Kjúklingapottréttur með karrí


Kjúklingapottréttur með karrí

Um daginn hitti ég frábæru vinkonur mínar í „sænska saumaklúbbnum“ – við erum reyndar alíslenskar en kynntumst hins vegar í Stokkhólmi. Ein þeirra var með lítið veski sem ég kolféll fyrir. Ég var ekki í rónni fyrr en ég eignaðist samskonar veski og það er ekki oft sem slíkt gerist, ég er nefnilega hvorki sérstaklega kaupglöð né tískumeðvituð! 🙂 Veskið er ekki bara ofboðslega fallegt heldur ákaflega praktískt. Það geymir, auk korta og peninga, Iphone símann. Samt er það einungis á stærð við lítið peningaveski. Ég settist sama kvöld við tölvuna og pantaði eitt slíkt veski frá Bandaríkjunum. Næstu daga vantaði mig tilfinnanlega mikið þetta veski, ég skildi hreinlega ekkert í því hvernig ég hafði komist af án þess fram að þessu! Skyndilega lá það í augum uppi að sameinað seðla- og símaveski var hverri konu lífsnauðsynlegt! Ég er svo lánsöm að eiga dásamlega vinkonu sem býr í Bandaríkjunum. Hún gat tekið á móti veskinu mínu og komið því til mín. Ég bíð reyndar alltaf eftir því að téð vinkona mín byrji að matarblogga sjálf, hún er nefnilega ekki bara einstaklega skemmtilegur penni heldur líka frábær kokkur. Henni hefur brugðið fyrir í blogginu mínu hér og hér. Í dag barst mér veskið mitt í hendur en það var ekki nóg með það, Ragga vinkona sendi mér frábær áhöld í eldhúsið, alltaf svo hugulsöm þessi elska! 🙂

Ég fékk þessa frábæru töng! Ef þið hafið ekki notað tangir enn í eldhúsinu þá eruð þið að missa af miklu, þær eru svo góð áhöld til að nota við steikingar. Ég átti bara eina töng fyrir sem var orðin léleg þannig að þessi var kærkomin viðbót.

OXO töng

Svo fékk ég þessa stórsniðugu könnu undir salatdressingu. Í henni er sveif sem blandar saman dressingunni. Það er allt svo sniðugt í henni Ameríkunni! 🙂 Takk elsku Ragga mín!

Chefn emulstir

Hér er svo veskið mitt dásamlega! Ég var með smá valkvíða varðandi litinn. Kristín vinkona hafði keypt sér ofsalega fallegt kóralrautt veski, en það var uppselt. Mig langaði ekki í svart og var næstum því búin að kaupa mér fallega turkish blátt. En svo sá ég þetta silfurlitaða og fannst það æðislegt, passar við allt en er samt meira spennandi en svart.

Marc Jacobs

Marc Jacobs

En ef ég vík að uppskrift dagsins þá útbjó ég einfaldan en ákaflega góðan kjúklingarétt í gær sem mig langar að deila með ykkur. Kjúklingur í karrísósu klikkar jú aldrei en hér er sojasósu og appelsínusafa bætt við sem gefur sósunni einstaklega gott bragð.

IMG_0323

Uppskrift:

  • 600 g kjúklingabringur eða kjúklingalundir
  • 2 paprikur, skornar í bita
  • 1-2 gulir laukar, skorinn í þunnar sneiðar
  • 2 hvítlauksrif, söxuð smátt eða pressuð
  • ca. 150 g sveppir, niðurskornir
  • smjör til steikingar
  • 3 msk karrí
  • 1 msk paprikukrydd
  • 4 dl rjómi eða matreiðslurjómi
  • 2 dl sýrður rjómi
  • 2 msk ferskur appelsínusafi (ég notaði safa úr appelsínu)
  • 2 msk sojasósa
  • salt & pipar

Kjúklingurinn er skorin í bita og steiktur upp úr smjöri á pönnu þar til að kjúklingurinn er steiktur á öllum hliðum. Papriku, lauk, sveppum, hvítlauk, karrí og paprikukryddi er bætt út á pönnuna og steikt í nokkrar mínútur til viðbótar. Þá er rjóma, sýrðum rjóma, appelsínusafa, sojasósu, pipar og salti (sojasósan er sölt, farið varlega með saltið) bætt út í. Látið malla í nokkrar mínútur til viðbótar. Borið fram með hrísgrjónum og fersku salati.

IMG_0327

Heilsteiktur kjúklingur með karrí- og eplasósu


IMG_0194Ég er smátt og smátt að fara í gegnum gömlu uppskriftabókina mína og færa uppskriftirnar þaðan yfir á þetta blogg. Þennan kjúklingarétt eldaði ég fyrir nokkuð löngu síðan en gleymdi að setja hann inn á bloggið þá. Ég hef ekki eldað þennan kjúklingarétt oft eftir að við fluttum til Íslands en þegar við bjuggum úti í Svíþjóð eldaði ég hann reglulega. Heilir kjúklingar eru ákaflega ódýrir í Svíþjóð og ég notaði hann því mikið. Hér eru reyndar heilir kjúklingar á frekar góðu verði líka, ég ætti því eiginlega að vera duglegri að elda úr heilum kjúklingi. Auk þess fær maður bringur, leggi og læri sem hentar mjög vel fyrir stóra fjölskyldu, krakkarnir vilja leggi, mér finnst lærin best og öðrum líkar best við bringurnar. Mér finnst sósan passa rosalega vel með kjúklingum. Þessi blanda, karrí, epli og ananas fer svo vel saman. Ég elda kjúkling mjög oft í steikarpokum, mér finnst hann verða svo safaríkur og meyr við það. Hins vegar er talað um að pensla kjúklinginn reglulega með mareneringu í þessari uppskrift og þá er ekki hægt að nota steikarpoka, betra að nota steikarpott. Ég sleppti reyndar að þessu sinni mareneringunni, kryddaði kjúklinginn vel með kjúklingakryddi og steikti í steikarpoka. Marineringin er samt rosalega góð, mæli með henni.

IMG_0166 Uppskrift:

  • 1 kjúklingur
  • salt og pipar
  • 1 msk olía
  • 30 g smör, brætt
  • 1 msk hunang
  • 1 msk soja
  • 1 gulur laukur, skorinn í bita
  • 2 epli, afhýdd og skorin í bita
  • 5 ananashringir, skornir í bita
  • 5 dl kjúklingasoð (gerður úr kjúklingakrafti og sjóðandi vatni)
  • 1,5 tsk karrí
  • 1 tsk kartöflumjöl eða maísenamjöl (hægt að sleppa)
  • salt og pipar
  • 2 msk smjör

IMG_0203

Ofinn settur á 200 gráður. Kjúklingurinn saltaður og pipraður. Smjöri, hunangi og sojasósu blandað saman og kjúklingurinn smurður með blöndunni. Kjúklingurinn lagður í eldfast mót og grillaður í ofni í 50-60 mínútur við 200 gráður, fer eftir stærð. Kjúklingurinn smurður reglulega með mareneringunni á meðan. Laukur, epli og ananas steiktur í smjöri í stutta stund án þess að það taki lit, þá er karrí stráð yfir og steikt í 1 mínútu til viðbótar. Kjúklingakraftinum hellt út í, suðan látin koma upp og kartöflumjöli eða maísenamjöli bætt út í til að þykkja sósuna (ath. sósan er gerð úr kjúklingakrafti og verður alltaf fremur þunn). Sósan látin malla í nokkrar mínútur, í lokin er smjöri bætt út í sósan smökkuð til með salti og pipar. Kjúklingurinn og sósan borin fram með hrísgrjónum.

IMG_0167