Stökkir Marsmolar


IMG_6182

Þá er fallega jólatréð okkar í garðinum loksins farið að skína! Elsku maðurinn minn sýndi aðdáunarverða stillingu þegar hann fór með seríuna þrisvar í viðgerð, fór þrjár ferðir til að kaupa fleiri og fleiri perur og setti seríuna einu sinni í tréð en þurfti að taka hana niður aftur þegar hún virkaði ekki! Eftir þriggja vikna basl fram og tilbaka fékk hann loks nýja seríu sem er komin í tréð og verður líklega ekki tekin niður á milli jóla héðan í frá! 😉

IMG_6217

Elfar, sem er nýbúinn að eignast Iphone, skjalfesti ferlið vel og vandlega! Þeir sem fylgjast með honum á Instagram fengu þetta beint í æð allan daginn! 🙂

Tré

Ég hef eytt öllum mínum tíma í ritgerðina undanfarið og hef engan tíma haft til að njóta aðventunnar almennilega finnst mér. Mér tókst núna um helgina að senda frá mér tæplega 27 þúsund orð til leiðbeinandans sem þýðir að ef að hún er sátt þá á ég ekki langt í land! 🙂 Ég leyfði mér af því tilefni að búa til dálítið jólanammi. Þetta er klárlega stysta uppskriftin sem ég hef sett hér inn! Þá meina ég bæði að í uppskriftinni eru fá hráefni og hún er afar fljótleg að útbúa. En þetta er mögulega líka ein bragðbesta uppskriftin á blogginu! Enda getur það varla klikkað þegar maður tekur súkkulaðistykki og bætir við það meira gúmmelaði! 🙂 Næst ætla ég að prófa að nota Snickers, það er örugglega hrikalega gott! Þetta eru sjúklega góðir bitar, þið verðið bara að prófa.

IMG_6189

Uppskrift:

  • 4 mars
  • 90 gr smjör
  • 60 gr Rice Krispies

Smjör og Mars brætt saman í potti við vægan hita þar til það er bráðnað saman. Þá er potturinn tekinn af hellunni og Rice Krispies bætt út í. Því næst eru mótaði litlir molar með skeið (ég lagði þá í skeiðina og mótaði þá aðeins til með fingrunum líka) og þeir lagðir á bökunarpappír. Molarnir látnir kólna. Molana þarf ekki að setja í kæli, þeir harðna og verða stökkir og góðir við stofuhita.

IMG_6179

Sörur


Sörur

Helginni höfum við eytt í jólaundirbúning. Í gær voru piparkökur skreyttar í skólanum hjá krökkunum og laufabrauð skorin út. Síðan skottuðumst við mæðgur (sú yngri, eldri dóttirinn er föst í próflestri) út í skúr og sóttum jóladótið og erum búnar að dunda okkur við að setja það upp. Eitt af uppáhalds jólaskrautinu okkar er litla jólatréið hér að neðan. Í rauninni er þetta dagatal, fyrir neðan tréið eru 24 litlar skúffur með jólaskrauti, eitt fyrir hvern dag. Í því er líka spiladós og þá snýst tréið í hringi. Krökkunum finnst þetta jólatré svo fallegt og ævintýralegt. Elfar kom heim frá Barcelona síðastliðna nótt og gerði í dag enn eina tilraunina við útiseríuna sem nú var búið var að gera við. Hann var búinn að koma henni vel fyrir í tréinu þegar það slökknaði á henni við litlar vinsældir. Það kallaði því á fjórðu ferðina í búðina (þetta var ný sería!) auk þess sem tveir dagar hafa farið í vaskinn við þetta seríustúss! Það er sannarlega mikið á sig lagt við jólaundirbúninginn! 🙂

Sörur

Á meðan Elfar eyddi deginum við seríubasl fór ég ég sörugerð. Þessar sörur eru eins og sörur eiga að vera að mínu mati! 🙂 Mér finnst sörur nefnilega svo ofsalega misjafnar, sumar sörur finnst mér alls ekki góðar. En þessar eru algjört nammi! Botninn er stökkur og loftkenndur (ekki flatur), kremið bragðgott með engu yfirgnæfandi kaffibragði og súkkulaðihjúpurinn þykkur og góður! Ég fer alltaf ákaflega vel út úr sörubakstrinum fyrir hver jól. Mamma nefnilega undirbýr botna og kremið en svo mætum við Inga frænka bara á staðinn og setjum saman sörurnar! Í dag gerðum við 350 gómsætar kökur. Best er að nota Dökkan hjúp, sem eru hjúpdropar frá Nóa og Siríus. Kökurnar fá þá svo fallegan glansandi hjúp.

Sörur

Uppskrift (ca. 60 kökur)

  • 3 eggjahvítur
  • 200 gr. flórsykur
  • 200 gr. fínakkaðar möndlur (heilar hýðislausar möndlur hakkaðar fínt í kvörn)

Eggjahvítur stífþeyttar. Flórsykurinn sigtaður yfir og hrært varlega saman við með sleikju ásamt möndlunum. Sett á plötu, klædda bökunarpappír, með tveimur teskeiðum og bakað við 200°C í ca.10 – 15 mín. (Blástur 175°C í ca. 12 mín – ég nota ekki blástur).

Sörur

Sörukrem:

  • ¾ dl. sykur
  • ¾ dl vatn
  • 3 eggjarauður
  • 150 gr. smjör, mjúkt
  • 1 msk. kakó
  • 1 tsk. kaffiduft (instant kaffi)

Sykur og vatn sett í pott og soðið saman í síróp, það tekur u.þ.b. 8 -10 mín. Nauðsynlegt er að hafa góðan hita. Tilbúið þegar fer að freyða. Eggjarauðurnar eru þeyttar þar til þær eru kremgular og þykkar. Hellið sírópinu úr pottinum í mjórri bunu út í, þeytið á meðan þar til blandan er orðin létt og loftmikil. Látið kólna. Mjúka smjörinu þá bætt út í, þeytt á meðan. Að lokum er kakói og kaffidufti sigtað út í (instant kaffi er gróft, því er gott að mylja það í gegnum sigtið með skeið, einnig er hægt að mylja það í morteli áður en það er sigtað). Kremið kælt í ísskáp.

Súkkulaðihjúpur N__a_D__kkur_Hj__4ed6b2411dd66

  • ca 1½ poki Dökkur hjúpur (hjúpdropar) frá Nóa og Siríus

Brætt í örbylgjuofni.

Sörur

Kreminu er smurt á botninn á kökunum, frekar þykkt lag. Þá eru kökurnar kældar með kreminu á í smá stund. Því næst er kremhlutanum dýft ofan í brædda súkkulaðihjúpinn og hjúpnum leyft að stífna. Það þarf kannski að hita súkkulaðihjúpinn aftur í örbylgjuofninum á meðan dýfingunum stendur ef hann verður of stífur. Þegar hjúpurinn hefur stífnað á kökunum er best að raða þeim í box með góðu loki, með t.d. bökunarpappír á milli. Það þarf að geyma sörurnar í frysti og bera þær fram beint úr frystinum, þær þiðna mjög fljótt.

SörurSörur

Hafraklattar


Þessir hafraklattar eru ofsalega góðir og ef maður einbeitir sér eingöngu að haframjölinu í uppskriftinni er jafnvel hægt að ímynda sér að þeir séu bráðhollir! Það er mikilvægt að baka klattana ekki of lengi. Ekki láta ykkur bregða þó þeir séu enn dúnmjúkir eftir baksturinn. Leyfið þeim að kólna og þá dökkna þeir aðeins og harðna en verða samt enn lungnamjúkir að innan. Jóhanna Inga beið spennt eftir að myndartökunni lyki (börnin eru farin að spyrja alltaf núna: ,,ertu búin að taka mynd, megum við borða?“ 😉 ) og hámaði svo í sig hafraklatta á mettíma!

Uppskrift:

  • 500 gr smjör (lint)
  • 100 gr sykur/hrásykur
  • 300 gr púðursykur
  • 4 tsk vanillusykur
  • 4 egg
  • 350 gr hveiti/spelt
  • 2 tsk matarsódi
  • 1 tsk salt
  • 1 tsk kanill
  • 550 gr haframjöl
  • 100 gr. smátt skorið suðusúkkulaði (má auka, minnka eða sleppa)
  • 1 bolli rúsínur (má auka, minnka, sleppa)

Aðferð:

Smjör, sykur og púðursykur þeytt þar til létt og ljóst. Eggjum bætt út í einu og einu í senn ásamt vanillusykri. Þurrefnum bætt út í, hveiti, matarsóda, salti og kanil, og í lokin er haframjöli, rúsínum og súkkulaði bætt við.

Á þessu stigi er deigið mjög blautt. Búið til kúlur í höndunum, ca. á stærð við tómata/plómur, setjið á plötu og fletjið lítillega út. Ég næ um það bil 9 stykkjum á plötu. Athugið að klattarnir stækka í ofninum.

Bakað í miðjum ofni við 200° í  ca 8-10 mínútur. Mikilvægt að baka ekki klattana of lengi, þeir eiga rétt að vera ljósbrúnir. Úr þessari uppskrift fékk ég ca. 30 klatta.