Ég útbjó einfaldan en ákaflega góðan kjúklingarétt í gær sem mig langar að deila með ykkur. Kjúklingur í karrísósu klikkar jú aldrei en hér er sojasósu og appelsínusafa bætt við sem gefur sósunni einstaklega gott bragð.
Uppskrift:
- 600 g kjúklingabringur eða kjúklingalundir
- 2 paprikur, skornar í bita
- 1-2 gulir laukar, skorinn í þunnar sneiðar
- 2 hvítlauksrif, söxuð smátt eða pressuð
- ca. 150 g sveppir, niðurskornir
- smjör til steikingar
- 3 msk karrí
- 1 msk paprikukrydd
- 4 dl rjómi eða matreiðslurjómi
- 2 dl sýrður rjómi
- 2 msk ferskur appelsínusafi (ég notaði safa úr appelsínu)
- 2 msk sojasósa
- salt & pipar
Kjúklingurinn er skorin í bita og steiktur upp úr smjöri á pönnu þar til að kjúklingurinn er steiktur á öllum hliðum. Papriku, lauk, sveppum, hvítlauk, karrí og paprikukryddi er bætt út á pönnuna og steikt í nokkrar mínútur til viðbótar. Þá er rjóma, sýrðum rjóma, appelsínusafa, sojasósu, pipar og salti (sojasósan er sölt, farið varlega með saltið) bætt út í. Látið malla í nokkrar mínútur til viðbótar. Borið fram með hrísgrjónum og fersku salati.
Eldhússögur 
Snilldar veski! 🙂 Hvaðan er það pantað? Er næstum viss um að það sé mér lífsnauðsynlegt að eignast svona…..
Helena, ég er sannfærð um að þig vantar þetta veski – allar konur vantar þetta veski! 😉 Ég pantaði það hjá Nordstrom, þeir senda meira að segja beint til Íslands! http://shop.nordstrom.com/sr?origin=keywordsearch&contextualcategoryid=2375500&keyword=Classic+Q+Phone+Wallet 🙂
Snilld! Takk fyrir þetta. Ég er alltaf í veseni með þetta síma/veskja dæmi. Þetta myndi sennilega leysa þann stórkostlega vanda 😉
Svo er kjúllinn alveg ómótstæðilega girnilegur… 🙂
Takk fyrir það! 🙂 Já ég er sko sannfærð um að veskið leysir þann vanda og eflaust flestan vanda sem við glímum við yfir höfuð – ný veski geti haft þannig áhrif á konur! 😉
Sæl.
Eins og alltaf hjá þér dásamlega gómsætt og ég ætla að prófa en smá spurningar hver er munurinn á gulum lauk og venjulegum? Mér sýnast vera sveppir í þessum rétt er það bara rugl í mér eða má setja þá með?
Hlakka mikið til að smakka.
Kveðja Sigríður
Sæl Sigríður.
Ég kalla venjulegan lauk gulan lauk – svona til aðgreiningar frá rauðlauk! 🙂 En þú hefur rétt fyrir þér, það eru sveppir í réttinum! Ég man það núna að ég ákvað að meðan ég var að elda að bæta við sveppum en gleymdi að skrifa það hjá mér. Ég er búin að bæta þeim inn í uppskriftina núna! 🙂
Töngin sem þú sýnir er hún frá Jamie Oliver?
Sæl Heiða. Þessi töng er frá OXO, ég er nokkuð viss um að ég hafi séð hana í ýmsum búsáhaldaverslunum hér á landi. http://www.heimkaup.is/OXO-tong-nylon-23-cm
heppna ég að sjá þennan póst 🙂 Vantar nýtt peningaveski og á leið til Amerkíku…………..ætla svo sannarlega að skella mér í Nordström og kaupa eins og eitt 🙂
Frábært Kristín! Gangi þér vel að velja lit! 🙂
takk, hlakka nú bara til 🙂
Annars er bloggið þitt frábært, hef oft nýtt mér uppskriftir frá þér og hver og ein slegið í gegn hér á heimilinu
Takk fyrir að bjóða okkur upp á þetta fína blogg 🙂
En hvað það var skemmtilegt að heyra, kærar þakkir fyrir góða kveðju! 🙂
Hæ getur þú sagt mér hvað svona veski kostar hingað komið????
Því miður veit ég það ekki þar sem að vinkona mín keypti veskið fyrir mig og kom með hingað til lands.
Ok takk. Geðveikt veski. Veistu hvort ég fæ þetta á norðurlöndunum t.d. Noregi???
Oh, já – ég elska þetta veski! Mig langar í mikið fleiri liti. Þegar ég var að skoða þessi veski á netinu þá gat ég ekki fundið þau á Norðurlöndunum, allavega ekki á neinum vefsíðum. En þú gætir líka kíkt á Ebay, kannski hægt að fá þau eithvað ódýrari og sent hingað heim.
Æ takk fyrir þetta. Flott síða hjá þér.
Sæl, mig langar til að prófa þennan rétt í kvöld en ætla að sleppa kjúklingnum er nefninlega grænmetisæta 🙂 er eitthvað sérstakt grænmeti sem þú gætir hugsað þér að bæta við sem er ekki í uppskriftinni og hvort þú notar þessa klassísku söltuðu soja sósu ?
Kv. Bjarni
Sæll Bjarni. Ég myndi nota sætar kartöflur, blómkál og brokkolí, allavega eitthvað af þessu þrennu, jafnvel allt. Ég hef ekki notað Kikkoman sojasósu því mér finnst hún alltof sölt, reyni að nota aðrar tegundir.