Pavlova með marsípani
Þann 4. júlí varð Vilhjálmur Jón okkar 13 ára! Eins og lög gera ráð fyrir á okkar heimili er afmælisbarnið (táningurinn!) vakið með köku, pökkum og söng og fær síðan að velja kvöldmatinn.
Val Vilhjálms á mat kom ekki á óvart, hann vildi fara á Hamborgarafabrikkuna enda mikill áhugamaður um hamborgara. Ég verð að segja að ég var ekkert ægilega spennt yfir mínum hamborgara, hann sló allavega ekki út steikarborgaranum (+ bearnaisesósu!) á Búllunni!
Ég spurði Vilhjálm hverjar væru uppáhaldskökurnar hans og hann svaraði marsípantertur og marengstertur. Ég fór því að skoða hinar ýmsu uppskriftir og datt á tilviljun niður á Pavlovu með marsípani, snilld – uppáhaldsterturnar samankomnar í einni! Þetta varð innblásturinn af marsípan Pavlovunni sem Vilhjálmur var vakinn með á afmælisdaginn. Það er óhætt að segja að þessi terta hafi slegið í gegn. Allri fjölskyldunni auk þeirra gesta og gangandi sem smökkuðu á tertunni fannst hún rosalega góð. Þeir sem eru hrifnir af marsípani mega ekki láta þessa tertu fram hjá sér fara! 🙂
Uppskrift:
- 4 stk eggjahvítur (stór egg)
- 250 g flórsykur
- 1 tsk hvítvíns edik
- 160 g Marsípan (Odense ren rå marcipan)
Fylling:
- 1/2 líter rjómi, þeyttur
- Fersk ber eða ávextir eftir smekk (t.d. jarðaber, hindber, bláber, blæjuber, rifsber)
- Rifið suðusúkkulaði og örlítið af flórsykri dreift yfir berin
Ofninn stilltur á 150 gráður undir- og yfir hita. Eggjahvítur þeyttar á miðlungshraða þar til þær eru vel slegnar, þá er hraðinn aukinn og flórsykrinum blandað smátt og smátt saman við. Hvítvínsediki bætt út í. Þegar eggjahvíturnar eru orðnar stífþeyttar er marsípanið rifið með grófu rifjárni út í blandað mjög varlega saman við með sleikju. Best er að rífa lítið í einu og blanda marsípaninu þannig smátt og smátt saman við marengsinn annars er hætta að á að það fari í kekki.
Ca. 20 cm hringur teiknaður á bökunarpappír sem settur er á ofnplötu. Marengsinum er dreift á flötinn og kantarnir látnir vera aðeins hærri en miðjan. Bakað í miðjum ofni í um það bil 45 mínútur, þá er slökkt á ofninum og marengsinn látinn kólna í ofninum.
Áður en kakan er borin fram er settur þeyttur rjómi yfir marengsinn og yfir rjómann er dreift berjum, rifnu suðusúkkulaði og að lokum er örlitlum flórsykri sigtað yfir berin.
Eldhússögur 
hljómar mjög spennandi – verð að prófa
umm ég verð að prófa þessa
Prófaði þessa í kvöld…algjör snilld…mæli með henni!
Þessa verð ég að prófa!! Dásamlega girnileg 🙂
Mig langar samt líka til að spyrja þig hvaðan leirtauið þitt er?? þetta er allt svo fallegt, diskarnir og bollarnir eru algjörlega to die for!! Má spyrja hvar þetta er keypt?
Takk Helga! 🙂 Já þetta stell er svo dásamlega fallegt … ég gæti sko borðað það líka! 🙂 Það fæst hjá http://www.cupcompany.is. Þetta er danskt stell sem heitir Green gate. Öll munstrin og allir litirnir eru svo fallegir, ómögulegt að velja þannig að ég á bara blöndu af öllu! 🙂
Sammála með að það sé svo fallegt að mig langar næstum að borða það líka 🙂 Takk annars kærlega fyrir alveg rosalega girnilega og fallega síðu 🙂
langar að vita með eitt, setur þú rjómann á pavlóuna deginum á undan eins og með marens?_
Sæl Heiða Kristín. Nei, þegar ég geri Pavolvu þá set ég rjómann á stuttu áður en tertan er borin fram. Gangi þér vel! 🙂
já ok, ég gerði pavlóuna frá þér um daginn en hún var hörð þegar við borðuðum hana, ég setti rjómann einmitt þá rétt á áður en ég bar hana fram, hún á kannksi bara að vera frekar hörð eða frekar kannski ekki alveg eins mjúk og marens
Ertu að meina þessa Pavlovu eða hefðbundna Pavlovu? Hvorugar eiga að vera harðar í gegn. Þessi hefðbundna er stökk að utan og mjúk í miðjunni. Ef þín hefur verið stökk þá getur verið að hún hafi verið of stór, þ.e. þurft að vera minni hringur þannig að hún verði hærri og þykkari. Þar með ætti hún að verða mýkri í miðjunni. Það er aðeins önnur áferð á Marsípan-Pavlovunni. Hún verður stökk að utan en mjúk í miðjunni vegna marsípansins, eða kannski meira svona pínulítið karamellukennd.
Má ég spyrja að einu varðandi pavlovurnar þínar, núna eru þær allar flatar líkt og maregns er en ekki stórar og bústnar líkt og venjulegar pavlovur er einhver ástæða fyrir því ?