Rabarbarapæ með stökkum hjúpi úr brúnuðu smjöri

IMG_4000

Síðastliðin tvö sumur höfum við farið í fremur langar utanlandsferðir en nú í sumar höfum við verið heima og notið þess afar vel. Sumrin á Íslandi eru svo stutt en svo dásamlega björt og falleg að í raun ætti maður bara að fara til útlanda á veturna. Yngsta barnið okkar fór hins vegar í ferðalag og það ekkert lítið ferðalag. Hún fór til Colombus í Bandaríkjunum í sumarbúðir barna og var þar í heilan mánuð, 11 ára gömul! Þegar hún orðaði þetta við mig fyrst fyrir tæpu ári síðan, þá hefði hún allt eins getað spurt hvort hún mætti fara til tungslins, svo fráleitt fannst mér að hún færi án okkar til útlanda svona lengi og svona ung. En þegar ég fór að kynna mér starfsemi CISV þá gat ég ekki annað en hrifist af hugmyndafræðinni. Allir sem höfðu farið í slíkar búðir, sem ég heyrði og las um, sögðu þetta vera það magnaðasta sem þau hefðu gert á ævinni. Ég ákvað að láta ekki mína hræðslu standa í vegi fyrir ævintýragirni dóttur minnar og úr varð að hún fór í þetta frábæra ferðalag.

heimkoma

Komin heim!

Markmið CISC er að stuðla að friði og réttlæti í heiminum í gegnum vinskap og samstarf ólíkra menningarbrota, óháð pólitískum eða trúarlegum skoðunum. Það er hugsun á bakvið að börnin séu 11 ára í þessum búðum því þá eru þau nógu þroskuð til þess að taka á móti þessum boðskap en ennþá það mikil börn að þau eru tilbúin að taka þátt í leikjunum sem búðirnar eru byggðar upp á og þetta er líka sá aldur sem börn mynda lífslangan vinskap á. Ég heyrði hér um bil ekkert í Jóhönnu í heilan mánuð og var því spennt að vita hvernig hún hefði upplifað búðirnar. Þegar hún loksins kom heim spurði ég hana hvort þetta hefði verið skemmtilegra eða leiðinlegra en hún hefði gert ráð fyrir. Hún svaraði að dvölin hefði verið miklu skemmtilegri en hún hélt; „ég lærði svo miklu meira um að vera þakklát, hugsa um aðra og verða betri manneskja” :). Hún eignaðist bestu vinkonur frá Indónesíu, Portugal, Costa Rica, Bandaríkjunum og löndum um allan heim og er ákveðin í því að halda áfram í samtökunum. Samtímis því sem hún var í Bandaríkjunum voru CISV sumarbúðir haldnar hér á landi með aðsetur í Mýrhúsaskóla. Ég fór nokkrum sinnum þangað í sjálfboðaliðavinnu í eldhúsið og gat þá fengið innsýn í hvað Jóhanna var að upplifa í sínum sumarbúðum. Ein helgi er svokölluð ”homestay” helgi. Þá fara börnin heim til fjölskyldu og við fengum til okkar þrjár yndislegar 11 ára stelpur frá Brasilíu, Ítalíu og Egyptalandi eina helgi. Við skemmtum okkur vel með þeim þessa helgi, sýndum þeim Reykjavík og mynduðum Facebook-tengsl við fjölskyldur þeirra í Kairo, Sao Paolo og Ferrara. Vinskapurinn sem myndaðist þesssa helgi kristallar einmitt markmið samtakanna svo vel.

cisv

Þar sem ég stóð í eldhúsinu í Mýrhúsaskóla einn daginn, í bongóblíðu, og bjó til súpu í kvöldmatinn fyrir börnin sem voru í sumarbúðum hér fór ég að hugsa um hversu gaman það væri að geta boðið þeim upp á almennilega íslenska grillveislu. Ég sá það nú strax í hendi mér að það myndi duga skammt að dröslast með grillið mitt á staðinn enda voru þetta 70 manns með fararstjórum og búðarteymi. Búðirnar eru reknar í sjálfboðaliðavinnu með lágmarksrekstrarfé. Í bríeríi ákvað ég því að senda Tomma hjá Hamborgarabúllunni tölvupóst, segja honum frá þessum frábæru samtökum og yndislegu börnum sem væru hér stödd allsstaðar að úr heiminum og spyrja hvort hann gæti hugsað sér að koma með grillvagninn sinn og bjóða þeim upp á hamborgaraveislu. Ég bjóst ekkert endilega við svari, enda þekki ég Tomma ekki neitt og þetta var fremur frökk bón, að biðja um ókeypis hamborgaraveislu fyrir 70 manns. Ég fékk hins vegar svar um hæl, ”Ekkert mál, hvenær hentar að við komum?”!! Algjörlega mögnuð viðbrögð og svo frábært að til sé fólk sem er tilbúið að gefa svona af sér án þess að vænta nokkurs tilbaka. Hamborgarabúllan mætti á staðinn í bongóblíðu á ”galadegi” búðanna og bauð upp á ógleymanlega grillveislu. Frábær minning og upplifun fyrir börnin sem dvöldu hér á Íslandi. Takk Tommi og Búllan!!

búllan

En svo ég snúi mér að uppskrift dagsins. Ég komst að því mér til mikillar ánægju að ég er með rabarbara í nýja garðinum mínum. Ég fann á sænskum uppskriftavef uppskrift að spennandi rabarbaraböku með brúnuðu smjöri. Brúnað smjör er svo svakalega gott, það kemur svo góður karamellu/hnetukeimur að smjörinu þegar það er brúnað. Ég var því spennt að prófa þessa uppskrift og hún sló algerlega í gegn hér heima. Stökkur hjúpur með karamellukeimi á móti súrum rabarbaranum var frábærlega gott. Það væri hægt að velta rabarbaranum upp úr smá sykri, jafnvel kanelsykri en okkur fannst gott að hafa hann dálítið súran á móti stökka og sæta hjúpnum.

IMG_3990
Uppskrift: 

  • 500 g rabarbari, skorin í bita
  • 150 g smjör
  • 1 1/2 dl haframjöl
  • 1 1/2 dl sykur
  • 1 1/2 dl hveiti
  • 1/2 tsk lyftiduft
  • 1/2 dl ljóst síróp 
  • 2 msk mjólk
  • örlítið salt

IMG_3988IMG_3989

Ofn hitaður í 175 gráður við blástur. Rabarbarinn skorinn í bita og honum dreift í smurt eldfast mót. Smjörið sett í pott og brætt við fremur háan hita þar til það byrjar að malla vel, þá er fylgst vel með smjörinu, jafnvel aðeins lækkað undir því ef með þarf. Eftir 2-3 mínútur verður það gullinbrúnt með hnetuilmi. Þá er potturinn tekinn af hellunni, mesta froðan veidd af og brúnaða smjörinu hellt í skál, ekki með botnfallinu. Því næst er haframjöli, sykri, hveiti, lyftidufti, sírópi, mjólk og salti bætt út í og allt hrært saman. Þessu er dreift yfir rabarbarann og bakað við 175 gráður í um það bil 45 mínútur. Borið fram með þeyttum rjóma eða ís.

IMG_3996IMG_3995

Rabarbarabaka með jarðarberjum og hvítu súkkulaði

Rabarbarabaka með jarðaberjum og hvítum súkkulaðiMér finnst alltaf dálítið skrítið og óþægilegt að skrifa lýsingar við uppskriftirnar sem ég set hér inn á síðuna. Að skrifa um mat, sem ég hef sjálf útbúið, eitthvað í líkingu við „dásamlega gott og besti réttur í heimi“ hljómar eins og mann skorti alla hógværð og sé í meira lagi sjálfumglaður! 🙂 Ég er nefnilega meira týpan í ætt við ömmur þessa lands, þar sem þær standa við matarborðið og segja: „Æ, þetta er nú nauðaómerkilegt, vonandi getið þið borðað eitthvað af þessu“. Hins vegar finn ég það sjálf þegar ég skoða matarblogg að ég vil fá álit á uppskriftunum. Þegar ég sé uppskrift á bloggi sem ekkert er skrifað um, bara „hér kemur uppskrift að… “ þá dæmi ég ósjálfrátt uppskriftina ekkert sérstaka. Að þessu sögðu þá kynni ég til leiks langbesta rabarbarapæ sem ég hef smakkað hingað til! 😉 Ég ákvað sem sagt að gera rabarbaraböku en þar sem hún verður stundum heldur til súr lagði ég höfuðið í bleyti, hvað gæti vegið upp á móti því? Jarðarber voru augljóst svar, svo sæt og góð. Mér finnst hvítt súkkulaði passa einstaklega vel við heita berja- og ávaxtarétti og ákvað að prófa það með. Mylsnan ofan á er klassísk en svo ótrúlega góð. Ég bauð stórfjölskyldunni upp á þessa böku um síðustu helgi og hún var kláruð upp til agna í einni svipan með þeim orðum að þetta væri besta rabarbarabakan sem þau hefðu smakkað … það er sem sagt ekki bara ég sem er að slá um mig! 🙂

IMG_6242

Uppskrift: 

  • 5-600 g rabarbari, skorinn í bita
  • 250 g jarðarber, helst fersk, skorin í sneiðar
  • 2/3 dl sykur
  • 2 msk maísmjöl
  • 100 g Siríus hvítir súkkulaðidropar (þ.e 2/3 úr pokanum)
  • 2 dl Kornax hveiti
  • 1 dl púðursykur
  • 1 dl sykur
  • 2 dl haframjöl
  • 110 g smjör (kalt)

Ofn hitaður í 180 gráður við undir- og yfirhita. Rabarbara, jarðarberjum, maísmjöli og 3/4 dl sykri er blandað saman og sett í eldfast mót. Hvítu súkkulaðidropunum er því næst dreift yfir.

Hveiti, púðursykur, sykur, haframjöl og smjör er mulið saman í höndunum þar til að blandan minnir á haframjöl. Þá er blöndunni dreift yfir berin og rabarbarann. Bakað við 180 gráður í 35-40 mínútur eða þar til toppurinn er orðin gullinbrún og berjablandan farin að „bubbla“ upp um hliðar formsins. Borið fram heitt með þeyttum rjóma eða vanilluís.

IMG_6214IMG_6224

Rabarbara- og perubaka með stökkum hafrahjúpi

Rabarbara- og perubaka með stökkri mylsnu

Ég er afar veik fyrir pæjum eða bökum eins og þau kallast á íslensku. Svíar eru mikið bökufólk, það eru alltaf til góðar bökur á kaffihúsunum þar í landi, til dæmis eplabökur og hindberjabökur. Það tók mig nokkur ár að taka í sátt að Svíar bera alltaf fram vanillusósu með bökunum (og eplakökum) en núna finnst mér vanillusósan óskaplega góð – sem minnir mig á að ég þarf að setja inn hingað uppskrift af slíkri sósu! Ég hef sett inn hingað á síðuna nokkrar góðar bökuuppskriftir. Til dæmis þessa uppskrift af kryddaðri eplaböku með hnetum, hún er ákaflega einföld og dásamlega gómsæt:

Krydduð eplabakaKrydduð eplabaka 

Ef þið hafið ekki enn prófað Key lime bökuna þá eruð þið að missa af miklu, hún er hnossgæti!

Key lime bakaKey lime baka

Þessi epla- og hindberjabaka er mjög fljótleg og yndislega góð.

Epla- og hindberjabaka

Epla- og hindberjabaka

Banana-karamellubakan er ein af mínum uppáhalds, ég mæli sannarlega með þessari dásemd

Banana-karamellukaka

Banana-karamellubaka

Að síðustu verð ég að nefna góðu berjabökuna hennar Jóhönnu Ingu, hún er ljúfmeti!Berjabaka

Berjabaka

Að þessu sinni ætla ég að setja inn uppskrift af feykigóðri rabarbaraböku með perum. Mér finnst voðalega gott að setja eitthvað sætt með í rabarbarabökurnar, það gefur svo gott jafnvægi við súran rabarbarann. Stundum set ég hindber með en að þessu sinni notaði ég perur, það kom ofsalega vel út. Ef þið eruð hrifin af hvítu súkkulaði þá er sannarlega ekki verra að strá yfir rabarbarabökuna dálítið af hvítum súkkulaðidropum. Hafrahjúpurinn ofan á bökunni er meðal annars með púðursykri og sírópi sem gefur henni stökka áferð og karamellukennt bragð – ljúffengt!

IMG_1944

Uppskrift:

  • 500 g rabarbari, skorinn í bita
  • 2 stórar perur, afhýddar og skornar í bita
  • 1 msk kartöflumjöl
  • 1 dl sykur + 1 msk
  • 1 dl púðursykur
  • 2 dl haframjöl
  • 2 dl hveiti
  • 1/2 tsk lyftiduft
  • 1/2 tsk vanillusykur
  • 1/2 dl ljóst síróp
  • 125 g smjör
  • 1/2 dl rjómi

Ofninn er stilltur á 150 gráður undir- og yfirhita. Rabarbaranum og perunum er dreift í smurt form og 1 msk af sykri og kartöflumjöli er stráð yfir. Smjörið er brætt í potti ásamt rjómanum. Þurrefnunum er blandað saman í skál ásamt sírópinu og brædda smjörinu og rjómanum er svo hrært út í. Blöndunni er því næst dreift jafnt yfir rabarbarann og perurnar. Bakað í ofni við 150 gráður í ca. 40 – 50 mínútur. Bakan er borin fram heit með þeyttum rjóma eða ís.

IMG_1948