Heimsins bestu Brownies


Ég hef áður minnst á muscovado sykur og hvað hann sé góður í tertur og kökur. Muscovado sykur er hrásykur, unninn úr sykurreyr en ekki hreinsaður. Þó að hann sé ekki beint hollur þá inniheldur hann b-vítamín og ýmis önnur næringarefni sem eru ekki í hreinsuðum sykri. Það er ákveðið lakkrís/karmellubragð af honum og hann hentar því afar vel í ýmsar kökur, sælgæti, karamellusósur auk heitra drykkja. Þegar muscovado sykur er notaður í kökur verða þær bragðmeiri og rakari en ef að notaður er venjulegur sykur eða púðursykur þar sem að muscovado heldur svo vel í sér raka. Þess vegna hentar hann vel í brownies því þær eiga að vera svolítið rakar og næstum klesstar. Mér finnst þessar brownies feykigóðar og einfaldar að baka. Þegar ég er með matarboð skelli ég oft í eina uppskrift á meðan ég elda matinn og býð upp á nýbakaðar og gómsætar brownies í eftirrétt!

Uppskrift:

200 gr. suðusúkkulaði
225 gr. smjör
3 egg
225 Muscovado sykur (dökkur)
80 gr. hveiti
1 tsk. lyftiduft
100 gr. grófhakkaðir valhnetukjarnar, líka hægt að nota pekanhnetur.
200 gr. mjólkursúkkulaði, grófbrytjað

Hitið ofnin í 180 gráður og smyrjið ferkantað form (ca. 20×30 cm). Brjótið suðusúkkulaðið í bita og setjið í pott ásamt smjörinu, bræðið við mjög vægan hita. Takið pottinn af hitanum um leið og smjörið er bráðið og hrærið þar til súkkulaðið er bráðnað og blandan slétt. Þeytið saman egg og Muscovado sykur þar til létt og ljóst. Hrærið súkkulaðiblöndunni saman við. Blandið hveiti, lyftidufti, valhnetum og mjólkursúkkulaði varlega saman við. Hellið í formið og bakið neðarlega í ofni í 30-40 mín, eða þar til skorpa hefur myndast ofan á en kakan er enn mjúk. Leyfið kökunni að kólna dálítið í forminu áður en hún er skorin í bita. Berið bitana fram volga með vanilluís eða þeyttum rjóma, berjum og jafnvel heitri karamellusósu!

Karmellusósa:

120 g smjör
115 g púðursykur
½ tsk vanilludropar
¼ bolli rjómi

Setjið allt hráefnið saman í pott og látið suðuna koma upp. Lækkið hitann og látið sósuna krauma í 3-5 mínútur. Hærið stöðugt í á meðan.
Berið sósuna fram heita með kökunni

Ís með heimatilbúnu frönsku núggati og súkkulaðisoðnum perum


Ég stenst fáar freistingar þegar kemur að eftirréttum en eitt af því fáa sem ég stenst auðveldlega er ís. Þess vegna var ég alveg hissa hvað ég kolféll fyrir þessum heimatilbúna ís. En það er franska núggatið í ísnum sem gerir útslagið, það er alveg svakalega gott! Það er ekkert flókið að búa það til. Mér finnst best að nota grófsaxaðar, afhýddar möndlur. Eftir að þær hafa verið karamelluseraðar og látnar kólna er gott að saxa þær niður enn frekar en þær límast líka svolítið saman við kælinguna. Eins finnst mér flest sem inniheldur perur eða epli gott og ekki verður það verra súkkulaðisoðið! Ég mundi það of seint að það átti að súkkulaðisjóða perurnar heilar og skera þær eftir suðu en ég gerði það einmitt í fyrra þegar ég prófaði þennan rétt í fyrsta sinn. Núna skar ég þær í báta fyrir suðu en ég mæli með hinu fyrrnefnda, perurnar halda meira perubragði og eru í betra jafnvægi við súkkulaðið ef þær eru soðnar heilar. Það er líka gott að hafa bara heitu súkkulaðisósuna ef manni finnst of mikið umstang að hafa perurnar líka.

Uppskrift f. 6

Núggat:

  • 80 gr afhýddar möndlur, saxaðar gróft
  • 90 gr sykur

Hitið afhýddar möndlur og sykur á pönnu þar til sykurinn verður gullinbrúnn og hjúpar möndlurnar vel. Hellið blöndunni á smjörpappír og látið kólna. Saxið möndlurnar frekar smátt.

Núggatís:

  • 5 eggjarauður
  • 5 msk sykur
  • 5 dl rjómi, léttþeyttur
  • 1 tsk vanilludropar (ég notaði eina vanillustöng í staðinn, stöngin klofin og fræin skafin innan úr)
  • núggatið

Þeytið saman eggjarauður og sykur þar til blandan verður ljós og loftmikil. Bætið léttþeyttum rjóma, vanilludropum (eða vanillufræum) og núggati út í og blandið vel saman. Frystið.


Súkkulaðisoðnar perur:

  • 3/4 lítri vatn
  • 1 dl sykur
  • 1 dl kakó
  • 1/2 vanillustöng
  • 4 perur, afhýddar

Sjóðið vatn, sykur, kakó og vanillustöng saman. Bætið perum út í og látið sjóða við vægan hita í 1 klukkustund, hreyfið við þeim öðru hvoru. Látið perurnar kólna í leginum. Skerið þær í báta áður en þær eru bornar fram.

Heit súkkulaðisósa:

  • 150 gr suðusúkkulaði
  • 30 gr smjör
  • 2 msk síróp
  • 1 dl rjómi

Setjið allt í pott og bræðið saman.

Ísinn má laga með tveggja vikna fyrirvara. Perurnar geymast í 2-3 daga í kæli og súkkulaðisósan geymist í eina viku í kæli.

Pannacotta með hvítu súkkulaði og ástaraldin


Pannacotta er ljúffengur eftirréttur upprunninn frá Ítalíu. Þetta er nokkurskonar vanillubúðingur en pannacotta þýðir ,,soðinn rjómi” á ítölsku. Þetta er einfaldur eftirréttur, rjómi, sætuefni og vanilla er soðið saman ásamt matarlími og síðan kælt. Yfirleitt er pannacotta borið fram með berum eða ávöxtum. Það er líka hægt að bragðbæta búðinginn með til dæmis kaffi, kanel, kakó eða kardimommu en hér nota ég hvítt súkkulaði. Þessi blanda, rjómi, ekta vanilla, hvítt súkkulaði og ástaraldin, gerir eftirréttinn skotheldan fyrir alla sælkera!

 Uppskrift f. 4

  •  5 dl rjómi
  • 1 msk hunang
  • 2 msk vanillusykur
  • 1 vanillustöng, vanillukornin skafin innan úr stönginni
  • 80 gr. hvítt súkkulaði, saxað
  • 2 plötur matarlím
  • 4 ástaraldin (passion fruit)

Matarlímsplötur settar í kalt vatn í minnst 5 mínútur. Vanillustöng klofin í tvennt, kornin innan úr báðum helmingunum skafinn úr með beittum hníf. Rjómi, hunang, vanillusykur og hvítt súkkulaði ásamt vanillukornunum sett í pott, hitað að suðu og hrært í á meðan. Þegar blandan er komin að því að sjóða er potturinn tekinn af hellunni. Mestur vökvinn kreistur úr matarlímsblöðunum og þeim bætt út í pottinn og hrært þar til þau eru bráðin saman við blönduna. Hellt í skálar eða bolla og kælt í ísskáp í minnst 3 klukkutíma. Áður en pannacottað er borið fram eru ástaraldinin skorin í tvennt, innvolsið skafið úr og dreift yfir.

Bakaðar perur með mjúkum marengs og súkkulaði


Þetta er mjög fljótlegur en góður eftirréttur og ef maður á niðursoðnar perur til taks þá er auðvelt að útbúa þennan rétt með litlum fyrirvara því auk peranna eru bara örfá hráefni. Í þetta sinn bætti ég líka við hvítu súkkulaði. Ávextir með bræddu hvítu súkkulaði er alltaf feykigóð blanda og ég tók því áhættuna að það kæmi vel út í þessum rétti sem það og gerði.

Ég man mjög vel eftir því þegar ég gerði þennan rétt í fyrsta sinn. Þá var ég tvítug, nýflutt til Stokkhólms og við vorum að fá gesti í fyrsta sinn í íbúðina okkar þar. Ég átti litla dós af perum og lagði þær í form, það var ekki nóg þannig að ég tók ferskar perur sem voru mjög harðar og óþroskaðar, afhýddi, skar þær í tvennt og fyllti formið. Svo komu gestirnir, rétturinn leit mjög vel út og allir fengu sér í skál. Við Elfar lentum á dósaperunum sem voru mjúkar og heitar. Gestirnir fengu hins vegar á sinn disk fersku perurnar sem voru auðvitað enn grjótharðar! Þau reyndu að skera perurnar með skeiðinni en það gekk vægast sagt illa. Ég man að annar gesturinn sagði að þessi réttur væri mjög sérstakur! Og þá var hann ekki að meina ,,sérstaklega góður“! 🙂 Sama kvöld kveiktum við í fyrsta sinn upp í gamla arninum í íbúðinni, Elfar hafði fyrr um daginn rogast heim með 40 kílóa viðarpoka en við áttum ekki bíl. Ég vildi nú breiða yfir þennan misheppnaða rétt og kveikja upp í notalegum arni fyrir gestina. Það tókst ekki betur en svo að íbúðin fylltist af reyk og gestirnir enduðu úti á svölum til að reyna að ná andanum og nágranninn bankaði upp á og hélt að það væri kviknað í! Þessir gestir komu aldrei í heimsókn aftur! 😉

En fylgið bara uppskriftinni og kveikið ekki upp í stífluðum arni, þá get ég lofað ykkur að gestirnir verða sáttir! 🙂

Uppskrift:

  • 1 stór dós perur
  • 4 eggjahvítur
  • 4 msk flórsykur
  • 100 gr suðusúkkulaði
  • 50 gr hvítt súkkulaði (hentar vel að nota hvíta súkkulaðidropa), má sleppa


Aðferð:

Raðið perunum í eldfast mót með skornu hliðina upp. Saxið hvíta súkkulaðið frekar fínt og setjið í dældirnar í perunum, ef notaðir eru hvítir súkkulaðidropar þarf ekki að saxa þá. Stífþeytið eggjahvítur og sykur. Þekjið perurnar með eggjahrærunni. Bakið við 110 gráður í u.þ.b 20 mínútur eða þar til rétturinn er orðinn fallega brúnn. Bræðið súkkulaði í vatnsbaði og dreifið því yfir réttinn eftir að formið er tekið úr ofninum . Berið fram heitt með ís.

Súkkulaðimús


Það eru til nokkrar útfærslur af súkkulaðifrauði. Mér finnst eiginlega hægt að flokka þær gróflega í fjórar útgáfur. Ein útgáfan er súkkulaði, sykur og bara eggjahvítur. Í annarri útgáfu er eggjarauðunum bætt út í súkkulaðið, sem sagt eggjarauðurnar notaðar auk eggjahvítanna. Í þriðju útgáfunni bætist rjómi við grunnhráefnið. Í þeirri fjórðu er enginn rjómi notaður en í stað hans kemur smjör. Í bókinni hennar Juliu Child notar hún einmitt síðastnefndu aðferðina (mæli með kvikmyndinni Julie & Julia ef þið hafið ekki séð hana enn!). Ég er enn að prufa mig áfram. Núna notaði ég uppskrift með hvorki smjöri né rjóma sem telst líklega mest hefðbundin og upprunaleg uppskrift af súkkulaðifrauði og það kom afar vel út. Ég notaði 70% súkkulaði en það er með 70% kakóinnihaldi og 30% sykri. Það er talað um að það þurfi aðeins að venjast svona kröftugu og lítið sætu súkkulaði og mörgum finnst það fullrammt við fyrstu kynni. Fyrir þá sem finnst þetta of rammt súkkulaði geta notað 56% súkklaði í uppskriftina hér að neðan. Næst ætla ég að prófa uppskriftina frá Juliu Child sem er með smjöri og mun auðvitað uppfæra hér á blogginu hvers konar súkkulaðifrauð hafi vinninginn!

Uppskrift f. 6-8 (fer eftir skammtastærð)

200 gr gott dökkt súkkulaði (56-70%)

8 eggjahvítur

75 gr sykur

3 eggjarauður

Súkkulaði brætt í vatnsbaði og kælt dálítið. Eggjarauður ásamt helmingnum af sykrinum þeytt þar til blandan verður ljós. Brædda súkkulaðinu hellt varlega saman við eggjarauðurnar og hrært vel í á meðan. Eggjahvíturnar hálfþeyttar og afganginum af sykrinum bætt út í smátt og smátt meðan þær eru stífþeyttar. Blandið þriðjungi af þeyttu eggjahvítunum rösklega saman við súkkulaðiblönduna með písk eða sleif. Að því búnu er afganginum af eggjahvítunum blandað varlega saman saman við með sleikju. Hér sést rétt tækni hvernig blanda á þeyttum eggjahvítum við annað hráefni án þess að þær missi ,,loftið“.

Setjið súkkulaðifrauðið í skálar eða glös og geymið í ísskáp í að minnsta kosti 2-3 klukkutíma áður en það er borið fram. Það er falleg og gott að skreyta með þeyttum rjóma og berjum, t.d. hindberjum eða jarðaberjum

Amerísk ostakaka með bláberjum


Jæja, tölum um ostakökur, þær dásemdarkökur! Það eru til tvenns konar útfærslur á ostakökum, bakaðar og óbakaðar. Uppistaðan í þessum óbökuðu er rjómaostur og þeyttur rjómi. Þær eru einungis kældar og því þarf oftast að setja í þær matarlím til að þær haldi forminu. Í bökuðum ostakökum, stundum kallaðar New York ostakökur, er uppistaðan líka rjómaostur, í sumum uppskriftum er að auki sýrður rjómi en sammerkt með þeim öllum er að í þeim eru egg. Bakaðar ostakökur eru, eins og segir sig sjálft, bakaðar í ofni en bornar fram kaldar. Hér áður fyrr gerði ég oftar óbakaðar ostakökur en núna er ég farin að gera oftar bakaðar. Þessi uppskrift af bakaðri ostaköku (kemur frá sænska kökukrúttinu henni Leilu) er mín uppáhalds hingað til, ég mun þó örugglega halda áfram að prófa fleiri uppskriftir! Ég held að galdurinn við hana sé hvíta súkkulaðið. Það er ótrúlegt hvað hvítt súkkulaði getur gert mikið fyrir kökur og eftirrétti! Í upphaflegu uppskriftinni er þessi ostakaka bökuð með bláberjum. Sú útgáfa hjá mér sést á myndinni hér að ofan (borin fram á dásamlega mánaðarstellinu sem ég fékk frá ömmu). En mér finnst hins vegar ekki verra að sleppa bláberjunum og skreyta hana með hindberjum og bera fram með hindberjasósu sem er himnesk með þessari ostaköku! Það er heldur ekkert sem segir að ekki sé hægt að baka hana með bláberjunum og bera fram með hindberjasósu! Þið sem elskið „Cheescake Factory“ ostakökur verðið að prófa þessa!

Uppskrift

  • 300 gr Digestive kex
  • 150 gr ósaltað smjör
  • 1 dl sykur
  • 1 dl maizenamjöl
  • 2 tsk vanillusykur
  • 600 gr Philadephia rjómaostur
  • 1 dós sýrður rjómi 10%
  • 3 egg
  • 1 dl rjómi
  • 200 gr hvítt súkkulaði
  • 2.5 dl. bláber (má nota frosin ber sem búið er að afþýða)
Hindberjasósa:
  • 300 gr hindber (má nota frosin ber sem búið er að afþýða)
  • 2-3 msk sykur

Aðferð:

  1. Ofn stilltur á 175 gráður. Smjör brætt og kex mulið í matvinnsluvél eða mixer og því blandað saman við smjörið. Sett í bökunarform með lausum botni og blöndunni þrýst i í botninn og aðeins upp í hliðar á forminu. Botnin bakaður í 10 mínútur og látin kólna.
  2. Ofninn lækkaður í 160 gráður. Sykri, maizenamjöli og vanillusykri blandað saman í skál. Sýrðum rjóma og rjómaosti bætt við og þeytt þar til að blandan verður kremkennd. Eggjum bætt við og þeytt vel, en þó ekki of lengi eftir að eggjum hefur verið bætt við. Rjómanum smám saman bætt við og þeytt á meðan. Súkkulaði brætt yfir vatnsbaði og bætt út í. Hellið blöndunni yfir kexbotninn og dreifið báberjunum yfir kökuna.
  3. Bakið við 160 gráður í 45-55 mínútur, eða þar til að kakan er bökuð að öllu leiti nema bara dálítið blaut í miðjunni. Þá er slökkt á ofninum og henni leyft að standa í ofninum í allavega hálftíma í viðbót. Notið álpappír yfir kökuna ef hún fer að dökkna mikið þegar líður á bökunartímann. Athugið að ostakakan verður ekki beint stíf þegar hún er tilbúin, sjáið þetta myndband við ca. 2.55 mínútur, þarna er sýnt að kakan getur ,,dansað“ svolítið þó hún sé tilbúin. Síðan sígur hún dálítið og jafnar sig. Það koma oft sprungur í yfirborðið en það er algengt, látið það ekki á ykkur fá! Ostakakan látin bíða í ísskáp yfir nóttu eða í minnst 6-8 tíma áður en hún er borin fram.
  4. Fyrir þá sem vilja prófa hindberjasósuna með! Afþýðið 300 gr. af hinberjum, bætið við 2-3 msk. af sykri og hrærið vel saman með gafli eða töfrasprota. Bætið við örlitlu vatni ef sósan er of þykk. Það er hægt að hella sósunni ofan á kökuna og bera hana þannig fram eða bera sósuna fram með kökunni. Ég mæli með þessum frosnu hindberjunum í Kosti, þau eru alveg eins og þau séu fersk þegar þau eru afþýdd. Þau eru rándýr, 2000 kr. fyrir tæpt kíló. En það er samt mun ódýrara en að kaupa fersk ber, auk þess eru þau öll í lagi (maður fær oft ónýt fersk ber), hægt að næla sér í skammt í frystinn hvenær sem er og svo eru þau stór og ljúffeng!

Banana-karamellubaka


Þessi himneska baka kemur úr smiðju Davids Lebovitz sem er snillingur þegar kemur að eftirréttagerð. Uppskriftina er að finna í bókinni hans Ready for Dessert: My Best Recipies. Á ensku heitir þessi baka Butterscotch Banana Cream Pie. Ég er búin að spá aðeins í þetta ,,butterscotch“. Á íslensku notum við orðið karamella yfir allar gerðir karamellu. En á ensku er til:

Butterscotch = púðursykur, rjómi og smjör hitað í ca. 115°C – 125°C.
Toffee = púðursykur, rjómi og smjör hitað upp í 150°C – 160°C þar til það verður stökkt.
Caramel = hvítur sykur ásamt smjöri og rjóma hitað þar til sykurinn brúnast, gerist við 150-170°C

Ég fæ ekki séð að við eigum mismunandi orð yfir þessar karamellur en ég er búin að fletta upp í eldhúsbiblíunni minni, Matarást eftir Nönnu Rögnvaldar, hún notar ensku orðin til aðgreiningar.

Eins og kemur fram hér að ofan þá er oftast rjómi í butterscotch-karamellunni en David notar mjólk í þessari uppskrift sem er auðvitað snilld, þá getur maður fengið sér fleiri sneiðar af bökunni án samviskubits! 🙂

Það kannski lítur út fyrir að það sé flókið að gera karamelluna en svo er alls ekki. Fylgið bara leiðbeiningunum nákvæmlega. Snilld við þessa böku er að það er hægt að útbúa hana deginum áður, en þá er bara rjómanum bætt við rétt áður en bakan er borið fram. Ég mæli með að þið prófið þessa dásemdarböku sem allra fyrst! 🙂

 Uppskrift

Botn:
180 gr súkkulaðikex (td. Maryland, rautt) eða Digestive kex ef maður vill minna sætan botn.
3 msk sykur
4 msk bráðið smjör

Aðferð:
Smyrjið bökuform. Bræðið smjörið og myljið kexið í matvinnsluvél eða mixer, blandið saman. Sett í botninn á forminu og blöndunni þrýst i í botninn og upp í hliðar á bökuforminu. Kælið í 30 mínútur í ísskáp eða frysti og bakið svo í ofni við 175°C í 10 mínútur. Leyfið botninum að kólna á meðan karamellan er er útbúin.

Karamella: 

215 gr. púðursykur
30 gr. smjör
3 msk. maizenamjöl
375 ml. nýmjólk
1/2 tsk. salt
3 eggjarauður
1/2 tsk vanilluextract (ég notaði fræin úr ferskri vanillustöng í staðinn en það er líka hægt að nota vanilludropa)
3 þroskaðir bananar

Aðferð:

  1. Bræðið smjör og púðursykur saman á meðalhita í potti, hellið yfir í meðalstóra skál, setjið sigti yfir skálina og setjið til hliðar
  2. Hrærið maizenamjölið út í 75 gr. af mjólkinni í lítilli skál. Hitið restina af mjólkinni með saltinu í potti þangað til að blandan er við suðu og hellið þá maizenamjölsblöndunni út í og hrærið þar til blandan þykknar (álíka mikið og majónes).
  3. Þeytið eggjarauðurnar saman í skál. Hellið smá af heitri mjólkurblöndunni útí eggin og þeytið meira. Hellið nú eggjablöndunni út í pottinn með heitu mjólkinni, sjóðið á meðalhita til að blandan þykkni.
  4. Hellið nú heitri blöndunni í gegnum sigtið ofan í púðursykurblönduna. Bætið vanilluextract við og hrærið vel saman. Núna er karamellan tilbúin.
  5. Skerið bananana niður í 6 mm sneiðar og dreifið yfir kexbotninn. Hellið karmellublöndunni yfir bananana, setjið plastfilmu yfir bökuna og geymið í kæli í minnst 2 klukkutíma áður en rjóminn er settur ofan á og bakan borin á borð.

IMG_3190

Rjómi:

250 ml rjómi
1 msk sykur
1/2 tsk vanilluextract
súkkulaðispænir til skreytingar

Þeytið rjómann þar til hann fer að þykkna, bætið þá sykri og vanilluextract út í og þeytið rjómann til fulls. Dreifið yfir bökuna og skreytið með súkkulaðispæni.

Berjabaka – Jóhanna Inga 7 ára gestabloggar!


Jóhanna Inga hefur nú lokið vikulöngu matreiðslunámskeiði. Hún gaf námskeiðinu hæstu einkunn en það er afar góður vitnisburður þar sem að þessi unga stúlka er kröfuhörð! 🙂 Þau fengu að gera alls 16 rétti, meðal annars pottrétt, pönnukökur, pæ, ís, salat, brauð, kökur, fiskrétt og súpu. Allt voru þetta mjög góðir og girnilegir réttir. Í lokin fengu þær vinkonurnar kokkahúfur! 🙂

Jóhanna Inga, Gyða Dröfn og Hrefna Rós:

Jóhanna Inga ætlar að gefa uppskrift af einum rétti sem hún útbjó. Þó svo að allir réttirnir hafi verið góðir var þetta eitthvað sem öllum í fjölskyldunni fannst afar ljúffengt. Hún segir að það sé mjög auðvelt að búa til þennan rétt! 🙂

Berjapæ

  • 2 dl. hveiti
  • 1 dl. púðursykur
  • 1 dl. sykur
  • 1/2 tsk. kanill
  • 1/4 tsk. salt
  • 2 dl. haframjöl
  • 100 gr. smjör
  • 4 dl. ber (hægt að nota frosna berjablöndu)
  • 1 epli, afhýdd og skorið í bita
  • 2 dl. sykur
  • 2 msk. maísmjöl

Aðferð:

  1. Blandaðu saman fyrstu 7 hráefnunum. Smjörið á að vera kalt.
  2. Myldu saman öll hráefnin þar til blandan minnir á haframjöl. Gættu þess að mylja ekki of mikið því þá bráðnar smjörið.
  3. Blandaðu eplunum, berjum, sykrinum og maísmjölinu saman.
  4. Settu berjablönduna í eldfast mót og stráðu svo hveitiblöndunni yfir.
  5. Settu í 180 gráðu heitan ofn í 35-40 mínútur eða þar til toppurinn er orðin gullinbrún og berjablandan bubblar upp um hliðarnar.
  6. Berið fram heitt með ís eða rjóma.
Hér er berjapæið hennar Jóhönnu ásamt heimatilbúna ísnum sem hún útbjó. Jóhanna vill koma því á framfæri að það hentar mjög vel líka að nota nýtínd bláber í þessa berjaböku! 🙂