn tekinn af hellunni. Rjómablöndunni er svo hellt hægt og varlega út í eggjarauðurnar á meðan þær eru þeyttar á lágum hraða. Vanillustönginn er klofin í tvennt og fræin skafinn innan úr stönginni. Þeim er bætt út í blönduna. Blöndunni er síðan hellt yfir ostakökuna (sem hefur fengið að kólna aðeins eftir að hún kemur út úr ofninum). Kakan er svo bökuð áfram í ofninum í 45 mínútur við 150 gráður. Þegar kakan er tekin úr ofninum er henni leyft að kólna vel. Þá er ca. 4 msk af sykri dreift yfir kökuna og hann brenndur með gasbrennara. Ef ekki er til gasbrennari er hægt að setja kökuna í örfáar mínútur undir heitt grill í bakarofni til þess að brenna sykurinn. Kakan er svo geymd í ísskáp, bragðast best daginn eftir.

IMG_1538