Flensan heldur enn fjölskyldunni í heljargreipum. Ég er aðeins að skána en börnin eru enn veik. Vetrarfríið hefst á morgun og aldrei þessu vant verður heimilisfaðirinn í fríi líka. Sem betur fer vorum við búin að ákveða að taka því rólega og vera bara heima. Vonandi fer krökkunum samt að skána þannig að við getum gert eitthvað skemmtilegt saman í fríinu.
Í þó nokkurn tíma hefur mig langað í góða sneið af djöflatertu. Þetta var töpuð barátta frá byrjun, auðvitað endaði það með því að ég bakaði djöflatertuna – enda ber tertan nafn með rentu! Ég hef verið að skoða og prófa mig áfram með smjör annars vegar og olíu hins vegar í súkkulaðikökur. Ef notuð er olía í súkkulaðiköku þá verður hún mjög mjúk, mýkri en súkkulaðikökur sem í er smjör. Hins vegar verða kökur með smjöri bragðbetri. Þegar notað er smjör er líka auðveldara að hræra lofti í deigið, það verður „flatara“ með olíu. Að þessu sinni notaði ég smjör og var afar sátt við djöflatertusneiðina sem ég gat loksins notið eftir margra daga löngun! 🙂
Uppskrift:
- 250 ml sjóðandi vatn
- 6 msk bökunarkakó, sigtað
- 120 g dökkur muscovado sykur eða púðursykur
- 130 g smjör, við stofuhita
- 150 g sykur
- 2 stór egg
- 230 g hveiti
- ½ tsk lyftiduft
- ½ tsk matarsódi
- 2 tsk vanillusykur
Ofn hitaður í 180 gráður og tvö 20 cm form smurð að innan (ath. þetta eru fremur lítil form). Kakó og muscovado sykur (eða púðursykur) er hrærður út í heita vatninu í skál, skálin lögð til hliðar.
Smjör og sykur hrært saman í hrærivél þar til að blandan verður létt í sér. Þá er eggjunum bætt út í, einu í senn, hrært á milli. Því næst er hveiti, lyftidufti, matarsóda og vanillusykri bætt út. Að lokum er vatninu sem búið var að blanda með sykri og kakó bætt út í og deiginu blandað vel saman. Deiginu er svo skipt á milli bökunarformanna tveggja og bakað í um það bil 30 mínútur við 180 gráður eða þar til kökurnar eru bakaðar í gegn. Kökurnar eru látnar kólna alveg áður en kremið er sett á milli botnanna og smurt utan á kökuna.
Krem:
- 120 g smjör, við stofuhita
- 5 msk kakó
- 3 msk síróp
- 250 g flórsykur
- 1 tsk vanillusykur
- 1 msk mjólk
Eldhússögur 
Líst vel á þessa uppskrift, hef einnig verið á „útkikki“ eftir góðri súkkulaðikökuuppskrift. Ég reikna með að þú setjir vatnið út í degið á eftir þurrefnunum, er það ekki?
Kveðja
Margrét Urður súkkulaðiköku elskandi
úpps … þú ert með athyglina á hreinu Margrét Urður súkkulaðiköku elskandi! 🙂 Ég gleymdi að setja inn hvenær vökvanum er bætt út í, búin að laga það núna. Takk fyrir kveðjuna! 🙂
Flott terta og uppskrift,en ég sé ekki leiðréttiguna með brædda sykurin!
Búin að setja það skýrar inn núna! 🙂
Ummm, ætla ad prófa. hefurdu prufad ad setja bananakrem à milli? Guddómlegt!
Gerði þessa á afmælisdag sonar míns, ótrúlega góð aðeins öðruvísi súkkulaðikaka sem er svo gaman að fá 🙂
Bakvísun: The beginner's travel guide to explore Iceland in 7 days - Pickyourtrail Blog