Gratíneraður plokkfiskur

Birt þann 5.11.2012 af Eldhússögur

Á meðan langri búsetu okkar fjölskyldunar stóð erlendis, kveiknaði oft nostalgísk löngun í íslenskan mat. Ég steikti kleinur, bakaði rúllutertur, bjó til kjötsúpu, fiskibollur og aðra íslenska matrétti um leið og tækifæri gafst. Það var þegar vinir og ættingjar komu í heimsókn með fullar töskur af matvörum af Fróni, matvörur sem maður kaupir alla jafna ekkert endilega mikið af þegar maður býr á Íslandi. Ísskápurinn okkar er að minnsta kosti í dag sjaldan fylltur af flatkökum, hangikjöti, palmín feiti og pítusósu! 🙂 En ennþá hellist samt yfir mig löngun í gamaldags íslenskan mat öðru hvoru. Um daginn voru það fiskibollur, í dag var það plokkfiskur. Mér finnst plokkfiskur agalega góður en bý hann ekki oft til, þyrfti eiginlega að gera hann oftar. Sumir færa plokkfisk í nútímabúning með t.d. hvítlauk, bearnise sósu, krydda með karrí eða öðrum nýjungum. Mér finnst hann bestur hefbundinn eins og maður fékk hann hjá mömmu. Ég hef bara breytt einu, ég set hann inn í ofn með osti. Glænýtt rúgbrauð er bráðnauðsynlegt með plokkfisknum og ekki bara hvaða rúgbrauð sem er. Það þarf að vera rúgbrauð frá Kökugerð HP, það er langbest!

Uppskrift fyrir ca 3:

1/2 laukur, smátt saxaður
50 gr smjör
1/2 -1 dl hveiti
500 gr kartöflur, soðnar
500 gr þorskur eða ýsa, soðinn
ca 4 dl mjólk og fiskisoð
rifinn ostur
salt
pipar
Nóg af rúgbrauði og smjöri!

Ofn hitaður í 200 gráður. Kartöflur soðnar, að því loknu eruð þær flysjaðar. Vatn soðið í stórum potti, salti og pipar (svartur) bætt út í þegar suðan kemur upp. Þá er fisknum bætt út í vatnið, lok sett yfir og potturinn tekinn af hellunni. Fiskurinn veiddur upp úr eftir 5-6 mínútur. Soðið geymt. Smjör og laukur sett í pott og látið malla í smá stund, salt og pipar bætt út í. Hveiti hrært saman við og þynnt með mjólk og fiskisoði (ég nota ca. 1/3 fiskisoð, 2/3 mjólk). Þegar jafningurinn er hæfilega þykkur er fisk og kartöflum bætt út í (líka hægt að bera kartöflurnar fram sér og sleppa því að bæta þeim út í plokkfiskinn) og hrært lauslega saman. Kryddað með salti og vel af hvítum pipar. Á þessum tímapunkti er hægt að bera fram plokkfiskinn en það er gott að baka hann í smástund í ofni með rifnum osti. Þá er plokkfisknum hellt í eldfast mót og rifnum osti dreift yfir. Bakað í ofni þar til osturinn hefur bráðnað, í ca. 15 mínútur. Borið fram með rúgbrauði og smjöri.

Þorskur með chorizo-salsa og blómkálsmauki

Birt þann 30.10.2012 af Eldhússögur

Ég held að margar barnafjölskyldur kannist við það vandamál að erfitt reynist að finna matrétti sem hugnast öllum fjölskyldumeðlimum jafn vel. Yngstu krakkarnir okkar, þá sérstaklega Jóhanna Inga, eru alls ekki hrifin af fisk. Þau þurfa samt að smakka allavega einn bita af því sem er í matinn en það er voðalega leiðinlegt að vera með kvöldmat sem hluti af fjölskyldunni borðar ekki. Þess vegna er ég mikið sjaldnar með fisk í matinn en ég kysi sjálf. Í kvöld ákvað ég að prófa dálítið ,,fullorðinslegan“ fiskrétt sem ég vissi svo sem fyrirfram að krakkarnir yrðu ekki hrifin af. Auk þess höfðu þau fengið fisk í hádegismatinn í skólanum. Ég útbjó því einfaldan pastarétt sem þau gæddu sér á, afar ánægð, á meðan ég útbjó fiskréttinn fyrir restina af fjölskyldunni. Í fiskréttinum var chorizo pylsa. Ég átti einmitt leið framhjá Pylsumeistaranum á Hrísateigi í dag og fór inn í þá verslun í fyrsta sinn. Ég hef ekki verið dugleg að nota slíkar pylsur áður og þekki almennt lítið til sterkra pylsa. Í boði voru spænskar og mexíkóskar chorizo pylsur og ég valdi þær fyrrnefndu, þær eru mildari. Rétturinn var góður en óvenjulegur þar sem að hráefnin voru önnur en ég er vön að nota. Fiskurinn er bragðmildur og blómkálsmaukið einnig en chorizo pylsan bragðsterk og hún gefur því mesta bragðið í réttinn. Rétturinn ætti því að slá í gegn hjá unnendum slíkra pylsa.

Uppskrift f. 4

Þorskur

800 gr þorskur
ólífuolía
sítrónusafi
salt og pipar

Blómkálsmauk:

1-2 blómkálshausar, skornir í bita
2-3 kartöflur, afhýdda og skornar til helminga
salt
1-2 msk smjör
1-2 msk sýrður rjómi
salt og pipar

Chorizosalsa:

3-4 msk furuhnetur eða saxaðar kasjúhnetur
ca 1 dl olífuolía
ca 150 gr chorizo pylsa, skorin í litla bita
2-4 skarlottulaukar, fínsaxaðir
1-2 hvítlauksrif, pressuð eða fínsöxuð
ca 1/4 rauður chili, fínsaxaður
3 sólþurrkaðir tómatar, fínsaxaðir
sítrónusafi
ferskt timjan, fínsaxað

Best er að byrja á því að saxa og skera hráefnið í chorizosalsað.

Þorskurinn: Þorskurinn penslaður með blöndu af sítrónusafa og ólífuolíu og kryddaður með salti og pipar. Fiskurinn er bakaður í ofni við 200 gráður í 10-15 mínútur eða þar til hann er fulleldaður.

Blómkálsmauk: Kartöflurnar og blómkálið er soðið í ósöltuðu vatni þar til hvor tveggja er orðið mjúkt, ca. 10-15 mínútur. Soðvatninu hellt af og smjöri stappað saman við kartöflurnar og blómkálið. Fyrir fínna mauk er hægt að nota töfrasprota eða matvinnsluvél. Maukið er smakkað til með sýrðum rjóma, salti og pipar.

Chorizosalsa: Furuhneturnar (eða kasjúhnetur) ristaðar á þurri pönnu og þær síðan lagðar til hliðar. Olíu bætt á pönnuna ásamt chorizo pylsu og hún látin malla í ca. eina mínútu. Þá er skarlottulauk, sólþurrkuðum tómötum, hvítlauk og chili bætt út (magn eftir smekk). Þetta er látið malla á vægum hita í nokkrar mínútur. Að síðustu er hnetunum bætt út í ásamt timjan og salsað smakkað til með sítrónusafa.

Pizzufiskur (eða þorskur í miðjarðarhafssósu með mozzarella!)

Birt þann 17.10.2012 af Eldhússögur

Ef ég fengi að ráða nafninu á þessum ljúffenga rétti þá myndi það vera ,,þorskur í miðjarðarhafssósu með mozzarella“. Yngri krakkarnir þvertóku hins vegar fyrir það, þau sögðu að nafnið pizzufiskur myndi gera réttinn girnilegan í augum allra barna! Þau eru hvorugt fyrir fisk en þegar hann er kominn í þessar umbúðir þá er ekki annað hægt en að klára af disknum sínum. Þetta er ótrúlega einfaldur réttur að matreiða og afar gómsætur. Ég kaupi varla ýsu lengur, finnst þorskurinn svo mikið betri. Í þetta sinn fékk ég mjög þykkt þorskflak og þurfti þess vegna að bæta við bökunartímann. Annars sakna ég dagsbirtunnar ógurlega mikið á kvöldmatartíma þessa dagana. Þegar ég byrjaði að blogga var júní og alltaf bjart. Ég kann ekkert í ljósmyndun er er búin að reka mig á grunnatriðið núna, það er dagsbirtan! Það er svo mikið leiðinlegra að taka matarmyndirnar þegar orðið er dimmt og það þarf að nota flass. Það jákvæða er hins vegar að ég er komin í kapphlaup við dagsbirtuna og er farin að hafa matinn fyrr, upp úr klukkan 18, helst fyrr. En ókosturinn er reyndar sá að oft sit ég ein við matarborðið til að byrja með, Elfar vinnur alltaf frameftir og oft eru eldri krakkarnir að stússast í tómstundum, íþróttum eða vinnu á þeim tíma. En hér kemur uppskriftin af pizzufisknum ( … eða þorsknum í miðjarðarhafssósunni með mozzarella!)

Uppskrift f. 4-5

500 gr. tómatsósa með hvítlauk og/eða kryddjurtum (ég notað þessa sósu frá Franseco Rinaldi sem fæst í Krónunni og örugglega á fleiri stöðum, sjá mynd)
fersk basilika
1 kíló þorskur eða ýsa
pipar og salt
1 msk olía
svartar ólífur
1-2 kúlur ferskur mozzarella

Ofninn hitaður í 200 gráður. Sósan hituð í potti, basilika söxuð gróft og bætt út í sósuna. Fiskurinn skorinn í hæfilega stór stykki og kryddaður með salti og pipar. Eldfast mót smurt með olíu, fisknum raðað í formið og sósunni hellt yfir. Að lokum er ólífunum dreift yfir. Álpappir breiddur yfir mótið og það sett í ofninn í ca. 10-15 mínútur. Mozzarella osturinn skorinn í sneiðar. Eldfasta mótið tekið úr ofninum og hitinn hækkaður í 215 gráður. Álpappírinn fjarlægður og ostinum raðað ofan á. Eldfasta mótið sett aftur inn í ofninn og bakað í ca. 10 mínútur eða þar til fiskurinn er eldaður í gegn. Borið fram með hrísgrjónum og salati, jafnvel góðu brauði líka.

Fiskibollur með karrísósu

Birt þann 9.10.2012 af Eldhússögur

Ég er búin að vera lengi á leiðinni að búa til fiskibollur. Heimatilbúnar fiskibollur með karrísósu er svo dásamlega góður matur. Í margumtalaða skemmtilega ræktarhópnum mínum í Heilsuborg (sem er besta heilsuræktarstöðin í bænum! ) var einmitt rætt um fiskibollur í gær. Það kemur svo sem ekkert á óvart þar sem við tölum mjög mikið um mat á meðan við æfum! Ein í hópnum sagðist hafa verið að leita að góðri uppskrift af fiskibollum á netinu, ég tók það auðvitað beint til mín og dreif mig í fiskibollugerðina! 😉 Mér finnst langbest að nota hefðbundna, gamla og góða fiskibollu uppskrift frá mömmu. Ég hélt kannski að þetta væri uppskrift upphaflega frá ömmu en svo var ekki. Mamma gróf upp uppskriftina sína til að kanna uppruna hennar, það kom í ljós að þetta er úrklippa úr Vísi frá árinu 1981. Þar gefur Kristín Andrésdóttir hústjórnarkennari þessa uppskrift af fiskibollum. Reyndar ber hún þær fram með steiktum lauk og brúnni sósu en á okkar heimili er karrísósan vinsælust. Þessi uppskrift af karrísósu er sænsk, hún er rosalega góð og afar auðveld. Það tekur jafnlanga stund að laga þessa sósu eins og að búa til pakkasósu en hún er svo margfalt betri! Mér finnst bæði gott að hafa kartöflur og hrísgrjón með réttinum en vel oftar hrísgrjón því þau fara svo vel með sósunni.

Ég á ekki hakkavél á hrærivélina mína og notaði þvi bara matvinnsluvélina til að búa til deigið í bollurnar. Fiskibollurnar verða þéttari þannig, mér finnst þær betri ef notuð er hakkavél en það er ekkert sem kemur að sök samt. Ég gef upp stóra uppskrift, mér finnst ekki taka því að búa bara til nokkrar bollur, best er að búa til eins stóran skammt og maður nennir og frysta afganginn. Frábært að geta gripið í fiskibollur úr frystinum. Þessi uppskrift gaf 22 fiskibollur, þær voru líklega í stærri kantinum.

Uppskrift:

1.2 kíló ýsa eða þorskur (ég notaði þorsk)
2 tsk salt
dálítill pipar
4 msk hveiti
3 msk kartöflumjöl
2 egg
1 laukur
ca 4 dl mjólk
smjör til steikingar

Fiskurinn hakkaður ásamt lauknum. Hveiti, karöflumjöli, salti, pipar og eggjum bætt út í fiskhakkið. Að lokum er mjólkinni bætt út í. Bollur mótaðar og þær steiktar upp úr smjörinu á pönnu. Þegar fiskibollurnar hafa náð góðum lit set ég þær í eldfast mót í ofn í við ca. 170 gráður á meðan ég bý til karrísósuna.

Karrísósa:

3 msk smjör
1 tsk karrí
3 msk hveiti
ca. 4.5 dl vökvi (hægt að nota vatn, mjólk eða rjóma), ég notaði 1 dl matargerðarrjóma og restina léttmjólk.
1 tsk eða teningur hænsnakraftur

Smjörið brætt og karrí bætt út í og það steikt í smjörinu í stutta stund. Hveitinu bætt út í og blandan pískuð á fremur háum hita þar til hún verður þykk. Þá er vökvanum bætt út í og á meðan er hrært stöðugt í sósunni með písk. Þá er hænsnakraftinum bætt út í. Sósan látin malla í 3-5 mínútur.

Laxaborgarar með mangósósu og sætum frönskum kartöflum

Birt þann 7.10.2012 af Eldhússögur

Fyrir löngu síðan fór ég með nokkrum frábærum stelpum úr líkamsræktarhópnum mínum í kraftgöngu vestur á Seltjarnarnes sem endaði svo með notalegri máltíð á Nauthól. Þá voru þeir með á matseðlinum gómsæta laxaborgara með ,,sætkartöflufrönskum“! Þetta var svo ljúffengur matur að ég hef oft hugsað um að endurgera réttinn heima og lét loksins verða af því í kvöld. Namm namm … þetta var svo gott! Meira að segja krakkarnir elskuðu þennan rétt. Það er mjög fljótgert að búa til borgarana, ég setti bara allt hráefnið í matvinnsluvél. En ef maður vill grófari borgara er hægt að mauka hráefnið saman með gaffli. Ég las mér til í sænskri uppskriftabók að það væri mikið betra að sjóða laxinn örstutt áður en búnir eru til borgarar úr þeim, þannig héldust þeir safaríkari. Ég gerði það og borgararnir voru afar safaríkir en ég hef svo sem ekkert viðmið. Ég bar laxaborgarana fram í hamborgarabrauði en þess þarf ekkert endilega. Það er líka gott að bera þá fram með grænmeti, sósu og sætkartöflufrönskum og þá er hægt að kalla þetta laxabuff! Sósan var rosalega góð, ég notaði blöndu af frosnu og fersku mangói en það er hægt að nota bara annað hvort. Þessa sósu er örugglega gott að nota líka með til dæmis grilluðum kjúklingi. En laxaborgararnir og meðlæti er ofsalega ferskur og bragðgóður réttur, mæli með honum!

Laxaborgarar (ca 5-6 borgarar, fer eftir stærð):

1 kíló laxaflök
1/2 – 1 lítill rauðlaukur, saxaður smátt
1 dl brauðmylsna
2 egg
1 tsk Sambal Oelek (chilimauk) eða 1/2 rautt chili, kjarnhreinsað og saxað smátt (meira ef maður vill sterka borgara)
1 dl ferskt kóríander, saxað (hægt að nota steinselju í staðinn)
2 hvítlauksrif, söxuð smátt
börkur af einni límónu (lime), gróft rifinn
salt og pipar

Aðferð:

Léttsaltað vatn sett í pott og suðan látin koma upp. Laxinn soðinn í ca. 4 mínútur, síðan er hann veiddur upp úr og roðið tekið af. Öll hráefnin í borgarana sett í matvinnsluvél og keyrt þar til blandan er maukuð saman, ekki of lengi samt, best er að hafa hráefnið í borgarana gróft og ef hráefnið er hrært of lengi geta þeir orðið seigir. Það má líka píska hráefnin saman með gaffli, þá verða borgararnir grófari. Olía og smá smjör sett á pönnu og borgararnir steiktir í nokkrar mínútur á hvorri hlið.

Borið fram með laxaborgurunum:

hamborgarabrauð
klettasalat
salat
gúrka
tómatar
avókadó
mangósósa
sætar franskar kartöflur

Mangósósa:

2 dl grísk jógúrt
2 dl mangó (frosið eða ferskt)
3 msk mango chutney
safi úr 1/2 límónu (hægt að nýta límónuna úr laxaborgara uppskriftinni)
salt og pipar

Öllu hráefninu blandað saman með töfrasprota eða í matvinnsluvél. Gott að smakka sósuna til með meiri límónusafa, mangó, mangó chutney og/eða salti og pipar eftir þörfum.

Sætar franskar kartöflur:

Sætar kartöflur skornar í aflangar sneiðar eins og franskar kartöflur. Þeim er svo velt upp úr ólífuolíu, maldon salti, grófum pipar og góðri kryddjurtablöndu, til dæmis Best á allt frá Pottagöldrum. Kartöflurnar bakaðar við 220 gráður í ca. 30 mínútur.

Þorskur með balsamik-lauk og sellerímús‏

Birt þann 1.10.2012 af Eldhússögur

Ég hef sett inn uppskrift af þorskrétti áður sem er himneskt góður! Þá uppskrift er að finna hér. Í kvöld prófaði ég aðra uppskrift af þorskrétti sem er svipað uppbyggð en með allt öðrum hráefnum. Þessi réttur var dásamlega góður! Látið ekki laukinn hræða ykkur í burtu! Ég til dæmis borða alls ekki hráan lauk, finnst hann hræðilega vondur. En hér er búið að meðhöndla laukinn þannig að hann verður algjört hnossgæti. Það er mikilvægt að gefa sósunni smá tíma, leyfa balsamikedikinu að sjóða vel niður og líka að smakka sósuna vel til. Sellerí- kartöflumúsin er rosalega góð, skemmtileg tilbreyting að fá bragð af sellerírótinni með kartöflunum. Ég fékk sellerírót í Nettó en hún er líka stundum til í Bónus minnir mig. Svo er líka hægt að svissa aðeins í uppskriftunum, nota t.d. sætukartöflumúsina úr hinum þorksréttinum sem ég minntist á, með þessum rétti.

Þorskur:

800 gr þorskflök, skorinn í bita
salt og pipar

Balsamik-laukur

14-16 skarlottulaukar
ólífuolía
2 msk sykur
2 dl balsamedik
2 dl fiskisoð (vatn+fiskikraftur)
2 msk ósaltað smjör

Sellerí- og kartöflumús

1 sellerírót, skorin í teninga
8-10 kartöflur
2 msk smjör
mjólk
sykur
salt og pipar

Sellerírót afhýdd og skorin í tenginga sem settir eru í pott. Kartöflur einnig settar í pott, hvort tveggja soðið þar til orðið mjúkt (í sitt hvorum pottinum). Vatninu hellt af, kartöflur afhýddar. Sellerírót og kartöflum stappað saman og smjöri bætt út í. Bragðbætt með salti, pipar og sykri (ef maður kýs að gera hana sætari). Einnig er hægt að bæta örlítið af mjólk út í.

Ofninn hitaður í 180 gráður. Þorskurinn saltaður og pipraður, skorinn í hæfilega bita og lagður í eldfast mót. Bakaður í ofni við 180 gráður í ca 15-20 mínútur. Fiskurinn tekinn úr ofninum, álpappír lagður yfir hann í ca. þrjár mínútur áður en hann er borinn á borð.

Skarlottulaukurinn afhýddur og ef hann er stór er gott að skera hann í tvennt á lengdina. Laukurinn látinn malla í olíu í potti, á fremur lágum hita, þar til hann er orðinn vel mjúkur. Sykri bætt út í og hann látinn bráðna. Því næst er balsamedik bætt út í og látinn malla þar til að það er vel soðið niður (verður næstum því að sírópi). Þá er fiskisoðinu bætt út í og soðið niður þar til sósan er orðin fremur seigfljótandi. Það er mikilvægt að smakka sósuna til, ef hún er til dæmis of súr þarf að bæta við sykri, ef hún er of sölt (fiskikrafturinn) þarf að bæta við örlitlu vatni. Smjörinu er svo bætt við rétt áður en sósan er borin fram.

Laxasúpa

Birt þann 17.9.2012 af Eldhússögur

Svara

Þessi súpa komst inn í gegnum súpuhliðið hjá mér! Þetta er sem sagt súpa sem mér finnst afar góð þó ég sé kresin á súpur. Laxinn í súpunni kemur rosalega vel út en mikilvægt er að ofelda hann ekki. Eftir að laxinn er kominn ofan í súpuna tekur bara nokkrar mínútur fyrir hann að verða tilbúinn. Fenniku fékk ég í Nettó í Mjóddinni. Ég mæli með því (fyrir þá sem búa réttu meginn í borginni! 🙂 ) að kaupa laxinn í Fiskbúð Hólmgeirs í Mjóddinni og skottast svo yfir í Nettó sem er við hliðina á og kaupa grænmetið og restina af hráefninu þar. Það er yfirleitt mjög gott úrval af grænmeti og ávöxum í þeirri verslun. Þetta er fremur mild súpa, ekkert af hráefninu er sérstaklega bragðsterkt. Ég vil hafa súpur frekar bragðmiklar og notaði því vel af cayanna piparnum en það er smekksatriði, súpuna þarf að smakka til og krydda eins og hentar hverjum og einum.

800 gr laxaflök, roðflett og skorin i teninga
200 gr rækjur (má sleppa)
1-2 stönglar af sellerí, skorið í strimla
2 gulrætur, skornar í strimla
1 fennika, skorin í strimla
1 púrrlaukur, skorinn í sneiðar
smjör til steikingar
1 dós hakkaðir tómatar
8 dl fiskisoð
smá hvítvín (má sleppa)
5 dl matargerðarrjómi
Cajanna pipar
maizena mjöl og vatn
salt

Skerið allt hráefnið eins og sagt er til um hér að ofan. Reynið að hafa grænmetisstrimlana svipað stóra. Steikið sellerí og gulrætur í smjöri í nokkrar mínútur, bætið svo við fenniku og púrrlauk og steikið í smástund í viðbót. Bætis svo við tómötum, fiskisoðinu, rjómanum og hvítvíni (ef það er notað). Látið súpuna malla þar til að grænmetið er tilbúið. Hristið saman dálítið maizenamjöl og vatn og bætið út í súpuna, látið suðuna koma upp. Því næst er súpan söltuð og pipruð með cayanna pipar og smökkuð til. Laxinum er bætt út í í örfáar mínútur (hann er mjög fljótt tilbúinn), hrærið ekki í súpunni. Bætið svo rækjum út í þegar súpan er borin fram. Súpuna er hægt að skreyta með fersku dilli og gott er að bera hana fram með góðu brauði, til dæmis focaccia brauði eða þessu fljótlega fimmkornabrauði.

Sashimi með avókadó og mangó í ponzusósu

Birt þann 11.9.2012 af Eldhússögur

Jamm, enn og aftur, avókadó og mangó! Þetta eru aðalpersónurnar í eldhússögunum mínum eins oft og ég mögulega kem þeim að! Og með þeim aukapersónum sem eru í þessum rétti … ég segi bara eins og Ósk dóttir mín ,,það hamingja í munninum á mér!“ 🙂 Þessi forréttur er hreinasta hnossgæti, það tekur enga stund að útbúa hann og að auki er hann afar fallegur á diski. Ég keypti lax í fiskbúð Hólmgeirs og frysti hann yfir nóttu eins og gera á við lax sem bera á fram hráan. Ég tók hann út að morgni og setti í ísskáp. Þá var hægt að skera hann niður seinnipartinn. Sósan sem er með réttinum er svo ljúffeng. Þetta er svokölluð ponzusósa en það kalla Japanir sósur sem gerðar eru úr sojasósu og safa úr sítrusávöxtum. Þeir nota Ponzusósuna meðal annars með sashimi og tataki (mjög létt grillað kjöt eða fiskur) Það er svo lítið mál að búa þennan rétt till, það þarf bara að skera laxinn fremur þunnt ásamt avókadóinu og mangóinu. Hræra síðan saman í sósuna og voilà! Dásemdar forréttur er tilbúinn!

Við snæddum þennan rétt um helgina með vinum okkar, Hildi og Alla ásamt börnum. Við skipulögðum svo brilliant matarboð, ég sá um að elda matinn og kom með hann heim til þeirra! Mér finnst svo gaman að elda en hundleiðinlegt að þrífa og laga til. Því miður er ég ekki nógu afslöppuð týpa, ég verð því alltaf að hafa allt spikk og span ef von er á heimsókn. Það gerir það að verkum að ég get sinnt matargerðinni minna en ég vildi. Núna gat ég hins vegar dúllað mér eingöngu í eldhúsinu en Hildur og Alli sáu um hina hliðina! Góð skipting fannst okkur öllum! 🙂

Uppskrift f. 4

400 gr lax
1 mangó (vel þroskað)
1 avókadó
1,5 dl safi úr límónum (lime), ca. 3-4 stykki
1 dl sojasósa
1/4 – 1/2 rautt chili
2 msk kóríander
2 msk vorlaukur
2 tsk sykur
Ristuð sesamfræ

Aðferð

Byrjað er að útbúa ponzusósuna. Límónusafinn er kreistur úr límónunum og blandað við sojasósuna. Vorlaukur, chili (kjarnhreinsað) og kóríander saxað mjög fínt og bætt við sojasósuna. Sykrað eftir smekk. Sósan geymd í ísskáp.
Lax, mangó og avókadó skorið í þunnar sneiðar og raðað fallega á disk. Sojasósunni og ristuðum sesamfræum dreift yfir. Skreytt með nokkrum þunnum chilisneiðum og kóríanderblöðum.

Ofnbakaður þorskur með pistasíusalsa, sætkartöflumús og sojasmjörsósu

Birt þann 4.9.2012 af Eldhússögur

130

Þessi fiskréttur er einn sá besti sem við höfum bragðað, svo einfalt er það! Bragðgóður fiskurinn með ljúffengu pistasíusalsanu, sætu kartöflumúsinni með mildu chili og límónubragði og svo sósunni sem er hnossgæti, gerð úr meðal annars smjöri og sojasósu, vá hvað þetta kom á óvart! Þetta var eins og að snæða fiskrétt á einhverjum frábærum veitingastað! Það hljómar núna eins og ég sé að mæra eldamennskuna hjá mér í bak og fyrir en það er uppskriftin sem er svona frábær, það getur hver sem er eldað þennan rétt! Enn og aftur undrast maður yfir því hvað hægt er að galdra fram dásamlega bragðgóða rétti með fremur fáum og einföldum hráefnum. Sósan var algjör snilld! Sem betur fer tvöfaldaði ég uppskriftina því sósan var hreinlega sleikt upp úr skálinni, sem og fiskurinn og kartöflumúsin. Næst ætla ég að prófa þessa sósu með laxi, það er örugglega líka meiriháttar gott. Með þessum rétti sauð ég nýtt og ferskt brokkolí. Ég sýð það afar stutt, það er ekki gott að borða mauksoðið brokkolí auk þess sem þá fara öll næringarefni úr því!

Sumum finnst erfitt að tímasetja matargerð og setja því kannski fyrir sig að það þarf að útbúa þrenns konar uppskriftir fyrir þennan rétt. En það er auðvelt. Best er að byrja á kartöflunum, afhýða þær, skera niður og byrja á að sjóða þær. Þegar þær eru komnar í pottinn er fiskurinn útbúinn og gerður tilbúinn fyrir ofninn. Eina sem er viðkvæmt fyrir biðinni er fiskurinn, maður vill bera hann á borð þegar hann er nýkominn úr ofninum. Þess vegna er best að setja hann í ofninn þegar kartöflurnar eru komnar vel á stað og jafnvel sósan líka. Kartöflumúsin er stöppuð, hrærð og bragðbætt í potti og þá þarf að skerpa á henni en það er hægt að gera hvenær sem er þannig að hún þolir vel að bíða.

Uppskrift f. 3

Sætkartöflumús

ca 5-600 gr sætar kartöflur, skrældar og skornar í bita
1-2 kartöflur, skrældar og skornar í bita
1/2 rautt chili, fræhreinsað
safi úr 1/2 límónu (lime)
ca 1 msk smjör
salt og pipar

Kartöflur og sætar kartöflur skrældar og skornar í svipað stóra bita. Þær eru svo settar í pott og vatn rétt látið fljóta yfir. Chili skorið í tvennt langsum, fræin hreinsuð úr og því svo bætt út í pottinn. Til að fá bragðsterkari kartöflumús er hægt að saxa chili smátt. Límónusafa bætt út í pottinn. Suðan látin koma upp og soðið í 15-20 mínútur eða þar til að kartöflurnar eru orðnar mjúkar. Vatninu helt af og chili (ef það er í heilu) fjarlægt. Kartöflurnar stappaðar fínt með smjöri og bragðbættar með salti, pipar og jafnvel meiri límónusafa. Til að skerpa á hitanum á sætkartöflumúsinni er hún sett í pott og hituð upp við meðalhita, hrært í á meðan.

Þorskur með pistasíusalsa:

ca 600 gr þorskhnakkar eða þorskflök
salt og pipar
3-4 msk pistasíuhnetur, saxaðar (má líka nota furuhnetur)
3 msk sítrónusafi og rifið hýði af 1/2 sítrónu
1 msk olífuolía
ca 1 dl fersk steinselja, söxuð
1/4 – 1/2 rautt chili, fræhreinsað og fínsaxað

Ofninn hitaður í 220 gráður. Þorskflökin skorin í bita og þeim raðað í smurt eldfast form. Kryddað með salti og pipar. Því næst er blandað saman í skál: pistsíuhnetum, sítrónusafa, sítrónuhýði, steinselju, chili og ólífuolíu. Blöndunni er dreift yfir fiskinn. Bakað í miðjum ofni við 220 gráður í ca 12-15 mínútur eða þar til fiskurinn er fulleldaður. Gætið þess að ofelda hann ekki.

Sojasmjörsósa

3 msk smjör
1 skarlottulaukur (hægt að nota 1/2 rauðlauk), saxaður fínt
1 hvítlauksrif, saxað fínt
1 tsk rautt chili, saxað fínt
2-3 msk sojasósa
1 msk steinselja, söxuð smátt

Smjör brætt í potti og látið krauma við fremur vægan hita í ca 15 mínútur þannig að smjörið verði brúnt. Froðan veidd af smjörinu. Lauk, hvítlauk, sojasósu, chili og steinselju blandað saman í skál og blandað út í smjörið rétt áður en sósan er borin fram. Njótið gjarnan með góðu hvítvínsglasi!

Sævar Már Sveinsson vínþjónn mælir með franska hvítvíninu Arthur Metz Pinot Gris. Lýsing: Roðagult. Meðalfylling, hálfþurrt, mild sýra. Hýði, reykur.

Ofnbakaður skötuselur í karrí-mangósósu með kúskús

Birt þann 22.8.2012 af Eldhússögur

Í gær var Fiskbúð Hólmgeirs með tilboð á skötusel, þeim ófagra en ljúffenga fisk! Þrátt fyrir að skötuselurinn sé almennt ekkert ódýr (frekar en annar fiskur hér á landi) þá er hann stundum kallaður humar fátæka mannsins enda afar þéttur og bragðgóður fiskur. Þessi uppskrift er einkar fljótleg en feykilega góð. Ég velti svolítið fyrir mér bökunartímanum en í flestum skötuselsuppskriftum er gefinn upp 10 mínútna bökunartími í ofni. Mér fannst það frekar stuttur tími, sérstaklega fyrir þykkustu bitana. Vissulega er mjög mikilvægt að ofelda ekki skötusel sem og aðra fiska, þá verður hann seigur. En sama gildir ef hann er ekki nægilega eldaður, ef hann er hrár þá er hann líka seigur og óspennandi. Bitarnir voru frekar þykkir og ég endaði á að hafa fiskinn í ofninum í 17 mínútur (eftir að hafa kíkt á fiskinn öðru hvoru) og það passaði fínt. Það er líka gott að sjá til þess að kaupa svipuð stór stykki af fisknum til þess að þau þurfi öll jafn langan eldurnartíma. Það er hægt að kaupa hvaða ,,currypaste“ sem er og hvaða mango chutney sem er, fer bara eftir smekk viðkomandi. Ég notaði milt karrýmauk en sterkt mango chutney í þessa uppskrift og okkur fannst það koma mjög vel út.

Uppskrift:

800 gr. skötuselur
nokkrar gulrætur, skornar í litla bita
1/2 kúrbítur, skorinn í litla bita
3 msk. karrímauk (curry paste)
3 msk. mangó-chutney
2 msk. ferskt kóríander
1 stór hvítlauksgeiri
grænmetiskraftur (ég muldi einn tening út í)
1 peli rjómi (hægt að skipta út fyrir kókosmjólk)
olía
salt og pipar

Aðferð:

Hitið ofninn í 200 gráður. Hreinsið skötuselinn (hann kemur oftast hreinsaður úr fiskbúðum) og skerið í jafna bita. Skerið grænmetið í bita. Hrærið saman karrýmauki og mango chutney og saxið kóriander út í maukið. Afhýðið hvítlauk, saxið smátt og bætið út í maukið ásamt grænmetiskrafti og rjóma. Hitið olíu á pönnu og steikið skötuselinn í um 1 mínútu á hvorri hlið á vel heitri pönnunni. Kryddið með salti og pipar.

Raðið skötuselnum í smurt eldfast mót, stráið kúrbít og gulrótunum yfir og hellið svo maukinu yfir allt saman. Bakið í 10-17 mínútur við 200 gráður (fer eftir þykkt skötuselsins).