Þessi uppskrift af kryddköku er komin frá ömmu minni, hún kallar kökuna reyndar kryddjólaköku. Ömmu er nú farið að bregða fyrir oft á blogginu mínu sem er eiginlega skrítið í ljósi þess að hún heldur því fram að sér þyki agalega leiðinlegt að elda mat og baka! En það hefur þó ekki komið í veg fyrir að hún eldi mat upp á hvern einasta dag og baki kökur auk þess sem hún vann meira að segja í eldhúsi í mörg ár. Amma segist samt ekkert skilja í því að ég hafi gaman að því að laga mat, sá áhugi sé allavega ekki frá sér kominn! 🙂 En amma er með á hreinu gamlar og góðar íslenskar uppskriftir eins og þessa kryddköku. Þetta er feikigóð kaka sem er afar einfalt að búa til. Amma setur yfirleitt í hana rúsínur en ég sleppi þeim, krakkarnir vilja þær ekki og mér finnst kakan líka betri án rúsína. Þessi uppskrift dugar í tvö jólakökuform sem eru 25 x 11 cm.
Uppskrift:
- 500 gr hveiti
- 150 gr púðursykur
- 150 gr sykur
- 3 egg
- 250 gr smjör, mjúkt (við stofuhita)
- 2 tsk matarsódi
- 2 tsk kanill
- 2 tsk negull
- 2 tsk vanillusykur
- 2 dl mjólk eða súrmjólk
Aðferð:
Ofninn stilltur 180 gráður. Allt hráefnið sett saman í skál og hrært saman. Deiginu skipt í tvö smurð jólakökuform, 25 x 11 cm, og þau bökuð við 180 gráður í ca. 45 mínútur.
Eldhússögur 
Þessa ætla ég að prufa á morgun, með laugardagskaffinu,
Gaman að heyra, vonandi líkar þér vel! 🙂
Var strax ákveðin í að prófa þessa þegar ég sá hana hjá þér. Tækifærið kom í dag og sé sko ekki eftir því. Er nokkuð viss um að hún verið bökuð reglulega á heimilinu hér eftir. Takk fyrir góða uppskrift.
Frábært Lilja, það gleður mig að heyra að ykkur líkaði uppskriftin! 🙂 Takk fyrir kveðjuna!
Þessi uppskrift er inni í ofni núna. Ilmar vel húsið
Hljómar vel Jónas! 🙂
Þessi var bökuð í morgun og var tekin með í nesti í dagsferð í dag. Hún smakkast alveg rosalega vel 😉
Hæhæ
Er að baka þessa kryddköku. En er að bera saman við uppskrift drá móður minni frá því í húsmæðrarskólanum og þar setur hún Kakó en ég sé það ekki á listanum þínum! Er það ekki sem gefur litinn í kökuna?
Liturinn kemur frá púðursykrinum og kryddunum, ekkert kakó í þessari uppskrift! 🙂
Okey takk fyrir og fyrir frábæra síður sem er mikið notuð, takk.
Gaman að heyra, takk fyrir kveðjuna! 🙂
Rosalega góð kryddkaka!