Ég er veik fyrir kjúklingi og ég er veik fyrir sætum kartöflum. Best finnst mér þegar þessi tvö hráefni eru tvinnuð saman! Þessi kjúklingaréttur með sætum kartöflum er ekki bara ljúffengur heldur líka einstaklega fjlótlegur og einfaldur að útbúa. Ég bjó þennan rétt til í fyrrakvöld en sjálf átti ég að vera mætt á námskeið hjá SAMFOK á kvöldmatartíma þannig að ég rétt náði að henda réttinum inn í ofn áður en ég rauk út. Ég vonaði innilega að fjölskyldan myndi ekki klára matinn! Mér varð að ósk minni og gat hitað mér upp afganginn í hádeginu daginn eftir, dásamlega gott! Ég skildi Elfar og Ósk eftir með það verkefni að taka myndir af matnum. Þau voru nú ekkert himinlifandi með það verkefni og voru áhyggjufull yfir því að ég myndi ekki vera sátt við myndirnar. Elfar tók verkið að sér, vandaði sig mikið við að raða matnum fallega á diskinn og tók þessar fínu myndir! Ég kannski fer að láta hann um myndartökuna öðru hvoru svo það sé ekki alltaf ég sem fæ kaldan mat vegna matar-myndartökunnar! 🙂
Uppskrift.
- 1 kíló kjúklingabringur
- 1 msk smjör
- salt og pipar
- kjúklingakrydd
- 1 1/2 – 2 límónur (lime), safi og börkur
- ca 500 g sætar kartöflur
- 4 dl sýrður rjómi
- 2 msk ferskt engifer, fínrifið
- 1/2 tsk cayenne pipar (meira fyrir þá sem vilja sterkari rétt)
Ofninn stilltur á 225 gráður, undir- og yfirhita. Kjúklingabringurnar skornar í meðalstóra bita, kryddaðar með salti, pipar og kjúklingakryddi. Kjúklingabitarnir eru því næst steiktir á pönnu upp úr smjöri þar til þeir hafa tekið dálítinn lit en eru ekki steiktir í gegn. Þá eru þeir lagðir í eldfast mót og límónusafanum hellt fyrir bitana. Sætu kartöflurnar eru afhýddar og rifnar með fremu grófu rifjárni. Börkurinn af límónunum er rifinn fínt og honum blandað saman við rifnu sætu kartöflurnar, rifið engifer, sýrðan rjóma og cayenne pipar auk salts. Sætu kartöflublöndunni er dreift yfir kjúklingabitana og rétturinn eldaður í ofni við 225 gráður í 20-30 mínútur eða þar til kjúklingurinn er eldaður í gegn.
Vá hvað þetta er girnó … verð að prófa þennan 😉
Girnilegt, ætla að prófa þennan á morgun 🙂
Úrvalsgóður!
Gaman að þér líkaði rétturinn Björn! 🙂
Prófaði þennan í gærkvöldi og get svo sannarlega mælt með honum. Hann var æði.
Frábært að heyra Ingibjörg! 🙂
Þessi réttur var eldaður í kvöld og var mjög góður að allra áliti.Takk kærlega.;)
Gaman að heyra það Sveinrún, takk fyrir kveðjuna! 🙂