Þessar vikur sem við höfum dvalist í Michigan hefur ekki farið framhjá okkur að mikið er ræktað af maískorni hér í sveitunum. Gott framboð er af ferskum maísstönglum sem þarf bara að taka úr hýðinu og sjóða í örfáar mínútur og þá er komið á borð ljúffengt meðlæti. Það er með ólíkindum hversu góður maísinn er svona nýr og ferskur, hann er ákaflega sætur og bragðgóður, mjög frábrugðinn frosna maísnum sem við fáum aðallega heima á Íslandi svo ekki sé talað um úr dós.
Það er þó stundum hægt að fá ferskan maís heima á Íslandi og þá mæli ég eindregið með að þið prófið þetta maís- og avókadósalsa sem er afar gott meðlæti með til dæmis öllum grillmat. Í þessari uppskrift er ferski maísinn notaður óeldaður og þá eru maískornin skemmtilega stökk og sæt. Ég held að það væri líka óskaplega gott að nota þetta salsa með góðum flögum líkt og Tostitos Scoops.
Uppskrift:
- 1 stór, þroskaður avókadó, skorinn í bita
- 2-3 msk safi af límónum (lime)
- 2 stórir tómatar (blautasta innvolsið fjarlægt), skornir í bita
- 2 ferskir maísstönglar
- ca. 3 vorlaukar, hvíti og græni hlutinn saxað fremur smátt (hægt að skipta út fyrir ca. 1/4 rauðlauk, smátt söxuðum)
- ca. 1/4 – 1/2 rauður chili, fræhreinsaður og saxaður mjög smátt
- handfylli ferskt kóríander, saxað smátt
- salt og grófmalaður svartur pipar
Avókadóbitarnir settir í skál og límónusafanum hellt yfir. Þá er tómötunum bætt út í. Hýðið er fjarlægt af maísstönglunum og kornið skorið af stönglunum. Best er að leggja stöngulinn á skurðarbretti og renna beittum hníf meðfram öllum hliðum stöngulsins. Maísinum er því næst bætt út í skálina. Að síðustu er chili bætt út í ásamt kóríander. Smakkað til með salti, pipar og meiri límónusafa ef með þarf.
Eldhússögur 
Þetta salsa er svo klikkað gott 😉 Fékk ferskann maís í Bónus og Var með þetta með grillmat í gær og þvílík snilld svo ferskt og gott og auðvitað voru allir sáttir alveg niður í 2ára. Svo kláruðum við restina með Tostios scoopm kvöldið og það var ótrúlega gott líka. Gerðum einnig grillaðan ananas með cajun kryddi og það var líka alveg æðislegt og maðurinn minn sem „borðar ekki “ ananas en prófar samt allt fannst hann virkilega góður 🙂
Takk fyrir okkur
Gerði þessa salsa aftur og var núna með gular baunir og kom mjög vel út og passaði þvílíkt vel með doritos kjúklingi. Ég og vinkona mín vorum með matarklúbb og allir rosalega ánægðir.
Frábært! Ég þarf að prófa að búa það til úr gulum baunum, ég held einmitt mikið upp á þetta salsa. 🙂
Er alveg ómögulegt að prófa þetta með maís úr dós ef maður kemst ekki yfir ferskan maís? 🙂
Nei það er ekkert ómögulegt, endilega gerðu það! 🙂
Mikið svakalega er þetta gott með grillmat. – held se mikilvægt að hafa einmitt ferskan mais
Er ofsalega gott- mæli eindregið með þessu. Mjög gott einmitt með ferskan mais þvi hann er sma „crispy“