Hægeldaður lambahryggur í jólaöli


Hægeldaður lambahryggur í jólaöliÞegar ég var barn þá skildi ég ekkert í því að lambalæri og lambahryggur væri álitið sunnudagsmatur því mér fannst það alls ekki gott. Núna finnst mér lambakjöt einn sá besti matur sem ég fæ og lambahryggur er orðinn einn af mínum uppáhaldsréttum. Mér finnst best að hægelda hrygginn og hef gaman að prófa mig áfram með mismunandi sósur. Að þessu sinni notaði ég það sem hendi var næst og hægeldaði hrygginn í jólaöli. Það kom frábærlega vel út og gerði sósuna svo góða. Í stað þess að nota jólaöl er líka hægt að nota pilsner.

Með hryggnum steikti ég ferskt grænmeti. Með því að steikja grænmetið upp úr smjöri og nota grænmetiskraft, sem gefur seltu og krydd, þá verður það algjört sælgæti. Ég prófaði líka að steikja gulrætur upp úr brúnuðu smjöri og maukaði þær síðan, dásamlega gott. Að auki var ég með ofnbakaðar kartöflur og sætarkartöflur sem meðlæti. Mér finnst mjög gott að bræða saman smjör og ólífuolíu í potti og hella yfir kartöflurnar ásamt góðu kryddi áður en þær fara inn í ofn, það gefur svo góða áferð og bragð.

IMG_0946 Þessi máltíð var svo góð að þetta verður nýársmaturinn hjá okkur að þessu sinni, ekki slæmt að byrja nýtt og spennandi ár á slíkum herramannsmat! 🙂

Uppskrift, lambahryggur fyrir ca. 6:

  • 1 lambahryggur (3 kíló)
  • 400 ml jólaöl – ég notaði tilbúna blöndu af Malti og Appelsíni (eða pilsner)
  • 1 hvítlaukur (ég notaði solo hvítlauk), afhýddur og skorinn í báta
  • ca. 1 msk hunangs-dijon sinnep
  • kryddið „Bezt á lambið“
  • 2-3 dl rjómi
  • ca. 2 msk hveiti
  • ca. 1/2 -1 msk sojasósa
  • ca. 1/2 msk rifsberjahlaup
  • 1-2 tsk nautakraftur
  • salt og pipar
  • sósujafnari + sósulitur við þörfum

IMG_0936

Ofninn er hitaður í 100 gráður við undir og yfirhita. Lambahryggurinn er snyrtur ef með þarf, skolaður og þerraður. Því næst er hnífsoddi stungið hér og þar í hrygginn og 10-12 hvítlauksrifum stungið ofan í raufarnar. Þá er hryggurinn smurður með þunnu lagi af dijonsinnepi og því næst kryddaður vel með kryddinu „Bezt á hrygginn“. Nú er hryggurinn settur ofan í ofnpott og jólaölinu hellt ofan í pottinn. Lokið er sett á ofnpottinn og hryggurinn eldaður við 100 gráður í ca 4 – 5 tíma (fer eftir þykkt hryggsins og hversu mikið steiktan maður kýs að hafa hann). Best er að nota kjöthitamæli og stinga honum þar sem vöðvinn er þykkastur. Hryggurinn er tilbúinn þegar hitinn er komin í ca. 65-70 gráður, við 65 gráður er kjötið enn fremur bleikt. Þegar ca. 10 mínútur eru eftir af tímanum er ofnpotturinn tekinn út úr ofninum, vökvanum hellt af í skál. Ofninn er hitaður í 220 gráður á grillstillingu. Hryggurinn er settur aftur ofan í ofnpottinn án loks og hann hitaður í ofninum í ca. 6-8 mínútur (áfram á grillstillingu og sama hita) eða þar til puran verður dökkbrún – fylgist vel með hryggnum. Þá er hryggurinn tekinn út og leyft að jafna sig áður en hann er skorinn niður. Á meðan þessu stendur er sósan útbúin. IMG_0942

Sósa: Vökvinn er sigtaður ofan í pott og látinn standa í smástund á kaldri hellu þannig að fitan fljóti upp á yfirborðið. Þá er hún veidd af og pískuð saman við hveiti með gaffli þar til smjörbollan verður passlega þykk. Suðan er látin koma upp á soðinu og smjörbollunni bætt út í og hrært vel á meðan. Því næst er rjómanum bætt út í og sósan smökkuð til með sojasósu, rifsberjahlaupi, nautakrafti og kryddum. Ef sósan er of þunn er notaður sósujafnari og sósan dekkt við þörfum með sósulit.

IMG_0965

Smjörsteikt grænmeti: 

  • 1 brokkolíhaus, skorinn í bita
  • 250 g sveppir, skornir í beta
  • 1 rauð paprika, skorin í bita
  • 1 lítill rauðlaukur, skorin í sneiðar
  • 2-3 msk smjör
  • 1-2 tsk grænmetiskraftur (ég notaði frá Oscars)
  • salt og pipar

Smjörið er brætt á pönnu og grænmetið steikt í nokkrar mínútur þar til það er hæfilega eldað. Kryddað með grænmetiskrafti, salti og pipar.

IMG_0939

Gulrótarmauk í brúnuðu smjöri:

  • 300 g gulrætur
  • 80 g smjör
  • salt og pipar

IMG_0941

Gulræturnar eru skornar í bita. Smjörið er brætt í potti og gulræturnar látnar malla í smjörinu í um það bil 15 mínútur við meðalhita og hrært öðru hvoru í pottinum. Þegar smjörið hefur brúnast og gulræturnar orðnar dökkar eru þær maukaðar og kryddaðar með salti og pipar.
IMG_0957

Sævar Már vínþjónn mælir með rauðvíninu Campo Viejo Gran Reserva með þessari máltíð. Lýsingin á víninu er eftirfarandi: Dökkkirsuberjarautt. Þétt meðalfylling, ósætt, fersk sýra, miðlungs tannín. Skógarber, plóma, krydd, jörð, eik.rioja

 

Auglýsingar

5 hugrenningar um “Hægeldaður lambahryggur í jólaöli

  1. Óskaði mér þessa máltíð sem afmælismat og eldaði maðurinn minn þetta í gær fyrir okkur fjölskylduna.
    Keypti dós af jólaöli áður en það hvarf úr búðunum. Er því buin að hlakka svo til að fá þessa dýrindis máltíð.
    Og þetta var alveg æðislegt heppnaðist svo vel og grænmetið, sósan og kartöflurnar voru fullkomnar með plús þessar gulrætur voru súper góðar.
    Svo vorum við með bollur í eftirétt, alveg yndisleg afmælismáltíð 🙂

    • En æðslegt að heyra að þið hafið verið ánægð og þú sniðug að geyma jólaölið! 🙂 Innilega til hamingju með afmælið! 🙂

  2. Vaknaði í morgun með löngun í lambahrygg, enda ár og dagur síðan ég borðaði það síðast. Datt niður á þessa uppskrift á netinu og fylgdi henni utan gulræturnar sem ég gleymdi að kaupa. Þetta reyndist algerlega frábært og sósan var einstaklega góð, algert lostæti. Allur maturinn og meðlætið hvarf af borðinu eins og dögg fyrir sólu meira að segja karöflurnar (notaði rauðar íslenskar) sem dæturnar hafa ekki verið alltof hrifnar af til þessa. Þakka fyrir þessa frábæru uppskrift.

  3. Bakvísun: Tillögur að páskamáltíðum | Eldhússögur

Færðu inn athugasemd

Skráðu umbeðnar upplýsingar að neðan eða smelltu á smámynd til að skrá þig inn:

WordPress.com Logo

You are commenting using your WordPress.com account. Log Out / Breyta )

Twitter picture

You are commenting using your Twitter account. Log Out / Breyta )

Facebook photo

You are commenting using your Facebook account. Log Out / Breyta )

Google+ photo

You are commenting using your Google+ account. Log Out / Breyta )

Tengist við %s